Ken Ta e Mihó Lider pa Nos Tempu?

Na 1940 tabatin un krísis di liderato den Parlamento Britániko. David Lloyd George di 77 aña di edat, kende a guia Gran Bretaña na viktoria den e Promé Guera Mundial, tabata skucha e debate, i e por a evaluá na un manera skèrpi e trabou di funshonarionan haltu debí ku e mes tabatin hopi aña den polítika. Den un diskurso ku el a pronunsiá den e Kámara di Komunnan dia 8 di mei, el a deklará: “E nashon ta prepará pa tur sakrifisio basta ku e tin liderato, basta ku Gobièrnu mustra bon kla kiko ta su metanan i basta ku e nashon ta sigur ku su lidernan ta hasiendo nan bèst.”

E PALABRANAN di Lloyd George ta mustra bon kla ku pueblo ta ferwagt di nan lidernan ku nan ta kompetente i ku nan ta hasi esfuerso sinsero pa purba mehorá kosnan. Un kolaboradó di kampaña elektoral a splik’é den e forma aki: “Ora pueblo vota pa un presidente, nan ta basha nan voto riba un kandidato den kende su man nan ta konfia nan bida, nan futuro i nan yunan.” Pa salbaguardiá e konfiansa ei, e tin un tarea enorme su dilanti. Dikon?

Wèl, nos mundu ta kargá ku problema ku ta parse imposibel pa solushoná. Por ehèmpel, kua lider a demostrá di ta dje sabí i poderoso ei ku e por kaba ku krímen i guera? Ken entre e lidernan djawe tin e rekursonan i kompashon pa perkurá alimento, awa limpi i kuido médiko pa tur hende? Ken tin e konosementu i determinashon pa protehá i drecha e medio ambiente? Ken ta sufisientemente kompetente i poderoso pa garantisá ku henter humanidat lo disfrutá di un bida largu i felis?

Hende No Tin e Kapasidat

Nos no por nenga ku algun lider á logra sierto éksito. Pero, di mas tantu tempu ku nan por sirbi ta un par di dékada—i despues ken ta sigui nan? Un di e lidernan di mas kompetente ku a yega di biba, Rei Salomon di Israel di antigwedat, a meditá riba e pregunta aki, anto el a yega n’e siguiente konklushon: “Mi tabata odia tur e fruta di mi trabou ku mi a traha p’e bou di solo, pasobra mi mester lag’é pa e hende ku lo bin despues di mi. I ken sa si e lo ta un hende sabí òf un hende bobo.  Tòg e lo tin kontròl riba tur fruta di mi trabou ku mi a traha p’e dor di aktua ku sabiduria bou di solo. Esaki tambe ta banidat.”—Eklesiastés 2:18, 19.

Salomon no tabata sa si su susesor lo a sigui ku su bon trabou òf daña tur kos. Pa Salomon, e siklo di gobernantenan ku ta sigui otro tabata “banidat.” Un otro tradukshon di Beibel ta yama e proseso aki algu “apsurdo.”

Tin biaha, kambio forsoso di gobernantenan sa bai kompañá ku uso di violensia. Lidernan kapas a ser matá ora nan tabata den pleno funshon. Abraham Lincoln, un eks-presidente di Merka altamente respetá, a yega di bisa un ouditorio: “Mi a ser skohé pa okupá un puesto importante pa un periodo kòrtiku, i awor, den boso bista, mi a risibí un poder ku pronto lo pasa pa historia.” En bèrdat su periodo komo mandatario tabata kòrtiku. Apesar di tur loke el a logra i su deseo pa hasi mas pa hende, Presidente Lincoln a goberná su pais pa apénas kuater aña. Na kuminsamentu di su di dos periodo di gobernashon, un hòmber ku kier a mira un kambio di liderato a asesin’é.

Ni e mihó lidernan humano no por garantisá nan mes futuro. Akaso bo por konfia nan anto pa garantisá esun di bo? Beibel ta bisa: “No konfia den prensnan, den yu di hende, den kende no tin salbashon. Su spiritu ta sali, e ta bolbe na tera; e mes dia ei su pensamentunan ta peresé.” Den e tradukshon di Byington e último parti di versíkulo 4 ta bisa: “Riba e dia ei su bon boluntat ta kaba na nada.”—Salmo 146:3, 4.

Kisas e konseho pa no konfia den lidernan humano ta duru pa aseptá. Pero Beibel no ta bisa ku hende hamas lo por haña un lider ku ta bon i stabil. Isaias 32:1 ta bisa: “Mira, un rei lo reina ku hustisia.” Yehova Dios, Kreadó di hende, a prepará “un rei,” un Lider, ku pronto lo tuma kontròl kompletu di asuntunan di tera. Ken e ta? Profesia di Beibel ta bisa ken e ta.

 Unu Ku di Bèrdat Ta Kualifiká pa Dirigí

Dos mil aña pasá, un angel a bisa un mosa hudiu ku yama Maria: “Lo bo konsebí den bo matris i duna lus na un yu hòmber, i lo bo yam’é Hesus. E lo ta grandi i lo wòrdu yamá Yu di e Haltísimo; i Señor Dios lo dun’é e trono di su tata David; i e lo reina riba e kas di Jakòb pa semper, i su reino lo no tin fin.” (Lukas 1:31-33) Sí, Hesus di Názarèt ta e Rei profetisá den Beibel.

Hopi bes obranan di arte religioso ta pinta Hesus komo un beibi òf ku un aparensia débil i malnutrí òf komo un hende ku a priva su mes di tur goso den bida i kende, sin ningun resistensia, ta aseptá tur loke otronan hasi kuné. E imágennan aki no ta inspirá konfiansa den dje komo Gobernante. Sin embargo, e berdadero Hesukristu di Beibel a krese bira un hòmber maduro, yen di vigor, entusiasmo i inisiativa. I e tabata poseé otro karakterístika ku a hasié un lider hopi kompetente. (Lukas 2:52) Aki ta sigui algun aspekto di su personalidat sobresaliente.

Hesus a mantené integridat perfekto. Su kondukta tabata asina onesto i rekto ku el a reta su enemigunan públikamente pa presentá un akusashon válido kontra dje. Nan no tabata por. (Juan 8:46) Su siñansanan liber di hipokresia a logra konvensé hopi hende sinsero pa bira su siguidó.—Juan 7:46; 8:28-30; 12:19.

Hesus tabata kompletamente dediká na Dios. E tabata asina determiná pa kaba ku e trabou ku Dios a dun’é, ku ningun oponente—ni humano ni demoniako—no por a strob’é. Atakenan violento no a spant’é. (Lukas 4:28-30) E no a laga kansansio i hamber desanim’é. (Juan 4:5-16, 31-34) I maske su amigunan a bandon’é, hamas el a desviá for di su meta.—Mateo 26:55, 56; Juan 18:3-9.

Hesus tabatin interes profundo den hende. El a perkurá kuminda pa hende ku tabatin hamber. (Juan 6:10, 11) El a konsolá hende deprimí. (Lukas 7:11-15) El a kura hende siegu, surdu i enfermo. (Mateo 12:22; Lukas 8:43-48; Juan 9:1-6) El a stimulá su apòstelnan ku tabata trahadónan diligente. (Juan, kapítulo 13-17) El a resultá di ta “e bon wardadó” ku a kuida su karnénan.—Juan 10:11-14.

Hesus tabata dispuesto pa traha. El a laba pia di e apòstelnan p’e por a siña nan un lès importante. (Juan 13:4-15) Su mes pia a yena ku stòf segun ku e tabata prediká e bon nobo riba e kamindanan di tera di Israel. (Lukas 8:1) Asta ora el a plania pa sosegá na “un lugá solitario,” el a atendé e multitut ku a bin busk’é pa haña mas instrukshon. (Marko 6:30-34) Asina el a pone un ehèmpel pa tur kristian di kiko ke men ser diligente.—1 Juan 2:6.

Hesus a terminá su asignashon i a bandoná tera. Komo rekompensa pa su fieldat, Yehova Dios a dun’é un reino i inmortalidat den shelu. Beibel ta bisa di Hesus resusitá: “Kristu, siendo lantá for di e mortonan, lo no muri nunka mas.” (Romanonan 6:9) Bo por tin sigur ku e ta e mihó Lider pa humanidat. Unabes Kristu Hesus tuma mando kompletu riba tera, lo no tin nesesidat mas pa duna ningun otro hende poder pa fungi komo lider, i nunka mas lo tin ku trese kambio den liderato. Nunka lo e ser kitá for di su puesto durante su periodo di gobernashon, i ningun susesor inkapas lo bin eliminá òf daña loke el a logra. Pero kiko spesífikamente lo e hasi pa benefisiá humanidat?

Loke e Lider Nobo Aki Lo Hasi

Salmo 72 ta duna nos algun detaye profétiko di e manera ku e Rei perfekto i inmortal aki lo goberná. Den versíkulo 7 i 8 nos ta lesa: “Den su dianan laga e hustu floresé, i laga tin abundansia di pas te ora ku no tin luna mas. Lag’é goberná tambe di laman pa laman, i for di Riu Eufrates te na e finnan di tera.” Bou di su gobernashon benefisioso, habitantenan di tera lo disfrutá di siguridat eterno sin interupshon. Lo e destruí tur arma eksistente i lo e  eliminá for di hende su kurason asta e deseo pa hasi guera. E personalidat di e hendenan ku awe ta ataká otro manera leon feros òf ku ta aktua manera ber brabu kontra nan próhimo lo kambia kompletamente. (Isaias 11:1-9) Pas lo ta abundante.

Salmo 72 ta bisa mas aleu den versíkulo 12 pa 14: “E lo libra esun den nesesidat ora ku e sklama pa yudansa, esun afligí tambe i esun ku no tin ningun hende pa yud’é. E lo tin kompashon di e pober i di esun den nesesidat, i e lo salba bida di esnan den nesesidat. E lo reskatá nan bida for di opreshon i violensia; i nan sanger lo ta presioso den su bista.” Hende pober, esnan den nesesidat i esnan afligí lo bira parti di un solo famia humano felis, uní bou di e liderato di e Rei Hesukristu. Nan bida lo ta karakterisá pa goso, i no pa doló i desesperashon.—Isaias 35:10.

Versíkulo 16 ta primintí: “Lo tin abundansia di maishi den e tera, riba kabes di e serunan [“lo tin sobreabundansia,” NW].” Awe miónes di hende riba tera ta bai drumi tur dia ku hamber. Hopi bes polítika i golosidat ta stroba hende di yega na un repartishon hustu di sufisiente kuminda, di manera ku multitut di hende, foral mucha, ta muri di malnutrishon. Bou di e mando di Hesukristu, e problema aki lo disparsé. Tera lo ta bendishoná ku bon kosecha di kuminda delisioso. Humanidat kompletu lo ta bon alimentá.

Lo bo ke disfrutá di e bendishonnan aki di bon liderato? Si ta asina, nos ta animá bo pa siña mas tokante e Lider ku pronto lo ehersé kontròl kompletu riba henter e tera. Gustosamente, Testigunan di Yehova lo yuda bo hasi esei. Lo bo no keda desapuntá, pasobra Yehova Dios mes ta bisa di su Yu: “Pa loke ta ami, mi a establesé mi rei riba Sion, mi seru santu.”—Salmo 2:6.

[Kuadro na página 5]

DIRIPIENTE FOR DI PODER

Por lo general, si un gobernante ta sòru pa su siudadanonan tin un grado rasonabel di pas i un kondishon di bida basta sigur, e por konta ku nan rèspèt i sosten. Di otro banda, si pa un òf otro motibu pueblo pèrdè konfiansa den dje, e por pèrdè su puesto hopi lihé. Aki ta sigui algun ehèmpel di situashonnan ku a pone gobernantenan poderoso pèrdè nan poder diripiente.

Mal kondishon di bida. Na kabamentu di siglo 18, hopi siudadano franses a haña nan obligá ta hiba un bida di paga hopi belasting i haña poko kuminda. E situashon aki tabata un di e faktornan ku a kontribuí na e Revolushon Franses, ku na aña 1793 a kousa morto di Rei Louis XVI na guiotina.

Guera. Promé Guera Mundial a pone fin n’e gobernashon di algun di e emperadornan di mas poderoso den historia. Por ehèmpel, na 1917 un skarsedat di kuminda kousá pa un guera na St. Petersburg, Rusia, a bin kulminá den e Revolushon di Febrüari. E rebelion aki a tumba Tsar Nicolas II for di su trono i a habri kaminda p’e régimen komunista. Na novèmber 1918, Alemania tabata kier pas, pero e aliadonan no kier a stòp di bringa te ora a bini un kambio di gobièrnu. Komo resultado, e emperador aleman Wilhelm II a ser fòrsá pa bai den eksilio na Hulanda.

Anhelo pa un otro sistema di gobernashon. Na 1989 e Kortina di Heru a kai. Na momentu ku pueblo di paisnan komunista a kuminsá rechasá komunismo, gobièrnunan ku tabata mustra sólido a basha den otro. I esei a habri kaminda pa otro formanan di gobernashon.

[Plachinan na página 7]

Hesus a alimentá hende ku hamber, a kura esnan enfermo i a pone un bon ehèmpel pa tur kristian

[Rekonosementu pa Potrèt na página 4]

Lloyd George: Potrèt ta di Kurt Hutton/Plachi Post/Getty Images