Odiá sin Motibu
Odiá sin Motibu
“Sin motibu nan a odia mi.”—JUAN 15:25.
1, 2. (a) Dikon algun persona ta keda straño ku hende ta papia malu di kristiannan, pero dikon tal papiamentu no mester sorprendé nos? (b) Den e artíkulo aki nos lo konsiderá ‘ser odiá’ den ki sentido? (Wak nota na pia di página.)
TESTIGUNAN DI YEHOVA ta hasi esfuerso pa biba segun e prinsipionan ku tin den e Palabra di Dios. Debí na esei nan ta gosa di un ekselente reputashon den hopi pais. Sin embargo, tin biaha hende a pinta nan malu. Por ehèmpel, segun un funshonario gubernamental di e stat St. Petersburg na Rusia: “Hende a pinta Testigunan di Yehova pa nos komo un tipo di sekta klandestino ku tabata sinta den skuridat i mata mucha i mata nan mes.” Pero despues di a traha ku Testigunan di Yehova en konekshon ku un kongreso internashonal, e mesun funshonario aki a remarká: “Awor mi ta mira hende normal, ku ta smail . . . Nan ta pasífiko i trankil, i nan stima otro masha hopi.” El a agregá: “Di bèrdat mi no por komprondé dikon hende ta gaña e sorto di kosnan ei riba nan.”—1 Pedro 3:16.
2 Sirbidónan di Dios no ta haña plaser den ser kalumniá komo malechor, sin embargo nan no ta keda sorprendí ora hende papia malu di nan. Hesus a atvertí su sirbidónan di antemano: “Si mundu odia boso, sa anto ku el a odia ami promé ku boso. . . . Pa e palabra ku ta pará skirbí den nan Lei keda kumplí: ‘Sin motibu nan a odia mi.’” * (Juan 15:18-20, 25; Salmo 35:19; 69:4) Mas promé Hesus a bisa su disipelnan: “Si nan a yama e kabes di kas Beëlzebú, anto kuantu mas e miembronan di su kas!” (Mateo 10:25) Kristiannan ta komprondé ku nan tin ku soportá tal reproche komo parti di e “staka di tormento” ku nan a aseptá ora nan a bira siguidó di Kristu.—Mateo 16:24, NW.
3. Te na ki grado hende a persiguí adoradónan berdadero?
3 Persekushon di adoradónan berdadero tin un historia masha largu, i a kuminsá for di tempu di “Abel, e hustu.” (Mateo 23:34, 35) Esei no tabata limitá na algun insidente isolá. Hesus a bisa ku “tur hende lo odia” su siguidónan pa kousa di su nòmber. (Mateo 10:22) Ademas, apòstel Pablo a skirbi ku tur sirbidó di Dios—inkluyendo kada un di nos—mester ferwagt ku nos lo ser persiguí. (2 Timoteo 3:12) Kiko ta e motibu pa esaki?
E Fuente di Odio sin Motibu
4. Kon Beibel ta revelá ta ken ta e fuente di tur odio sin motibu?
4 E Palabra di Dios ta revelá ku for di prinsipio tabatin un instigadó invisibel. Tuma e asesinato kruel di e promé hòmber di fe, Abel. Beibel ta deklará ku su ruman hòmber asesino, Kain, “tabata di e malbado,” Satanas e Diabel. (1 Juan 3:12) Kain a desplegá e karakter di Satanas, i Diabel a us’é pa kumpli ku su plannan malisioso. Tambe Beibel ta revelá e papel ku Satanas a hunga den e atakenan feros kontra Jòb i Hesukristu. (Jòb 1:12; 2:6, 7; Juan 8:37, 44; 13:27) E buki di Revelashon ta indiká bon kla ta ken ta tras di e persekushon di e siguidónan di Hesus, bisando: “Diabel ta bai tira algun di boso den prizon, pa boso wòrdu poní na prueba.” (Revelashon 2:10) Sí, Satanas ta e fuente di tur odio sin motibu kontra e pueblo di Dios.
5. Kiko ta e motibu ku Satanas ta odia adoradónan berdadero?
5 Kiko ta e motibu ku Satanas ta odia adoradónan berdadero? Den un plan malisioso di Satanas ku ta mustra su enorme arogansia, el a lanta kontra “e Rei eterno,” Yehova Dios. (1 Timoteo 1:17; 3:6) E ta pretendé ku Dios su gobernashon riba su kriaturanan ta demasiado restriktivo i ku ningun persona ta sirbi Yehova ku un motibu puru, sino mas bien ku nan ta hasi esei solamente pa probecho egoista. Tambe segun Satanas, si permitié pone hende na prueba, e por pone delaster un di nan stòp di sirbi Dios. (Génesis 3:1-6; Jòb 1:6-12; 2:1-7) Satanas ta purba establesé su mes komo un soberano rival di Yehova dor di kalumniá Yehova di ta un opresor, un mentiroso i un frakaso. Pues anto, su furia kontra e sirbidónan di Dios ta motivá pa su anhelo intenso pa ser adorá.—Mateo 4:8, 9.
6. (a) Kon nos ta personalmente enbolbí den e kuestion di Yehova su soberania? (b) Kon un komprondementu di e kuestion aki ta yuda nos mantené nos integridat? (Wak e kuadro, página 16.)
6 Abo ta mira kon e kuestion aki ta toka bo bida? Komo un sirbidó di Yehova, probablemente bo a deskubrí ku ounke pa hasi Dios su boluntat ta rekerí esfuerso sinsero, e benefisionan di esei ta sobresaliente. Pero kiko si bo sirkunstansianan den bida ta hasié difísil, asta doloroso, pa sigui kumpli ku e leinan i prinsipionan di Yehova? I kiko si ta parse ku bo no ta risibí ningun benefisio a kambio? Lo bo yega na e konklushon ku no ta bale la pena pa sigui sirbi Yehova? Òf bo amor pa Yehova i apresio profundo pa su kualidatnan magnífiko lo motivá bo pa sigui kana den tur su kamindanan? (Deuteronomio 10:12, 13) Dor di permití Satanas trese sierto grado di sufrimentu riba nos, Yehova a duna kada un di nos e chèns di mustra kiko ta nos kontesta personal riba e desafio di Satanas.—Proverbionan 27:11.
“Ora Ku Hende Insultá Boso”
7. Kua ta un táktika ku Diabel ta usa pa purba kita nos for di Yehova?
7 Laga nos bai konsiderá mas a fondo un di e trampanan mañoso ku Satanas ta usa den un intento pa proba su banda di e kuestion: su uso di kalumnia òf insultonan mentiroso. Hesus a yama Satanas “e tata di mentira.” (Juan 8:44) E nòmber deskriptivo Diabel, ku ta nifiká “Kalumniadó,” ta identifik’é komo e kalumniadó prinsipal di Dios, di Dios su palabra konfiabel i di su nòmber santu. Diabel ta usa insinuashon, akusashon falsu i mentira flagrante pa desafiá Yehova su soberania, i e ta usa e mesun táktikanan pa kalumniá Dios su sirbidónan fiel. Dor di montoná kalumnia i insulto riba e Testigunan aki, e por hasi un prueba pisá bira asta mas difísil pa karga.
8. Kon Satanas a trese reproche riba Jòb, i ku ki efekto?
8 Konsiderá loke a sosodé ku Jòb, kende su nòmber ta nifiká “Opheto di Hostilidat.” Fuera di pone Jòb pèrdè su medio di mantenshon, su yunan i su salú, Satanas a laga parse ku Jòb ta un pekadó ku tabata haña kastigu di Dios. Ounke Jòb tabata un hòmber masha respetá, hende a kuminsá despresi’é, entre nan, asta su famia i amigunan íntimo. (Jòb 19:13-19; 29:1, 2, 7-11) Ademas, pa medio di konsoladónan falsu, Satanas a trata na ‘kibra Jòb ku palabra.’ Promé, dor di insinuá ku Jòb mester a kometé algun pika serio, i despues dor di konden’é direktamente komo un malechor. (Jòb 4:6-9; 19:2; 22:5-10) Ki un gran desanimashon esei lo mester tabata pa Jòb!
9. Kon Satanas a laga Hesus parse un pekadó?
9 E Yu di Dios, komo defensor prinsipal di Yehova su soberania, a bira Satanas su opheto prinsipal di hostilidat. Ora Hesus a bin na mundu, Satanas a trata na lag’é parse desfigurá den sentido spiritual—meskos ku el a hasi ku Jòb—dor di duna e impreshon ku Hesus ta un pekadó. (Isaias 53:2-4; Juan 9:24) Hende a yama Hesus un buraché i un hòmber golos, i a bisa ku e ‘tabatin un demoño.’ (Mateo 11:18, 19; Juan 7:20; 8:48; 10:20) Nan a akus’é falsamente di blasfemia. (Mateo 9:2, 3; 26:63-66; Juan 10:33-36) Esaki a kousa Hesus angustia, pasobra e tabata sa ku esei a trese reproche inhustamente riba su Tata. (Lukas 22:41-44) Por último, nan a klaba Hesus na staka komo un kriminal maldishoná. (Mateo 27:38-44) Pa mantené integridat perfekto, Hesus a hañ’é ta soportá hopi “hostilidat di pekadónan.”—Hebreonan 12:2, 3.
10. Kon e restu di e ungínan a bira e blanko di Satanas den tempu moderno?
10 Den tempu moderno, e restu di Kristu su siguidónan ungí tambe a bira Diabel su opheto di hostilidat. Beibel ta deskribí Satanas komo “e akusadó di [Kristu su] rumannan, ku ta akusá nan di dia i anochi dilanti di nos Dios.” (Revelashon 12:9, 10) Desde ku a saka Satanas for di shelu i e ta limitá na e bisindario di tera, el a intensifiká su esfuerso pa pinta Kristu su rumannan komo basura. (1 Korintionan 4:13) Den algun pais, hende kalumniosamente a yama nan un sekta peligroso, meskos ku hende a yama e kristiannan di promé siglo. (Echonan 24:5, 14; 28:22) Manera nos a menshoná den introdukshon, hende a kalumniá nan pa medio di propaganda falsu. Sin embargo, “atraves di gloria i desonor, atraves di mal informe i bon informe,” e rumannan ungí di Kristu—apoyá pa nan kompañeronan di ‘otro karné’—humildemente a hasi esfuerso pa ‘warda e mandamentunan di Dios i duna testimonio di Hesus.’—2 Korintionan 6:8, NW; Juan 10:16; Revelashon 12:17.
11, 12. (a) Kiko por ta e kousa di algun reproche ku kristiannan ta eksperensiá? (b) Den ki maneranan un kristian por sufri inhustamente pa motibu di su fe?
11 Klaru ku no ta tur reproche ku sirbidónan individual di Dios ta eksperensiá ta pa “kousa di hustisia.” (Mateo 5:10) Algun problema por ta debí na nos propio imperfekshon. Nos no ta haña ningun mérito spesial si ora nos ta “peka i wòrdu tratá severamente, [nos] soportá esaki ku pasenshi.” Sin embargo, si “pa motibu di konsenshi pa ku Dios un hende wanta pena ora ku e ta sufri inhustamente,” lo e “haña aprobashon” di Yehova. (1 Pedro 2:19, 20) Bou di ki sirkunstansianan esaki por sosodé?
12 Tin kristiannan ku a sufri maltrato pasobra nan a nenga di partisipá den kustumbernan di entiero ku ta kontra di prinsipionan bíbliko. (Deuteronomio 14:1) Hóbennan Testigu tabata e blanko di insultonan konstante pasobra nan ta pega na Yehova su normanan moral. (1 Pedro 4:4) Algun mayor kristian a ser akusá eróneamente di ta “negligente” òf “abusadó” pasobra nan a buska tratamentu sin sanger pa nan yunan. (Echonan 15:29) Famia i bisiñanan a kibra tur kontakto ku sierto kristiannan djis pasobra nan a bira sirbidónan di Yehova. (Mateo 10:34-37) Tur e kristiannan ei ta siguiendo e ehèmpel ku e profetanan i asta Hesus a pone di sufri inhustamente.—Mateo 5:11, 12; Santiago 5:10; 1 Pedro 2:21.
Soportá Reproche di Buena Gana
13. Kiko por yuda nos mantené nos balansa spiritual ora nos ta konfrontá reproche òf insultonan severo?
13 Ora nos ta konfrontá reproche òf insultonan severo debí na nos fe, nos por bira desanimá, meskos ku profeta Jeremias, i sinti ku nos no por sigui sirbi Dios. (Jeremias 20:7-9) Kiko por yuda nos mantené nos balansa spiritual? Purba mira e asuntu for di Yehova su punto di bista. E ta konsiderá esnan ku ta keda fiel bou di prueba komo vensedó, no komo víktima. (Romanonan 8:37) Purba visualisá den bo mente e personanan ku a sostené Yehova su soberania apesar di tur indignidat ku Diabel a lansa kontra nan, tantu hòmber komo muhé, manera por ehèmpel Abel, Jòb, Maria mama di Hesus, i otro sirbidónan fiel di pasado, i tambe nos rumannan den fe di tempu moderno. (Hebreonan 11:35-37; 12:1) Meditá riba nan bida di integridat. Ta komo si fuera e nubia grandi ei di personanan fiel ta yama nos pa bin para huntu ku nan riba e plataforma di viktoria ku tin reservá pa esnan ku pa medio di nan fe ta vense mundu.—1 Juan 5:4.
14. Kon orashon ferviente por fortalesé nos pa keda fiel?
14 Si ‘nos preokupashonnan ta bira hopi den nos,’ nos por akudí na Yehova den orashon ferviente, i lo e konsolá nos i fortalesé nos. (Salmo 50:15; 94:19) Lo e duna nos e sabiduria nesesario pa nos enfrentá e prueba i lo e yuda nos keda enfoká riba e kuestion grandi—Yehova su soberania—ku tin tras di e odio sin motibu ku su sirbidónan ta eksperensiá. (Santiago 1:5) Tambe Yehova por duna nos “e pas di Dios, ku ta surpasá tur komprondementu.” (Filipensenan 4:6, 7) E trankilidat aki ku Dios ta duna, ta kapasitá nos pa keda kalmu i desididu apesar di preshon ekstremo, sin entregá na duda òf miedu. Mediante su spiritu santu, Yehova por sostené nos atraves di loke sea e permití bin riba nos.—1 Korintionan 10:13.
15. Kiko por yuda nos pa no bira amargá ora nos ta sufri?
15 Kiko por yuda nos pa nos no bira amargá òf haña rabia riba hende ku ta odia nos sin motibu? Kòrda ku nos atversarionan prinsipal ta Satanas i e demoñonan. (Efesionan 6:12) Ounke tin algun hende ku konsientemente i deliberadamente ta persiguí nos, hopi di esnan ku ta oponé e pueblo di Dios ta hasi esei pa motibu di ignoransia òf pasobra nan ta ser manipulá dor di otro hende. (Daniel 6:4-16; 1 Timoteo 1:12, 13) Yehova ta deseá pa ‘tur klase di hende’ haña e oportunidat di “wòrdu salbá i yega na konosementu di e bèrdat.” (1 Timoteo 2:4) De echo, algun persona ku ántes tabata oponé nos awor ta nos rumannan kristian dor ku nan a opservá nos kondukta intachabel. (1 Pedro 2:12) Ademas, nos por siña un lès for di e ehèmpel di Hosé, yu di Jakòb. Ounke Hosé a sufri masha hopi pa falta di su mitar rumannan, e no a karga renkor kontra nan. Dikon nò? Pasobra e por a mira ku Yehova su man tabata den e asuntu, maniobrando susesonan pa kumpli ku Su propósito. (Génesis 45:4-8) Asina tambe Yehova por pone ku kualke sufrimentu inhustu ku nos pasa aden por resultá pa e gloria di su nòmber.—1 Pedro 4:16.
16, 17. Dikon nos no mester bira muchu preokupá pa e esfuersonan di opositor pa stroba e trabou di prediká?
16 Nos no mester ta indebidamente preokupá si pa un tempu ta parse ku opositornan tin éksito den stroba e bon nobo di progresá. Yehova ta sagudiendo e nashonnan aworakí pa medio di e testimonio mundial ku ta ser duná, i e rikesa òf kosnan deseabel ta drentando. (Hageo 2:7) Kristu Hesus, e Bon Wardadó, a bisa: “Mi karnénan ta tende mi bos, i mi konosé nan, i nan ta sigui mi; i mi ta duna nan bida eterno, . . . i ni un hende lo no ranka nan for di mi man.” (Juan 10:27-29) E angelnan santu tambe ta enbolbí den e gran kosecha spiritual. (Mateo 13:39, 41; Revelashon 14:6, 7) P’esei, nada ku opositornan bisa òf hasi, por stroba Dios su propósito.—Isaias 54:17; Echonan 5:38, 39.
17 Hopi bes e esfuerso di opositornan ta resultá nèt lo kontrario di loke tabata nan intenshon. Den un komunidat afrikano, hende a plama hopi mentira teribel tokante Testigunan di Yehova, inkluso ku nan tabata adoradónan di Diabel. Debí na esaki, ki ora ku e Testigunan tabata pasa na su kas, Grace a kore bai skonde patras di kas i a keda einan te ora nan a bai. Un dia e pastor di su misa a mustra un di nos publikashonnan i a bisa tur presente pa nan no les’é pasobra lo e por a pone nan bandoná nan fe. Esaki a lanta Grace su kuriosidat. E siguiente biaha ku e Testigunan a pasa, en bes di skonde, el a papia ku nan i a risibí su ehemplar personal di e publikashon. Nan a kuminsá un studio di Beibel kuné, i el a batisá na 1996. Awor Grace ta usa su tempu pa buska otro hende ku kisas a ser malinformá tokante Testigunan di Yehova.
Fortifiká Bo Fe Awor
18. Dikon ta nesesario pa fortifiká nos fe promé ku pruebanan severo surgi, i kon nos por hasi esei?
18 Ya ku Satanas por ataká nos un ora pa otro ku odio sin motibu, ta masha importante pa nos fortifiká nos fe awor. Kon nos por hasi esaki? Un informe for di un pais kaminda e pueblo di Yehova tabata ser persiguí a bisa: “Tin un kos ku a bira masha bisto: Kristiannan ku tin bon kustumbernan spiritual i un apresio profundo pa e bèrdat bíbliko no tin problema pa para firme ora nan haña nan ku prueba. Pero esnan ku den ‘tempu faborabel’ ta falta reunion, ta iregular den sirbishi di vèlt i ta komprometé nan fe den kosnan chikitu, hopi bes ta kai ora nan haña nan ku un prueba ‘ardiente.’” (2 Timoteo 4:2, NW) Si abo mira áreanan den kua bo por mehorá, traha duru pa hasi esei sin tarda.—Salmo 119:60.
19. Kiko e integridat ku Dios su sirbidónan a warda apesar di ser odiá sin motibu, a logra?
19 E integridat ku adoradónan berdadero a warda apesar di e plaga di odio satániko ta un testimonio bibu ku Yehova su soberania ta legítimo, hustu i meresí. Nan fieldat ta hasi Dios su kurason kontentu. Ounke hende kisas ta montoná reproche riba nan, Esun kende su dignidat ta mas haltu ku shelu i tera “no tin bèrgwensa di wòrdu yamá nan Dios.” De echo, korektamente Beibel por bisa di tur e personanan fiel ei ku “mundu no tabata digno di nan.”—Hebreonan 11:16, 38.
[Nota]
^ par. 2 Den e Skritura, e palabra “odia” tin diferente nifikashon. Den algun konteksto, e ke men simplemente stima ménos. “Odia” por nifiká tambe un repugnansia fuerte pa algu pero sin intenshon di kousa daño na dje, purbando mas bien di evit’é debí ku bo ta sinti asko di dje. Sin embargo, e palabra “odia” por indiká tambe hostilidat intenso, un renkor kontinuo hopi bes kompañá pa malisia. Ta e sentido aki di e palabra nos ta trata den e artíkulo aki.
Abo Por Splika?
• Kiko tin tras di e odio sin motibu dirigí kontra adoradónan berdadero?
• Kon Satanas a usa reproche òf insulto den un intento pa kibra e integridat di Jòb i Hesus?
• Kon Yehova ta fortifiká nos pa para firme apesar di odio satániko?
[Preguntanan di Estudio]
[Kuadro/Plachi na página 16]
Nan A Komprondé Kiko Ta e Berdadero Kuestion
Un Testigu di Yehova na Ukrania, kaminda e trabou di prediká e Reino tabata prohibí pa mas ku 50 aña, a komentá: “Nos no mester evaluá e situashon di e Testigunan di Yehova únikamente den e konteksto di relashonnan humano. . . . Mayoria di e funshonarionan tabata simplemente kumpli ku nan trabou. Ora ku gobièrnu a kambia, e funshonarionan tambe a kambia di banda, pero nos a keda meskos. Nos tabata konsiente di e echo ku Beibel a revelá e berdadero fuente di nos difikultatnan.
Nos no a mira nos mes komo djis víktimanan inosente di hòmbernan opresivo. Loke a yuda nos perseverá tabata un komprondementu kla di e kuestion ku a surgi den hòfi di Edén: e kuestion di Dios su derecho di goberná. . . . Nos a tuma nos posishon na fabor di un kuestion ku no tabata ligá solamente ku interesnan personal di sernan humano, sino tambe ku e interesnan di e Soberano di universo. Nos konosementu mas elevá di e berdadero kuestionnan enbolbí a hasi nos fuerte i a yuda nos mantené nos integridat asta bou di e sirkunstansianan di mas ekstremo.”
[Plachi]
Victor Popovych, arestá na 1970
[Plachi na página 13]
Ken tabata tras di e reproche ku nan a someté Hesus na dje?
[Plachinan na página 15]
Jòb, Maria i sirbidónan di Dios di tempu moderno, manera Stanley Jones, a sostené Yehova su soberania