Kua Religion Bo Tin Ku Skohe?

‘DIFERENTE religion ta simplemente diferente kaminda ku ta hiba n’e mesun meta. Al fin i al kabo, ta un Dios so tin, no ta bèrdat?’ Hopi hende ta pensa asina. Pa nan, e kos importante ta pa bo afiliá na un religion, pero realmente no ta importá kua religion bo ta skohe, basta bo ta den un.

Na promé instante, e argumentu aki por parse rasonabel, ya ku ta bèrdat ku ta un Dios so tin, e Todopoderoso. (Isaias 44:6; Juan 17:3; 1 Korintionan 8:5, 6) Sin embargo, nos no por ignorá e diferensianan opvio—asta kontradikshonnan—ku tin entre e hopi gruponan religioso ku ta bisa ku nan ta sirbi e Dios berdadero. Tin diferensianan grandi den nan kustumbernan, nan kreensianan, nan siñansanan i nan rekisitonan. E diferensianan ta asina grandi ku esnan ku ta pertenesé na un religion òf grupo ta haña ku ta difísil pa komprondé òf aseptá loke e otronan ta siña òf kere.

Di otro banda, Hesus a bisa: “Dios ta Spiritu, i esnan ku ta ador’é mester adorá den spiritu i bèrdat.” (Juan 4:24) Adorá Dios den bèrdat ta laga espasio pa un variedat di idea kontradiktorio tokante ken Dios ta, kiko ta su propósito, i kon e ke pa hende ador’é? Ta lógiko pa kere ku no ta importá e Dios Todopoderoso kon nos ta ador’é?

Kristiannan Berdadero di e Tempu Ayá i Awor

De bes en kuando e kristiannan di promé siglo tabatin nan diferensianan di opinion. Por ehèmpel, papiando di e kristiannan na Korinto, apòstel Pablo a bisa: “Di e hendenan di kas di Cloé mi a tende, mi rumannan, ku tin pleitu entre boso. Awor esaki ta loke mi kier men, ku kada un di boso ta bisa: ‘Ami ta disipel di Pablo,’ i ‘Ami di Apolos,’ i ‘Ami di Sefas,’ i ‘Ami di Kristu.’”—1 Korintionan 1:11, 12.

Pablo a mira e diferensianan di opinion aki komo di menor importansia? Kada kristian tabata simplemente siguiendo su mes kaminda di salbashon? Sigur ku nò! Pablo a spièrta nan: “Mi ta ekshortá boso, rumannan, pa medio di e nòmber di nos Señor Hesukristu, pa boso tur papia e mesun kos, i pa no tin divishon entre boso, ma pa boso ta perfektamente uní den e mesun mente i den e mesun opinion.”—1 Korintionan 1:10.

Klaru ku unidat di kreensia no mester ta algu fòrsá. E ta ser lográ solamente ora kada persona investigá asuntunan profundamente i yega n’e mesun konklushonnan i aseptá  esakinan. Pues, un estudio personal di e Palabra di Dios i un deseo sinsero pa apliká loke ta ser siñá ta pasonan esensial pa yega na e klase di unidat ku Pablo a papia di dje. E unidat ei ta eksistí? Manera nos a mira, pa hopi tempu Dios a trata ku su pueblo komo grupo. Ta posibel pa identifiká e grupo ei awe?

E Benefisionan di Uni Bo Mes ku e Grupo Aprobá pa Dios

E salmista David a puntra un biaha: “O SEÑOR, ken por biba den bo tabernakel? Ken por biba riba bo seru santu?” Esei sigur ta un pregunta ku mester pone bo pensa seriamente. David a duna e kontesta: “Esun ku ta kana den rektitut i ta hasi hustisia, i ta papia bèrdat den su kurason.” (Salmo 15:1, 2) Un komprondementu eksakto di Beibel lo yuda bo identifiká e religion ku ta kumpli ku e rekisitonan divino ei. Anto dor di uni bo mes ku e grupo ei, bo por disfrutá di kompañerismo edifikante ku hende ku ta adorá Dios den unidat i “den spiritu i bèrdat.”

Testigunan di Yehova a demostrá ku ta posibel pa logra unidat di kreensia i akshon asta den e mundu desuní djawe. Den nan filanan tin diferente persona ku un tempu tabata miembro di hopi religion i grupo étniko. Tin Testigunan ku un tempu tabata agnóstiko òf ateo. Otronan simplemente no tabata pensa mashá riba religion. For di e diversidat di religion, kultura i filosofia aki a sali individuonan ku awor ta gosa di un unidat religioso ku bo no ta mira otro kaminda den e mundu djawe.

E base p’e unidat ei ta Beibel, e Palabra di Dios. Klaru ku Testigunan di Yehova sa ku nan no por dikta riba otro hende kiko nan tin ku hasi òf laga. Pero nan ta kontentu sí ku nan tin e privilegio di por animá otro hende pa siña Beibel pa asina nan por basa nan eskoho di religion riba un fundeshi sólido. Den e manera aki, hopi hende mas por gosa di e benefisionan ku adorá Dios “den spiritu i bèrdat” ta trese kuné.

Awe, e peliger di bira víktima di influensianan perhudisial i tentashon ta grandi. P’esei ta masha importante pa skohe bon asosiashon. Beibel ta bisa ku “esun ku anda ku hende sabí lo ta sabí” i ku “mal kompania ta daña bon kustumber.” (Proverbionan 13:20; 1 Korintionan 15:33) Ora nos ta den kompania di e berdadero adoradónan di Dios, esei lo ta un protekshon pa nos. P’esei, Beibel ta rekordá nos: “Laga nos konsiderá kon pa stimulá otro pa stima i hasi bon obra, i no laga di asistí na nos mes reunionnan, manera ta kustumber di algun, ma enkurashá otro; i muchu mas ainda, ora boso ta mira ku e dia ta yegando serka.” (Hebreonan 10:24, 25) Ta un bendishon ora berdadero amigu, rumannan spiritual, ta yuda otro amorosamente i ta kumpli ku nan responsabilidatnan dilanti Dios!

Ottmar ta konfirmá e punto di bista aki. El a lanta den un famia katóliko na Alemania, pero a stòp di bai misa. E ta splika: “Ki ora ku mi a bai misa, mi tabata sali mes bashí ku mi a drenta.” Ma e no a pèrdè su fe den Dios. Despues el a haña kontakto ku Testigunan di Yehova i a keda konvensí ku nan ta e berdadero adoradónan di Dios. El a mira e nesesidat pa asosiá ku nan. Awor e ta bisa: “Komo un persona aktivo den un organisashon mundial, mi ta disfrutá di pas mental i di kurason. Pokopoko pero sigur mi ta hañando yudansa pa mi por tin un konosementu mas eksakto di Beibel. Pa mi personalmente, esei ta algu di gran balor.”

Un Invitashon na Esnan Ku Ta Buska e Bèrdat

Hende ku tin e mesun punto di bista i ku ta traha estrechamente ku otro komo grupo, por kumpli ku un tarea muchu mas efikas ku personanan ku ta traha independiente di otro. Por ehèmpel, ora Hesus a despedí di su disipelnan, el a duna nan e siguiente instrukshon: “P’esei, bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli  ku tur loke mi a ordená boso.” (Mateo 28:19, 20) Kon nan lo por a kumpli satisfaktoriamente ku un enkargo asina si no tabatin guia ni organisashon? Kon un persona lo por obedesé e mandato bíbliko aki si e ta purba sirbi Dios riba su mes?

Aña pasá, Testigunan di Yehova rònt mundu a repartí 91.933.280 buki i foyeto, huntu ku 697.603.247 revista basá riba Beibel, alkansando asina miónes di hende den 235 pais ku e mensahe di e Palabra di Dios. Esei ta un prueba palpabel ku e esfuerso uní di un grupo bon organisá ta logra hopi mas ku e esfuerso di kada hende riba nan mes!

Ademas di repartí literatura bíbliko, Testigunan di Yehova ta kondusí studio di Beibel grátis pa yuda hende haña un komprondementu profundo di e rekisitonan di Dios. Aña pasá nan a kondusí un promedio di 5.726.509 studio di Beibel tur siman ku un òf mas hende. E siñansa bíbliko aki a yuda miónes di hende haña un base sólido riba kua nan por basa nan eskoho di religion. Nos ta invitá bo pa bo siña kiko ta e rekisitonan divino ku Beibel ta trese dilanti. E ora ei bo tambe por hasi bo eskoho.—Efesionan 4:13; Filipensenan 1:9; 1 Timoteo 6:20; 2 Pedro 3:18.

Si bo ke agradá Dios, ta vital pa bo pertenesé na un religion—pero no na kualke grupo òf organisashon religioso. Bo tin ku basa bo eskoho di religion riba konosementu eksakto di Beibel, no riba doktrina sin base òf loke bo a tende otro hende bisa di Beibel. (Proverbionan 16:25) Siña kiko ta e rekisitonan p’e religion berdadero. Kompará nan ku bo mes kreensianan i despues hasi bo eskoho.—Deuteronomio 30:19.

[Plachinan na página 7]

Testigunan di Yehova ta disfrutá di unidat den un mundu desuní