E Orashon di Nos Tata—Loke E Ta Nifiká pa Bo

E ORASHON di Nos Tata ku Hesukristu a siña hende den e Sermon Riba Seru, ta den Beibel na Mateo kapítulo 6, versíkulo 9 te ku 13. Djis promé ku el a siña hende e orashon aki, Hesus a bisa: “Ora bo ta hasi orashon, no keda ripití palabranan bano manera e paganonan ta hasi, pasobra nan ta kere ku nan lo wòrdu tendí pa motibu di nan kantidat di palabra.”—Mateo 6:7.

Pues, sin duda Hesus su intenshon no tabata pa hende ripití e Orashon di Nos Tata palabra pa palabra. Ta bèrdat ku despues e mes a ripití e orashon aki pa e benefisio di otro oyentenan. (Lukas 11:2-4) Pero e palabranan den e Evangelio di Mateo no ta meskos ku esnan menshoná den Lukas. Ademas, ora Hesus i su disipelnan a hasi orashon mas despues, nan no a usa presis e mesun palabranan di su orashon modelo.

Dikon e Orashon di Nos Tata ta den Beibel? Mediante e modelo aki, Hesus ta siña nos kon pa hasi orashon di tal manera ku e por ta aseptabel pa Dios. Den e orashon aki nos ta haña tambe kontesta pa sierto pregunta importante tokante bida. P’esei laga nos konsiderá un pa un kada parti di e Orashon di Nos Tata.

Kon Ta Dios Su Nòmber?

“Nos Tata ku ta den shelu, bo nòmber sea santifiká.” (Mateo 6:9) E orashon modelo ta kuminsá ku e palabranan ei i ta yuda nos hala serka Dios dor di yam’é “nos Tata.” Meskos ku un mucha ku di mes ta sintié atraí na un mayor amoroso i komprensivo, nos por aserká nos Tata selestial ku e konfiansa ku e ta deseá di tende nos. Rei David a kanta: “Abo ku ta skucha orashon, serka bo tur hende ta bin.”—Salmo 65:2.

Hesus a siña nos resa pidi pa Dios su nòmber sea santifiká òf apartá komo santu.  Pero kon ta Dios su nòmber? Beibel ta kontestá ku e siguiente palabranan: “Abo, kende su nòmber ta Yehova, abo so ta e Haltísimo riba henter tera.” (Salmo 83:18, NW) Bo a yega di mira e nòmber Yehova?

De echo, por haña e nòmber di Dios, Yehova, kasi 7.000 bes den e manuskritonan hopi bieu di Beibel. Sin embargo, tin traduktor a bai asina leu di a saka e nòmber aki for di nan vershonnan di Beibel. P’esei ta na su lugá pa nos resa pidi pa nos Kreadó santifiká su nòmber, òf hasié santu. (Ezekiel 36:23) Un manera pa aktua na armonia ku e orashon ei ta dor di usa e nòmber Yehova ora nos ta resa na Dios.

Un señora ku yama Patricia a lanta komo katóliko i tabata konosé e Orashon di Nos Tata bon. Kon el a reakshoná ora un Testigu di Yehova a mustr’é Dios su nòmber den Beibel? “Mi no por a kere!” el a bisa tur emoshoná. El a sigui bisa: “P’esei mi a kue mi mes Beibel, i e tabata eiden tambe. Kaba e Testigu a mustra mi Mateo 6:9 i 10, anto a splika mi ku e Orashon di Nos Tata indirektamente ta referí na Dios su nòmber. Mi tabata ègt emoshoná i a pidié pa studia Beibel ku mi.”

E Boluntat di Dios Lo Sosodé Riba Tera

“Ku bo reino bin. Ku bo boluntat sosodé na tera meskos ku den shelu.” (Mateo 6:10) Di ki manera e parti aki di Hesus su orashon modelo lo kumpli? Mayoria hende ta imaginá ku shelu ta un lugá di pas i trankilidat. E Skritura ta menshoná ku shelu ta Yehova su “habitashon santu i glorioso.” (Isaias 63:15) Ta p’esei nos ta resa pa Dios su boluntat sosodé na tera “meskos ku den shelu”! Pero esaki lo sosodé un dia?

Yehova su profeta Daniel a predisí: “E Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan aki [riba tera], ma e mes lo dura pa semper.” (Daniel 2:44) Pronto e Reino òf gobièrnu selestial aki lo tuma akshon pa trese pas mundial mediante un gobernashon hustu.—2 Pedro 3:13.

Pidi pa e Reino di Dios bin i pa su boluntat sosodé riba tera ta un ekspreshon di fe ku lo no hiba na desepshon. Apòstel kristian Juan a skirbi: “Mi a tende un bos duru for di e trono, bisando: ‘Mira, e tabernakel di Dios ta meimei di hende, i e lo biba meimei di nan, i nan  lo ta su pueblo, i Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.’” Tambe Juan a agregá: “I Esun ku ta sintá riba e trono a bisa: . . . ‘Skirbi, pasobra e palabranan aki ta fiel i berdadero.’”—Revelashon 21:3-5.

Orashon i Nos Nesesidatnan Físiko

Hesus su palabranan den e orashon modelo a mustra ku ora nos ta resa nos mester ta mas interesá den kosnan ku tin di haber ku e nòmber di Dios i su boluntat. Sin embargo, e orashon modelo ta sigui ku petishonnan personal ku ta apropiá pa hasi na Yehova.

E promé di esakinan ta: “Duna nos awe nos pan di kada dia.” (Mateo 6:11) Esaki no ta un petishon pa rikesa material. Hesus a animá nos pa resa pidi pa “tur dia, duna nos nos pan di kada dia.” (Lukas 11:3, BPK) Na armonia ku e Orashon di Nos Tata, nos por resa ku e konfiansa ku Dios lo perkurá pa nos nesesidatnan di tur dia si nos ta stim’é i obedes’é.

Ora nos ta preokupá demasiado ku problemanan ekonómiko, esei lo por pone nos neglishá nos nesesidat spiritual i di e manera ei keda sin hasi loke Dios ta spera di nos. Pero si nos pone adorashon di Dios na promé lugá den nos bida, nos por tin sigur ku nos petishonnan pa nesesidatnan material manera por ehèmpel, kuminda i paña, lo wòrdu skucha faborablemente. Hesus a bisa: “Buska promé e reino di Dios i [Dios] su hustisia, i tur e kosnan aki lo wòrdu añadí na boso.” (Mateo 6:26-33) No ta fásil pa sigui buska Dios su hustisia, ya ku nos tur ta pekadó i ta den nesesidat di pordon. (Romanonan 5:12) E Orashon di Nos Tata ta trata e asuntu ei tambe.

Nos Orashonnan i Pordon

“Pordoná nos nos debenan, meskos ku nos tambe ta pordoná nos debedónan.” (Mateo 6:12) Den e Orashon di Nos Tata menshoná na Lukas, e “debenan” aki a wòrdu yama “pikánan.” (Lukas 11:4) Yehova Dios realmente lo pordoná nos pikánan?

Maske Rei David di Israel di antigwedat a kometé pikánan serio, el a arepentí i ku konfiansa el a pidi den orashon: “Abo, Señor, ta bon, i kla pa pordoná, i abundante den miserikòrdia pa tur esnan ku ta sklama na bo.” (Salmo 86:5) Esei sí ta un pensamentu alentador! Nos Tata selestial ta “kla pa pordoná” e pikánan di esnan ku repentí i akudí na dje. Sí, meskos ku un debe por wòrdu kanselá kompletamente, asina Yehova Dios por pordoná nos pikánan kompletamente.

Sin embargo, Hesus a menshoná ku tin un kondishon: Pa Dios pordoná nos, nos mester pordoná otro hende. (Mateo 6:14, 15) Ounke tres amigu di Jòb a maltrat’é, el a pordoná nan i asta a resa pa nan. (Jòb 42:10) Si nos pordoná hende ku peka kontra nos, nos lo agradá Dios i lo por benefisiá di su miserikòrdia.

E echo ku Dios ta dispuesto pa tende nos petishonnan mester konmové nos pa hasi esfuerso pa buska su aprobashon. I nos por hasi esei maske nos ta imperfekto. (Mateo 26:41) Den esaki tambe Yehova por yuda nos, presis manera Hesus a indiká den e último petishon importante di e orashon modelo.

Yudansa pa Hiba un Bida Hustu

“No hiba nos den tentashon, ma libra nos for di e malbado.” (Mateo 6:13) Yehova no ta keda sin yuda nos ora nos ta enfrentá tentashon ni e no ta pone nos kai den piká. Su Palabra ta bisa: “Pasobra Dios no por wòrdu tentá dor di maldat, i e mes no ta tenta ningun hende.” (Santiago 1:13) Dios ta permití pa nos wòrdu tentá, pero e por libra nos for di e Tentadó Prinsipal, esta, “e malbado” Satanas e Diabel.

Apòstel Pedro a urgi kompañeronan kristian: “Sea sobrio, sea alerta. Boso atversario, e Diabel, ta kana rònt manera un leon ku ta gruña, buskando ken e por devorá.” (1 Pedro 5:8) Figura bo, Satanas a tenta asta e hòmber perfekto Hesukristu! Kiko tabata e meta di  Diabel? Pa kita Hesus for di e adorashon puru di Yehova Dios. (Mateo 4:1-11) Si bo ta hasiendo esfuerso pa sirbi Dios, Satanas su meta ta pa devorá abo tambe!

Usando e mundu ku ta bou di su kontròl, Diabel lo por purba tenta nos pa hasi kosnan ku Dios no ta aprobá. (1 Juan 5:19) P’esei ta hopi importante pa nos akudí regularmente na Dios pa yudansa, spesialmente ora nos ta enfrentá un tentashon kontinuo. I si nos adorá Yehova na armonia ku su Palabra inspirá, Beibel, e lo libra nos dor di yuda nos resistí Diabel. Beibel ta bisa nos: ‘Dios ta fiel, i ku lo e no permití pa nos wòrdu tentá mas ku nos por soportá.’—1 Korintionan 10:13.

Fe den Dios Ta Esensial

Ta masha alentador pa sa ku nos Tata selestial ta interesá den kada un di nos! El a asta laga su Yu, Hesukristu, siña nos kon pa hasi orashon. Esaki sigur ta duna nos e deseo pa agradá Yehova Dios. Pero kon nos por hasi esei?

Beibel ta deklará: “Sin fe ta imposibel pa agrad’é [Dios], pasobra esun ku bin serka Dios mester kere ku e ta, i ku e ta esun ku ta rekompensá esnan ku ta busk’é.” (Hebreonan 11:6) Kon un hende por logra haña e fe ei? Beibel ta bisa: “Fe ta bin for di tendementu.” (Romanonan 10:17) Testigunan di Yehova ta keda masha kontentu pa papia tokante asuntunan bíbliko ku tur hende ku ta deseá di sirbi Dios ku berdadero fe.

Nos ta spera ku e konsiderashon aki di e Orashon di Nos Tata a yuda bo komprondé e nifikashon di e orashon mas profundamente. Dor di siña konosé Yehova mas mihó i tambe su rekompensa pa “esnan ku ta busk’é,” bo por fortalesé bo fe den Dios. Ohalá bo sigui siña mas tokante Dios i su propósitonan pa asina bo por tin un relashon íntimo ku bo Tata selestial pa semper.—Juan 17:3.

[Komentario na página 5]

“Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos ku den shelu. Duna nos awe nos pan di kada dia. I pordoná nos nos debenan, meskos ku nos tambe ta pordoná nos debedónan. I no hiba nos den tentashon, ma libra nos for di e malbado.”—Mateo 6:9-13

[Plachi na página 7]

Yehova ta perkurá pa e nesesidatnan di esnan ku ta stim’é

[Plachi na página 7]

Tambe Dios ta yuda nos resistí Diabel

[Plachi na página 7]

Si nos, meskos ku Jòb, pordoná hende ku peka kontra nos, nos lo por benefisiá di Dios su miserikòrdia