Buska Yehova, Esun Ku Ta Eksaminá Kurason
Buska Yehova, Esun Ku Ta Eksaminá Kurason
“Buska mi pa boso por biba.”—AMOS 5:4.
1, 2. Kiko e Skritura ke men ora e ta bisa ku Yehova “ta wak kurason”?
YEHOVA DIOS a bisa profeta Samuel: “Hende ta wak aparensia di pafó, ma SEÑOR ta wak kurason.” (1 Samuel 16:7) Kiko ta nifiká ku Yehova “ta wak kurason”?
2 Den e Skritura, kurason ta ser usá hopi bes pa simbolisá loke un persona ta di paden: su deseonan, su pensamentunan, su emoshonnan i loke e ta gusta. Pues, ora Beibel ta bisa ku Dios ta wak kurason, esei ta nifiká ku e ta mira mas aleu ku e aparensia di pafó i ta enfoká riba loke un persona ta di bèrdat.
Dios Ta Eksaminá Israel
3, 4. Segun Amos 6:4-6, ki kondishon tabata eksistí den e reino di dies tribu di Israel?
3 Ora Esun ku ta eksaminá kurason a opservá e reino di dies tribu di Israel den e dianan di Amos, kiko ta loke El a mira? Amos 6:4-6 ta papia di hòmbernan ‘ku tabata drumi riba kama di ivor i tabata rèk kurpa riba sofá.’ Nan tabata “kome lamchi for di e tou i bisé for di e stal.” E hendenan ei a “komponé kantika pa nan mes” (na e idioma original e ta bisa ku “nan a inventá instrumèntnan di muzik,” NW), i tabata ‘bebe kònchinan yen di biña.’
4 Na promé bista, esaki lo por parse di ta un esena masha plasentero. Den e komodidat di nan kas luhoso, e rikunan tabata disfrutá di e kuminda i bebida mas ekskisito, i a ser entretené dor di e mihó instrumèntnan musikal ku tabatin. Tambe nan tabatin “kama di ivor.” Na Samaria, siudat kapital di e reino di Israel, arkeólogonan a haña ivor masha bunita tayá. (1 Reinan 10:22) Hopi di e ivor aki muy probablemente tabata labrá den muebel òf usá asta komo dekorashon riba muraya.
5. Dikon Dios tabata malkontentu ku e israelitanan den tempu di Amos?
5 Akaso Yehova Dios tabata kontra ku e israelitanan a biba kómodo, disfrutá di dushi kuminda, bebe bon biña i skucha músika bunita? Klaru ku nò! Ta e mes a perkurá tur e kosnan ei na abundansia pa hende disfrutá di dje. (1 Timoteo 6:17) Loke Yehova no tabata kontentu kuné ta e mal deseonan di e pueblo, nan kurason malbado, nan aktitut sin rèspèt pa ku Dios i nan falta di amor pa nan paisanonan israelita.
6. Den ki situashon spiritual Israel tabata durante e tempu di Amos?
6 Un sorpresa grandi tabata spera esnan ku tabata ‘rèk kurpa riba sofá, komiendo lamchi for di e tou, bebiendo biña i inventando instrumèntnan di muzik.’ E hòmbernan ei a “pone e dia di kalamidat tarda,” es desir, nan a hasi manera ku e dia di kalamidat ei ta masha leu. Bon mirá, e kosnan ku tabata pasa den Israel mester a molestiá nan, pero al kontrario, ‘di e ruina di Hosé nan no tabatin duele.’ (Amos 6:3-6) Apesar di e prosperidat ekonómiko di e nashon, Dios a mira ku den sentido spiritual, Hosé—esta, Israel—tabata den ruina. Sin embargo, e hendenan a dal bai ku nan aktividatnan diario manera nada no a pasa. Hopi hende awe tin e mesun aktitut. Kisas nan ta atmití ku nos ta bibando den tempu difísil, pero tanten ku nan no ta ser afektá personalmente, nan no ta wòri mashá ku e situashon difísil di otro hende i nan no ta mustra ningun interes den asuntunan spiritual.
Israel—Un Nashon den Deterioro
7. Kiko lo a pasa si e pueblo di Israel no hasi kaso di Dios su spièrtamentunan?
7 E buki di Amos ta deskribí un nashon den deterioro apesar ku su aparensia eksterno tabata di prosperidat. Ya ku e hendenan no a hasi kaso di Dios su spièrtamentunan i korigí nan manera di pensa, Yehova lo a bandoná nan den man di nan enemigunan. E asirionan lo a bin i saka nan for di nan bunita kama di ivor i lastra nan hiba den koutiverio. Ayó tur komodidat!
8. Kon Israel a bin resultá den un mal kondishon spiritual?
8 Ta kon e nashon di Israel a bin hañ’é den e kondishon aki? E situashon aki a kuminsá desaroyá na aña 997 promé ku nos era, despues ku Rei Salomon a muri i su yu Rehoboam a subi trono i dies tribu di Israel a separá for di e tribunan di Huda i Benjamin. E promé rei di e reino di dies tribu di Israel tabata Jeroboam I, “yu hòmber di Nabat.” (1 Reinan 11:26) Jeroboam a konvensé e pueblo bou di su dominio ku tabata muchu molèster pa nan bai te Yerusalèm pa adorá Yehova. Sin embargo, e no tabata realmente interesá den e bienestar di e pueblo. Mas bien, su intenshon tabata pa protehá su mes interes. (1 Reinan 12:26) Jeroboam tabatin miedu ku si e israelitanan sigui bai na e tèmpel di Yerusalèm pa e fiestanan anual na onor di Yehova, ku tempu nan lo a bira fiel atrobe na Huda. Pues, pa evitá esaki, Jeroboam a traha dos bisé di oro, un na Dan i e otro na Bèt-èl. Asina adorashon di bisé a bira e religion di Estado den e reino di Israel.—2 Krónikanan 11:13-15.
9, 10. (a) Ki tipo di selebrashonnan religioso Rei Jeroboam I a organisá? (b) Kon Dios a konsiderá e fiestanan ku nan tabata tene na Israel den tempu di Rei Jeroboam II?
9 Jeroboam a purba duna e religion nobo un aparensia di algu respetabel. El a organisá eventonan religioso ku tabata kasi meskos ku e fiestanan tené na Yerusalèm. Na 1 Reinan 12:32, nos ta lesa: “Jeroboam a instituí un fiesta den e di ocho luna, riba e di diesinku dia di e luna, manera e fiesta ku tin na Huda, i a subi bai na e altar; asina el a hasi na Bèt-èl, ofresiendo sakrifisio.”
10 Yehova nunka a aprobá e tipo di fiestanan religioso falsu ei. Via Amos, Yehova a mustra esei bon kla mas ku un siglo despues durante e reinado di Jeroboam II, kende a bira rei di e reino di dies tribu di Israel rònt di aña 844 promé ku nos era. (Amos 1:1) Segun Amos 5:21-24, Dios a bisa: “Mi ta odia, mi ta rechasá boso fiestanan; tampoko mi no tin delisia den boso asambleanan solèm. Maske boso ofresé na mi ofrendanan kimá i boso ofrendanan di maishi, lo mi no aseptá nan; i ni wak lo mi no wak e ofrendanan di pas di boso bestianan gòrdá. Kita for di mi e boroto di boso kantikanan; ni skucha lo mi no skucha e zonidu di boso harpanan. Ma laga hustisia kore basha manera awa, i rektitut manera un korida di awa ku ta keda kore konstantemente.”
Similaridatnan den Nos Tempu
11, 12. Ki similaridatnan tin entre e adorashon di Israel di antigwedat i esun ku tin awe den kristiandat?
11 Ta bisto ku Yehova a eksaminá kurason di e hendenan ku tabata partisipá den e fiestanan pagano di Israel i el a rechasá nan selebrashon- i ofrendanan. Awe tambe Dios ta rechasá e selebrashonnan pagano di kristiandat, manera Pasku di Nasementu i Pasku di Resurekshon. Pa adoradónan di Yehova, no por tin ningun asosiashon entre hustisia i maldat, ni komunion entre lus i skuridat.—2 Korintionan 6:14-16.
12 Tin mas similaridat entre e adorashon di kristiandat i e adorashon di bisé di e israelitanan. Ounke algun persona ku ta deklará di ta kristian ta aseptá e bèrdat di e Palabra di Dios, e adorashon di kristiandat riba su mes no ta ser motivá pa berdadero amor pa Dios. Si tabata asina, anto lo el a para riba pa su miembronan adorá Yehova “den spiritu i bèrdat,” pasobra esei ta e klase di adorashon ku ta agradá Dios. (Juan 4:24) Ademas, kristiandat no ta “laga hustisia kore basha manera awa, i rektitut manera un korida di awa ku ta keda kore konstantemente.” Al kontrario, konsistentemente e ta minimisá e rekisitonan moral di Dios. E ta tolerá fornikashon i otro pikánan serio. Asta tin algun iglesia ku ta bai asina leu di bendishoná matrimonionan homoseksual!
“Stima Bondat”
13. Dikon nos tin ku kumpli ku e palabranan di Amos 5:15?
13 Na tur esnan ku ta anhelá pa adorá Yehova den un manera aseptabel, e ta bisa: “Odia maldat, stima bondat.” (Amos 5:15) Stimashon i odio ta emoshonnan hopi fuerte ku ta sali for di e kurason figurativo. Siendo ku kurason ta engañoso, nos mester hasi tur loke ta na nos alkanse pa proteh’é. (Proverbionan 4:23; Jeremias 17:9) Si nos permití nos kurason kultivá mal deseo, nos lo por haña nos ta stima loke ta malu i odia loke ta bon. I si nos sigui tras di e deseonan ei dor di praktiká piká, ni sikiera e selo di mas grandi na mundu lo no laga nos haña e fabor di Dios bèk. P’esei laga nos pidi Dios yuda nos pa nos ‘odia maldat i stima bondat.’
14, 15. (a) Menshoná algun persona den Israel ku tabata hasi loke ta bon. Pero kon e pueblo a trata algun di nan? (b) Kon nos por enkurashá kristiannan ku ta den sirbishi di tempu kompletu awe?
14 Sin embargo, no ta tur israelita tabata hasi loke ta malu den bista di Yehova. Por ehèmpel, Oseas i Amos a “stima bondat” i a sirbi Dios fielmente komo profeta. Otronan a hasi voto òf promesa solèm pa biba komo nazareo. Durante e periodo di nan voto komo nazareo, nan a apstené di usa produktonan di mata di wendrùif, spesialmente biña. (Numbernan 6:1-4) Kon e otro israelitanan a mira e bida di sakrifisio propio ku tal hasidó di bondat a hiba? Na Amos 2:12 nos ta haña e kontesta hopi sorprendente riba e pregunta aki. E kontesta ta revelá te kon leu e nashon a degenerá spiritualmente. E versíkulo ei ta bisa: “Boso a hasi e nazareonan bebe biña, i boso a ordená e profetanan, bisando: ‘Boso no profetisá!’”
15 Mirando e ehèmpel di fieldat di e nazareonan i di e profetanan, e israelitanan ei lo mester a haña bèrgwensa i sinti nan motivá pa kambia nan bida. En bes di esei, nan a demostrá falta di amor dor di buska manera pa deskurashá esnan leal di duna gloria na Dios. Laga nos nunka enkurashá nos rumannan kristian ku ta pionero, misionero, superintendente biahero òf miembro di e famia di Bètel pa stòp ku nan sirbishi di tempu kompletu djis pa nan por bai bèk na un asina yamá bida normal. Mas bien, laga nos animá nan pa sigui ku nan bon trabou!
16. Dikon e israelitanan den tempu di Moisés tabata mihó pará ku esnan den tempu di Amos?
16 Ounke hopi israelita tabata disfrutá di prosperidat material den e tempu di Amos, nan no tabata “riku pa ku Dios.” (Lukas 12:13-21) Nan antepasadonan tabatin mana so pa kome den desierto durante 40 aña largu. Nan no tabatin bankete di toro gòrdá ni kama di ivor pa drumi hasi kos di floho ariba. Pero ku rason, Moisés a bisa nan: “SEÑOR bo Dios a bendishoná bo den tur loke bo a hasi. . . . SEÑOR bo Dios tabata ku bo durante e kuarenta añanan aki; bo no tabatin falta di nada.” (Deuteronomio 2:7) Sí, e israelitanan den desierto semper tabatin e kosnan ku di bèrdat nan tabatin mester. I loke ta mas importante, nan tabatin Dios su amor, protekshon i bendishon!
17. Dikon Yehova a hiba e promé israelitanan na e Tera Primintí?
17 Yehova a rekordá e hendenan den tempu di Amos ku t’e a trese nan antepasadonan den e Tera Primintí i a yuda nan kore ku tur nan enemigunan for di e pais. (Amos 2:9, 10) Pero pakiko Dios a saka e promé israelitanan ei for di Egipto i hiba nan na e Tera Primintí? Tabata pa nan por a hiba un bida di banidat i luho, i rechasá nan Kreadó? Nò! Mas bien, el a hasi esei pa nan por a ador’é komo un pueblo liber i spiritualmente limpi. Pero e habitantenan di e reino di dies tribu di Israel no a odia loke ta malu i stima loke ta bon. Na lugá di esei, nan tabata duna gloria na imágennan grabá, no na Yehova Dios. Esta un bèrgwensa!
Yehova Ta Regla Kuenta ku Israel
18. Pakiko Yehova a libra nos spiritualmente?
18 Dios no tabata bai pasa por haltu di e komportashon bergonsoso di e israelitanan. El a mustra nan bon kla kiko ta su posishon, bisando: “Lo mi kastigá boso pa tur boso inikidatnan.” (Amos 3:2) E palabranan ei mester pone nos reflekshoná riba nos propio liberashon for di sklabitut di e Egipto di tempu moderno, esta, e aktual sistema di kosnan malbado. Yehova no a libra nos spiritualmente pa nos bai kore tras di metanan egoista. Mas bien, el a libra nos pa nos por dun’é alabansa di kurason komo un pueblo liber ku ta partisipá den adorashon puru. Anto nos kada un lo tin ku duna kuenta i rason pa e manera ku nos ta usa e libertat ku Dios a duna nos.—Romanonan 14:12.
19. Segun Amos 4:4 i 5, kiko mayoria israelita tabata stima?
19 Lamentablemente, mayoria habitante di Israel no a hasi kaso di e mensahe poderoso ku Amos a entregá na nan. E profeta a saka na kla e mal kondishon spiritual di nan kurason ku e siguiente palabranan ku ta pará skirbí na Amos 4:4 i 5: “Drenta Bèt-èl i transgresá [es, desir, kibra lei]; multipliká transgreshon na Gilgal! . . . Pasobra asina boso gusta hasi, boso yunan di Israel.” E israelitanan no a kultivá deseonan korekto. Nan no a protehá nan kurason. Komo resultado, mayoria di nan a kuminsá stima loke ta malu i odia loke ta bon. E personanan kabesura ei, adoradó di bisé, no a kambia. Yehova lo a regla kuenta ku nan, i nan lo mester muri den nan pikánan!
20. Kon un persona por sigui un proseder ku ta na armonia ku Amos 5:4?
20 Lo no tabata fásil pa ningun hende ku a biba den Israel e tempu ei pa keda fiel na Yehova. Na moda di papia, ta difísil pa landa kontra koriente, es desir, bai kontrali na e tendensianan popular, i esei ta algu ku kristiannan djawe, hóben i bieu, ta bon konsiente di dje. Pero amor pa Dios i e deseo pa agrad’é a motivá algun israelita pa praktiká adorashon berdadero. Yehova a ekstendé na nan e kaluroso invitashon ku nos ta haña na Amos 5:4: “Buska mi pa boso por biba.” Awe tambe Dios ta mustra miserikòrdia na hende ku arepentí i ku ta busk’é dor di gana konosementu eksakto di su Palabra i despues ta hasi su boluntat. No ta fásil pa sigui e proseder aki, pero hasiendo esei lo hiba na bida eterno.—Juan 17:3.
Prosperidat Apesar Ku Ta Reina Hamber Spiritual
21. Ki sorto di hamber ta afektá hende ku no ta práktika adorashon berdadero?
21 Kiko tabata spera esnan ku no a apoyá adorashon berdadero? E hamber di mas malu ku tin: hamber spiritual! “Mira, dianan ta bin,” Señor Soberano Yehova a bisa, “ku lo mi manda hamber riba e tera; no hamber pa pan ni set pa awa, ma mas bien pa tende e palabranan di [Yehova].” (Amos 8:11) Kristiandat ta sufriendo di un hamber spiritual asina. Pero esnan di kurason onrado den kristiandat por mira e prosperidat spiritual di e pueblo di Dios i nan ta basha bin na Yehova su organisashon. E kontraste entre e situashon den kristiandat i e situashon ku ta reina serka kristiannan berdadero a keda aptamente ekspresá den e palabranan aki di Yehova: “Mira, mi sirbidónan lo kome, ma boso lo pasa hamber. Mira, mi sirbidónan lo bebe, ma boso lo tin set. Mira, mi sirbidónan lo regosihá, ma boso lo wòrdu brongosá.”—Isaias 65:13.
22. Dikon nos tin motibu pa alegrá?
22 Akaso nos, komo sirbidó di Yehova, ta apresiá personalmente loke nos tin den sentido di perkurashonnan i bendishonnan spiritual? Sí, ora nos ta studia Beibel i publikashonnan kristian i ta asistí na nos reunionnan, asambleanan i kongresonan, nos ta ègt sinti gana di grita di goso pa motibu di e bon kondishon di nos kurason. Nos ta hopi kontentu ku nos tin un bon komprondementu di e Palabra di Dios, inkluso di e profesia inspirá di Amos.
23. Kiko esnan ku duna gloria na Dios ta disfrutá di dje?
23 Pa tur hende ku ta stima Dios i ku ke dun’é gloria, e profesia di Amos ta kontené un mensahe di speransa. Sin importá den ki situashon ekonómiko nos ta aktualmente òf ki pruebanan nos tin ku konfrontá den e mundu yen di problema aki, nos ku ta stima Dios ta gosa di bendishonnan divino i di e mihó alimento spiritual. (Proverbionan 10:22; Mateo 24:45-47) Tur gloria ta bai anto pa Dios, kende ta perkurá tur kos na abundansia pa nos benefisio. P’esei laga nos ta desididu pa dun’é nos alabansa sinsero pa semper. I esei lo ta nos privilegio gososo si nos buska Yehova, Esun ku ta eksaminá kurason.
Kon Lo Bo Kontestá?
• Ki situashonnan a eksistí na Israel den tempu di Amos?
• Ki similaridatnan tin entre e situashon djawe ku esun den e reino di dies tribu di Israel?
• Ki sorto di hamber ku a ser profetisá ta reina awor, pero ken e no ta afektá?
[Preguntanan di Estudio]
[Plachinan na página 21]
Hopi israelita a biba den luho pero nan no tabatin prosperidat spiritual
[Plachi na página 23]
Animá sirbidónan di tempu kompletu pa sigui ku nan bon trabou
[Plachinan na página 25]
No tin hamber spiritual den Yehova su pueblo felis