Un Bista Riba e Tesoronan di Chester Beatty

“RIKU na tesoronan di masha hopi sivilisashon pèrdí, . . . impreshonante den e beyesa di su miniaturanan i kuadronan.” Asina eks-direktor R. J. Hayes, a resumí e Biblioteka di Chester Beatty na Dublin, Irlanda. E biblioteka tin un kolekshon inmenso di kosnan antik baliosísimo, obranan di arte presioso i buki- i manuskritonan masha skars di balor kasi inkalkulabel. Pero ken Chester Beatty tabata? I kiko ta e tesoronan ku el a kolekshoná?

Alfred Chester Beatty a nase na 1875 na New York, Merka, di desendensia eskoses, irlandes i ingles. Pa ora e tabatin 32 aña, el a akumulá un fortuna grandi komo ingeniero i asesor di mina. Durante henter su bida el a usa su rikesa enorme pa kolekshoná artíkulonan di gran beyesa i ekselensia. Ora el a muri na 1968 na edat di 92 aña, Beatty a laga henter su kolekshon pa e pueblo di Irlanda.

Kiko El A Kolekshoná?

Beatty su kolekshon ta ekstenso i variá. Ora tin ekshibishon, nan ta mustra apénas 1 porshento di su kolekshon. El a kolekshoná artíkulonan presioso i sumamente skars ku a bin di masha hopi periodo i kultura ku ta abarká míles di aña; artíkulonan europeo di Edat Medio i di Renaissance i tambe kosnan for di kantidat di pais asiátiko i afrikano. Por ehèmpel, su kolekshon di kuadronan hapones sumamente presioso grabá den palu ta ser konsiderá un di esnan mas fini na mundu.

Un kontraste grandi ku e obranan di arte fini, ta e kolekshon hopi interesante di mas ku shen tabla di klei di Babilonia i Sumer ku kosnan skirbí riba nan den spijkerschrift di antigwedat. Hende ku tabata biba na Mesopotamia mas ku 4.000 aña pasá, a skirbi relatonan detayá di nan bida riba tablanan di klei muhá, ku despues nan a hinka den fòrnu. Hopi di e tablanan ei a keda eksistí te den nos tempu i ta duna nos evidensia bon kla kon bieu e arte di skirbi ta.

Su Fasinashon ku Buki

Ta parse ku e abilidat artístiko enbolbí den trahamentu di buki di kalidat fini, a atraé Chester Beatty masha hopi. El a kolekshoná míles di buki religioso i no-religioso, inkluso algun ehemplar di Koran ku dekorashonnan masha elaborá. Segun un eskritor, Beatty tabata “fasiná ku e proporshonnan matemátiko di e letra arabir, . . . i su sentido di koló a ser stimulá dor di e manera ku nan a dòrna e kaligrafia ku kapanan fini di oro i plata i ku otro mineralnan di koló bibu.”

E piedra presioso “yade” a fasiná Chester Beatty, meskos ku el a fasiná algun di e emperadornan di China den siglonan mas promé. E emperadornan tabata konsiderá yade fini komo e mineral di mas presioso ku tur, i hopi mas balioso ku oro. E gobernantenan aki a enkargá artesanonan ábil pa transformá blòkinan di yade den blachinan fini i lizu. Artistanan talentoso e ora ei a yena e páginanan aki di yade ku kaligrafia fini i plachinan grabá ku oro, i asina a produsí algun di e bukinan mas asombroso ku hende hamas a traha. Beatty su kolekshon di e bukinan aki ta gosa di renombre mundial.

Manuskritonan Baliosísimo di Beibel

Pa amantenan di Beibel, Chester Beatty su tesoronan di mas grandi ta su inmenso kolekshon di manuskritonan di Beibel di antigwedat i di Edat Medio.  E manuskritonan masha bunita dekorá ta reflehá e pasenshi i abilidat artístiko di e eskribanan ku a kopia nan na man. E bukinan imprimí ta demostrá e abilidat i artesania di e promé imprimidónan i trahadónan di buki. Por ehèmpel, Anton Koberger a imprimí e Biblia Latina na Nuremberg na aña 1479. El a biba rònt di e tempu di Johannes Gutenberg i ta ser deskribí komo “un di e promé imprimidónan di mas importante i aktivo.”

Un di e artíkulonan eksepshonal di e Biblioteka di Chester Beatty ku ta ser ekshibí ta un manuskrito riba pèrkamènt di prinsipio di siglo 4 skirbí dor di Ephraem, un komentarista sirio. Ephraem ta sita ekstensamente for di un obra di siglo 2 yamá Diatessaron. Den e obra ei e eskritor Tasiano a kombiná e kuater relatonan di Evangelio di e bida di Hesukristu den un solo narashon armonioso. Eskritornan ku a biba mas despues a referí hopi biaha na e Diatessaron, pero no tin ningun ehemplar di dje awe. Algun komentarista di siglo 19 asta tabata duda ku el a eksistí. Sin embargo, na 1956 Beatty a deskubrí Ephraem su komentario riba Tasiano su obra Diatessaron. Esei tabata un deskubrimentu ku a duna mas evidensia ku Beibel ta outéntiko i verídiko.

Un Tesoro di Manuskritonan di Papiro

Beatty a kolekshoná tambe un kantidat enorme di manuskrito di papiro, tantu di temanan religioso komo no-religioso. Mas ku 50 kodèks (buki di papiro) ta data promé ku siglo 4 di nos era. Algun di e papironan aki a ser reskatá for di montonnan grandi di papiro—básikamente dùmpnan di papiro—ku pa siglonan tabata den desierto di Egipto sin ku hende sa. Hopi di e dokumentonan di papiro tabata na pida-pida ora hende a pone nan na benta. Bendedónan tabata bin ku kahanan yen di pida papiro. Segun Charles Horton, direktor di e Kolekshon Oksidental di e Biblioteka di Chester Beatty, “e personanan interesá pa kumpra e papironan, simplemente tabata hinka man den e kaha i piki e fragmentonan mas grandi ku tabatin mas tantu kos skirbí riba nan.”

Horton a bisa ku Beatty su “deskubrimentu mas sensashonal,” a konsistí di kodèksnan balioso di Beibel ku “a inkluí algun di e kopianan mas bieu konosí di e Tèstamènt Bieu i Nobo di e kristiannan.” Por ta masha bon ku ta bendedónan ku tabata sa kuantu balor e kodèksnan tin, a sker nan pa bende nan lòs ku diferente kumpradó. Sin embargo, Beatty a logra kumpra e kantidat mas grandi di e hayasgo. Kon importante e kodèksnan aki ta? Sir Frederic Kenyon a deskribí nan deskubrimentu komo “sin duda esun mas importante” desde ku Tischendorf a deskubrí e Kodèks Sináitiko na aña 1844.

E kodèksnan aki ta data di entre siglo 2 pa siglo 4 di nos era. Entre e bukinan di e Skritura Hebreo ku tin den e vershon Septuaginta na griego tin dos ehemplar di Génesis. Segun Kenyon esakinan tin balor spesial ‘pasobra den e manuskritonan di pèrkamènt di siglo 4 di Vatikano i Sináitiko ta falta kasi henter e buki di Génesis.’ Tin tres kodèks ku ta kontené bukinan di e Skritura Griego Kristian. E promé kodèks tin mayor parti di e kuater Evangelionan i gran parti di e buki di Echonan. E di dos kodèks, ku páginanan adishonal ku Beatty a optené despues, tin un ehemplar kasi kompletu di e kartanan di apòstel Pablo, inkluso su karta na e Hebreonan. E di tres kodèks ta kontené kasi un tersera parti di e buki di Revelashon. Segun Kenyon, e papironan aki a “fortalesé ku evidensia hopi palpabel e base—ya kaba hopi  fuerte—di nos konfiansa den e teksto di e Tèstamènt Nobo manera nos tiné awe.”

E papironan bíbliko di Chester Beatty ta demostrá ku kristiannan a kuminsá usa e kodèks na un fecha hopi trempan, probablemente promé ku fin di siglo un di nos era. E kodèks, esta, un buki di página, a remplasá e uso di e ròlnan ku tabata difísil pa hèndel. E papironan ta demostrá tambe ku komo ku material pa skirbi ariba tabata skars, kopistanan hopi bes a bolbe usa papelnan bieu di papiro. Por ehèmpel, un manuskrito kóptiko ku tin un parti di e Evangelio di Juan ta skirbí “den loke ta parse un buki di tarea di skol ku tin sòm griego.”

E dokumentonan aki di papiro no ta di un beyesa ekstraordinario, pero nan ta baliosísimo. Nan ta konektá nos na un manera visibel i palpabel ku e komienso di kristianismo. Charles Horton a bisa: “Aki, dilanti bo propio wowo, bo por mira e klase di bukinan ku algun di e promé komunidatnan kristian a usa, bukinan ku nan tabata balorá manera un tesoro.” (Proverbionan 2:4, 5) Si bo haña chèns di wak algun di e tesoronan aki den e Biblioteka di Chester Beatty, lo bo no keda desepshoná.

[Plachi na página 31]

Kuadro hapones grabá den palu dor di Katsushika Hokusai

[Plachi na página 31]

E “Biblia Latina” tabata un di e promé ehemplarnan di Beibel ku nan a imprimí

[Plachi na página 31]

Ephraem su komentario riba e “Diatessaron” di Tasiano ta reforsá e outentisidat di Beibel

[Plachi na página 31]

Chester Beatty P45, un di e kodèksnan mas bieu na mundu, ta kontené mayor parti di e kuater Evangelionan i gran parti di e buki di Echonan den un solo volúmen

[Rekonosementu pa Potrèt na página 29]

Reprodusí ku e pèrmit bondadoso di The Trustees of the Chester Beatty Library, Dublin

[Rekonosementu pa Potrèt na página 31]

Tur potrèt: Reprodusí ku e pèrmit bondadoso di The Trustees of the Chester Beatty Library, Dublin