Kon Eksakto Historia Bíbliko Ta?

CHAIM HERZOG, eks-presidente di e Estado di Israel, i Mordechai Gichon, profèser emérito di arkeologia na Universidat di Tel Aviv, ta bisa lo siguiente den nan buki Battles of the Bible (Batayanan di Beibel):

“Deskripshon di e táktikanan di kombate di e batayanan di Beibel . . . no por ta kos ku hende a inventá. Loke ta proba esei fuera di tur duda ta por ehèmpel si hasi un komparashon entre e kampaña di Gideon kontra e madianitanan i nan aliadonan, segun e relato den Huesnan 6-8, i e batayanan di e Guera di Troya ku Homero a deskribí den su obra Iliada. Pa e obra di Homero, kualke kosta aksesibel i un stat fortifiká no muchu leu lo a sirbi komo un bon esena geográfiko . . . Pero esei no ta e kaso ku e relato bíbliko di e kampaña di Gideon. E deskripshonnan detayá di táktikanan di kombate i di enkuentronan, basá riba e relashon entre rasgonan spesífiko di e terenonan i e akshonnan di tantu amigu i enemigu—riba un esenario di guera ku tabata un 60 kilometer largu—simplemente no por ser reprodusí ningun kaminda . . . Pues práktikamente nos ta ser obligá na aseptá ku e narashon di e táktikanan di kombate di e batayanan manera Beibel ta deskribí, ta verídiko.”

Podisé bo por studia Gideon su kampaña dor di usa e mapa riba página 18 i 19 den e foyeto estilo atlas “Mira e Tera Bunita.” * E relato ta kuminsá ora “tur e madianitanan i e amalekitanan i e yu hòmbernan di oriente a reuní; i nan a krusa pasa i a kampa den e vaye di Jezreel.” Gideon a pidi e tribunan den bisindario pa bin yud’é. E susesonan a tuma lugá for di e fuente di Harod te na e seru di More, i despues mas abou den e vaye di Hordan. Despues ku Gideon a krusa Hordan persiguiendo su enemigunan, el a dominá nan.—Huesnan 6:33–8:12.

E mapa den “Mira e Tera Bunita” ta mustra e sitionan prinsipal ku ta ser menshoná i e karakterístikanan di e terenonan enbolbí. Un otro mapa (página 15) ta identifiká e teritorionan di e tribunan di Israel. E dos mapanan aki por yuda bo mira kon eksakto e relato di Beibel ta.

Esaki ta ilustrá e remarke di defuntu Profèser Yohanan Aharoni: “Den kaso di e tera di Beibel, tin un konekshon asina estrecho entre geografia i historia ku realmente bo no por komprondé niun di dos sin yudansa di e otro.”

[Nota]

[Plachi na página 32]

Mapa den background: Basá riba mapanan ku pèrmit di Pictorial Archive (Near Eastern History) Est. and Survey of Israel