Pregunta di Lektor

Ya ku Rei Salomon di Israel di antigwedat a bira infiel na Dios den su behes, nos por konkluí ku lo e no ser resusitá?—1 Reinan 11:3-9.

Ounke Beibel ta menshoná nòmber di algun hòmber i muhé di fe ku sin duda lo ser resusitá, e no ta komentá spesífikamente riba e posibilidat di resurekshon di delaster un persona ku e ta papia di dje. (Hebreonan 11:1-40) Sin embargo, den e kaso di Salomon nos por haña un idea di Dios su huisio dor di kompará loke a pasa kuné ora el a muri ku loke a pasa ku sierto personanan fiel ora nan a muri.

E Skritura ta papia di solamente dos posibilidat pa e mortonan: e estado temporal di no ta eksistí i e estado di morto eterno. Esnan ku Dios ta husga ku nan no ta digno di un resurekshon ta ser tirá den “Gehena” (tradusí “kandela di fièrnu” den Beibel Santu) òf e “lago di kandela,” i ámbos palabra ta nifiká morto eterno den Beibel. (Mateo 5:22; Marko 9:47, 48; Revelashon 20:14) Entre e hendenan aki lo tin e promé pareha humano, Adam ku Eva, e traidó Hudas Iskariot, i sierto personanan ku a muri ora Dios a ehekutá huisio riba nan, manera e hendenan den tempu di Noe i e habitantenan di Sodoma i Gomora. * Ora e hendenan ku lo haña resurekshon muri, nan ta bai e graf komun di humanidat, ku yama “Seol” òf “Hades” den e idiomanan original di Beibel. Papiando di nan futuro, Beibel ta deklará: “Laman a entregá e mortonan ku tabata den dje, i morto i Hades a entregá e mortonan ku tabata den nan; i nan a wòrdu husgá, kada un di nan segun nan obranan.”—Revelashon 20:13.

Pues anto, e personanan fiel ku Hebreonan kapítulo 11 ta menshoná, ta den Seol òf Hades sperando resurekshon. Entre nan tin Dios su sirbidónan leal Abraham, Moisés i David. Konsiderá awor kiko Beibel ta bisa di nan relashoná ku nan morto. Yehova a bisa Abraham: “I abo, lo bo bai serka bo tatanan na pas; lo bo wòrdu derá na un edat hopi avansá.” (Génesis 15:15) Na Moisés, Yehova a bisa: “Mira, bo ta serka di bai sosegá serka bo tatanan.” (Deuteronomio 31:16) Enkuanto David, e tata di Salomon, Beibel ta bisa: “David a bai sosegá serka su tatanan i a wòrdu derá den e Stat di David.” (1 Reinan 2:10) Pues, e ekspreshon ‘bai sosegá serka bo tatanan’ ta un otro manera pa bisa ku e persona a bai Seol, esta, e graf komun di humanidat.

Kiko a pasa ku Salomon ora el a muri? Beibel ta kontestá: “E tempu ku Salomon a reina na Yerusalèm riba henter Israel tabata kuarenta aña. I Salomon a bai sosegá serka su tatanan i a wòrdu derá den e Stat di su tata David.” (1 Reinan 11:42, 43) Pues, ta parse rasonabel pa konkluí ku Salomon ta den Seol, òf Hades, for di kua lo e ser resusitá.

E konklushon aki ta impliká ku e posibilidat di ser resusitá ta habrí pa otro personanan ku e Skritura ta bisa spesífikamente ku ‘nan a bai sosegá serka nan tatanan.’ De echo, Beibel ta bisa asina di hopi di e reinan ku a subi trono despues di Salomon, ounke nan tabata infiel. Esaki no ta irasonabel, ya ku “lo tin un resurekshon di tantu e hustunan komo e malbadonan.” (Echonan 24:15) Klaru ku ta despues ku “tur ku ta den graf” ser resusitá nos lo sa sigur ken a ser faboresí ku un resurekshon. (Juan 5:28, 29) Pues en bes di duna un kontesta apsoluto tokante kua persona di pasado lo haña resurekshon, nos ta warda pa wak, konfiando den Yehova su desishon perfekto.

[Nota]