Persiguí Pero Felis
Persiguí Pero Felis
“Felis boso ta ora hende ta reprochá boso i ta persiguí boso i ku mentira ta papia tur sorto di kos malu kontra boso pa mi kousa.”—MATEO 5:11.
1. Kiko Hesus a sigurá su siguidónan relashoná ku felisidat i persekushon?
ORA ku pa promé bes Hesus a manda su apòstelnan bai prediká e Reino, el a spièrta nan ku nan lo a haña oposishon. El a bisa nan: “Tur hende lo odia boso pa kousa di mi nòmber.” (Mateo 10:5-18, 22) Sin embargo, mas promé den su Sermon Riba Seru, el a sigurá su apòstelnan i otro hende ku e oposishon ei no nesesariamente lo a pone nan pèrdè e felisidat profundo ku nan a sinti. De echo, Hesus asta a konektá felisidat ku ser persiguí komo kristian! Kon persekushon por hasi hende felis?
Sufri pa Kousa di Hustisia
2. Segun Hesus i apòstel Pedro, ki ora sufrimentu ta hasi nos felis?
2 E di ocho motibu pa felisidat ku Hesus a deklará ta: “Felis ta esnan ku a ser persiguí pa kousa di hustisia, ya ku e reino di shelu ta pertenesé na nan.” (Mateo 5:10) Sufrimentu riba su mes no ta algu digno di mérito. Apòstel Pedro a skirbi: “Ki mérito boso ta haña si, ora boso peka i wòrdu tratá severamente, boso soportá esaki ku pasenshi? Ma si ora boso hasi loke ta korekto i ku pasenshi boso sufri pa e motibu ei, esaki ta haña aprobashon serka Dios.” El a bisa mas aleu: “No laga ningun di boso sufri komo matadó, òf ladron òf malechor, òf un ku ta mete den asuntu di otro; ma si un hende ta sufri komo kristian, no lag’é sinti bèrgwensa, ma den e nòmber ei lag’é glorifiká Dios.” (1 Pedro 2:20; 4:15, 16) Segun e palabranan di Hesus, sufrimentu ta hasi nos felis ora nos ta soport’é pa kousa di hustisia.
3. (a) Kiko ta nifiká ser persiguí pa kousa di hustisia? (b) Ki efekto persekushon tabatin riba e promé kristiannan?
3 Un hende ta desplegá berdadero hustisia dor di kumpli ku Dios su boluntat i obedesé su mandamentunan. P’esei sufri pa kousa di hustisia ta nifiká sufri pasobra bo ta resistí e preshon pa violá Dios su normanan òf rekisitonan. E lidernan hudiu a persiguí e apòstelnan pasobra esakinan a nenga di stòp di prediká den nòmber di Hesus. (Echonan 4:18-20; 5:27-29, 40) Akaso esaki a kaba ku nan goso òf a stòp nan predikashon? Al kontrario! “Nan a bai for di presensia di e Konsilio, regosihando [òf, alegrando] ku nan a wòrdu konsiderá digno pa sufri bèrgwensa pa su nòmber. I tur dia, den tèmpel i di kas pa kas, nan tabata sigui siña hende i prediká Hesus komo e Kristu.” (Echonan 5:41, 42) E persekushon aki a duna nan goso i a rebibá nan selo den e trabou di prediká. Mas despues, e romanonan a persiguí e promé kristiannan pasobra nan a nenga di partisipá den adorashon di emperador.
4. Menshoná algun motibu pakiko hende ta persiguí kristiannan.
4 Den tempu moderno, hende ta persiguí Testigunan di Yehova pasobra nan ta nenga di stòp di prediká “e evangelio aki di e reino.” (Mateo 24:14) Beibel ta manda pa reuní huntu, p’esei ora prohibí nan reunionnan kristian, nan ta preferá di sufri ku stòp di asistí. (Hebreonan 10:24, 25) Tambe hende a persiguí nan pa motibu di nan neutralidat kristian òf pasobra nan ta nenga di hasi mal uso di sanger. (Juan 17:14; Echonan 15:28, 29) Apesar di tur esei, e posishon aki ku e pueblo di Dios ta tuma na fabor di hustisia ta duna nan un pas mental profundo i hopi felisidat.—1 Pedro 3:14.
Reprochá pa Kousa di Kristu
5. Pa ki motibu básiko hende ta persiguí e pueblo di Yehova awe?
5 E di nuebe motibu pa felisidat ku Hesus a konsiderá den su Sermon Riba Seru tambe ta trata ku e tópiko di persekushon. El a bisa: “Felis boso ta ora hende ta reprochá boso i ta persiguí boso i ku mentira ta papia tur sorto di kos malu kontra boso pa mi kousa.” (Mateo 5:11) E motibu básiko pakiko hende ta persiguí e pueblo di Yehova ta pasobra nan no ta parti di e sistema di kosnan malbado aki. Hesus a bisa su disipelnan: “Si boso tabata di mundu, mundu lo a stima loke ta di dje; ma pasobra boso no ta di mundu, ma ami a skohe boso for di den mundu, p’esei mundu ta odia boso.” (Juan 15:19) Meskos tambe apòstel Pedro a deklará: “Den tur esaki nan ta keda sorprendí ku boso no ta kore huntu ku nan den e mesun diluvio di libertinahe, i nan ta kalumniá boso.”—1 Pedro 4:4.
6. (a) Dikon hende ta reprochá i persiguí e restu i nan kompañeronan? (b) E reproche ei ta mengua nos felisidat?
6 Nos a mira kaba ku e promé kristiannan a ser persiguí pasobra nan a nenga di stòp di prediká den nòmber di Hesus. Kristu a enkargá su siguidónan: “Boso lo ta mi testigunan . . . te na e parti mas alehá di mundu.” (Echonan 1:8) Ku selo e restu fiel di Kristu su rumannan ungí a kumpli ku e enkargo ei, ku yudansa di nan kompañeronan leal di e “multitut grandi.” (Revelashon 7:9) Konsekuentemente, Satanas ta hasi guera ‘ku e restu di su desendientenan [e desendientenan di e “muhé,” e parti selestial di Dios su organisashon], kendenan ta warda e mandamentunan di Dios i tin e trabou di duna testimonio di Hesukristu.’ (Revelashon 12:9, 17) Komo Testigu di Yehova, nos ta duna testimonio di Hesus, kende ta e Rei ku ta reina awor den e gobernashon di Reino. E Reino aki lo destruí gobièrnunan humano ku ta para den kaminda di Dios su hustu mundu nobo. (Daniel 2:44; 2 Pedro 3:13) Pa motibu di nos dunamentu di testimonio, hende ta reprochá nos i persiguí nos, pero nos ta felis di por sufri pa e nòmber di Kristu.—1 Pedro 4:14.
7, 8. Ki mentiranan opositornan a papia kontra e promé kristiannan?
7 Hesus a deklará ku su siguidónan mester konsiderá nan mes felis asta ora hende “ku mentira ta papia tur sorto di kos malu” kontra nan pa su kousa. (Mateo 5:11) Esaki sigur tabata e kaso ku e promé kristiannan. Ora ku apòstel Pablo tabata será na Roma, rònt di aña 59 pa 61 di nos era, e lidernan hudiu a bisa di e kristiannan: “Enkuanto e sekta aki, nos sa ku e ta wòrdu kontradisí tur kaminda.” (Echonan 28:22) Nan a akusá Pablo ku Silas di “a pone mundu aribabou,” i ku nan a “aktua kontrario na e dekretonan di Cesar.”—Echonan 17:6, 7.
8 Historiadó K. S. Latourette a skirbi tokante kristiannan den tempu di e Imperio Romano i el a deklará: “Tabatin diferente tipo di akusashon [kontra nan]. Komo ku nan a nenga di partisipá den seremonianan pagano, hende a duna kristiannan e beinam ateo. Komo ku nan a apstené di partisipá den mayoria aktividat den komunidat—e fiestanan pagano, e dibertishonnan públiko . . .—hende a hasi chèrchi di nan i yama nan odiadó di e rasa humano. . . . Hende tabata bisa ku kristiannan di ámbos sekso tabata topa otro anochi . . . i ku nan tabata tene relashon seksual parotin. . . . E echo ku nan a selebrá [e Konmemorashon di e morto di Kristu] solamente den presensia di kreyentenan a kousa e rumor ku kristiannan regularmente tabata sakrifiká un beibi i bebe su sanger i kome su karni.” Ademas, komo ku e promé kristiannan a nenga di partisipá den adorashon di emperador, hende a akusá nan di ta enemigu di Estado.
9. Kon e kristiannan di promé siglo a reakshoná riba e akusashonnan falsu ku hende a lansa kontra nan, i kon e situashon ta awe?
9 E akusashonnan falsu ei no a kita e promé kristiannan di kumpli ku nan enkargo di prediká e bon nobo di Reino. Na aña 60 pa 61 di nos era, Pablo por a bisa tokante e bon nobo ku “den henter mundu tambe e ta duna fruta i ta sigui krese konstantemente” i ku el a ser “proklamá den henter kreashon bou di shelu.” (Kolosensenan 1:5, 6, 23) Ta meskos ta pasa awe. Hende ta akusá Testigunan di Yehova falsamente, meskos ku nan a hasi ku e kristiannan di promé siglo. Apesar di esei, e trabou di prediká e mensahe di Reino ta bai dilanti awe i ta hasi esnan ku ta partisipá den dje hopi felis.
Felis di Ta Ser Persiguí Meskos Ku e Profetanan
10, 11. (a) Kon Hesus a terminá su konsiderashon di e di nuebe motibu pa felisidat? (b) Dikon hende a persiguí e profetanan? Duna algun ehèmpel.
10 Hesus a terminá su konsiderashon di e di nuebe motibu pa felisidat ku e palabranan: “Alegrá . . . , pasobra di e manera ei nan a persiguí e profetanan promé ku boso.” (Mateo 5:12) E profetanan ku Yehova a manda pa spièrta Israel infiel no a risibí bon trato i hopi bes a haña persekushon. (Jeremias 7:25, 26) Apòstel Pablo a konfirmá e echo aki, skirbiendo: “Kiko mas lo mi bisa? Pasobra lo mi no tin basta tempu pa mi konta di . . . e profetanan, kendenan pa medio di fe . . . a pasa den prueba di bofon i sota di karbachi, sí, tambe kadena i prizon.”—Hebreonan 11:32-38.
11 Durante reinado di e rei malbado Akab i su kasá, Jezabel, nan a mata hopi profeta di Yehova ku spada. (1 Reinan 18:4, 13; 19:10) Opositornan a pone profeta Jeremias den sepa i despues a bent’é den un renbak yen di lodo. (Jeremias 20:1, 2; 38:6) Profeta Daniel a ser bentá den kueba di leon. (Daniel 6:16, 17) Tur e profetanan pre-kristian aki a haña persekushon pasobra nan a defendé Yehova su adorashon puru. E lidernan religioso hudiu a persiguí hopi profeta. Hesus a yama e eskriba- i fariseonan “yunan di esnan ku a mata e profetanan.”—Mateo 23:31.
12. Dikon ta un onor pa nos komo Testigu di Yehova ser persiguí meskos ku e profetanan di pasado?
12 Awe, hende hopi bes ta persiguí nos komo Testigu di Yehova pasobra nos ta prediká e bon nobo di Reino ku selo. Nos enemigunan ta akusá nos di ‘ta kombertí hende na un manera agresivo,’ pero nos sa ku adoradónan fiel di Yehova di pasado a konfrontá krítika similar. (Jeremias 11:21; 20:8, 11) Pa nos, ta un onor di por sufri pa e mesun motibu ku e profetanan fiel di pasado a sufri. Disipel Santiago a skirbi: “Rumannan, tuma e profetanan ku a papia den e nòmber di Señor komo un ehèmpel di sufrimentu i di pasenshi. Mira, nos ta konsiderá komo bendishoná esnan ku a perseverá.”—Santiago 5:10, 11.
Motibunan Profundo pa Ser Felis
13. (a) Dikon persekushon no ta desanimá nos? (b) Kiko ta yuda nos para firme, i kiko esaki ta proba?
13 Persekushon no ta desanimá nos. Al kontrario, e pensamentu ku nos ta kanando den paso di e profetanan, di e promé kristiannan i asta di Kristu Hesus, ta un konsuelo pa nos. (1 Pedro 2:21) Nos ta saka profundo satisfakshon for di e Skritura, manera for di e siguiente palabranan di apòstel Pedro: “Stimánan, no sea sorprendí pa motibu di e kandela di prueba ku tin meimei di boso, ku ta bin riba boso pa boso wòrdu probá, komo si fuera ta algu straño ta pasa ku boso; si boso wòrdu reprochá pa e nòmber di Kristu, boso ta bendishoná, pasobra e spiritu di gloria i di Dios ta riba boso.” (1 Pedro 4:12, 14) Nos sa di eksperensia ku e úniko motibu pakiko nos por para firme bou di persekushon ta pasobra Yehova su spiritu ta riba nos i ta fortalesé nos. E sosten di spiritu santu ta proba ku Yehova su bendishon ta riba nos, i esaki ta duna nos gran felisidat.—Salmo 5:12; Filipensenan 1:27-29.
14. Ki motibunan nos tin pa alegrá ku nos ta ser persiguí pa kousa di hustisia?
14 Un otro motibu pakiko oposishon i persekushon pa kousa di hustisia ta hasi nos felis ta pasobra esei ta proba ku nos ta bibando komo kristiannan berdadero ku deboshon na Dios. Apòstel Pablo a skirbi: “Tur hende ku ta deseá di hiba un bida santu [“di deboshon na Dios,” NW] den Kristu Hesus lo wòrdu persiguí.” (2 Timoteo 3:12) Nos ta sumamente felis ora nos pensa ku dor di mantené nos integridat bou di prueba nos ta perkurá un kontesta mas riba Satanas su desafio di ku tur Yehova su kriaturanan ta sirbi Yehova pa motibu di interes egoista. (Jòb 1:9-11; 2:3, 4) Nos ta masha kontentu ku nos tambe por duna un aporte—pa chikí ku e por ta—na vindiká Yehova su hustu soberania.—Proverbionan 27:11.
Bula di Goso pa e Rekompensa
15, 16. (a) Ki motibu Hesus a duna pa nos “alegrá i bula di goso”? (b) Ki rekompensa tin wardá den shelu pa kristiannan ungí, i ki rekompensa nan kompañeronan, e “otro karnénan,” tambe lo risibí?
15 Hesus a duna un motibu mas pa keda kontentu ku hende ta kalumniá nos i persiguí nos meskos ku e profetanan di pasado. Djis promé ku Hesus terminá su konsiderashon di e di nuebe motibu di felisidat, el a deklará: “Alegrá i bula di goso, ya ku boso rekompensa ta grandi den shelu.” (Mateo 5:12) Apòstel Pablo a skirbi: “Pago di piká ta morto, ma e don di grasia di Dios ta bida eterno den Kristu Hesus, nos Señor.” (Romanonan 6:23) Sí, e ‘gran rekompensa’ ta bida, i esei no ta un pago ku nos ta meresé. E ta un don òf regalo. Hesus a bisa ku e rekompensa ta “den shelu” pasobra e ta bin di Yehova.
16 E ungínan ta risibí “e korona di bida” ku den nan kaso ta bida inmortal huntu ku Kristu den shelu. (Santiago 1:12, 17) E “otro karnénan,” kendenan tin e speransa di biba riba tera, ta anhelá pa haña bida eterno den un paradeis riba tera. (Juan 10:16; Revelashon 21:3-5) Pa ámbos grupo, e “rekompensa” no ta algu ku nan ta meresé. Tantu e ungínan komo e “otro karnénan” ta risibí nan rekompensa debí na Yehova su “grasia na abundansia,” ku a motivá apòstel Pablo pa bisa: “Gradisí Dios pa su regalo ku no por deskribí ku palabra.”—2 Korintionan 9:14, 15, BPK.
17. Dikon nos por ta felis i asta “bula di goso,” na moda di papia, ora hende ta persiguí nos?
17 Apòstel Pablo a skirbi na e kristiannan, di kua algun a ser persiguí kruelmente pa Emperador Nero: “Nos ta regosihá tambe den nos tribulashonnan, sabiendo ku tribulashon ta produsí perseveransia; i perseveransia, karakter [“un kondishon aprobá,” NW]; i karakter, speransa; i speransa no ta desapuntá.” Tambe el a bisa: ‘Regosihá den speransa, perseverá den tribulashon.’ (Romanonan 5:3-5; 12:12) Sea ku nos speransa ta pa biba den shelu òf riba tera, e rekompensa pa nos fieldat bou di prueba ta hopi mas grandi ku kualke kos ku nos meresé. E goso ku nos tin debí na e prospekto di por biba pa semper pa sirbi i alabá nos amoroso Tata, Yehova, bou di nos Rei Hesukristu, ta un goso sin límite. Na moda di papia nos ta “bula di goso.”
18. Kiko nos por spera di e nashonnan segun ku e fin ta yega mas serka, i kiko Yehova lo hasi?
18 Den algun pais, nan a persiguí Testigunan di Yehova i te ainda ta persiguí nan. Den Hesus su profesia tokante e fin di e sistema aki, el a spièrta kristiannan berdadero: “Tur nashon lo odia boso pa kousa di mi nòmber.” (Mateo 24:9) Segun ku nos ta yega mas serka di e fin, Satanas lo pone e nashonnan manifestá nan odio kontra Yehova su pueblo. (Ezekiel 38:10-12, 14-16) Esaki lo ta un señal ku a yega tempu pa Yehova aktua. “Lo mi engrandesé mi mes, santifiká mi mes i hasi mi mes konosí den bista di hopi nashon; i nan lo sa ku ami ta [Yehova].” (Ezekiel 38:23) Pues Yehova lo santifiká su gran nòmber i libra su pueblo for di persekushon. P’esei, felis “ta un hende ku ta perseverá den prueba.”—Santiago 1:12.
19. Kiko nos mester hasi miéntras ku nos ta warda riba e gran ‘dia di Yehova’?
19 Segun ku e gran ‘dia ei di Yehova’ ta yegando mas i mas serka, laga nos alegrá ku nos ta ser “konsiderá digno pa sufri bèrgwensa” pa e nòmber di Hesus. (2 Pedro 3:10-13; Echonan 5:41) Meskos ku e promé kristiannan, laga nos “sigui siña hende i prediká” tokante e bon nobo di Kristu i tokante su gobernashon di Reino miéntras ku nos ta warda riba nos rekompensa den Yehova su hustu mundu nobo.—Echonan 5:42; Santiago 5:11.
Komo Repaso
• Kiko ta nifiká sufri pa kousa di hustisia?
• Ki efekto persekushon tabatin riba e promé kristiannan?
• Dikon nos por bisa ku Testigunan di Yehova ta ser persiguí meskos ku e profetanan di pasado?
• Dikon nos por “alegrá i bula di goso” ora nos ta ser persiguí?
[Preguntanan di Estudio]
[Plachinan na página 16]
“Felis boso ta ora hende ta reprochá boso i ta persiguí boso”
[Rekonosementu]
Grupo den prizon: Chicago Herald-American