Nan A Enfrentá Oposishon ku Kurashi

UN MULTITUT di hende hostiná a obligá Gayo i Aristarko, dos kompañero di Pablo, drenta e teatro di Efeso. Einan e multitut a grita dos ora largu: “Grandi ta Artémis di e efesionan!” (Echonan 19:28, 29, 34) Pablo su kompañeronan a para firme ora nan a haña nan ku e oposishon aki? Kiko a kousa e situashon aki originalmente?

Pablo a prediká ku éksito den e stat di Efeso pa rònt di tres aña. Komo resultado di esei, hopi efesio a stòp di adorá ídolo. (Echonan 19:26; 20:31) E ídolo típiko di Efeso tabata un tèmpel chikitu di plata di Artémis, e diosa di fertilidat, kende su magnífiko tèmpel a duna un bista riba henter e stat. E hendenan tabata bisti e imágennan chikitu aki di e tèmpel komo amuleto òf nan tabata pone nan den kas. Klaru ku kristiannan no tabata kumpra e ídolonan aki.—1 Juan 5:21.

Un di e platénan ku tabata yama Demetrio a sinti ku Pablo su ministerio tabata un menasa pa nan negoshi lukrativo. Dor di papia mitar bèrdat i eksagerá kosnan, el a konvensé e otro artesanonan ku rònt Asia Menor hende lo stòp di adorá Artémis. Ora e platénan furioso a kuminsá alabá Artémis na bos haltu, a surgi un disturbio formal i henter e stat tabata den konfushon.—Echonan 19:24-29.

Míles di hende a reuní na e teater ku tabatin asiento pa 25.000 persona. Pablo a ofresé su mes pa papia ku e multitut desordená, pero algun funshonario amigabel a konvens’é pa no hasié. Finalmente e sekretario di stat a logra kalma e multitut, i Gayo ku Aristarko a skapa ileso.—Echonan 19:35-41.

Awe e pueblo di Dios tambe por haña nan ku opositornan i asta lantamentu segun ku nan ta kumpli ku nan ministerio. Hopi bes nan ta prediká e bon nobo den statnan kaminda ta reina un ambiente di idolatria, inmoralidat i delinkuensia. Apesar di esei, ku kurashi nan ta imitá apòstel Pablo, kende ‘no a laga di siña públikamente i di kas pa kas’ den e stat di Efeso. (Echonan 20:20) I nan tambe ta alegrá ora nan ta mira ku ‘e palabra di Yehova ta sigui krese i prevalesé.’—Echonan 19:20.

[Plachi na página 30]

Ruinanan di e teatro na Efeso