“Keda Alerta”

DEN tempu antiguo, tabatin pòrtir ku a traha na entrada di stat i di tèmpel i den algun kaso, asta na entrada di kasnan privá. Fuera di hasi sigur ku e portanan tabata será anochi, pòrtirnan a fungi tambe komo vigilante. Esaki tabata un asignashon masha responsabel, pasobra siguridat di e stat a dependé di nan yamada pa spièrta e hendenan di kualke peliger inminente.

Hesukristu tabata konosí ku e papel di pòrtir, ku nan a yama tambe wardadó di porta. Na un okashon, el a kompará su disipelnan ku wardadó di porta i a animá nan pa keda vigilá i alerta relashoná ku e konklushon di e sistema di kosnan hudiu. Hesus a bisa: “Tene kuidou, keda alerta, pasobra boso no sa ki ora e tempu ta yega. Ta manera un hende ku a bai hasi un biahe, kende a laga su kas i . . . a ordená e wardadó di porta pa keda alerta. P’esei, keda alerta, pasobra boso no sa ki ora e señor di e kas ta bin.”—Marko 13:33-35.

Di igual manera, ya pa mas ku 125 aña e revista aki, E Toren di Vigilansia, ta transmití Hesus su animashon pa “keda alerta.” Kon? Manera tin pará skirbí na página 2 di e revista aki: “E ta vigilá susesonan di mundu segun ku esakinan ta kumpli ku profesia bíbliko. E ta konsolá tur hende ku e bon notisia di ku e Reino di Dios pronto lo destruí tur esnan ku ta oprimí nan próhimo i lo kambia e tera den un paradeis.” E Toren di Vigilansia, ku un sirkulashon mundial di mas ku 26.000.000 ehemplar na 150 idioma, ta e revista religioso mas ampliamente distribuí na mundu. Mediante dje, Testigunan di Yehova, meskos ku e pòrtirnan di antigwedat, ta urgi hende rònt mundu pa “keda alerta” den sentido spiritual pasobra e Señor, Hesukristu, ta na punto di bolbe i ehekutá huisio riba e sistema di kosnan aki.—Marko 13:26, 37.