Buskamentu di Felisidat

UN PAR di aña pasá, nan a hasi hendenan na Alemania, Fransia, Gran Bretaña i Merka, e pregunta aki: “Kiko bo tin mester pa bo ta felis?” Di esnan entrevistá, 89 porshento a bisa un bon salú; 79 porshento a menshoná un matrimonio òf relashon ku ta duna satisfakshon; 62 porshento a menshoná e rekompensanan di ta un mayor; i 51 porshento tabata pensa ku un karera eksitoso ta e faktor desisivo pa felisidat. I ounke sabiduria tradishonal ta spièrta ku plaka no ta garantisá felisidat, 47 porshento di esnan entrevistá sí tabata konvensí ku plaka ta duna felisidat. Kiko echo ta mustra?

Na promé lugá, wak e supuesto konekshon entre plaka i felisidat. Un sondeo di e shen personanan mas riku na Merka a mustra ku nan no ta mas felis ku hende en general. Ademas, ounke hopi hende na Merka a kasi dòbel nan poseshonnan material den e último 30 añanan, nan no ta niun tiki mas felis ku nan tabata na ántes, segun ekspertonan di salú mental. De echo, un informe a bisa: “Atraves di e mesun periodo ei, e porsentahe di depreshon a subi drástikamente. Suisidio di tinernan a bira tripel. Sifranan di divorsio a bira dòbel.” Den alrededor di 50 pais, investigadónan ku a studia e konekshon entre plaka i felisidat a yega na e konklushon ku plaka no por kumpra felisidat.

Awor, kon importante e faktornan manera bon salú, un matrimonio ku ta duna satisfakshon i un karera eksitoso ta pa felisidat? Wèl, si e faktornan aki tabata apsolutamente nesesario pa hasi un hende felis, kiko ta para di e miónes di hendenan ku no ta gosa di bon salú i tur esnan ku no tin un bon matrimonio? Kiko di parehanan kasá sin yu i tur e hòmber- i muhénan ku no tin un karera eksitoso? Tur e personanan ei ta destiná na un bida infelis? I e supuesto felisidat di e hendenan ku aktualmente ta gosa di bon salú i un matrimonio ku ta duna nan satisfakshon lo disparsé si nan situashon kambia?

Nos Ta Buskando Felisidat na e Kamindanan Korekto?

Tur hende ke ta felis. Esaki no ta un sorpresa pasobra e Kreadó di hende ta ser deskribí komo “e Dios felis,” i el a krea hende den su imágen. (1 Timoteo 1:11, NW; Génesis 1:26, 27) Pues, ta masha natural ku hende ta buska felisidat. Sin embargo, hopi hende ta deskubrí ku tene un gara riba felisidat ta meskos ku tene santu den bo man; ámbos ta sali for di bo man fásilmente.

 Lo por ta posibel ku tin hende ta hasi demasiado esfuerso pa haña felisidat? Filósofo sosial Eric Hoffer a pensa ku sí. El a komentá: “E búskeda di felisidat ta un di e kousanan prinsipal di infelisidat.” Esei siguramente ta e kaso si nos ta buska felisidat kaminda no mester ta. Den tal kaso, definitivamente nos lo haña nos ku desepshon i frustrashon. Purba bira riku; lucha pa gana fama òf rekonosementu; sigui tras di metanan polítiko, sosial òf ekonómiko; òf djis hiba un bida ku ta konsentrá riba nos mes i riba satisfasé nos propio deseonan inmediatamente—ningun di e kosnan aki no ta duna nos felisidat. No ta nada straño anto ku tin hende a adoptá e punto di bista iróniko ekspresá dor di un eskritor ku a bisa: “Si nos djis stòp di kore tras di felisidat nos lo por biba basta dushi.”

Un punto hopi notabel ta ku e enkuesta menshoná na prinsipio di e artíkulo aki a mustra tambe ku 40 porshento di e hendenan tabata di opinion ku bo ta haña felisidat dor di hasi bon i yuda otro hende. Anto 25 porshento a enfatisá ku fe i konvikshon religioso ta hunga un papel importante den ser felis. Klaramente, nos tin ku analisá mas profundo ta kiko ta nesesario pa hasi nos berdaderamente felis. E siguiente artíkulo lo yuda nos hasi esei.

[Plachinan na página 3]

Hopi hende ta pensa ku plaka, un dushi bida di famia òf un karera eksitoso, ta e yabi pa felisidat. Bo ta di akuerdo?