Entrená pa Duna Testimonio Kabal
Entrená pa Duna Testimonio Kabal
“Boso lo ta mi testigunan na Yerusalèm i na henter Judea i Samaria, i te na e parti mas alehá di mundu.”—ECHONAN 1:8.
1, 2. Kiko tabata Pedro su enkargo, i ken a dun’é?
“HESUS di Názarèt . . . a manda nos prediká pa e pueblo i pa duna testimonio [“kabal,” NW] ku esaki ta Esun ku Dios a nombra komo hues di e bibunan i di e mortonan.” (Echonan 10:38, 42) Ku e palabranan ei apòstel Pedro a splika Cornelio i su famia di e enkargo ku el a risibí pa ta un evangelisadó.
2 Ki tempu Hesus a duna e enkargo ei? Probablemente, Pedro tabata pensa riba loke Hesus a bisa despues di su resurekshon, djis promé ku el a subi na shelu. Na e okashon ei Hesus a bisa su disipelnan fiel: “Boso lo ta mi testigunan na Yerusalèm i na henter Judea i Samaria, i te na e parti mas alehá di mundu.” (Echonan 1:8) Sin embargo, promé ku esei ya Pedro tabata sa kaba ku komo disipel di Hesus, lo e tabatin ku papia ku otro hende tokante su fe den Hesus.
Tres Aña di Entrenamentu
3. Ki milager Hesus a hasi, i ki invitashon el a duna Pedro ku Andres?
3 Vários luna despues di su boutismo na aña 29 di nos era, Hesus a prediká kaminda Pedro ku su ruman Andres tabata traha komo piskadó na Laman di Galilea. Nan a piska henter anochi pero sin kohe nada. Pero tòg Hesus a bisa nan: “Bai kaminda tin awa hundu i tira boso redanan pa boso kohe piská.” Ora nan a hasi loke Hesus a bisa, “nan a kohe un kantidat grandi di piská; i nan redanan a kuminsá kibra.” Ora Pedro a mira e milager el a haña masha miedu, pero Hesus a kalm’é, bisando: “No tene miedu, for di awor padilanti lo bo ta piskadó di hende.”—Lukas 5:4-10.
4. (a) Kon Hesus a prepará su disipelnan pa duna testimonio? (b) Kon e ministerio di e disipelnan di Hesus lo tabata na komparashon ku esun di dje?
4 Mesora Pedro ku Andres—i tambe Santiago ku Juan, e yunan di Zebedeo—a laga nan botonan i sigui Hesus. Pa kasi tres aña, nan a kompañá Hesus riba su giranan di predikashon i a risibí entrenamentu komo evangelisadó. (Mateo 10:7; Marko 1:16, 18, 20, 38; Lukas 4:43; 10:9) Na final di e periodo ei, dia 14 di nisan di aña 33, Hesus a bisa nan: “Esun ku kere den mi, e obranan ku mi ta hasi e tambe lo hasi; i obranan mas grandi ku esakinan e lo hasi.” (Juan 14:12) E disipelnan di Hesus lo a duna testimonio kabal meskos ku Hesus a hasi, pero na un eskala muchu mas grandi. Manera nan a haña sa poko despues, tantu nan komo tur futuro disipel lo a duna testimonio na “tur e nashonnan,” te na “fin” di e sistema di kosnan.—Mateo 28:19, 20.
5. Den ki maneranan nos por benefisiá di e entrenamentu ku Hesus a duna su siguidónan?
5 Nos ta bibando den e ‘tempu di fin.’ (Mateo 24:3) Pero distinto for di e promé disipelnan ei, nos no por kompañá Hesus i opservá kon e ta prediká na hende. Pero tòg nos por benefisiá di e entrenamentu ku el a duna dor di lesa den Beibel kon el a prediká i ki instrukshonnan el a duna su siguidónan. (Lukas 10:1-11) Ademas, e artíkulo aki lo trata un otro kos hopi importante ku Hesus a siña su disipelnan: e aktitut korekto pa ku e trabou di prediká.
Un Interes Profundo den Hende
6, 7. Ki kualidat di Hesus a hasi su sirbishi efektivo, i kon nos por imit’é den e aspekto aki?
6 Kon bin Hesus su predikashon tabata asina efektivo? Un motibu ta ku e tabatin interes profundo den hende. E salmista a profetisá ku Hesus lo “tin kompashon di e pober i di esun den nesesidat.” (Salmo 72:13) Definitivamente el a kumpli ku e profesia ei. Beibel ta bisa di un sierto okashon: “Ora ku el a mira e multitutnan, el a sinti kompashon pa nan, pasobra nan tabata kansá i plamá, manera karné sin wardadó.” (Mateo 9:36) Asta esnan ku a práktika piká a ripará su interes intenso i a sinti nan atraé na dje.—Mateo 9:9-13; Lukas 7:36-38; 19:1-10.
7 Awe nos tambe lo ta efektivo si nos demostrá e mesun interes intenso den hende. Promé ku bo sali den sirbishi, pakiko bo no ta tuma un momentu pa reflekshoná kuantu nesesidat hende tin di e informashon ku bo ta bai hiba pa nan? Pensa riba e problemanan ku podisé nan tin i ku solamente e Reino lo resolvé. Sea desididu pa trata tur hende na un manera positivo, ya ku bo no sa ken lo reakshoná faborabel riba e mensahe. Podisé e próksimo persona ku bo aserká a pidi den orashon pa un hende manera abo pasa serka dje i yud’é!
Motivá dor di Amor
8. Siguiendo Hesus su ehèmpel, kiko ta motivá su siguidónan pa prediká e bon nobo?
8 E bon nobo ku Hesus a proklamá tabatin di haber ku e kuestionnan di mas importante ku tin dilanti humanidat: kumplimentu di Yehova su boluntat, santifikashon di Su nòmber i vindikashon di Su soberania. (Mateo 6:9, 10) Komo ku e tabata stima su Tata, Hesus a sintié motivá pa mantené integridat te na fin i duna testimonio kabal tokante e Reino ku lo resolvé tur e kuestionnan ei. (Juan 14:31) Komo ku e siguidónan di Hesus djawe tin e mesun motivashon, nan ta diligente ora nan ta partisipá den sirbishi. Apòstel Juan a bisa: “Esaki ta e amor di Dios, ku nos ta warda su mandamentunan,” i esei ta enserá tambe e mandamentu di prediká e bon nobo i hasi disipel.—1 Juan 5:3; Mateo 28:19, 20.
9, 10. Fuera di amor pa Dios, amor pa ken mas ta motivá nos pa duna testimonio kabal?
9 Hesus a bisa su siguidónan: “Si boso ta stima mi, boso lo warda mi mandamentunan. Esun ku tin mi mandamentunan i ta warda nan, esei ta esun ku ta stima mi.” (Juan 14:15, 21) Pues, amor pa Hesus mester motivá nos pa prediká tokante e bèrdat i hasi e otro kosnan ku Hesus a manda. Durante un di e okashonnan ku Hesus a aparesé despues ku el a resusitá, el a urgi Pedro: “Kuida mi lamchinan. . . . Pastoriá mi karnénan. . . . Kuida mi karnénan.” Kiko mester a motivá Pedro pa hasi esei? Hesus a indiká kiko ta e kontesta ora ku bes tras bes el a puntra Pedro: “Bo ta stima mi? . . . Bo ta stima mi? . . . Bo ta stima mi?” Sí, Pedro su amor pa Hesus, su kariño p’e, lo a motiv’é pa duna testimonio kabal, haña e “lamchinan” di Hesus, i despues ser un wardadó spiritual i pastoriá nan.—Juan 21:15-17.
10 Awe, nos no konosé Hesus personalmente manera Pedro tabata konos’é. Tòg nos ta komprondé e importansia di loke el a hasi pa nos. Nos ta sinti nos konmoví pa e gran amor ku a pon’é “eksperensiá morto pa tur hende.” (Hebreonan 2:9; Juan 15:13) Nos ta sinti meskos ku Pablo a sinti ora el a skirbi: ‘E amor di Kristu ta obligá nos . . . El a muri pa tur, pa esnan ku ta biba no biba mas pa nan mes, ma pa esun ku a muri pa nan.’ (2 Korintionan 5:14, 15) Nos ta demostrá ku nos ta tuma Hesus su amor pa nos na serio i ku nos na nos turno ta stim’é, dor di tuma na serio e enkargo pa duna testimonio kabal. (1 Juan 2:3-5) Nunka nos lo no ke adoptá un aktitut indiferente pa ku e trabou di prediká, komo si fuera nos ta konsiderá Hesus su sakrifisio komo algu di poko balor.—Hebreonan 10:29, BPK.
Keda Konsentrá Riba Loke Ta Importante
11, 12. Pa ki propósito Hesus a bin na mundu, i kon el a keda konsentrá riba esei?
11 Ora ku Hesus tabata dilanti di Ponsio Pilato, el a bisa: “Pa esaki mi a nase i pa esaki mi a bin den mundu, pa duna testimonio di e bèrdat.” (Juan 18:37) Hesus no a laga nada strob’é di duna testimonio di e bèrdat. Esei tabata e boluntat di Dios p’e.
12 Satanas definitivamente a tèst Hesus den esaki. Djis despues ku Hesus a batisá, Satanas a ofresé pa hasié un hòmber prominente den mundu, pa dun’é “tur e reinonan di mundu i nan gloria.” (Mateo 4:8, 9) Mas despues, e hudiunan kier a hasié rei. (Juan 6:15) Kisas tin hende awe ta puntra nan mes si lo no tabata mas probechoso pa humanidat si Hesus a aseptá e ofertanan ei. Podisé nan ta rasoná ku komo rei humano, Hesus lo por a hasi hopi kos bon pa humanidat. Pero Hesus mes a rechasá tal tipo di pensamentu. El a konsentrá riba duna testimonio di e bèrdat.
13, 14. (a) Kiko no a stroba Hesus di konsentrá riba loke ta importante p’e? (b) Ounke Hesus tabata pober den sentido material, kiko el a logra?
13 Ademas, Hesus no a kore tras di rikesa. Komo resultado, e no a hiba un bida di luho. E no tabatin ni sikiera su propio kas. Na un okashon el a bisa: “Zoro tin kueba i para di shelu tin nèshi, ma e Yu di hende no tin ningun lugá pa pone su kabes.” (Mateo 8:20) Ora Hesus a muri, e úniko kos di balor ku Beibel ta indiká ku e tabatin ta e paña ku e sòldánan romano a tira lòt riba dje. (Juan 19:23, 24) Akaso Hesus su bida tabata un frakaso? Apsolutamente ku nò!
14 Hesus a logra hopi mas ku kualke hende riku ku ta hasi obra di karidat hamas lo por a logra. Pablo a bisa: “Boso konosé e grasia di nos Señor Hesukristu, ku ounke e tabata riku, sin embargo pa boso motibu el a bira pober, pa boso dor di su pobresa por a bira riku.” (2 Korintionan 8:9; Filipensenan 2:5-8) Ounke Hesus tabata pober den sentido material, el a habri kaminda pa hende humilde por gosa di bida eterno den perfekshon. Esta gradisidu nos ta na dje! Tambe nos ta masha kontentu ku e rekompensa ku el a risibí pasobra el a konsentrá riba hasi Dios su boluntat.—Salmo 40:8; Echonan 2:32, 33, 36.
15. Kiko tin mas balor ku rikesa?
15 Kristiannan ku awe ta hasi esfuerso pa imitá Hesus, tambe ta nenga di kore tras di rikesa. (1 Timoteo 6:9, 10) Nan ta rekonosé ku rikesa por hasi bida kómodo, pero nan sa ku rikesa no por yuda nan haña bida eterno den futuro. Ora un kristian muri, su rikesa material no ta di ningun balor p’e, meskos ku e paña di Hesus no tabatin balor p’e ora el a muri. (Eklesiastés 2:10, 11, 17-19; 7:12) Ora un kristian muri, e úniko kos di berdadero balor ku e tin ta su relashon ku Yehova i ku Hesukristu.—Mateo 6:19-21; Lukas 16:9.
Oposishon No A Deskurashá Hesus
16. Kon Hesus a reakshoná riba oposishon?
16 Oposishon no a pone Hesus stòp di konsentrá riba dunamentu di testimonio di e bèrdat. Ni e echo ku e tabata sa ku su ministerio terenal lo a terminá den un morto sakrifisial, no a deskurash’é. Pablo a bisa di Hesus: “Kende, pa motibu di e goso poné su dilanti, a soportá e sufrimentu di [“staka di tormento,” NW], sin hasi kaso di bèrgwensa, i a sinta na man drechi di e trono di Dios.” (Hebreonan 12:2) Tuma nota ku Hesus no a “hasi kaso di bèrgwensa.” E no a preokupá ku loke su oponentenan a pensa di dje. El a konsentrá riba hasi e boluntat di Dios.
17. Kiko nos por siña di Hesus su perseveransia?
17 Aplikando e lès di Hesus su perseveransia, Pablo a animá kristiannan: “Konsiderá esun ku a soportá tal hostilidat di pekadónan kontra su mes, pa boso no kansa i pèrdè ánimo.” (Hebreonan 12:3) Ta sierto ku nos por kansa di konfrontá oposishon òf bofon dia aden dia afó. Tambe nos por kansa di e lucha konstante pa resistí e atrakshonnan di mundu. I kisas esei ta pone ku nos tin ku wanta krítika di nos famia ku ta enkurashá nos pa “logra algu” den bida. Sin embargo, meskos ku Hesus, nos ta akudí na Yehova pa sostené nos segun ku firmemente nos ta sigui pone e Reino na promé lugá den nos bida.—Mateo 6:33; Romanonan 15:13; 1 Korintionan 2:4.
18. Ki lès ekselente nos por siña for di loke Hesus a bisa Pedro?
18 Un okashon ku Hesus a demostrá bon kla ku e no tabata ke pa nada strob’é di konsentrá riba loke ta mas importante, ta ora ku el a kuminsá konta su disipelnan tokante su binidero morto. Pedro a animá Hesus pa ta “bondadoso” ku su mes i a sigur’é ku ‘apsolutamente lo e no tin e destino aki.’ Hesus a nenga di skucha kualke kos ku lo por a debilitá su determinashon pa hasi Yehova su boluntat. El a bira lomba pa Pedro i a bisa: “Bai tras di mi, Satanas! Bo ta un tropieso pa mi, pasobra bo no ta pensa pensamentu di Dios sino esun di hende.” (Mateo 16:21-23, NW) Laga nos tambe ta semper mesun determiná pa rechasá pensamentu di hende. Mas bien, semper laga e pensamentunan di Dios guia nos.
E Reino Lo Trese Berdadero Benefisio
19. Ounke Hesus a hasi hopi milager, kiko tabata e parti mas importante di su ministerio?
19 Hesus a hasi hopi milager pa demostrá ku e tabata e Mesias. Asta el a lanta hende for di morto. E obranan ei a atraé e multitutnan, pero Hesus no a bin na tera djis pa hasi trabou sosial. El a bin pa duna testimonio di e bèrdat. E tabata sa ku kualke benefisio material ku e perkurá, lo tabata algu temporal. Asta e hendenan resusitá lo a bolbe muri. Solamente dor di duna testimonio di e bèrdat lo e por a yuda algun hende gana bida eterno.—Lukas 18:28-30.
20, 21. Kon kristiannan berdadero ta mantené nan balansa den e asuntu di bon obra?
20 Awe, tin hende ta purba imitá e bon obranan di Hesus dor di traha hospital òf dor di yuda e pobernan rònt mundu mediante otro servisionan sosial. Den algun kaso nan ta hasi hopi sakrifisio personal, i nan sinseridat ta digno di elogio; pero kualke alivio ku nan duna ta pa un tempu so. Ta e Reino so lo por trese alivio permanente. P’esei, meskos ku Hesus, Testigunan di Yehova ta konsentrá riba dunamentu di testimonio di e bèrdat tokante e Reino ei.
21 Klaru ku kristiannan berdadero ta hasi bon obra tambe. Pablo a skirbi: “Miéntras nos tin oportunidat, laga nos hasi bon na tur hende, i spesialmente na esnan ku ta di e famia di fe.” (Galationan 6:10) Den tempu di krísis òf ora un hende ta den nesesidat, nos no ta vasilá pa “hasi bon” na nos próhimo òf na nos rumannan kristian. No opstante, nos ta keda konsentrá riba loke Hesus a mira komo lo mas importante: dunamentu di testimonio di e bèrdat.
Siña for di Hesus Su Ehèmpel
22. Dikon kristiannan ta prediká na nan próhimo?
22 Pablo a skirbi: “Ai di mi si mi no prediká evangelio!” (1 Korintionan 9:16) E no tabata indiferente pa ku e evangelio pasobra predikashon di e bon nobo a nifiká bida p’e i pa esnan ku skuch’é. (1 Timoteo 4:16) Nos ta mira nos sirbishi di e mesun manera. Nos ke yuda nos próhimo. Nos ke mustra nos amor pa Yehova. Nos ke demostrá nos amor pa Hesus i nos apresio pa su gran amor pa nos. P’esei nos ta prediká e bon nobo i asina nos ‘no ta biba mas konforme e pashonnan di hende, sino konforme e boluntat di Dios.’—1 Pedro 4:1, 2.
23, 24. (a) Ki lès nos ta siña for di e milager di e piskánan? (b) Ken awe ta dunando testimonio kabal?
23 Meskos ku Hesus, nos no ta stòp di konsentrá riba nos trabou prinsipal ora hende ta hasi bofon di nos òf na un manera rabiá ta rechasá nos mensahe. Nos ta siña un lès for di e milager ku Hesus a hasi ora el a yama Pedro ku Andres pa siguié. Nos ta saka afó ku si nos obedesé Hesus i, na moda di papia, tira nos redanan asta den awanan aparentemente improduktivo, nos piskamentu lo por duna resultado. Hopi piskadó kristian a kohe bon piská despues di a traha años den awanan aparentemente improduktivo. Otro piskadó tabatin chèns di muda bai kaminda e piskamentu ta mas produktivo i nan a kue bon piská einan. Sea loke sea nos hasi, nos lo no stòp di tira nos redanan. Nos sa ku ainda Hesus no a deklará ku e trabou di prediká a kaba den ningun parti di mundu.—Mateo 24:14.
24 Aktualmente, tin mas ku seis mion Testigu di Yehova ta prediká aktivamente den mas ku 230 pais. E Toren di Vigilansia di 1 di febrüari 2005 lo tin e rapòrt mundial di nan aktividat durante e aña di sirbishi 2004. E rapòrt ei lo demostrá ku Yehova su bendishon riku ta riba e trabou di prediká. Den e tempu ku ta resta pa e sistema di kosnan aki, laga nos sigui tuma na pechu e palabranan stimulante di Pablo: “Prediká e palabra, okupá bo den dje urgentemente.” (2 Timoteo 4:2, NW) Laga nos sigui duna testimonio kabal te ora ku Yehova bisa ku e trabou a terminá.
Kuminsando e aña aki, e Rapòrt di Aña di Sirbishi di Testigunan di Yehova Mundialmente lo no sali den e edishon di 1 di yanüari di E Toren di Vigilansia. Na lugá di esei lo e sali den e edishon di 1 di febrüari.
Bo Por Kontestá?
• Kon nos por benefisiá di e entrenamentu ku Hesus a duna su disipelnan?
• Ki aktitut Hesus tabatin pa ku e hendenan ku el a prediká na dje?
• Kiko ta motivá nos pa duna testimonio kabal?
• Den ki maneranan nos por sigui konsentrá riba hasi Dios su boluntat meskos ku Hesus a hasi?
[Preguntanan di Estudio]
[Plachi na página 15]
Nos lo ta efektivo den nos sirbishi si nos mustra e mesun interes profundo den hende ku Hesus a demostrá
[Plachi na página 16, 17]
Hesus a bin na tera prinsipalmente pa duna testimonio di e bèrdat
[Plachinan na página 17]
Testigunan di Yehova ta konsentrá riba duna testimonio kabal