E Splendor di Yehova Su Kreashon

‘O Yehova, Ki Numeroso Bo Obranan Ta!’

SEA nos ta biba den kunuku òf den stat, riba seru òf kantu di laman, nos ta rondoná pa e splendor impreshonante di kreashon. Apropiadamente, e Kalènder 2004 di Testigunan di Yehova ta presentá un panorama di e asombroso obranan di Yehova Dios su man.

Hende gradisidu semper a mustra interes den e obranan di Dios. Tuma por ehèmpel Salomon, kende su sabiduria “tabata surpasá e sabiduria di tur e hòmbernan di oriente.” Beibel ta bisa: “E tabata papia di e palunan, di e palu di seda ku tin na Líbano te na e hisòp ku ta krese na muraya; tambe e tabata papia di e bestianan, di para, bestia ku ta lastra i piská.” (1 Reinan 4:30, 33) Rei David, tata di Salomon, hopi biaha a meditá riba Dios su obranan maestro. El a ser konmoví pa deklará na su Kreadó: “O SEÑOR, ki numeroso bo obranan ta! Ku sabiduria bo a traha tur; tera ta yen di loke bo a krea.”—Salmo 104:24. *

Ta bon pa nos tambe opservá i studia e kreashon. Por ehèmpel, nos lo por ‘hisa nos wowo wak ariba’ i puntra: “Ta ken a krea e streanan aki”? Wèl, ta Yehova Dios, kende realmente tin ‘un grandesa di forsa i poder’!—Isaias 40:26.

Ora nos meditá riba Yehova su obranan di kreashon, kon esei mester influensiá nos? Den por lo ménos tres manera. E por (1) rekordá nos pa apresiá nos bida, (2) motivá nos pa yuda otro hende siña for di kreashon i (3) stimulá nos pa siña konosé nos Kreadó mas mihó i apresi’é mas tantu.

Nos bida komo hende, siendo hopi mas superior ku esun di “bestia ku no por rasoná,” ta kapasitá nos pa opservá i balorá e maravianan di kreashon. (2 Pedro 2:12) Nos wowonan por mira e paisahe elegante i bunita. Nos oreanan por tende e kanto melodioso di paranan. I e echo ku nos ta konsiente di tempu i di lugá ta laga nos keda ku rekuerdonan agradabel. Maske nos bida aktual no ta perfekto, tòg e ta bale la pena!

Mayornan por disfrutá di nan yunan su fasinashon natural ku kreashon. Mucha gusta buska kokolishi kantu di laman, karisiá bestia òf subi palu! Mayornan lo ke yuda nan chikitinnan mira e konekshon ku tin entre e kreashon i e Kreadó. E atmirashon i rèspèt profundo ku muchanan ta desaroyá pa Yehova su kreashon ta algu ku nan por keda kuné pa restu di nan bida.—Salmo 111:2, 10.

Lo ta un gran falta di perspikasia di nos parti si nos mester atmirá e kreashon pero keda sin duna krédito na e Kreadó. E profesia  di Isaias ta yuda nos reflekshoná riba e punto aki ora e ta bisa: “Bo no sa? Bo no a tende? E Dios Eterno, [Yehova], e Kreadó di e finnan di tera no ta bira kansá ni fatigá. Su komprondementu ta inskudriñabel.”—Isaias 40:28.

Sí, Yehova su obranan ta duna prueba di su sabiduria sin igual, su poder inkomparabel i su amor profundo pa nos. Ora nos ta mira e bunitesa ku tin rònt di nos i ta mira den nan e kualidatnan di Esun ku a traha tur esei, laga esaki motivá nos pa bisa meskos ku David: “No tin ningun manera bo . . . , o Señor, tampoko no tin ningun obra manera bo obranan.”—Salmo 86:8.

Nos por tin sigur ku Yehova su obranan di kreashon lo sigui fasiná hende obediente. Atraves di eternidat, nos lo tin un kantidat sinfin di oportunidat pa siña mas tokante Yehova. (Eklesiastés 3:11) I mas nos siña tokante nos Kreadó, mas nos lo stim’é.

[Nota]

[Kuadro na página 9]

Elogio pa e Kreadó

Hopi sientífiko apresiativo ta mira e man di Dios den kreashon. Aki ta sigui algun ehèmpel:

“E goso i punto sobresaliente den mi ramo di siensia ta bin na e momentunan sporádiko ku mi deskubrí algu nobo i mi bisa mi mes: ‘Ahan, ta asina Dios a hasié.’ Mi meta ta pa komprondé un punta di Dios su plan.”—Henry Schaefer, profèser di kímika.

“Pa loke ta e kousa di e ekspanshon di Universo, ta keda na e lektor pa e mes saka su konklushon, pero nos kuadro ta inkompletu sin Dje [Dios].”—Edward Milne, kosmólogo britániko.

“Nos sa ku naturalesa ta ser deskribí mediante e matemátika di mas mihó ku tin pasobra ta Dios a kre’é.”—Alexander Polyakov, matemátiko ruso.

“Den nos estudio di ophetonan natural nos ta konsiderando e pensamentunan di e Kreadó, birando familiarisá ku su konseptonan, interpretando un sistema ku ta di Dje i no di nos.”—Louis Agassiz, biólogo merikano.

[Plachi na página 8, 9]

Ezelspinguïn, Península di Antártika

[Plachi na página 9]

Parke Nashonal Grand Teton, Wyoming, Merka

[Rekonosementu]

Jack Hoehn/Index Stock Photography