Kon pa Protehá Bo Yunan pa Medio di e Sabiduria di Dios

TUR dia nos kurpa ta den guera. E tin ku bringa kontra un kantidat di mikrobio, parasit i vírus. Afortunadamente, mayoria di nos a heredá un sistema inmunológiko ku ta defendé nos kontra tal atake i ta spar nos di bira víktima di vários malesa kontagioso.

Den un manera similar, kristiannan tin ku lucha kontra ideanan i normanan no-bíbliko i kontra e preshonnan ku por destruí nos salú spiritual. (2 Korintionan 11:3) Pa nos por resistí e atake diario aki kontra nos mente i kurason, nos tin ku desaroyá un sistema di defensa pa protehá nos mes spiritualmente.

Spesialmente nos yunan tin mester di tal defensa, ya ku nan no ta nase ku e defensa aki ku por kontrarestá e spiritu di mundu. (Efesionan 2:2) Segun ku yunan ta krese, ta masha importante pa mayornan yuda nan desaroyá nan propio defensa. Riba kiko e defensa ei ta basá? Beibel ta splika: “Yehova mes ta duna sabiduria; . . . e mes lo protehá e kaminda di esnan ku ta leal na dje.” (Proverbionan 2:6, 8, NW) E sabiduria di Dios por protehá e kaminda di hóbennan ku di otro manera kisas no ta para firme kontra mal asosiashon, preshon di nan pareunan òf entretenimentu insaludabel. Kon mayornan por sigui e guia di Yehova i inkulká Dios su sabiduria den nan yunan?

Buska Asosiashon Edifikante

Ta di komprondé ku tinernan gusta kompania di otro tiner, pero si nan ta asosiá eksklusivamente ku personanan sin eksperensia esei lo no yuda nan haña e sabiduria di Dios i us’é. Un proverbio ta spièrta: “Lokura ta mará den kurason di un mucha.” (Proverbionan 22:15) Pues kon algun mayor a yuda nan yunan apliká e sabiduria di Dios den e asuntu di asosiashon?

Un tata ku yama Don * a bisa: “Nos yu hòmbernan a pasa basta tempu ku amigunan di nan mes edat, pero mayoria di e tempu ei nan a pas’é den nos kas, den nos presensia. Nos portanan semper tabata habrí pa nan amigunan i  p’esei konstantemente nos kas tabata yen di hóben; nos a duna nan kos di kome i laga nan sinti ku nan tabata bonbiní. Gustosamente nos a tolerá e bochincha i desòrdu den nos kas afin di perkurá un ambiente safe den kua nos yunan por a gosa.”

Brian ku Mary tin tres yu ku ta bon mucha pero nan ta atmití ku no tabata semper fásil pa eduká nan. Nan a konta: “Den nos kongregashon, tabatin masha poko hóben rònt di 17 aña pa asosiá ku nos yu muhé Jane. Sin embargo, e tabatin ún amiga ku yama Susan, un mucha muhé alegre i amigabel. Pero Susan su mayornan tabata mas liberal ku nos. Nan a permití Susan keda riba kaya mas lat ku Jane, bisti saya mas kòrtiku, skucha músika kuestionabel i wak pelíkulanan inapropiá. Pa basta tempu Jane tabatin problema pa komprondé nos punto di bista. Den su bista, Susan su mayornan a parse mas komprensivo, miéntras ku el a konsiderá nos demasiado estrikto. Ta te ora ku Susan a hañ’é den problema, Jane a realisá ku nos firmesa tabata un protekshon p’e. Nos ta kontentu ku nos a keda para riba loke nos tabata kere ta mihó pa nos yu muhé.”

Meskos ku Jane, tin hopi hóben ku a siña ku ta sabí pa buska e guia di nan mayornan den e tipo di asosiashon aki. Un proverbio ta bisa: “Orea ku ta skucha reprendementu di bida lo biba meimei di e sabínan.” (Proverbionan 15:31) Sabiduria di Dios ta guia hóbennan pa buska kompania di amigunan edifikante.

Kon pa Resistí e Preshon pa Hasi Meskos Ku Otro Hóben

Asosiashon i preshon di pareu ta estrechamente ligá ku otro. Dia aden dia afó, e preshon pa hasi meskos ku otro hóben ta ataká e defensa di nos yunan. Komo ku hóbennan normalmente ta buska e aprobashon di esnan di nan mes edat, e preshon di nan pareunan por moldia nan den e malchi ku e mundu ta konsiderá esun deseabel.—Proverbionan 29:25.

Beibel ta rekordá nos ku “e mundu ta pasa bai i su deseonan tambe.” (1 Juan 2:17) Pues, mayornan no mester permití pa e puntonan di bista di mundu tin demasiado influensia riba nan yunan. Kon nan por yuda nan yunan pensa manera un kristian?

Richard a bisa: “Mi yu muhé semper kier a bisti loke otro hóbennan tabata bisti. P’esei ku pasenshi nos a rasoná kuné riba e bentaha- i desbentahanan di kada petishon. Asta ora tabata trata di modanan ku nos a pensa ta aseptabel, nos a sigui e konseho ku nos a tende algun aña pasá: ‘Un persona sabí ta esun ku no ta e promé pa adoptá un moda nobo, ni e último pa lag’é.’”

Un mama ku yama Pauline a kontrarestá e preshon di pareu ku su yunan a haña den un otro manera. E ta kòrda: “Mi a mustra interes den loke a interesá mi yunan i ku regularidat mi tabata bai den kamber serka nan pa papia ku nan. E kòmbersashonnan largu aki a hasi posibel ku mi por a influensiá nan manera di  pensa i yuda nan konsiderá otro manera di mira asuntunan.”

Preshon di pareu no ta algu ku lo stòp. P’esei mayornan probablemente lo haña nan ku un lucha konstante pa “tumba rasonamentunan” mundano i yuda nan yunan trese nan pensamentunan “bou di kontròl pa hasié obediente na e Kristu.” (2 Korintionan 10:5, NW) Pero dor di ‘perseverá den orashon,’ tantu mayor komo yu lo ser fortifiká pa kumpli ku e tarea sumamente importante aki.—Romanonan 12:12, NW; Salmo 65:2.

E Atrakshon Fuerte di Entretenimentu

Un di tres influensia ku pa mayornan kisas ta difísil pa trata kuné ta entretenimentu. Mucha chikí naturalmente gusta hunga. Hopi mucha mas grandi tambe ansiosamente ta buska dibertishon. (2 Timoteo 2:22) Pero si satisfasé e deseo aki den un manera imprudente, e por debilitá nan defensa spiritual. E peliger ta bin prinsipalmente den dos manera.

Promé, mayoria entretenimentu ta reflehá mundu su normanan moral degradá. (Efesionan 4:17-19) Sin embargo, típikamente e ta ser presentá den un manera eksitante i atraktivo. Esaki ta forma un berdadero peliger pa hóbennan, ya ku kisas nan no ta mira e trampanan skondí.

Di dos, e kantidat di tempu ku nan ta dediká na entretenimentu tambe por kousa problema. Pa algun hóben, dibertishon ta bira e kos di mas importante den bida, apsorbando demasiado tempu i energia. Un proverbio ta spièrta ku “no ta bon pa kome hopi miel.” (Proverbionan 25:27) Asina tambe demasiado entretenimentu lo kita e apetit pa alimento spiritual i hiba na flohera mental. (Proverbionan 21:17; 24:30-34) Si hóbennan bai disfrutá plenamente di e mundu aki esei lo stroba nan di haña ‘un gara riba loke ta e bida berdadero,’ bida eterno den Dios su mundu nobo. (1 Timoteo 6:12, 19) Kon mayornan a trata ku e reto aki?

Mari Carmen, mama di tres yu muhé, a bisa: “Nos tabata ke pa nos yunan tin rekreo sano i pa nan pasa bon. P’esei nos tabata sali regularmente komo famia, i tambe nan a pasa ratunan huntu ku amigunan den kongregashon. Pero nos a tene rekreo na su debido lugá. Nos a kompar’é ku postre na final di un kuminda, e ta un kos dushi pero e no ta e plato prinsipal. Nan a siña traha na kas, na skol i den kongregashon.”

Don ku Ruth tampoko no a laga entretenimentu ta un asuntu di kasualidat. Nan a splika: “Nos a hasié un kustumber pa usa djasabra komo ‘dia di famia.’ Mainta nos tabata sali den sirbishi di vèlt, atardi nos tabata bai landa, anto anochi nos tabatin un sena spesial.”

E komentarionan di e mayornan aki ta mustra e balor di ta balansá den perkurá entretenimentu sano i di ten’é na su debido lugá den bida di un kristian.—Eklesiastés 3:4; Filipensenan 4:5, NW.

Konfia den Yehova

Naturalmente ta tuma años pa desaroyá un defensa spiritual. No tin un remedi milagroso ku lo duna yunan sabiduria di Dios i motivá nan pa konfia den nan Tata selestial. Mas bien, mayornan tin ku sigui “lanta nan den e disiplina i instrukshon” di Yehova. (Efesionan 6:4) E dunamentu regular di “instrukshon” aki ta nifiká ku mayornan ta yuda nan yunan mira asuntunan manera Dios ta mira nan. Kon mayornan por logra esaki?

Un faktor importante pa logr’é ta di tene un studio di Beibel regular komo famia. E estudio ta  ‘habri wowo di e yunan, pa nan por kontemplá e kosnan maravioso for di Dios su lei.’ (Salmo 119:18) Diego a tuma e estudio di famia masha na serio i asina el a yuda su yunan hala mas serka Yehova. El a konta: “Mi tabata prepará kabalmente pa e estudio. Mi a siña kon pa hasi e personahenan bíbliko mas bibu dor di hasi investigashon den publikashonnan bíbliko. Mi a animá mi yunan pa buska similaridatnan entre nan bida i bida di personahenan fiel. Esaki a rekordá mi yunan na un manera bibu loke ta agradá Yehova.”

Yunan ta siña tambe den un ambiente informal. Moisés a hasi un yamada riba mayornan pa papia tokante e rekordatorionan di Yehova ‘ora nan a sinta den nan kas, ora nan a kana riba kaminda, ora nan a bai drumi i ora nan a lanta.’ (Deuteronomio 6:7) Un tata a splika: “Mi yu hòmber mester di tempu pa habri su kurason i ekspresá su sintimentunan. Ora nos bai kana huntu òf ta hasi un trabou huntu, ta despues di basta ratu e ta kuminsá deshogá su mes. Na okashonnan asina, nos sa tin bon kòmbersashon ku ta benefisiá nos tur dos.”

E orashonnan ku mayornan ta hasi tambe tin un efekto profundo riba nan yunan. Ora yunan tende nan mayornan aserká Dios humildemente pa pidi yudansa i pordon, esei ta motivá e yunan pa ‘kere ku Dios ta eksistí.’ (Hebreonan 11:6, BPK) Hopi mayor ku tin éksito ta enfatisá e importansia di hasi orashon komo famia, por ehèmpel, orashonnan ku ta inkluí asuntunan di skol i otro kosnan ku ta preokupá nan yunan. Un tata a bisa ku su kasá semper ta hasi orashon ku e muchanan promé ku nan sali bai skol.—Salmo 62:8; 112:7.

“No Laga Nos Kansa di Hasi Bon”

Tur mayor ta hasi fout i kisas ta lamentá e manera ku nan a atendé sierto situashonnan. No opstante, Beibel ta urgi nos pa sigui purba, pa nos no “kansa di hasi bon.”—Galationan 6:9.

Sin embargo, tin biaha mayornan por sinti gana di entregá ora ku maske kon nan trata nan no por logra komprondé nan yunan. Lo ta fásil pa konkluí ku e generashon mas hóben ta otro i difísil. Pero en realidat, muchanan djawe tin e mesun debilidatnan ku generashonnan anterior, i nan ta konfrontá e mesun tipo di tentashonnan, ounke ku kisas e preshon pa kometé piká a bira mas grandi. P’esei un tata, despues di a korigí su yu hòmber, a suavisá su palabranan dor di agregá bondadosamente: “Bo kurason simplemente ke hasi loke mi kurason kier a hasi tempu ku mi tabatin bo edat.” Podisé mayornan no sa muchu kos tokante kòmpiuter, pero nan sa tur kos tokante e inklinashonnan di e karni imperfekto.—Mateo 26:41; 2 Korintionan 2:11.

 Podisé tin mucha ku no ta masha kontentu ku e guia di nan mayornan i asta ta rebeldiá kontra e disiplina ku nan ta risibí. Pero un biaha mas, ta esensial pa perseverá. Apesar ku na prinsipio nan tin mala gana òf tin periodonan ku nan ta resistí guia, hopi mucha ku tempu ta reakshoná faborabel. (Proverbionan 22:6; 23:22-25) Matthew, un hóben kristian ku awor ta sirbi na un ofisina di sukursal di Testigunan di Yehova, a konta: “Tempu ku mi tabata tiner, mi a sinti ku e restrikshonnan di mi mayornan tabata inhustu. Mi a rasoná, si e mayornan di mi amigunan tabata permití un kos, dikon esnan di mi no por a hasi meskos? I mi tabata rabia hopi ora ku tin biaha nan a straf mi dor di no laga mi bai rema, un kos ku mi tabata gusta hopi. Sin embargo, awor ku mi ta wak bèk, mi ta realisá ku e disiplina ku mi mayornan a duna mi tabata efektivo i tambe nesesario. Mi ta gradisidu ku nan a duna mi e guia ku mi tabatin mester ora ku mi tabatin mester di dje.”

No tin duda tokante esaki: maske nos yunan tin biaha no por evitá di ta den un ambiente spiritual insaludabel, tòg nan por krese bira kristiannan ekselente. Manera Beibel ta primintí, e sabiduria di Dios por yuda nan desaroyá un sistema di defensa pa protehá nan mes spiritualmente. “Pasobra sabiduria lo bin den bo kurason, i konosementu lo ta agradabel na bo alma. Diskreshon lo warda bo; komprondementu lo kuida bo. Sabiduria lo libra bo for di e kaminda di maldat.”—Proverbionan 2:10-12.

No ta fásil pa karga un yu nuebe luna den barika. I e 20 añanan ku ta sigui despues kisas lo trese sierto kantidat di doló i tambe felisidat. Pero komo ku mayornan kristian ta stima nan yunan, nan ta hasi tur nan esfuerso pa protehá nan ku e sabiduria di Dios. Nan sintimentu pa ku nan yunan ta meskos ku loke apòstel Juan a sinti pa ku su yunan spiritual: “No tin goso mas grandi pa mi ku di tende ku mi yunan ta kana den e bèrdat.”—3 Juan 4.

[Nota]

[Plachi na página 24]

“Nos portanan semper tabata habrí pa nan amigunan i p’esei konstantemente nos kas tabata yen di hóben”

[Plachi na página 25]

Mustra interes den loke ta interesá bo yunan

[Plachinan na página 26]

“Mi tabata prepará kabalmente pa e estudio”