Puntonan Sobresaliente di e Buki di Numbernan
E Palabra di Yehova Ta Bibu
Puntonan Sobresaliente di e Buki di Numbernan
E ISRAELITANAN a keda organisá den un nashon despues di nan Eksodo for di Egipto. Poko despues nan lo por a drenta e Tera Primintí, pero esei no a sosodé. Al kontrario, nan tabatin ku dual pa kuater dékada den un “desierto grandi i teribel.” (Deuteronomio 8:15) Dikon? E relato históriko den e buki bíbliko di Numbernan ta konta nos kiko a pasa. E relato ei mester graba den nos mente e importansia di obedesé Yehova Dios i respetá su representantenan.
Moisés a skirbi e buki di Numbernan den desierto i riba e Sabananan di Moab. E buki ta abarká un periodo di 38 aña i 9 luna, for di aña 1512 te ku 1473 promé ku nos era. (Numbernan 1:1; Deuteronomio 1:3) E buki su nòmber ta bin di dos senso ku a tuma di e israelitanan, 38 aña for di otro. (Kapítulonan 1-4, 26) E relato ta partí den tres sekshon. E promé parti ta konta susesonan ku a tuma lugá na Seru Sinaí. E di dos parti ta abarká loke a tuma lugá durante e tempu ku Israel tabata dual den desierto. I e último parti ta trata susesonan riba e Sabananan di Moab. Segun ku bo ta lesa e relato aki, lo bo por pensa riba e preguntanan aki: ‘Kiko e insidentenan aki ta siña mi? E buki aki ta kontené prinsipionan ku por benefisiá mi awe?’
NA SERU SINAÍ
E promé di e dos sensonan ta tuma lugá miéntras ku e israelitanan ta ainda na pia di Seru Sinaí. En total tin 603.550 hende hòmber di 20 aña bai ariba, ku eksepshon di e levitanan. Evidentemente nan ta tuma e senso pa propósito militar. Henter e kampamentu, inkluso hende muhé, mucha i e levitanan, kisas ta yega na mas ku tres mion hende.
Despues di e senso, e israelitanan ta risibí instrukshon den ki órden nan mester marcha, tambe detayenan relashoná ku e debernan di levita i sirbishi di tabernakel, mandamentunan tokante isolashon (karentena), i leinan relashoná ku kasonan di yalusí i promesanan di e nazareonan. Kapítulo 7 ta duna informashon tokante ofrendanan ku e lidernan di tribu a hasi en konekshon ku inougurashon di e altar, i kapítulo 9 ta trata e selebrashon di Pasku. Tambe e asamblea ta haña instrukshon tokante den ki órden nan mester kamper i den ki órden nan mester sali bai.
Kontesta Riba Pregunta Bíbliko:
2:1, 2—Kiko tabata “e emblema” rònt di kua e divishon di tres tribu mester a kamper den desierto? Beibel no ta deskribí kiko e emblema aki tabata. Sin embargo, e pueblo no a konsiderá nan komo símbolo sagrado ni a duna nan ningun nifikashon religioso. Nan a usa nan pa un propósito práktiko: pa yuda un hende haña su debido lugá den e kampamentu.
5:27—Kiko tabata ke men ku un muhé kulpabel di adulterio su “hep lo seka”? Aki Beibel ta usa e palabra “hep” pa indiká e órganonan di prokreashon. E echo ku su “hep lo seka” ta duna e idea ku e órganonan aki lo degenerá, di manera ku lo ta imposibel pa e konsebí.
Lès pa Nos:
6:1-7. Nazareonan mester a apstené di tur produkto di wendrùif i di tur bebida stèrki, lokual a rekerí pa nan frena nan deseonan. Nan mester a laga nan kabei krese bira largu, un señal di sumishon na Yehova, meskos ku hende muhé mester tabata sumiso na nan kasá òf nan tata. E nazareonan mester a keda limpi dor di no mishi ku nada morto, ni sikiera si tabata e kadaver di un famia djaserka. Sirbidónan di tempu kompletu awe ta demostrá un spiritu di sakrifisio propio dor di frena nan deseonan i dor di ta sumiso na Yehova i na su areglo. Podisé algun asignashon ta enserá ku nan mester bai biba na un lugá leu, i p’esei kisas ta difísil òf asta imposibel pa nan regresá nan pais pa entiero di un famia djaserka.
8:25, 26. Segun e lei, hòmbernan di edat mester a retirá for di sirbishi obligatorio di levita. Esei tabata pa hasi sigur ku ta solamente hòmbernan kapas tabata den e sirbishi di levita, i pa mustra konsiderashon ku e levitanan di edat. Sin embargo, e hòmbernan di edat por a ofresé pa yuda otro levitanan. Maske awe un hende no ta baha ku penshon komo proklamadó di Reino, e prinsipio di e lei aki ta siña nos un lès balioso. Si debí na edat avansá un kristian no por kumpli ku sierto obligashonnan, e por partisipá den un otro forma di sirbishi ku sí ta na su alkanse.
DI UN LUGÁ PA OTRO DEN DESIERTO
Ku tempu e nubia ta lanta for di riba e tabernakel, i e israelitanan ta kuminsá un marcha ku lo abarká 38 aña i un òf dos luna, i al final ta hiba nan na e sabananan di desierto di Moab. Lo ta bon pa sigui nan ruta riba e mapa na página 9 di e foyeto “Mira e Tera Bunita,” publiká dor di Testigunan di Yehova.
Riba kaminda pa Kades, den e Desierto di Paran, tin por lo ménos tres kaso di kehamentu. E promé kaso ta terminá ora ku Yehova manda kandela pa destruí algun di e hendenan. Di dos kaso ta ora e israelitanan ta sklama pa karni, i Yehova ta perkurá patrishi òf sloke. Den e di tres kaso, Miriam ku Aaron su kehamentu kontra Moisés ta pone ku Miriam temporalmente ta ser kastigá ku lepra.
Miéntras ku nan ta kamper na Kades, Moisés ta manda 12 hòmber bai spioná e Tera Primintí. Nan ta bolbe despues di 40 dia. E pueblo ta kere e mal informe di dies di e spionnan, i ke piedra Moisés ku Aaron, i e fiel spionnan Josué i Kalèb. Yehova ta bisa ku e ke dal e pueblo ku pèst, pero Moisés ta intersedé, i Dios ta deklará ku nan lo kana dual den e desierto pa 40 aña, te ora ku tur esnan numerá den e senso a muri.
Yehova ta duna nan leinan adishonal. Koré i mas hende ta lanta kontra Moisés ku Aaron, pero kandela ta destruí algun rebelde i tera ta habri i traga e otronan. E siguiente dia henter e kongregashon ta murmurá kontra Moisés ku Aaron. Komo resultado, 14.700 ta muri di un plaga for di Yehova. Pa Dios mustra ta ken el a skohe komo sumo saserdote, e ta laga Aaron su bara saka sprùit. E ora ei Yehova ta duna mas lei relashoná ku e obligashonnan di levita i purifikashon di e pueblo. E uso di shinishi di un bisé kòrá hembra ta prefigurá e purifikashon mediante e sakrifisio di Hesus.—Hebreonan 9:13, 14.
E yunan di Israel ta regresá Kades, kaminda Miriam ta muri. E kongregashon ta bolbe keha kontra Moisés ku Aaron. Pakiko? No tin awa. Debí ku Moisés ku Aaron no ta santifiká Yehova su nòmber ora ku milagrosamente nan ta perkurá awa, nan ta pèrdè e chèns di drenta den e Tera Primintí. Israel ta bai for di Kades, i Aaron ta muri na Seru Hor. Segun ku e israelitanan ta pasa rònt di e teritorio di Edòm, nan ta kansa i ta papia kontra Dios i Moisés. Yehova ta manda kolebra venenoso pa kastigá nan. Un biaha mas Moisés ta intersedé, i Dios ta instruyé pa traha un kolebra di bròns i pon’é riba un palu pa asina e hendenan ku kolebra pika por kura dor di fiha nan bista riba e kolebra. E kolebra ta prefigurá e klabamentu di Hesus na staka pa nos benefisio eterno. (Juan 3:14, 15) Israel ta derotá e reinan amoreo Sehon i Og i ta tuma poseshon di nan tera.
Kontesta Riba Preguntanan Bíbliko:
12:1—Dikon Miriam ku Aaron a keha kontra Moisés? E berdadero motibu di nan kehamentu aparentemente tabata Miriam su deseo pa mas poder. Ora ku Séfora, kasá di Moisés, a djòin Moisés den desierto, Miriam podisé a teme ku hende lo no a mir’é mas komo primera dama den e kampamentu.—Eksodo 18:1-5.
12:9-11—Dikon ta Miriam so a ser kastigá ku lepra? Muy probablemente, ta é tabata esun ku a instigá e kehamentu i a konvensé Aaron pa djòin kuné. Aaron a desplegá e aktitut korekto dor di konfesá su eror.
21:14, 15—Ta ki sorto di buki Beibel ta menshoná akinan? E Skritura ta referí na vários buki ku eskritornan bíbliko a usa komo fuente di informashon. (Josué 10:12, 13; 1 Reinan 11:41; 14:19, 29) “E Buki di Gueranan di SEÑOR” tabata un di e bukinan ei. El a kontené un relato históriko di e gueranan di e pueblo di Yehova.
Lès pa Nos:
11:27-29. Moisés ta un ekselente ehèmpel enkuanto kon nos mester reakshoná ora otro hende risibí privilegio den e sirbishi di Yehova. En bes di bira yalurs i buska gloria pa su mes, Moisés a keda kontentu ora ku Eldad i Medad a kuminsá aktua komo profeta.
12:2, 9, 10; 16:1-3, 12-14, 31-35, 41, 46-50. Yehova ta ferwagt di su adoradónan ku nan ta mustra rèspèt pa outoridat duná dor di Dios.
14:24. Un faktor krusial pa resistí e preshon di mundu pa hasi malu ta di desaroyá ‘un spiritu òf aktitut mental diferente.’ Esei mester ta un spiritu ku ta otro for di esun di mundu.
15:37-41. Intenshon di e fraña úniko riba e bistí di e israelitanan tabata pa kòrda nan ku nan tabata un pueblo apartá pa adorá Dios i pa obedesé su mandamentunan. Akaso nos tambe no tin ku biba segun e normanan di Dios i destaká komo diferente for di mundu?
RIBA E SABANANAN DI MOAB
E moabitanan ta yen di miedu ora ku e yunan di Israel bin kamper riba e sabananan di desierto di Moab. P’esei Rei Balak di Moab ta paga Balaam pa maldishoná e israelitanan. Pero Yehova ta fòrsa Balaam pa bendishoná nan. E ora ei nan ta usa muhénan moabita i madianita pa lòk hòmbernan israelita pa kometé inmoralidat i idolatria. Komo resultado, Yehova ta destruí 24.000 malechor. E plaga finalmente ta terminá ora ku Finees demostrá ku e no ta tolerá ningun rivalidat kontra Yehova.
E di dos senso ta revelá ku ningun di e hòmbernan kontá den e promé senso a keda na bida, ku eksepshon di Josué i Kalèb. Josué ta risibí e enkargo pa bira susesor di Moisés. E israelitanan ta haña instrukshon tokante kon pa hasi e diferente ofrendanan i tokante hasimentu di promesa. Tambe e pueblo di Israel ta tuma vengansa riba e madianitanan. Ruben, Gad i mitar tribu di Manasés ta establesé nan mes na ost di Riu Hordan. Israel ta risibí instrukshon tokante krusamentu di Hordan i kon pa tuma poseshon di e tera. Yehova ta definí e fronteranan di e tera detayadamente. Pa medio di lòt mester disidí ta ken ta haña kua parti di e herensia. Levitanan ta haña 48 stat, di kua 6 di nan mester fungi komo stat di refugio.
Kontesta Riba Preguntanan Bíbliko:
22:20-22—Dikon Yehova a rabia ku Balaam? Yehova a bisa profeta Balaam ku e no mag maldishoná e israelitanan. (Numbernan 22:12) Pero tòg e profeta a bai ku e hòmbernan di Balak ku e pleno intenshon di maldishoná Israel. Balaam kier a agradá e rei di Moab i haña un rekompensa serka dje. (2 Pedro 2:15, 16; Hudas 11) Asta ora Dios a fòrsa Balaam bendishoná Israel en bes di maldishon’é, Balaam a purba haña aprobashon di e rei dor di sugerí pa usa muhénan ku tabata adorá Baal pa sedusí e hòmbernan israelita. (Numbernan 31:15, 16) Pues, Dios tabata rabiá ku Balaam pa motibu di e profeta su golosidat sin eskrúpulo.
30:6-8—Un esposo kristian por anulá e promesanan di su kasá? Pa loke ta promesa, Yehova ta trata awor ku su adoradónan riba un base individual. Por ehèmpel, dedikashon na Yehova ta un voto òf promesa personal. (Galationan 6:5) Un esposo no tin e outoridat pa anulá un promesa asina. Pero un esposa, mester evitá di hasi promesanan ku ta na konflikto ku e Palabra di Dios òf na konflikto ku su debernan pa ku su kasá.
Lès pa Nos:
25:11. Finees tabata un tremendo ehèmpel di selo pa e adorashon di Yehova! Akaso nos deseo pa mantené e kongregashon limpi no mester motivá nos pa informá e ansianonan kristian di inmoralidat serio ora nos sa di esei?
35:9-29. Un hende ku a mata un persona no-intenshonalmente mester a bandoná su kas i hui pa un stat di refugio pa un periodo di tempu. Esei ta siña nos ku bida ta sagrado i ku nos mester tin rèspèt p’e.
35:33. Tera kontaminá dor di sanger dramá di hende inosente por ser ekspiá solamente dor di sanger di esnan ku a dram’é. P’esei ta na su lugá ku Yehova lo destruí e malbadonan promé ku transformá e tera den un paradeis.—Proverbionan 2:21, 22; Daniel 2:44.
E Palabra di Dios Tin Poder
Nos mester mustra rèspèt pa Yehova i pa rumannan nombrá den puesto di responsabilidat den su pueblo. E buki di Numbernan ta enfatisá e bèrdat aki bon kla. Esei ta un lès masha importante pa mantené pas i unidat den e kongregashon awe.
E insidentenan menshoná den Numbernan ta mustra kon fásil hende ku neglishá nan spiritualidat por kometé malecho, manera murmuramentu, inmoralidat i idolatria. Algun di e ehèmpelnan i lèsnan for di e buki bíbliko aki por sirbi komo base pa partinan di nesesidat lokal den Reunion di Sirbishi na kongregashonnan di Testigunan di Yehova. En bèrdat, “e palabra di Dios ta bibu i aktivo” i ta ehersé poder den nos bida.—Hebreonan 4:12.
[Plachi na página 24, 25]
Pa medio di un nubia milagroso riba e tabernakel, Yehova a dirigí den ki órden e kampamentu di Israel mester a kamper i den ki órden nan mester a sali bai
[Plachinan na página 26]
Yehova meresé nos obedensia i ta ferwagt di nos ku nos ta respetá su representantenan