Unda Mundu Ta Bai?

UN MUNDU UNÍ. E ta zona hopi bon. No ta esei tur hende ke? Sí, hende tin hopi tempu ta papia di union. Bes tras bes, reunionnan di lidernan di mundu a konsentrá riba e tema ei. Na ougùstùs 2000, mas ku 1.000 lider religioso a reuní na Nashonnan Uní (New York) pa e Kumbre Mundial di Pas di Milenio. Nan a papia riba solushonnan pa e konfliktonan di mundu. Sin embargo, e konferensia mes no tabata pasífiko i a reflehá e kontroversianan ku ta eksistí den mundu. Un mufti (un hurista profeshonal ku ta interpretá lei mòslem) di Yerusalèm a nenga di bini pasobra un rabi hudiu tabata presente. Otro partisipantenan a sinti nan ofendí pasobra Dalai Lama no a haña invitashon pa e promé dos dianan komo ku e organisadónan a pensa ku esaki lo a molestiá China.

Na òktober 2003, e nashonnan na rant di Oséano Pasífiko a papia riba asuntunan di siguridat mundial durante e kumbre di Koperashon Ekonómiko di Asia-Pasífiko (APEC) ku nan a tene na Tailandia. E 21 nashonnan ku tabata presente a hura ku nan lo desmantelá gruponan terorista i a bai di akuerdo pa oumentá siguridat mundial. Durante e konferensia, sin embargo, vários representante a  protestá kontra e remarkenan ku un promé minister a hasi. Aparentemente el a lansa un akusashon yen di odio kontra e hudiunan.

Dikon No Tin Union?

Ounke hende ta papia hopi tokante forma un mundu uní, nos ta mira masha poko resultado konkreto. Dikon un mundu uní ta sigui skapa for di man di humanidat den siglo 21 ounke hopi hende ta hasi esfuerso sinsero?

E pregunta aki ta ser kontestá parsialmente den e komentarionan di un di e promé ministernan ku a asistí na e konferensia di APEC. El a bisa: “Tin un kos ku yama orguyo nashonal.” Sí, sosiedat humano ta profundamente enbolbí den nashonalismo. Tur nashon i grupo étniko ta ser motivá pa e deseo di outodeterminashon, esta, di por disidí pa nan mes. Soberania nashonal kombiná ku e spiritu di kompetensia i golosidat a produsí un situashon ku por eksplotá un ora pa otro. Den hopi kaso, ora interesnan nashonal ta na konflikto ku interesnan mundial, interesnan nashonal ta haña prioridat.

Un bon deskripshon di nashonalismo ta e ekspreshon ku e salmista a usa: “E pèst ku ta destruí.” (Salmo 91:3) E tabata manera un plaga riba humanidat i a kousa masha hopi sufrimentu. Nashonalismo i loke e ta produsí—odio kontra otro pueblonan—ta eksistí pa siglonan kaba. Awe, nashonalismo ta sigui kousa divishon, i gobernantenan humano no por stòp e.

Hopi outoridat ta atmití ku nashonalismo i interes propio ta e rais di e problemanan di mundu. Por ehèmpel, eks-Sekretario General di Nashonnan Uni, U Thant a remarká: “Hopi di e problemanan ku nos ta konfrontá awe ta debí na aktitutnan robes . . . Entre nan tin e konsepto di nashonalismo intolerante: ‘Sea bon òf malu, ta mi pais.’” Tòg nashonnan awe, ku ta wak solamente nan propio interes, ta sklama pa mas i mas soberania. Esnan ku tin bentaha no ke pèrdè niun tiki di nan soberania. Por ehèmpel, International Herald Tribune a hasi e siguiente remarke tokante Union Europeo (UE): “Rivalidat i deskonfiansa ta keda e karakterístikanan básiko di polítika europeo.  Ainda mayoria nashon ku ta miembro di UE ta haña ku ta inaseptabel ku un di nan pareunan ta haña mas influensia i ta hiba delantera.”

Beibel, e Palabra di Dios, korektamente ta deskribí e resultado di tur gobernashon humano, bisando: “Hende a ehersé outoridat riba un otro hende pa su daño.” (Eklesiastés 8:9) Dor ku a dividí mundu den vários nashon separá, tantu grupo di hende komo personanan individual a eksperensiá kumplimentu di e prinsipio bíbliko aki: “Esun ku isolá su mes ta buska su mes deseo; su furia ta lanta kontra tur sabiduria sano.”—Proverbionan 18:1.

Nos Kreadó, ku sa kiko ta mihó pa nos, nunka tabatin e propósito pa hende establesé nan propio gobièrnu i goberná nan mes. Dor di hasi esei, hende a ignorá Dios su propósito i e echo ku tur kos ta pertenesé na dje. Salmo 95:3-5 ta bisa: “SEÑOR [Yehova] ta un Dios grandi, i un Rei grandi ariba tur e diosnan, den kende su man e profundidatnan di tera ta; e kabesnan di e serunan tambe ta di dje. Laman ta di dje, pasobra ta e ta esun ku a trah’é; Su mannan a forma e tera seku.” Dios ta e Soberano legítimo ku tur hende mester konsiderá komo nan gobernante. Dor di buska nan propio soberania, e nashonnan ta trahando kontra su boluntat.—Salmo 2:2.

Kiko Ta Nesesario?

E úniko manera pa uni mundu ta dor di tin un solo outoridat mundial ku ta traha na interes di tur hende. Hopi hende ku ta preokupá ku e situashon ta rekonosé ku esaki ta nesesario. Sin embargo, nan ta buska hopi biaha den e direkshon robes. Por ehèmpel, hopi komentarista—inkluso lidernan religioso—a urgi hende pa spera riba Nashonnan Uní pa logra un mundu uní. Pero sin importá kon noble e ideanan di organisashonnan humano ta, hamas nan lo por solushoná humanidat su problemanan internashonal. Mas bien, mayoria di e organisashonnan aki simplemente a bira un refleho di e desunion ku ta eksistí entre vários nashon.

Beibel ta spièrta nos pa no spera riba institushonnan humano pa trese solushon ora e ta bisa: “No konfia den prensnan, den yu di hende, den kende no tin salbashon.” (Salmo 146:3) Esaki ta nifiká ku no tin speransa pa logra un mundu uní? Nò. Tin un otro manera pa logra esei.

Hopi hende no sa ku ya kaba Dios a establesé un gobièrnu ku ta kapas pa uni mundu. Beibel ta bisa di Yehova Dios: “Ma pa loke ta ami, mi a establesé mi rei riba Sion, mi seru santu. Pidi mi, i siguramente lo mi duna bo e nashonnan komo bo herensia, i e finnan di tera komo bo poseshon.” (Salmo 2:6, 8) Tuma nota ku e tekstonan ta bisa ku Yehova Dios ‘a establesé su rei,’ na ken e ta referí komo “mi yu” den versíkulo 7. Esaki no ta ningun otro sino e Yu spiritual prinsipal di Dios, Hesukristu, kende Yehova a duna outoridat riba tur nashon.

Kon un Mundu Uní Lo Ser Realisá

Mayoria hende no ta rekonosé e gobernashon selestial aki ku Dios a establesé. E nashonnan ta keda pega persistentemente na e derecho di soberania ku nan a duna nan mes. Sin embargo, Dios lo no tolerá hende ku ta nenga di rekonosé Su derecho di goberná komo Soberano i e gobièrnu ku el a establesé. Relashoná ku esnan ku ta nenga di aseptá e areglo aki Salmo 2:9 ta bisa: “Lo bo [e Yu, Hesukristu] kibra nan ku bara di heru, lo bo kibra nan na pida-pida manera kos trahá di klei.” Sea ku e nashonnan ta realisá esei òf nò, nan ta riba un kaminda ku lo hiba na un konfrontashon ku Dios. E último buki di Beibel ta papia di “e reinan di henter mundu,” ku ta ser reuní “pa e guera di e gran dia di Dios Todopoderoso.” (Revelashon 16:14) Dios lo eksterminá e nashonnan i nan manera di aktua ku ta kousa desunion. Esaki lo habri kaminda pa e gobièrnu di Dios kumpli ku su trabou sin ningun strobansa.

Komo Soberano di Universo, Yehova Dios sabiamente lo ehersé poder mediante su Yu pa  hasi e kambionan nesesario pa logra un mundu uní. E gobièrnu di Dios lo trese berdadero union i lo bendishoná tur amante di hustisia. Pakiko bo no ta tuma un par di minüt pa lesa Salmo 72 den bo Beibel? Einan bo ta haña un deskripshon profétiko di loke gobernashon bou di mando di e Yu di Dios lo hasi pa humanidat. Hende lo eksperensiá un mundu berdaderamente uní, i tur nan problemanan—opreshon, violensia, pobresa, etcetera—lo disparsé.

Hopi hende den e mundu dividí djawe ta kere ku e speransa ei ta irealístiko. Pero ta esei ta un eror. Dios su promesanan no a faya nunka i nan lo no faya nunka. (Isaias 55:10, 11) Abo lo ke mira e kambio aki? Bo por. De echo, ya kaba tin un pueblo ku ta preparando pa e tempu ei. Nan ta bini di tur nashon, pero en bes di bringa, nan ta someté nan mes awor unidamente na e soberania di Dios. (Isaias 2:2-4) Ken nan ta? Nan ta konosí komo Testigunan di Yehova. Pakiko bo no ta aseptá e invitashon pa bishitá kaminda nan ta reuní? Probablemente lo bo disfrutá di asosiashon refreskante ku hende ku por yuda bo someté na e soberania di Dios i disfrutá di un union ku lo dura pa semper.

[Plachinan na página 7]

Hende for di tur nashon ta preparando pa biba den un mundu uní

[Rekonosementu pa Potrèt na página 4]

Saeed Khan/AFP/Getty Images

[Rekonosementu pa Potrèt na página 5]

Muhé ku ta yora: Igor Dutina/AFP/Getty Images; manifestantenan: Said Khatib/AFP/Getty Images; tankinan di guera: Joseph Barrak/AFP/Getty Images