Siña Konosé Yehova Su Kamindanan

“Laga mi konosé bo kamindanan, pa mi konosé bo.”—EKSODO 33:13.

1, 2. (a) Pakiko Moisés a reakshoná manera el a hasi ora el a mira un egipsio maltratá un hebreo? (b) Pa Yehova por a usa Moisés den su sirbishi, kiko Moisés tabatin ku siña?

MOISÉS a lanta den kas di Fárao i a haña un edukashon den e sabiduria ku pa e noblenan di Egipto tabata di gran balor. Sin embargo, Moisés a realisá ku e no tabata un egipsio. Su mayornan tabata hebreo. Tempu ku e tabatin 40 aña, el a sali bai inspekshoná su rumannan, e yunan di Israel. Ora el a mira un egipsio maltratá un di e hebreonan, Moisés no a keda sin hasi nada. El a dal e egipsio mata. Moisés a tuma parti pa e pueblo di Yehova i a pensa ku Dios tabata usand’e pa libra su rumannan. (Echonan 7:21-25; Hebreonan 11:24, 25) Ora e insidente aki a bira konosí, kas real di Egipto a kuminsá mira Moisés komo un rebelde, i e tabatin ku hui pa skapa su bida. (Eksodo 2:11-15) Pa Dios por a usa Moisés, Moisés tabatin ku siña konosé Yehova su kamindanan mihó. Moisés tabata dispuesto pa siña?—Salmo 25:9.

² Pa e siguiente 40 añanan, Moisés a biba komo un eksiliado i un wardadó di karné. En bes di bira amargá pa motibu ku su rumannan hebreo aparentemente no a apresi’é, Moisés a someté su mes na loke Dios a permití. Ounke a pasa hopi aña durante kua aparentemente e no a haña niun rekonosementu, Moisés a laga Yehova form’é. Mas despues el a skirbi bou di influensia di e spiritu santu di Dios, i no komo ekspreshon di su opinion personal: “Awor e hòmber Moisés tabata masha humilde, mas ku tur hòmber ku tabatin riba superfisie di tera.” (Numbernan 12:3) Yehova a usa Moisés den maneranan sobresaliente. Si nos tambe ta humilde, Yehova lo bendishoná nos.—Sofonias 2:3.

Moisés A Haña un Enkargo

3, 4. (a) Ki enkargo Yehova a duna Moisés? (b) Ki yudansa Moisés a haña?

³ Un dia un angel ku a representá Yehova a papia ku Moisés banda di Seru Horèb riba e Península di Sinaí. El a bisa Moisés: “Siguramente mi a mira e aflikshon di mi pueblo ku ta na Egipto, i a tende nan sklamashon pa motibu di nan kapatasnan, pasobra mi ta konsiente di nan sufrimentunan. P’esei mi a baha bin pa libra nan for di man di e egipsionan i pa saka nan for di e tera ei hiba na un tera bon i grandi, na un tera ku tin lechi i miel na abundansia.” (Eksodo 3:2, 7, 8) En konekshon ku esaki, Dios tabatin un trabou pa Moisés. Pero un kos sí, e tabatin ku kumpli kuné manera Yehova a manda.

⁴ E angel di Yehova a kontinuá: “Bin awor i lo mi manda bo serka Fárao pa bo saka mi pueblo, e yunan di Israel, for di Egipto.” Moisés a duda un poko. E no a sinti su mes kapas, i riba su mes, e no tabata tampoko. Sin embargo, Yehova a garantisá Moisés: “Lo mi ta ku bo.” (Eksodo 3:10-12) Yehova a duna Moisés poder p’e hasi milagernan ku lo a demostrá ku en bèrdat ta Dios a mand’é. Aaron, ruman di Moisés, lo mester a kompañ’é pa papia p’e. Yehova lo a siña nan kiko nan mester a bisa i hasi. (Eksodo 4:1-17) Moisés lo a kumpli fielmente ku e asignashon ei?

5. Pakiko e aktitut di Israel tabata un problema pa Moisés?

⁵ Na promé instante e ansianonan di Israel a kere Moisés i Aaron. (Eksodo 4:29-31) Sin embargo,  pronto, “e formannan di e yunan di Israel” a kulpa Moisés i su ruman di a hasi nan “un abominashon” dilanti Fárao ku su sirbidónan. (Eksodo 5:19-21; 6:9) Ora e israelitanan a sali for di Egipto i a mira e garoshinan egipsio bini nan tras, nan a haña miedu. Ku Laman Kòrá dilanti nan i garoshi di guera nan tras, e israelitanan a sinti nan atrapá, i nan a kulpa Moisés pa esei. Kon abo lo a reakshoná? Ounke e israelitanan no tabatin boto, riba instrukshon di Yehova, Moisés a manda e pueblo pa prepará nan kosnan pa nan bai. E ora ei Dios a pusha e awanan di Laman Kòrá i e fondo di laman a seka di manera ku Israel por a pasa.—Eksodo 14:1-22.

Un Kuestion Mas Importante ku Liberashon

6. Kiko Yehova a enfatisá ora el a duna Moisés e enkargo?

⁶ Ora Yehova a duna Moisés e enkargo, el a enfatisá e importansia di e nòmber divino. Rèspèt pa e nòmber ei i pa e Persona ku esaki ta representá tabata krusial. Ora Moisés a puntra Yehova tokante su nòmber, el a bisa Moisés: “Lo mi resultá di ta loke lo mi resultá di ta.” Ademas, Moisés mester a bisa e yunan di Israel: “Yehova e Dios di boso antepasadonan, e Dios di Abraham, e Dios di Isaak i e Dios di Jakòb, a manda mi serka boso.” Yehova a agregá: “Esaki ta mi nòmber te na tempu indefiní, i esaki ta e memoria di mi pa generashon tras di generashon.” (Eksodo 3:13-15, NW) Te awe Yehova ta e nòmber pa kua Dios ta konosí serka su sirbidónan rònt mundu.—Isaias 12:4, 5; 43:10-12, NW.

7. Kiko Dios a urgi Moisés pa hasi apesar di e arogansia di Fárao?

⁷ Moisés i Aaron a presentá dilanti Fárao i a entregá nan mensahe den nòmber di Yehova. Pero ku un tono arogante, Fárao a bisa: “Ken ta Yehova, pa mi obedesé su bos pa manda Israel bai? Mi no konosé Yehova mes i, ademas, mi no ta manda Israel bai.” (Eksodo 5:1, 2, NW) Fárao tabatin yen di maña i el a demostrá ku su kurason ta duru. Asina mes Yehova a urgi Moisés pa entreg’é e mensahenan bes tras bes. (Eksodo 7:14-16, 20-23; 8:1, 2, 20) Moisés por a mira ku esei a iritá Fárao. Un konfrontashon mas lo por a duna bon resultado? Israel tabata ansioso pa haña liberashon. Fárao a nenga redondamente. Kiko abo lo a hasi?

8. Kiko tabata e benefisio di e manera ku Yehova a trata ku e situashon ku a enbolbé Fárao, i ki efekto e susesonan ei mester tin riba nos?

⁸ Moisés a entregá un mensahe mas, ku a bisa: “Esaki ta loke Yehova e Dios di e hebreonan a bisa: ‘Manda mi pueblo bai pa nan por sirbi mi.’” Tambe Dios a bisa: “Ya mi por a alargá mi man pa mi heridá bo i bo pueblo ku pèst i pa eliminá bo for di tera. Pero, en realidat, p’e motibu aki mi a mantené bo na eksistensia, pa mi mustra bo mi poder i pa mi nòmber ser deklará den henter e tera.” (Eksodo 9:13-16, NW) Yehova su propósito tabata pa mediante e huisio kontra Fárao ku su kurason duru, demostrá su poder den un manera ku lo a duna un atvertensia na tur persona ku ta desafi’é. Esaki ta konta tambe pa Satanas e Diabel, esun ku mas despues Hesukristu a yama “e prens di e mundu.” (Juan 14:30; Romanonan 9:17-24) Manera a ser profetisá, e nòmber di Yehova a ser deklará na tur parti di tera. Su gran pasenshi a permití tantu e  israelitanan komo un inmenso multitut miksto ku a uni ku nan pa adorá Dios skapa nan bida. (Eksodo 9:20, 21; 12:37, 38) Desde e tempu ei, e deklarashon di Yehova su nòmber a benefisiá miónes di hende mas ku a aseptá adorashon berdadero.

El A Trata ku un Pueblo Difísil

9. Kon Moisés su mes pueblo a demostrá falta di rèspèt pa Yehova?

⁹ E hebreonan tabata konosé e nòmber di Dios. Moisés a usa e nòmber ei ora el a papia ku nan, pero no ta semper nan a mustra e debido rèspèt pa Esun ku tabata karga e nòmber ei. Kiko a sosodé djis despues ku Yehova milagrosamente a libra e israelitanan for di Egipto i nan no a haña bon awa di bebe mesora? Nan a murmurá kontra Moisés. Despues nan a keha tokante e kuminda. Moisés a spièrta nan ku nan murmuramentu no tabata djis kontra dje i Aaron sino kontra Yehova. (Eksodo 15:22-24; 16:2-12) Na Seru Sinaí, Yehova a duna e israelitanan e Lei, i esaki a bai akompañá pa manifestashonnan sobrenatural. Sin embargo, e pueblo desobediente a traha un bisé di oro pa adorashon i a deklará ku nan tabata hasiendo “un fiesta na SEÑOR.”—Eksodo 32:1-9.

10. Pakiko e petishon di Moisés registrá na Eksodo 33:13 ta di interes spesial pa superintendentenan kristian awe?

¹⁰ Kon Moisés mester a trata ku un pueblo ku Yehova mes a deskribí komo kabesura? Moisés a supliká Yehova: “Si mi a haña grasia den bo bista, laga mi konosé bo kamindanan, pa mi konosé bo, pa mi haña grasia den bo bista.” (Eksodo 33:13) Superintendentenan kristian ku ta kuida Testigunan di Yehova di nos tempu tin un tou muchu mas humilde. Tòg, nan tambe ta pidi den orashon: “Hasi mi konosé bo kamindanan, o SEÑOR; siña mi bo bereanan.” (Salmo 25:4) Konosementu di Yehova su kamindanan ta kapasitá superintendentenan pa trata ku situashonnan den un manera ku ta na armonia ku e Palabra di Dios i ku ta kuadra ku su personalidat.

Loke Yehova Ta Ferwagt di Su Pueblo

11. Ki guia Yehova a duna Moisés, i pakiko nos ta interesá den nan?

¹¹ Loke Yehova a ferwagt di su pueblo a ser revelá verbalmente na Seru Sinaí. Despues Moisés a risibí dos tabla ku e Dies Mandamentunan skirbí riba nan. Ora Moisés a baha for di e seru, el a mira e israelitanan ta adorá e bisé i den su rabia el a dal e tablanan abou i a kibra nan. Yehova a bolbe skirbi e Dies Mandamentunan riba tablanan di piedra ku Moisés a traha. (Eksodo 32:19; 34:1) E mandamentunan aki no a kambia desde e dia ku nan a ser duná pa promé biaha. Moisés mester a aktua na armonia ku nan. Tambe Dios a mustra Moisés bon kla ki tipo di persona E ta, i esei a laga Moisés mira kon é mester a komportá su mes komo representante di Yehova. Kristiannan no ta bou di e Lei di Moisés, pero loke Yehova a bisa Moisés ta kontené hopi prinsipio básiko ku no a kambia i ku te awe ta konta pa tur hende ku ta adorá Yehova. (Romanonan 6:14; 13:8-10) Laga nos konsiderá un par di esakinan.

12. E echo ku Yehova ta eksigí deboshon eksklusivo mester tabatin ki efekto riba Israel?

¹² Duna Yehova deboshon eksklusivo. E nashon di Israel tabata presente ora Yehova a deklará ku e ta eksigí deboshon eksklusivo. (Eksodo 20:2-5) E israelitanan a mira hopi evidensia ku Yehova ta e Dios berdadero. (Deuteronomio 4:33-35) Yehova a mustra nan bon kla ku sin importá kiko otro nashonnan tabata hasi, e sí lo no a tolerá ningun forma di idolatria ni spiritismo entre su pueblo. Nan deboshon na dje no mester tabata djis un formalidat. Nan tur mester a stima Yehova ku henter nan kurason, ku henter nan alma i ku tur nan forsa. (Deuteronomio 6:5, 6) Esei lo a enserá nan abla, nan kondukta—sí, tur aspekto di nan bida. (Levítiko 20:27; 24:15, 16; 26:1) Hesukristu tambe a mustra bon kla ku Yehova ta eksigí deboshon eksklusivo.—Marko 12:28-30; Lukas 4:8.

13. Pakiko Israel tabatin e deber di obedesé Dios estriktamente, i kiko mester motivá nos pa obedes’é? (Eklesiastés 12:13)

 ¹³ Obedesé Yehova su mandamentunan estriktamente. Yehova mester a rekordá e pueblo di Israel ku ora nan a drenta den un relashon di pakto kuné, nan a hura di obedes’é estriktamente. Nan tabata liber den hopi kos, pero den asuntunan riba kua Yehova a duna nan mandamentu, nan tabatin ku obedes’é estriktamente. Esei lo a duna evidensia di nan amor pa Dios i lo a benefisiá tantu nan komo nan yunan pasobra tur loke Yehova a rekerí di nan tabata pa nan mes bon.—Eksodo 19:5-8; Deuteronomio 5:27-33; 11:22, 23.

14. Kon Dios a laga Israel mira e importansia di duna prioridat na aktividatnan spiritual?

¹⁴ Duna prioridat na asuntunan spiritual. E nashon di Israel no mester a laga e echo ku nan tabatin ku perkurá pa nan nesesidatnan físiko pone ku nan no a sobra tempu ni energia pa dediká na aktividatnan spiritual. E israelitanan no mester a dediká nan bida solamente na e kosnan básiko di tur dia. Yehova a apartá un periodo di tempu spesífiko pa siman ku el a designá komo sagrado, tempu ku nan mester a usa eksklusivamente pa aktividat relashoná ku adorashon di e Dios berdadero. (Eksodo 35:1-3; Numbernan 15:32-36) Kada aña nan mester a saka tempu èkstra pa sierto asamblea- òf konvokashonnan santu. (Levítiko 23:4-44) Esakinan lo a duna nan oportunidat pa papia di e obranan poderoso di Yehova, pa ser rekordá di su kamindanan i pa gradisié pa tur su bondat. Segun ku e pueblo a ekspresá nan deboshon na Yehova, nan lo a haña mas temor di Dios i amor p’e. Ademas, esei lo a yuda nan kana den su kamindanan. (Deuteronomio 10:12, 13) E prinsipionan sano ku e instrukshonnan ei ta kontené ta benefisiá Yehova su sirbidónan awe.—Hebreonan 10:24, 25.

Siña Komprondé i Apresiá Yehova Su Kualidatnan

15. (a) Pakiko un bon komprondementu di Yehova su kualidatnan i apresio pa nan tabata benefisioso pa Moisés? (b) Ki preguntanan lo por yuda nos pensa profundamente riba kada un di Yehova su kualidatnan?

¹⁵ Algu ku lo a yuda Moisés trata ku e pueblo ta ku el a komprondé i apresiá Yehova su kualidatnan. Eksodo 34:5-7 [NW] ta bisa ku Dios a pasa dilanti kara di Moisés i a deklará: “Yehova, Yehova, un Dios miserikòrdioso i yen di grasia, ku ta tarda pa rabia i ta abundante den bondat amoroso i bèrdat, ku ta konserbá bondat amoroso pa míles, i ta pordoná eror i transgreshon i piká, pero di ningun manera lo e duna dispensashon di kastigu, mandando kastigu pa eror di tata riba yu i riba nietu, riba e di tres generashon i riba e di kuater generashon.” Tuma tempu pa meditá riba e palabranan ei. Puntra bo mes: ‘Kiko kada un di e kualidatnan aki ta nifiká? Kon Yehova a demostr’é? Kon superintendentenan kristian por manifestá e kualidat aki? Kon e kualidat partikular ei ta influensiá loke kada un di nos ta hasi?’ Konsiderá djis un par di ehèmpel.

16. Kon nos por haña un mihó komprondementu di Dios su miserikòrdia, i pakiko ta importante pa hasi esaki?

 ¹⁶ Yehova ta “un Dios miserikòrdioso i yen di grasia.” Si bo tin e buki di referensia Perspikasia pa Komprondé e Skritura, lesa kiko e ta bisa bou di “Miserikòrdia.” Òf hasi investigashon riba e tema ku yudansa di e Indèks di Publikashonnan Watch Tower òf e programa di kòmpiuter Watchtower Library riba CD-ROM. * Usa un konkordansia pa haña tekstonan ku ta referí na miserikòrdia. Lo bo mira ku ademas di suavisá kastigu tin biaha, Yehova su miserikòrdia ta inkluí tierno kompashon. E ta impulsá Dios pa tuma akshon pa trese alivio pa su pueblo. Komo evidensia di esaki, Dios a perkurá pa e israelitanan tantu físikamente komo spiritualmente durante nan biahe dor di e Tera Primintí. (Deuteronomio 1:30-33; 8:4) Den su miserikòrdia, Yehova a pordoná nan ora nan a faya. El a tene kompashon ku su pueblo di antigwedat. Pues anto, su sirbidónan di e tempu aktual tin muchu mas motibu ainda pa tene kompashon ku otro.—Mateo 9:13; 18:21-35.

17. Kon e echo ku nos ta komprondé kiko ta enserá ku Yehova ta “yen di grasia” ta yuda nos promové adorashon berdadero?

¹⁷ Ademas di ta miserikòrdioso, Yehova ta yen di grasia tambe. Kon lo bo definí e ekspreshon “yen di grasia”? Kompará e definishon ei ku tekstonan ku ta bisa ku Yehova ta yen di grasia. Beibel ta mustra ku e kualidat aki di parti di Yehova ta enserá e interes amoroso ku e tin den e personanan ménos privilegiá di su pueblo. (Eksodo 22:26, 27) Den kualke pais, stranheronan i tambe otro hende ta haña nan ku sierto desbentaha. Ora Yehova a siña su pueblo pa ta imparsial i pa mustra bondat na hendenan asina, el a kòrda nan ku nan tambe tabata stranhero un tempu: na Egipto. (Deuteronomio 24:17-22) Kiko di nos awe komo e pueblo di Dios? Si nos tambe ta yen di grasia, esei lo uni nos mas na otro i atraé otro hende na e adorashon di Yehova.—Echonan 10:34, 35; Revelashon 7:9, 10.

18. Kiko nos ta siña for di e restrikshonnan ku Yehova a imponé riba Israel relashoná ku nan trato ku hende di otro nashon?

¹⁸ Sin embargo, interes bondadoso den hende di otro nashon no mester a remplasá Israel su amor pa Yehova i su normanan moral. Pues, e israelitanan a siña pa no sigui e kamindanan di e nashonnan bisiña, pa no adoptá nan kustumbernan religioso i estilo di bida inmoral. (Eksodo 34:11-16; Deuteronomio 7:1-4) Esei ta konta pa nos awe tambe. Nos mester ta un pueblo santu, meskos ku nos Dios, Yehova, ta santu.—1 Pedro 1:15, 16.

19. Kon Dios su pueblo lo ser protehá ora nan ta komprondé kon Yehova ta mira malecho?

¹⁹ Pa hasi sigur ku Moisés a komprondé Su  kamindanan, Yehova a duna di konosé ku ounke e no ta aprobá piká, e ta slow pa rabia. E ta permití tempu pa hende siña su rekisitonan i kumpli ku nan. Si un hende repentí di su piká, Yehova ta pordon’é, pero e no ta libr’é sí di e kastigu meresí pa malecho serio. El a atvertí Moisés ku loke e israelitanan a hasi lo por tabatin influensia riba e futuro generashonnan, sea pa bon òf malu. Ora e pueblo di Dios ta komprondé i ta apresiá Yehova su kamindanan, nan no ta bai kulpa Dios pa situashonnan ku nan mes a kousa ni konkluí ku Dios ta muchu slow.

20. Kiko por yuda nos trata di un manera apropiá ku nos rumannan den fe i ku esnan ku nos ta topa den nos ministerio? (Salmo 86:11)

²⁰ Si bo ta deseá di profundisá bo mes konosementu di Yehova i di su kamindanan, sigui hasi investigashon i meditá ora bo ta lesa Beibel. Analisá kuidadosamente e vários aspektonan fasinante di Yehova su personalidat. Konsiderá huntu ku orashon kon bo por imitá Dios i armonisá bo bida mas plenamente ku su propósito. Esaki lo yuda bo evitá trampa, tambe trata bo rumannan den fe na un manera apropiá i yuda otro hende siña konosé i stima nos Dios maravioso.

[Nota]

Kiko Bo A Siña?

• Pakiko humildat tabata importante pa Moisés, i pakiko e ta krusial pa nos?

• Kiko bon a ser lográ kada bes ku a konfrontá Fárao ku e palabra di Dios?

• Menshoná algun prinsipio sobresaliente ku Moisés a siña i ku ta konta pa nos tambe.

• Kiko por yuda nos komprondé Yehova su kualidatnan mihó?

[Preguntanan di Estudio]

[Plachi na página 21]

Moisés a entregá Yehova su palabra fielmente na Fárao

[Plachi na página 23]

Yehova a revelá su rekisitonan na Moisés

[Plachi na página 24, 25]

Meditá riba Yehova su kualidatnan