Historia di Bida

Kontentu Ku Mi Aporte na e Obra Mundial di Edukashon Bíbliko

SEGUN E RELATO DI ANNA MATHEAKIS

E fèri tabata na kandela. Si e barku aki di 171 meter lo a senk, e lo a hala mi abou i laman lo a bira mi graf. Mi a landa desesperadamente pa skapa mi bida, luchando kontra olanan grandi. E úniko manera ku mi por a keda riba awa tabata di tene duru na un salbabida ku un otro señora tabatin bistí. Mi a pidi Dios duna mi forsa i kurashi. Esei tabata tur loke mi por a hasi.

TABATA aña 1971, i mi tabata bolbiendo na mi di tres asignashon komo misionero, Italia. Den e noufragio ei, mi a pèrdè kasi tur kos. Pero e kosnan di mas importante sí mi no a pèrdè, esta, mi bida, e hermandat kristian amoroso i e privilegio di sirbi Yehova. E sirbishi ei a hiba mi tres kontinente kaba i e noufragio tabata djis un insidente di e hopi kosnan ku a pasa den mi bida.

Mi a nase na 1922. Mi famia tabata biba na Rām Allāh, rònt di 16 kilometer nort di Yerusalèm. Tur mi dos mayornan tabata di e isla di Kreta, pero mi tata a lanta na Názarèt. Nos tabata sinku ruman, tres hòmber i dos muhé, i ami tabata esun di mas chikitu. Nos famia a haña un sla duru dia ku mi di dos ruman hòmber a hoga den Riu Hordan durante un ekskurshon ku skol. Despues di e tragedia aki mi mama no kier a keda biba mas na Rām Allāh, i nos a muda bai Atenas, tempu ku mi tabatin tres aña di edat.

E Bèrdat di Beibel Ta Alkansá Nos Famia

Djis despues ku nos a yega Gresia, mi ruman hòmber mayó, Nikos, ku e tempu ei tabatin 22 aña, a drenta den kontakto ku e Studiantenan di Beibel, manera Testigunan di Yehova tabata konosí e tempu ei. E konosementu  di Beibel ku el a haña a dun’é un gran goso i un entusiasmo enorme pa e sirbishi kristian. Esaki a hasi mi tata furioso, i el a saka Nikos for di kas. Sin embargo, ora mi tata tabata bai Palestina, ami ku mi mama i mi ruman muhé tabata kompañá Nikos bai e reunionnan kristian. Ainda mi por kòrda kon mi mama tabata papia yen di entusiasmo tokante e kosnan ku e tabata tende na e reunionnan ei. Pero djis despues, el a haña kanser i a muri ku 42 aña di edat. Durante e tempu difísil ei, mi ruman muhé, Ariadne, a perkurá amorosamente pa nos famia. Apesar ku e mes tabata yòn ainda, pa hopi aña e tabata manera un mama pa mi.

Tempu ku mi tata tabata na Atenas, semper e tabata hiba mi Iglesia Òrtodòks, i despues ku el a muri mi a sigui bai misa, ounke ku ménos regularidat. Mi a mira ku e hendenan no tabata realmente deboto na Dios, p’esei ku tempu mi a stòp di bai misa.

Despues ku mi tata a muri, mi por a haña un trabou stabil na e ministerio di finansa. En kambio, mi ruman hòmber a dediká su bida n’e obra di prediká e Reino, i el a sirbi pa hopi aña na Gresia. Na 1934 el a muda bai Chipre. E tempu ei no tabatin Testigu di Yehova batisá riba e isla ei, di manera ku e tabatin e privilegio di promové e trabou di prediká einan. Despues ku el a kasa, su esposa, Galatia, tambe a sirbi pa hopi aña komo predikadó di tempu kompletu. * Hopi biaha Nikos tabata manda buki i revista basá riba Beibel pa nos, pero kasi nunka nos no tabata ni habri nan. El a keda Chipre te na su morto.

Mi A Hasi e Bèrdat di Mi Mes

Na 1940, George Douras, un Testigu seloso na Atenas i un amigu di Nikos, a bishitá nos i a invitá nos pa djòin un grupo chikitu pa un estudio di Beibel na su kas. Gustosamente nos a aseptá e invitashon. Djis despues nos tabata konta otro hende di e kosnan ku nos a siña. E konosementu di Beibel ku ami i mi ruman muhé a haña a motivá nos pa dediká nos bida na Yehova. Ariadne a batisá na 1942 i ami na 1943.

Ora Segundo Guera Mundial a terminá, Nikos a invitá nos pa bini Chipre, di manera ku na 1945 nos a muda bai Nicosia. Kontrali ku e situashon na Gresia, na Chipre sí no tabatin opstákulo pa e trabou di prediká. Nos a partisipá no solamente den e sirbishi di kas pa kas, sino tambe den e trabou di duna testimonio riba kaya.

Dos aña despues, Ariadne tabatin ku bai Gresia bèk. Ei el a topa su futuro kasá, un adoradó di Yehova, pues el a keda Atenas. No a tarda muchu ku mi sua i ruman muhé a animá mi pa regresá Gresia i kuminsá e sirbishi di tempu kompletu den e kapital. Ya ku semper mi meta tabata pa traha pionero, mi a bai Atenas bèk, kaminda e nesesidat tabata mas grandi.

Porta Nobo di Oportunidat A Habri

Dia 1 di novèmber 1947, mi a kuminsá traha pionero, dedikando 150 ora pa luna den e trabou di prediká. E teritorio di nos kongregashon tabata inmenso, i mi tabatin ku kana bastante. Tòg mi a haña hopi bendishon. Hopi bes polis tabata arestá kualke Testigu ku nan a haña ta prediká òf ta asistí na reunion kristian. Pues, no a dura hopi pa nan a arestá mi.

Nan a akusá mi di ta kana kombertí hende,  lokual e tempu ei tabata un piká serio. Nan a sentensiá mi na dos luna den e Prizon di Averof pa Hende Muhé na Atenas. Tabatin un otro ruman Testigu kaba einan, i nos dos a disfrutá di un kompañerismo kristian deleitabel i edifikante apesar ku nos tabata enkarselá. Despues ku mi a sinta mi kastigu, mi a sigui traha yen di goso komo pionero. Hopi di e personanan ku mi a studia Beibel kuné e tempu ei ainda ta sirbiendo Yehova fielmente, i esei ta duna mi un gran satisfakshon.

Na 1949, mi a risibí un invitashon pa asistí na e di 16 klas di e Skol Bíbliko di Galaad di Watchtower na Merka, kaminda nan ta prepará sirbidónan di tempu kompletu pa e trabou di misionero. Tantu ami komo mi famia a keda masha enkantá. Mi a plania pa asistí na un kongreso internashonal na New York den e zomer di 1950 pa despues drenta Galaad.

Despues ku mi a yega Merka, mi tabatin e privilegio di hasi trabou di limpiesa pa un par di luna na e sede mundial di Testigunan di Yehova na New York. E lugá tabata limpi, plasentero i edifikante, i mi tabata meimei di karanan kontentu di mi rumannan kristian. Semper lo mi keda ku grato rekuerdo di e seis lunanan ku mi a pasa einan. Despues a yega e tempu pa asistí n’e Skol di Galaad kaminda sinku luna di instrukshon i estudio intenso a pasa manera nada. Komo studiante, nos a bin realisá kon presioso i bunita konosementu di Beibel ta, i esei a oumentá nos goso i nos deseo pa kompartí ku otro hende e konosementu di e bèrdat ku por duna hende bida.

Mi Promé Asignashon Komo Misionero

Na Skol di Galaad, nan a permití nos skohe nos futuro partner promé ku nos a risibí nos asignashon. Mi partner tabata Ruth Hemmig (awor Bosshard), un ekselente ruman muhé. Ami ku Ruth a keda sumamente kontentu ora nos a risibí nos asignashon pa Istanbul, Turkia—un krusada entre Asia i Europa! Nos tabata sa ku ainda nos trabou di prediká no a haña rekonosementu legal den e pais ei, pero nos no a duda ku Yehova lo a sostené nos.

Istanbul ta un bunita stat kosmopolitano. E lugá ta yen di tienda i pakus, un meskla di e restorantnan mas ekskisito na mundu, museonan interesante, bunita áreanan di biba, i tur esei, pegá ku un laman semper fasinante. Pero mas importante, nos a haña hende sinsero ku kier a siña tokante Dios. E grupo chikitu di Testigu na Istanbul a konsistí prinsipalmente di armenio, griego i hudiu. Sin embargo, tabatin hopi otro nashonalidat, i ta bon ku mi tabata sa algu di un variedat di idioma, inkluso turko. Algu ku nos a gusta hopi tabata di por a topa hende di diferente nashonalidat ku tabatin set di e bèrdat. Te awe hopi di e personanan aki ta sirbiendo Yehova fielmente.

Ta lástima ku Ruth no por a renobá su pèrmit di residensia, i el a haña su mes obligá di sali for di e pais. Ainda e ta den sirbishi di tempu kompletu na Suisa. Despues di tur e añanan aki, te awe mi ta sinti falta di su kompania agradabel i edifikante.

Mi A Muda Bai un Otro Hemisferio

Na 1963 outoridatnan na Turkia no a renobá mi pèrmit di residensia. Tabata duru pa bai laga rumannan kristian ku mi a mira lucha pa vense hopi opstákulo i progresá spiritualmente. Pa por a lanta mi ánimo, mi famianan tabatin e bondat di paga mi pasashi pa bai New York pa mi por a asistí na un kongreso einan. Ainda mi no a risibí mi siguiente asignashon.

Despues di e kongreso, mi a ser asigná na  Lima, Perú. Huntu ku un ruman muhé yòn kende mester a bira mi partner, for di New York mi a bai dirèkt na mi asignashon nobo. Mi a siña spañó i a biba den e kas di misionero situá riba e sukursal di Testigunan di Yehova. Tabata hopi dushi pa prediká ei i pa konosé e rumannan lokal.

Un Otro Asignashon, un Otro Idioma

Ku tempu, mi famianan aya na Gresia a kuminsá sinti e efektonan di behes i kebranto di salú. Nunka nan no a pidi mi pa stòp ku mi sirbishi di tempu kompletu i bai bèk na un asina yamá bida normal pa por a yuda nan. Sin embargo, despues di a pensa hopi i hasi hopi orashon, mi a realisá ku lo tabata mihó pa mi sirbi mas pegá ku mi famia. E rumannan na sukursal a komprondé pa mi i nan a asigná mi na Italia, i mi famianan a ofresé pa kubri e gastunan di e mudansa. A resultá ku tabatin un gran nesesidat di evangelisadó na Italia.

Atrobe mi tabatin ku siña un idioma nobo, e biaha aki, italiano. Mi promé asignashon tabata den e stat Foggia. Despues nan a kambia mi pa Nápoli, kaminda tabatin mas nesesidat. Mi teritorio tabata Posilipo, un di e partinan mas bunita di Nápoli. El a kubri un área grandi, i tabatin apénas ún publikadó di Reino. Mi a gusta e trabou masha tantu, i Yehova a yuda mi kuminsá hopi estudio di Beibel. Ku tempu a forma un kongregashon grandi den e área ei.

Entre e promé hendenan lokal ku ken mi a studia Beibel tabatin un mama i su kuater yunan. Te awe e ku su dos yu muhénan ta Testigu di Yehova. Tambe mi a studia ku un pareha kasá ku tabatin un yu muhé chikitu. Henter e famia a progresá den e bèrdat i a simbolisá nan dedikashon pa medio di boutismo bou di awa. Awor e yu muhé ta kasá ku un fiel sirbidó di Yehova, i huntu nan ta sirbiendo Dios yen di selo. Tempu ku mi tabata studia Beibel ku un famia grandi, mi a mira kuantu poder e Palabra di Dios tin, i esaki a impreshoná mi. Ora nos a lesa vários teksto ku ta mustra ku Dios no ta aprobá adorashon di imágen, e mama no a ni warda te ora e estudio a kaba. Mesora el a eliminá tur e imágennan ku e tabatin den kas!

Den Peliger Riba Laman

Tempu ku mi tabata biaha entre Italia ku Gresia, semper mi tabata bai ku boto. Por lo general, e biahe tabata masha plasentero. Pero ku un di e biahanan ei sí, den e zomer di 1971, kosnan no a bai bon. Mi tabata regresando Italia riba e ferry Heleanna. Trempan riba e mainta di 28 di ougùstùs, a start un kandela den e kushina di e barku. E kandela a plama i e pasaheronan a drenta un pániko formal. Hende muhé a bai flou, muchanan tabata yora, i e hòmbernan tabata keha fuertemente i reklamá na bos haltu. E hendenan a kore bai na e botonan salbabida na kada banda di e dèk. Pero no tabatin sufisiente salbabida, i e mekanismo pa baha e botonan salbabida den laman no tabata traha bon. Ami no tabatin salbabida, pero e vlamnan tabata birando mas grandi, pues e úniko kos sensato ku mi por a hasi ta di bula na laman.

Manera ku mi a bula na awa, mi a mira un señora ku tabatin un salbabida bistí ta drif banda di mi. Aparentemente e no tabata sa landa, pues mi a gar’é na su brasa i hal’é for di e barku ku tabata senk. E laman a bira mas  brutu i e lucha pa keda riba awa a kansa mi mes. A parse ku no tabatin speransa, pero mi a sigui roga Yehova p’e duna mi kurashi, i esaki a fortalesé mi. Mi no por a keda sin kòrda riba e noufragio ku apòstel Pablo a eksperimentá.—Echonan, kapítulo 27.

Ku e señora duru tené, mi a lucha ku e olanan kuater ora largu, landando ora mi tabatin e forsa pa hasi esei i invokando e yudansa di Yehova. Finalmente, mi a mira un boto chikitu yega serka. Nan a reskatá mi, pero e señora sí a muri kaba. Ora nos a yega e stat di Bari, Italia, nan a hiba mi un hospital kaminda mi a risibí atenshon médiko. Mi tabatin ku keda den e hospital un par di dia, i hopi Testigu a bin bishitá mi, i a ofresé mi bondadosamente tur tipo di yudansa. E amor kristian ku nan a manifestá a hasi un impreshon profundo riba tur ku a opservá esaki. *

Despues ku mi a rekuperá kompletamente, e rumannan di sukursal a asigná mi na Roma. Nan a pidi mi traha e teritorio di negoshi den e sentro di e stat, lokual mi a hasi pa sinku aña, ku yudansa di Yehova. Mi a disfrutá 20 aña largu di sirbishi na Italia, i mi a bin haña un amor p’e italianonan.

Bèk Kaminda Mi A Kuminsá

Ku tempu e salú di Ariadne i su kasá a bai mas atras. Mi a realisá ku si mi tabata biba mas serka di nan, lo mi por a paga nan bèk maske ta algu di tur loke nan a hasi amorosamente pa mi. Mi tin ku atmití ku tabata duru pa bandoná Italia. Sin embargo, e rumannan di sukursal a aprobá e asuntu, i for di zomer di 1985, mi ta trahando pionero na Atenas, kaminda mi a kuminsá e sirbishi di tempu kompletu na 1947.

Mi a prediká den e teritorio asigná na mi mes kongregashon, i mi a puntra e rumannan na sukursal si mi por a prediká tambe den e teritorio di negoshi den e sentro di e stat. Mi a hasi esaki tres aña largu huntu ku un partner ku tambe tabata pionero. Nos por a duna un testimonio kabal na hende ku masha poko biaha sa ta na kas.

Segun ku tempu ta pasa mi deseo pa sirbi ta bira mas i mas fuerte, pero forsa físiko si ta bai atras. Mientras tantu mi sua a fayesé i Ariadne, kende tabata manera un mama pa mi, a pèrdè su bista. Pa loke ta ami, mi salú tabata bon durante e añanan ku mi a dediká den e sirbishi di tempu kompletu. Sin embargo, resientemente mi a kai for di un trapi di marmer i kibra mi man drechi. Despues mi a kai i kibra mi pèlvis. Mi mester a operá i a keda na kama pa hopi tempu. Awor mi no por move libremente mas. Mi ta kana ku garoti i mi por sali solamente si un hende kompañá mi. No opstante, mi ta hasi mi bèst, sperando ku mi kondishon físiko lo mehorá. E echo ku mi por partisipá den e obra di edukashon bíbliko, asta den un forma limitá, ta sigui ser e fuente prinsipal di mi felisidat i satisfakshon.

Ora mi kòrda bèk riba e añanan gososo ku mi a pasa den e sirbishi di tempu kompletu, mi kurason ta yena di gratitut na Yehova. Tantu Yehova komo e parti di su organisashon aki riba tera konsistentemente a perkurá guia sano i yudansa balioso, lokual a permití mi alkansá mi potensial kompletu segun ku mi a dediká mi bida na su sirbishi. Mi deseo sinsero ta pa Yehova fortalesé mi pa sigui den su sirbishi. Mi ta kontentu ku mi por a duna un aporte chikitu na e obra mundial di edukashon bíbliko ku e ta dirigí.—Malakias 3:10.

[Nota]

[Plachi na página 9]

Ami ku mi ruman muhé, Ariadne i su kasá Michalis dia ku mi tabata bayendo Galaad

[Plachi na página 10]

Nan a asigná ami ku Ruth Hemmig na Istanbul, Turkia

[Plachi na página 11]

Italia, kuminsamentu di e dékada di 1970

[Plachi na página 12]

Awe, ami ku mi ruman muhé Ariadne