Ta Importá Kiko Otro Hende Ta Pensa di Nos?

KASI tur hende ta gusta pa otro hende elogiá nan. Kòmplimènt por pone nos sinti nos bon, ya ku e ta duna nos un sintimentu ku nos a logra algu. Apresio di otronan por asta pone nos deseá di mehorá nos prestashon. Sin embargo, nos ta sinti kompletamente diferente ora nos ripará ku algun hende no ta apresiá loke nos ta hasi. Un reakshon friu òf un krítika ku ta reflehá despresio por kibra nos. Loke otro hende ta pensa di nos por tin un efekto profundo riba loke nos ta pensa di nos mes.

No ta bon pa nos ignorá loke otro hende ta pensa di nos. Bon mira, nos por benefisiá ora otro hende ta analisá nos kondukta. Ora opinion di otro hende ta basá riba prinsipionan moral haltu, nan por benefisiá nos i motivá nos pa hasi loke ta korekto. (1 Korintionan 10:31-33) Sin embargo, hopi bes opinion públiko ta masha inhustu. Pensa por ehèmpel riba e punto di bista trosí ku e saserdotenan prinsipal i otro hendenan tabatin di Hesukristu ora nan “a kuminsá grita, bisando: ‘Na staka! Na staka kuné!”” (Lukas 23:13, 21-25, NW) Ora ta trata di punto di bista ku ta basá riba informashon falsu òf influensiá pa envidia òf prehuisio, nos mester simplemente ignorá nan. P’esei anto, nos tin ku ehersé sano huisio i reakshoná na un manera sensato riba opinion di otro hende.

Ken Su Opinion Ta Importante?

Nos ke tin aprobashon di hendenan yegá na nos den e adorashon berdadero. Esakinan ta entre otro, miembronan di nos famia ku ta den e bèrdat i otro rumannan kristian. (Romanonan 15:2; Kolosensenan 3:18-21) E amor i rèspèt di kompañeronan di fe i e “interkambio di estímulo” entre nan ta nifiká masha hopi pa nos. (Romanonan 1:11, 12, NW) ‘Ku humildat nos ta konsiderá otronan mas importante ku nos mes.’ (Filipensenan 2:2-4) Ademas, nos ta hasi esfuerso pa nos haña—i balorá—e aprobashon di e “lidernan” òf esnan ku ta hiba delantera entre nos, esta, e ansianonan den e kongregashon.—Hebreonan 13:17.

Ta bon tambe pa nos tin “un bon reputashon serka esnan pafó” di e kongregashon. (1 Timoteo 3:7) Nos ta haña un satisfakshon ora nos famianan, kompañeronan di trabou i bisiñanan ku no ta Testigu, tin rèspèt pa nos! Akaso nos no ta purba hasi un bon impreshon riba e hendenan ku nos ta prediká na dje pa asina nan reakshoná faborablemente riba e mensahe di Reino? Si nos tin un bon reputashon den e komunidat komo personanan moralmente limpi, rekto i onesto, esei ta trese gloria pa Dios. (1 Pedro 2:12) Sin embargo, nunka nos mester komprometé prinsipionan bíbliko pa gana aprobashon di otro hende; ni nos no ta fingi pa impreshoná nan. Nos tin ku atmití ku nos no por komplasé tur hende. Hesus a bisa: “Si boso tabata di mundu, mundu lo a stima loke ta di dje; ma pasobra boso no ta di mundu, ma ami a skohe boso for di den mundu, p’esei mundu ta odia boso.” (Juan 15:19) Nos por hasi algu pa gana rèspèt di hende ku ta kontra nos?

 Gana Rèspèt di Opositornan

Hesus a spièrta: “Tur hende lo odia boso pa kousa di mi nòmber, ma ta esun ku a perseverá te na fin lo ta salbá.” (Mateo 10:22) E odio aki hopi bes ta resultá den akusashonnan kruel kontra nos. Funshonarionan di gobièrnu bou di influensia di prehuisio kisas ta katalogá nos komo personanan “rebelde” òf “ku ta lanta kontra gobièrnu.” Opositornan abierto kisas ta pretendé ku nos ta un sekta problemátiko ku mester ser sensurá. (Echonan 28:22) Tin bes nos por kontradisí e akusashonnan falsu aki. Kon asina? Dor di sigui e konseho di apòstel Pedro: ‘Sea dispuesto pa duna kontesta na kada un ku pidi boso pa duna kuenta di e speransa ku tin den boso, sin embargo ku suavedat i reverensia.’ (1 Pedro 3:15) Ademas, nos mester usa “palabra sano ku no por wòrdu kondená, pa e oponente wòrdu brongosá sin ku e tin nada malu di bisa di nos.”—Tito 2:8.

Miéntras nos ta purba limpia nos nòmber di reproche, nos no mester desanimá òf kibra ora hende difamá nos inhustamente. Nan a akusá Hesus, e Yu perfekto di Dios, di blasfemia, rebeldia i asta di spiritismo. (Mateo 9:3; Marko 3:22; Juan 19:12) Nan a difamá òf kalumniá apòstel Pablo. (1 Korintionan 4:13) Tantu Hesus komo Pablo a ignorá e tipo di krítikanan ei i a keda okupá ku nan trabou. (Mateo 15:14) Nan tabata sa ku nunka nan lo por a gana aprobashon di nan enemigunan ya ku “henter mundu ta bou di kontròl di e malbado.” (1 Juan 5:19) Awe nos ta haña nos ku e mesun desafio. Nos no mester laga e mentiranan ku nos opositornan yen di odio ta plama tokante nos, intimidá nos.—Mateo 5:11.

Opinionnan Ku Realmente Ta Importá

Loke hende ta pensa di nos ta varia hopi, dependiendo di nan motivashonnan i di loke nan a tende di nos. Tin hende ta apresiá i respetá nos, otronan ta insultá nos i odia nos. Sin embargo, tanten ku nos ta sigui prinsipionan bíbliko, nos tin tur motibu pa ta felis i na pas.

Apòstel Pablo a skirbi: “Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia, pa e hende di Dios por ta perfekto, ekipá pa tur bon obra.” (2 Timoteo 3:16, 17) Nos por gana e aprobashon di Yehova Dios i di su Yu Hesukristu, dor di aseptá Dios su Palabra ku apresio komo nos guia den tur kos. Finalmente, e opinionnan ku mas ta importá ta esnan di Yehova i su Yu. Loke nan ta pensa di nos ta mustra nos berdadero balor. Na final di kuenta, nos bida ta dependé di nan aprobashon.—Juan 5:27; Santiago 1:12.

[Komentario na página 30]

“Di pafó ta parse ku mi no ke elogio pero di paden mi ta sklama p’e, i esei ta mi bèrgwensa.”—POËTA INDIO RABINDRANATH TAGORE

[Plachinan na página 31]

Opinionnan di nos kompañeronan di fe ta importá

[Plachi na página 30]

Culver Plachinan