Kultivá Kristu Su Punto di Bista di Grandesa

“Ken ku kier bira grandi entre boso lo ta boso sirbidó.” —Mateo 20:26.

1. Kiko ta mundu su punto di bista di grandesa?

SERKA di e antiguo stat egipsio Tebas (awe Karnak), ku ta keda un 500 kilometer zùit di Kairo, tin un estatua di 18 meter haltu di Fárao Amenhotep III. Bo no por wak e imágen inmenso ei sin sinti bo chikiritiku. Sin duda, nan a trah’é pa inspirá hende pa adorá e Fárao. P’esei e monumento aki ta un bon símbolo di mundu su punto di bista di grandesa: hasi bo mes parse mas grandi i mas importante posibel i laga otro hende sinti nan insignifikante.

2. Ki ehèmpel Hesus a pone pa su siguidónan, i kiko nos tin ku puntra nos mes?

² Wak e kontraste entre e punto di bista aki di grandesa ku loke Hesukristu a siña hende. Ounke Hesus tabata e “Señor i Maestro” di su siguidónan, el a siña nan ku bo tin grandesa ora bo ta sirbi otro hende. E último dia di su bida riba tera, Hesus a demostrá su disipelnan kiko e tabata ke men ku esei dor di laba nan pia. Esei sigur tabata un akto humilde di sirbi otro hende! (Juan 13:4, 5, 14) Kiko bo ta gusta mas tantu: sirbi hende òf laga hende sirbi bo?  Kristu su ehèmpel ta lanta den bo e deseo pa ta humilde meskos kuné? Si ta asina, laga nos analisá Kristu su punto di bista di grandesa na kontraste ku e punto di bista komun ku tin den mundu.

Evitá Mundu Su Punto di Bista di Grandesa

3. Ki ehèmpelnan bíbliko ta mustra e resultado tristu di esnan ku ta anhelá di haña gloria serka hende?

³ Tin hopi ehèmpel bíbliko ku ta mustra ku mundu su punto di bista di grandesa ta hiba na puru frakaso. Pensa riba e hòmber poderoso Haman, kende tabata un persona prominente den e korte real di Pèrsia den tempu di Ester ku Mardokeo. Haman su anhelo intenso pa gloria a hiba na su humiashon i morto. (Ester 3:5; 6:10-12; 7:9, 10) Konsiderá tambe e kaso di e rei orguyoso Nabukodonosor, kende a bira loko nèt na kulminashon di su poder. El a ekspresá su idea trosí di grandesa den e siguiente palabranan: “Esaki no ta e gran Babilonia ku ami mes a traha komo un residensia real ku e forsa di mi poder i pa e gloria di mi mahestat?” (Daniel 4:30) Tambe tin e kaso di Herodes Agripa I, ku en bes di duna gloria na Dios, orguyosamente a aseptá gloria inmeresí pa su mes. “Bichi a kom’é i el a muri.” (Echonan 12:21-23) Loke a hiba tur e hòmbernan aki na nan kaida humiante ta ku nan no a komprondé Yehova su punto di bista di grandesa.

4. Ken ta tras di mundu su spiritu orguyoso?

⁴ Ta bon si nos ke usa nos bida den un manera ku ta laga nos haña onor i rèspèt. Sin embargo Diabel ta probechá di e deseo aki pa fomentá un spiritu orguyoso ku ta reflehá su propio ambishonnan. (Mateo 4:8, 9) No lubidá nunka ku t’e ta “e dios di e mundu aki,” i ku e ta desididu pa promové su manera di pensa aki riba tera. (2 Korintionan 4:4; Efesionan 2:2; Revelashon 12:9) Komo ku kristiannan sa ta for di ken mundu su punto di bista di grandesa ta bin, ta p’esei nan ta evitá e manera di pensa ei.

5. Logro, fama i rikesa ta garantisá satisfakshon duradero? Splika.

⁵ Un idea ku Diabel ta promové ta ku un nòmber famoso den mundu, elogio serka hende i saku yen di plaka outomátikamente ta hiba na un bida felis. Pero esei ta bèrdat? Akaso logro, fama i rikesa ta garantisá un bida yen di satisfakshon? Beibel ta spièrta nos pa no laga tal manera di pensa gaña nos. Rei sabí Salomon a skirbi: “Mi a mira ku tur trabou i tur logro ta resultado di kompetensia entre un hende i su próhimo. Esaki tambe ta banidat i korementu tras di bientu.” (Eklesiastés 4:4) Hopi hende ku a dediká henter nan bida pa alkansá prominensia òf rikesa den mundu por konfirmá ku e konseho bíbliko inspirá ei ta bèrdat. Un ehèmpel di esei ta un hòmber ku a yuda diseñá, traha i tèst e nave espasial ku a hiba hende luna. El a reflekshoná i bisa: “Mi a traha duru i a bira hopi bon den loke mi tabata hasi. Tòg esei tabata enbano, di ningun balor, pasobra e no a yuda mi haña felisidat duradero ni pas mental.” * Mundu su konsepto di grandesa, sea ta riba tereno di negoshi, deporte òf entretenimentu, no ta garantisá satisfakshon duradero.

 Sirbi Otro Hende Motivá pa Amor Ta Loke Ta Hasi Bo Grandi

6. Kiko ta mustra ku Santiago ku Juan tabatin un punto di bista robes di grandesa?

⁶ Un suseso den bida di Hesus a revelá loke berdadero grandesa ta enserá. Hesus i su disipelnan tabata bayendo Yerusalèm pa e Pasku hudiu di aña 33 di nos era. Na kaminda, dos primu di Hesus, Santiago ku Juan, a demostrá un punto di bista robes di grandesa. Via nan mama, nan a hasi e siguiente petishon na Hesus: ‘Duna òrdu pa den bo reino nos por sinta, ún na bo man drechi i ún na bo man robes.’ (Mateo 20:21) Hudiunan tabata konsiderá sinta na man drechi òf na man robes komo un gran onor. (1 Reinan 2:19) Sin eskrúpulo, Santiago ku Juan ambisiosamente a hasi un intento pa optené e puestonan mas distinguí. Di antemano nan kier a reservá e puestonan di outoridat aki. Hesus tabata sa kiko nan ta pensa i a usa e okashon ei pa korigí nan punto di bista robes di grandesa.

7. Kon Hesus a deskribí e manera pa alkansá berdadero grandesa kristian?

⁷ Hesus tabata sa ku den e mundu orguyoso aki, e hòmber ku nan ta konsiderá grandi ta esun ku ta kontrolá i manda riba otro hende i ku dor di djis klap man e por pone hende satisfasé mesora delaster un kapricho ku e tin. Pero serka e disipelnan di Hesus, ta sirbishi humilde ta e norma pa determiná grandesa. Hesus a bisa: “Ken ku kier bira grandi entre boso lo ta boso sirbidó, i ken ku kier ta esun di promé entre boso lo ta boso esklabo.”—Mateo 20:26, 27.

8. Kiko ke men ser un sirbidó, i kiko nos por puntra nos mes?

⁸ E palabra griego tradusí den Beibel komo “sirbidó” òf “minister” [NW] ta referí na un persona ku diligentemente i persistentemente ta hasi tur esfuerso pa rindi sirbishi na fabor di otronan. Hesus a siña su disipelnan un lès importante: Duna hende òrdu pa hasi kos no ta hasi bo grandi; loke sí ta hasi bo grandi ta ora ku bo ta sirbi otro hende motivá pa amor. Puntra bo mes: ‘Kon ami lo a reakshoná si mi tabata Santiago òf Juan? Lo mi a komprondé ku berdadero grandesa ta bin di sirbi otro hende motivá pa amor?’—1 Korintionan 13:3.

9. Ki ehèmpel Hesus a pone den e manera ku el a trata otro hende?

⁹ Hesus a mustra su disipelnan ku mundu su norma di grandesa no ta e norma di grandesa ku el a pone komo ehèmpel. Kristu nunka tabatin e aktitut di ta superior ku e hendenan ku el  a sirbi ni e no a laga nan sinti ku nan ta inferior. Tur klase di hende a sinti nan mes kómodo serka dje—hòmber, muhé i mucha, hende riku, pober, poderoso, i tambe esnan konosí komo pekadó. (Marko 10:13-16; Lukas 7:37-50) Hopi bes hende no tin pasenshi ku esnan ku tin debilidat. Hesus tabata otro. Maske su disipelnan tin biaha a pleita òf mustra falta di konsiderashon, ku pasenshi el a instruí nan, i asina el a mustra nan ku di bèrdat e tabata humilde i mansu.—Zakarias 9:9; Mateo 11:29; Lukas 22:24-27.

10. Kon henter Hesus su kurso di bida a reflehá sirbishi inegoista na fabor di otro hende?

¹⁰ E ehèmpel inegoista di Dios su Yu di mas importante a demostrá loke grandesa realmente a nifiká. Hesus no a bin na tera pa hende sirbié, sino pa é sirbi hende, kurando “tur sorto di malesa” i librando hende for di gara di demoño. Ounke el a kansa i tabatin mester di tempu pa sosegá, semper el a pone nesesidatnan di otro hende promé ku esnan di dje, i a hasi esfuerso pa konsolá nan. (Marko 1:32-34; 6:30-34; Juan 11:11, 17, 33) Su amor a motiv’é pa yuda hende spiritualmente, i pa kana sientos di kilometer den kaminda di tera pa prediká e bon nobo di e Reino. (Marko 1:38, 39) Sin duda, Hesus a konsiderá sirbi otro hende komo un asuntu masha serio.

Imitá e Humildat di Kristu

11. Ki kualidatnan ta buska den rumannan nombrá pa sirbi komo superintendente den kongregashon?

¹¹ Na fin di siglo 19, e rumannan a enfatisá e spiritu korekto ku superintendentenan kristian mester kultivá ora ku nan mester a skohe hòmbernan pa bira representante biahero pa sirbi e nesesidatnan di e pueblo di Dios. Segun e revista Zion’s Watch Tower di 1 di sèptèmber 1894, loke e rumannan tabata buska ta hòmbernan “mansu—pa nan no bira halsá . . . , di mente humilde ku no ta purba prediká na fabor di nan mes, sino pa Kristu—ku no ta ekspresá nan propio konosementu, sino Su Palabra den su simplesa i poder.” Ta bisto anto ku kristiannan berdadero nunka mester buska pa haña responsabilidat djis pa satisfasé ambishon personal òf pa haña prominensia, poder i kontròl riba otro hende. Un superintendente humilde ta kòrda ku e responsabilidatnan ku e tin ta “un bon trabou,” no un puesto elevá pa trese gloria pa su mes. (1 Timoteo 3:1, 2) Tur ansiano i sirbidó ministerial mester hasi nan máksimo esfuerso pa sirbi humildemente na fabor di otro hende i mester hiba delantera den sirbishi sagrado, poniendo asina un ehèmpel ku ta digno di imitashon.—1 Korintionan 9:19; Galationan 5:13; 2 Timoteo 4:5.

12. Kiko e rumannan ku ta hasi esfuerso pa alkansá privilegio den kongregashon lo por puntra nan mes?

¹² Kualke ruman hòmber ku ta hasi esfuerso pa alkansá privilegio lo tin ku puntra su mes:  ‘Mi ta buska oportunidatnan pa sirbi otro rumannan, òf mi tin e tendensia di ke pa hende sirbi mi? Mi ta dispuesto pa hasi tareanan útil ku otro hende no ta mira umbes?’ Por ehèmpel, un ruman hòmber yòn kisas ta dispuesto pa duna parti òf diskurso den e kongregashon kristian, pero ta vasilá pa yuda hende di edat. Kisas e ta gusta asosiá ku rumannan responsabel den kongregashon, pero e no ta gusta partisipá den e trabou di prediká. E ruman ei ta hasi bon di puntra su mes: ‘Mi ta enfoká prinsipalmente riba e aspektonan di Dios su sirbishi ku ta trese rekonosementu i elogio? Mi ta hasiendo esfuerso pa sobresalí riba otronan?’ Si nos ta buska gloria personal, definitivamente nos no ta imitando Kristu su ehèmpel.—Juan 5:41.

13. (a) Kon un superintendente su ehèmpel di humildat por influensiá otro hende? (b) Dikon nos por bisa ku humildat no ta djis un opshon pa un kristian?

¹³ Ora nos ta traha duru pa imitá e humildat di Kristu, nos ta sinti nos motivá pa sirbi otro hende. Konsiderá e ehèmpel di un superintendente di zona ku tabata inspekshoná e funshonamentu di un di e ofisinanan di sukursal di Testigunan di Yehova. Apesar ku e superintendente aki tabatin un programa hopi yen i bastante responsabilidat, el a para yuda un ruman hòmber yòn ku tabata bringa pa stèl un mashin di nit buki. E ruman yòn a konta: “Mi no por a kere e kos ei! El a bisa mi ku el a yega di traha ku e mesun tipo di mashin aki tempu ku e tabata sirbi na Bètel komo mucha hòmber yòn. El a kòrda kon difísil tabata pa stèl e mashin. El a traha riba e mashin ei ku mi pa basta ratu maske e tabatin hopi otro kos importante pa hasi. Esei impreshoná mi hopi.” E ruman yòn aki, ku awor ta superintendente na un ofisina di sukursal di Testigunan di Yehova, te ainda ta kòrda e akto di humildat ei. Laga nos no sinti nunka ku nos ta muchu haltu òf muchu importante pa hasi tareanan humilde. Mas bien, nos mester bisti “humildat.” Esei no ta djis un opshon. E ta parti di e “hende nobo” òf personalidat nobo ku un kristian mester bisti.—Filipensenan 2:3; Kolosensenan 3:10, 12; Romanonan 12:16.

Kon Nos Por Haña Kristu Su Punto di Bista di Grandesa

14. Kon dor di meditá riba nos relashon ku Dios i ku nos próhimo, nos por kultivá e punto di bista korekto di grandesa?

¹⁴ Kon nos por haña e punto di bista korekto di grandesa? Un manera ta dor di meditá riba nos relashon ku Yehova Dios. Yehova su mahestuosidat, poder i sabiduria ta elev’é hopi mas haltu ku e kampo di aktividat di hende insignifikante. (Isaias 40:22) Un otro kos ku por yuda nos kultivá humildat ta di meditá riba nos relashon ku nos próhimo. Por ehèmpel, kisas nos ta mas mihó ku otro hende riba sierto tereno, pero kisas nan ta sobresalí den aspektonan di bida ku ta hopi mas importante, òf podisé nos rumannan kristian tin sierto kualidatnan ku nos no tin. De echo, hopi ruman ku ta presioso den bista di Dios no sa destaká, debí na nan manera mansu i humilde.—Proverbionan 3:34; Santiago 4:6.

15. Kon e integridat di Dios su pueblo ta mustra ku ningun hende tin base pa sinti ku e ta superior ku otro hende?

¹⁵ Eksperensianan di Testigunan di Yehova ku a pasa den prueba severo debí na nan fe ta ilustrá e punto aki bon. Hopi bes, ta esnan ku mundu lo a konsiderá komun i koriente ta esnan ku a mantené nan integridat na Dios bou di prueba severo. Meditando riba e tipo di  ehèmpelnan ei por yuda nos keda humilde i ta siña nos ‘pa no pensa mas haltu di nos mes ku ta nesesario.’—Romanonan 12:3. *

16. Kon tur hende den kongregashon por kultivá grandesa segun e ehèmpel ku Hesus a pone?

¹⁶ Tur kristian, hóben i bieu, mester trata na kultivá Kristu su punto di bista di grandesa. Den kongregashon tin vários tarea pa hasi. Nunka rabia òf sinti bo ofendí si e rumannan pidi bo pa hasi tareanan ku por parse humilde. (1 Samuel 25:41; 2 Reinan 3:11) Mayornan, boso ta enkurashá boso yunan chikí i tiner pa hasi tur asignashon ku smak, sea ta na Salòn di Reino, na asamblea òf na kongreso? Nan ta mira boso hasi tareanan humilde? Un ruman hòmber, ku awor ta sirbi na e sede mundial di Testigunan di Yehova, ta kòrda kla-kla e ehèmpel di su mayornan. El a bisa: “E manera ku nan tabata trata ku e trabou di limpiesa di Salòn di Reino òf di e lugá di kongreso a laga mi komprondé ku nan a konsiderá e trabou ei importante. Hopi bes nan tabata ofresé pa hasi kos na benefisio di e kongregashon òf di e hermandat, sin importá kon humilde e tareanan ei por a parse di ta. E aktitut aki a yuda mi aseptá di buena gana kualke asignashon ku mi a haña aki na Bètel.”

17. Den ki maneranan ruman muhénan humilde por ta un bendishon pa e kongregashon?

¹⁷ Pa loke ta pone interes di otro hende promé ku di bo mes, nos tin e ekselente ehèmpel di Ester, kende a bira reina di e Imperio di Pèrsia den siglo 5 promé ku nos era. Ounke el a biba den un palasio, e tabata dispuesto pa riska su bida na fabor di e pueblo di Dios, i asina aktua na armonia ku Dios su boluntat. (Ester 1:5, 6; 4:14-16) Awe ruman muhénan kristian, sin importá nan sirkunstansia ekonómiko, por manifestá e mesun spiritu ku Ester dor di animá rumannan deprimí, bishitá esnan enfermo, partisipá den e predikashon i koperá ku e ansianonan. Ruman muhénan humilde asina ta un bendishon pa e kongregashon!

Bendishonnan Ku Ta Bin dor di Manifestá Kristu Su Punto di Bista di Grandesa

18. Ki benefisionan bo ta kosechá dor di manifestá grandesa segun e ehèmpel di Kristu?

¹⁸ Bo ta kosechá hopi benefisio ora bo ta mantené Kristu su punto di bista di grandesa. Sirbi otro hende na un manera generoso ta trese goso tantu pa nan komo pa bo. (Echonan 20:35) Segun ku bo ta traha duru na fabor di bo rumannan, hasiendo esei di buena gana i ku entusiasmo, nan ta haña mas kariño pa bo. (Echonan 20:37) Mas importante ainda, Yehova ta konsiderá loke bo ta hasi pa promové e bienestar di rumannan kristian komo un sakrifisio agradabel di alabansa na dje.—Filipensenan 2:17.

19. Kiko nos mester ta determiná pa hasi relashoná ku Kristu su punto di bista di grandesa?

¹⁹ Kada un di nos tin ku saminá su propio kurason i puntra: ‘Lo mi papia ku boka so tokante kultivá Kristu su punto di bista di grandesa, òf lo mi traha diligentemente pa pon’é na práktika?’ Beibel ta bisa bon kla kiko Yehova ta pensa di hende orguyoso. (Proverbionan 16:5; 1 Pedro 5:5) Laga nos akshonnan mustra ku gososamente nos ta manifestá Kristu su punto di bista di grandesa, sea ku ta den e kongregashon kristian, den nos bida di famia òf den nos trato diario ku otro hende, hasiendo tur kos pa e gloria i alabansa di Dios.—1 Korintionan 10:31.

[Nota]

Bo Por Splika?

• Dikon nos tin ku evitá mundu su punto di bista di grandesa?

• Kon Hesus a midi grandesa?

• Kon superintendentenan por imitá e humildat di Kristu?

• Kiko por yuda nos kultivá Kristu su punto di bista di grandesa?

[Preguntanan di Estudio]

[Kuadro na página 17]

Ken Tin Kristu Su Punto di Bista di Grandesa?

Esun ku ke pa hende sirbié òf esun ku ta dispuesto pa sirbi otro?

Esun ku ta preferá di ta e sentro di atenshon òf esun ku ta aseptá tareanan humilde?

Esun ku ta pone su mes na haltu òf esun ku ta pone otro hende na haltu?

[Plachi na página 14]

Un imágen inmenso di Fárao Amenhotep III

[Plachi na página 15]

Bo sa ta kiko a hiba na Haman su kaida?

[Plachinan na página 16]

Bo ta buska oportunidatnan pa sirbi otro hende?