Bo Orashonnan Por Hasi un Diferensia?

KUA di nos no a yega di enfrentá un situashon serio sin ku nos por a hasi nada al respekto? Beibel ta mustra ku apòstel Pablo tabata sa ku orashon por tin efekto riba e resultado final di e situashon serio ei.

Tempu ku Pablo a ser enkarselá inhustamente na Roma, el a pidi su rumannan den fe resa p’e, anto a agregá: “Mi ta roga boso mas ainda pa hasi esaki, pa mi por wòrdu debolbé na boso mas lihé.” (Hebreonan 13:18, 19) Na un otro okashon, Pablo a ekspresá su konfiansa ku Dios lo a kontestá orashonnan ku nan lo a hasi pa el a sali liber mas lihé. (Filemon 22) No a dura muchu ku Pablo a sali liber i a reanudá su trabou komo misionero.

Pero orashon por realmente kambia e resultado final di bo problemanan? Tal bes. Kòrda sí ku orashon no ta djis un formalidat religioso. De echo, esei ta e manera ku nos ta komuniká ku nos Tata amoroso i poderoso ku ta den shelu. Nos mester sinti nos liber pa ta masha spesífiko den nos orashonnan, anto spera ku pasenshi pa mira kon Yehova ta kontestá.

Kisas Dios no ta kontestá tur orashon direktamente, i no ta semper e ta kontestá den e forma òf n’e tempu ku nos ta spera. Por ehèmpel, Pablo a hasi orashon diferente biaha tokante su “sumpiña den karni.” Sea kual sea e problema, Dios no a elimin’é, pero el a konsolá Pablo ku e palabranan fortalesedor: “Mi grasia ta basta pa bo, pasobra mi poder ta wòrdu hasí perfekto den debilidat.”—2 Korintionan 12:7-9.

Nos tambe por tin e konfiansa ku asta si Dios no libra nos di sierto problema, e por “proveé salida . . . pa [nos] por soportá.” (1 Korintionan 10:13) I pronto Dios lo aliviá humanidat di tur sufrimentu. Miéntras tantu, si nos akudí na Esun “ku ta skucha orashon,” esei por hasi un diferensia.—Salmo 65:2.