Uní dor di Amor pa Dios

ORA ku e kongregashon kristian a keda formá den e promé siglo di nos era, un di su karakterístikanan sobresaliente—apesar di e diversidat di su miembronan—tabata e union. E adoradónan ei di e Dios berdadero a bin di nashonnan na Asia, Europa i Afrika. Nan a representá un variedat di antesedente: saserdote, sòldá, esklabo, refugiado, hende di fishi, hende profeshonal i komersiante. Algun tabata hudiu, i otronan no tabata hudiu. Hopi di nan na ántes tabata adúltero, homoseksual, buraché, ladron òf estafadó. Sin embargo, ora nan a bira kristian, nan a bandoná nan práktikanan malu i a bira hopi uní den fe.

Kon bin kristianismo di promé siglo a logra trese tur e hendenan aki huntu den union? Kon bin nan tabata na pas ku otro i ku hende en general? Dikon nan no a djòin den rebelion i konflikto? Dikon kristianismo di promé tabata asina distinto for di e religionnan prinsipal djawe?

Ta Kiko A Uni Miembronan di e Kongregashon?

E faktor prinsipal ku a uni e kreyentenan den promé siglo tabata amor pa Dios. E kristiannan ei a aseptá nan obligashon prinsipal di stima e Dios berdadero, Yehova, ku henter nan kurason, alma i mente. Por ehèmpel, apòstel Pedro, un hudiu, a haña instrukshon pa bishitá e kas di un siudadano stranhero, un persona ku  normalmente lo e no tabatin kontakto estrecho kuné. Loke a motivá Pedro pa obedesé e instrukshon tabata prinsipalmente amor pa Yehova. Pedro i otro kristiannan di promé tabatin un relashon íntimo ku Dios ku tabata basá riba konosementu eksakto di Su personalidat, di loke el a gusta i no a gusta. Ku tempu, tur adoradó a bin komprondé ku tabata Yehova su boluntat pa nan ta “uní den e mesun mente i den e mesun opinion.”—1 Korintionan 1:10; Mateo 22:37; Echonan 10:1-35.

Un otro kos ku a uni e kreyentenan tabata nan fe den Hesukristu. Nan kier a sigui su pasonan estrechamente. El a duna nan e mandamentu: “Boso stima otro . . . meskos ku ami a stima boso. . . . Na esaki tur hende lo sa ku boso ta mi disipel, si boso tin amor un pa otro.” (Juan 13:34, 35) Esaki lo no mester tabata un emoshon superfisial, sino amor di sakrifisio propio. Kiko lo tabata e resultado? Hesus a pidi den orashon relashoná ku hende ku pone fe den dje: “[Mi ta pidi] pa nan tur por ta un, meskos ku abo, Tata, ta den union ku mi i ami ta den union ku bo, pa nan tambe por ta den union ku nos.”—Juan 17:20, 21, NW; 1 Pedro 2:21.

Yehova a drama su spiritu santu, òf forsa aktivo, riba su sirbidónan berdadero. E spiritu aki a promové union entre nan. El a hasi posibel ku nan por a komprondé siñansanan di Beibel ku a ser aseptá den tur kongregashon. Adoradónan di Yehova tabata prediká e mesun mensahe: santifikashon di Yehova su nòmber mediante Dios su Reino Mesiániko, ku ta e gobièrnu selestial ku lo bai goberná riba henter humanidat. E kristiannan di promé a komprondé ku nan obligashon tabata pa ‘no ser parti di e mundu aki.’ P’esei ki ora ku a surgi guera sivil òf konfliktonan militar, kristiannan a keda neutral. Nan a hasi esfuerso pa ta na pas ku tur hende.—Juan 14:26; 18:36; Mateo 6:9, 10; Echonan 2:1-4; Romanonan 12:17-21.

Tur kreyente a asumí nan responsabilidat pa promové union. Kon? Dor di hasi sigur ku nan komportashon tabata na armonia ku Beibel. P’esei apòstel Pablo a skirbi kristiannan: “Enkuanto boso manera di biba di ántes, boso pone un banda e hende bieu,” i “bisti e hende nobo,” esta, bisti e personalidat nobo.—Efesionan 4:22-32.

Nan A Mantené Union

Kreyentenan di promé siglo naturalmente tabata imperfekto i a surgi situashonnan ku a pone nan union na peliger. Por ehèmpel, Echonan 6:1-6 ta konta di un desakuerdo ku a lanta entre kristiannan hudiu di abla griego i esnan di abla hebreo. Esnan di abla griego a sinti ku nan a ser diskriminá. Sin embargo, unabes e apòstelnan a keda informá di e situashon, nan a atendé e asuntu na un manera rápido i hustu. Mas despues, un kuestion di doktrina a hiba na un kontroversia tokante e obligashonnan di personanan no-hudiu den e kongregashon kristian. A tuma un desishon basá riba prinsipionan bíbliko, i tur kongregashon a aseptá e desishon aki.—Echonan 15:1-29.

E ehèmpelnan aki ta mustra ku den e kongregashon kristian di promé siglo, desakuerdonan no a hiba na divishon étniko ni na desunion kousá dor di un aktitut infleksibel pa ku sierto doktrinanan. Dikon nò? Pasobra e faktornan ku a fomentá union tabata sufisiente fuerte pa tene e kongregashon di promé uní  i na pas. E faktornan ei tabata amor pa Yehova, fe den Hesukristu, amor di sakrifisio propio pa otro, aseptashon di e guia di spiritu santu, mesun komprondementu di siñansanan bíbliko, i e aktitut di ta kla pa kambia nan komportashon.

Uní den Adorashon den Tempu Moderno

Ta posibel pa logra union den e mesun manera awe? Akaso e mesun faktornan aki te ainda por uni miembronan di e mesun religion i hasi posibel pa nan ta na pas ku tur rasa na tur parti di mundu? Sí, ta posibel! Testigunan di Yehova ta uní den un hermandat mundial ku ta abarká mas ku 230 pais, isla i teritorio. I nan ta ser uní dor di e mesun faktornan ku a uni kristiannan den promé siglo.

E kos prinsipal ku ta kontribuí na e union ku Testigunan di Yehova ta disfrutá di dje ta nan deboshon na Yehova Dios. Esaki ta nifiká ku nan ta hasi esfuerso pa keda fiel na Yehova bou di tur sirkunstansia. Tambe Testigunan di Yehova ta ehersé fe den Hesukristu i den su siñansanan. E kristiannan aki ta demostrá un amor di sakrifisio propio pa nan rumannan den fe i ta prediká e mesun bon nobo di e Reino di Dios den tur e paisnan kaminda nan ta aktivo. Gustosamente nan ta papia tokante e Reino aki ku hende di tur religion, rasa, nashonalidat i grupo sosial. Tambe Testigunan di Yehova ta keda neutral den e asuntunan di mundu, lokual ta yuda nan resistí e preshonnan polítiko, kultural, sosial i komersial ku ta kousa asina tantu desunion den humanidat. Tur Testigu ta aseptá nan obligashon di promové union dor di komportá nan mes na armonia ku normanan bíbliko.

Union Ta Atraé Otro Hende

E union aki hopi bes a lanta interes di personanan ku no tabata Testigu. Ilse, * por ehèmpel, un tempu tabata un sùr katóliko den un konbento na Alemania. Kiko a atra’é na Testigunan di Yehova? Ilse a bisa: “Nan ta e mihó hendenan ku mi a yega di topa. Nan no ta bai guera; nan no ta hasi nada ku ta perhudiká otro hende. Nan ke yuda hende biba felis riba un tera kombertí den Paradeis bou di e Reino di Dios.”

Un otro ehèmpel ta Günther, kende tabata un sòldá aleman ku nan a manda Fransia durante e segundo guera mundial. Un dia un domi a tene un sirbishi religioso pa e sòldánan den Günther su unidat. E domi a resa pidi bendishon, protekshon i viktoria. Despues di e sirbishi, Günther a bai bèk na su puesto komo vigilante. Ku su vèrekeiker el a mira ku e tropa enemigu na otro banda di e liña di bataya tambe tabatin un sirbishi religioso na enkargo di un domi. Despues Günther a remarká: “Probablemente e domi ei tambe a resa pidi bendishon, protekshon i viktoria. Mi a puntra mi mes kon por ta ku iglesianan kristian ta na bandanan kontrario di e mesun guera.” E impreshonnan aki a keda grabá den Günther su memoria. Despues di tempu Günther a bin den kontakto ku Testigunan di Yehova, kendenan no ta partisipá den guera, i el a bira parti di nan hermandat mundial.

Ashok ku Feema tabata pertenesé ántes na un religion oriental. Den nan kas nan tabatin un altar na un dios. Pero ora ku malesa grave a asotá nan famia, nan a reeksaminá nan religion. Kòmbersando ku Testigunan di Yehova, Ashok ku Feema a keda impreshoná ku e siñansanan di Beibel i pa e amor ku tabatin entre e Testigunan. Awor nan ta publikadónan seloso di e bon nobo di e Reino di Yehova.

Ilse, Günther, Ashok i Feema ta uní huntu ku miónes di Testigu di Yehova den un hermandat mundial. Nan ta kere e promesa di Beibel ku ta indiká ku e mesun faktornan ku awe ta uni nan den adorashon, pronto lo uni tur hende obediente. E ora ei lo no tin atrosidat, desunion ni divishon mas den nòmber di religion. Mundu kompletu lo ta uní den adorashon di e Dios berdadero, Yehova.—Revelashon 21:4, 5.

[Nota]

[Plachinan na página 4, 5]

Apesar ku e kristiannan di promé a bin di vários antesedente, nan tabata uní