Abo Ta Kere di Bèrdat Ku Diabel Ta Eksistí?

E SKRITURA ta pinta Diabel komo un persona real. E ta invisibel pa hende pa e mesun motibu ku Dios ta invisibel pa wowo humano. Beibel ta bisa ku “Dios ta [un] Spiritu.” (Juan 4:24) Diabel ta un kriatura spiritual. Pero kontrali na e Kreadó, Diabel sí tabatin un prinsipio.

Hopi tempu promé ku Yehova Dios a krea hende, el a traha un gran kantidat di kriatura spiritual. (Jòb 38:4, 7) Beibel ta yama e spiritunan aki angel. (Hebreonan 1:13, 14) Dios a krea nan tur perfekto; ni un di nan tabata un diabel òf tabatin kualke maldat den dje. Kon anto Diabel a kuminsá eksistí? E palabra “diabel” ta nifiká “kalumniadó” i p’esei e ta referí na un persona ku ta lanta mentira malisioso kontra otronan. “Satanas” ta nifiká “Resistidó” òf opositor. Meskos ku un hòmber ku un tempu tabata onrado ta hasi su mes un ladron dor di hòrta, asina un di e yunan spiritual perfekto di Dios a bai tras di su mal deseo i a hasi su mes Satanas e Diabel. Beibel ta splika kon un persona ta korumpí su mes, bisando: “Kada un ta wòrdu tentá ora ku e wòrdu atraí i sedusí dor di su mes pashon [òf, deseo]. Anto ora pashon konsebí, e ta duna lus na piká; i ora piká keda kumplí, e ta produsí morto.”—Santiago 1:14, 15.

Aparentemente ta esaki ta loke a sosodé. Ora Yehova Dios a krea e promé pareha humano, Adam ku Eva, e angel ku tabata kla pa rebeldiá kontra Dios a tuma nota di esaki. E tabata sa ku Yehova a manda Adam ku Eva yena tera ku hende hustu, ku lo a adorá e Kreadó. (Génesis 1:28) Aki e angel a mira su chèns di haña onor i prominensia. Motivá pa golosidat, el a kudishá loke e Kreadó so tabatin e derecho legítimo di haña, esta, adorashon di hende. En bes di rechasá e deseo inkorekto ei, e yu spiritual di Dios aki a keda pensa riba dje te ora esaki a hiba na un mentira i despues na rebelion. Ban wak kiko el a hasi.

E angel rebelde a usa un kolebra pa papia ku e promé muhé, Eva. E kolebra a puntra Eva:  “Di bèrdat ta asina ku Dios a bisa ku boso no mag kome di tur palu dje hòfi?” [NW] Ora Eva a sita e mandamentu di Dios i e kastigu pa desobedensia, e kolebra a deklará: “Siguramente boso lo no muri! Pasobra Dios sa ku e dia ku boso kome di [e palu meimei di e hòfi], boso wowo lo habri i boso lo ta manera Dios, konosiendo bon i malu.” (Génesis 3:1-5) El a insinuá ku Dios no a papia e bèrdat ku Adam i Eva. Dor di kome e fruta di e palu ei, Eva supuestamente lo a bira meskos ku Dios, ku e derechi pa disidí loke ta bon i loke ta malu. Esei tabata e promé mentira den historia, lokual a pone e angel ku a papi’é bira un kalumniadó. Tambe el a bira un opositor di Dios. P’esei Beibel ta identifiká e enemigu di Dios aki komo “e kolebra [original] di antigwedat, kende ta wòrdu yamá Diabel i Satanas.”—Revelashon 12:9.

“Sea Alerta”

E mentira ku Diabel a bisa Eva a logra su meta. Beibel ta bisa: “Ora ku e muhé a mira ku e palu tabata bon pa kuminda, i ku e tabata un delisia pa bista, i ku e palu tabata deseabel pa hasi hende bira sabí, el a kohe di su fruta i a kome; i el a duna su esposo tambe ku tabata huntu kuné, i el a kome.” (Génesis 3:6) Eva a kere loke Satanas a bis’é i a desobedesé Dios. Pa kolmo el a pone Adam tambe violá e lei di Dios. Asina Diabel a logra pone e promé pareha humano rebeldiá kontra Dios. For di e tempu ei padilanti, Satanas ta ehersiendo su influensia invisibel riba asuntunan humano. Ku ki meta? Pa hende no adorá e Dios berdadero sino pa nan rindi adorashon na dje. (Mateo 4:8, 9) Ku bon motibu anto e Skritura ta duna e spièrtamentu: “Sea sobrio, sea alerta. Boso atversario, e Diabel, ta kana rònt manera un leon ku ta gruña, buskando ken e por devorá.”—1 Pedro 5:8.

Beibel ta mustra bon kla ku Diabel ta un berdadero persona spiritual, un angel ku a bira korupto i peligroso! E promé paso esensial ku nos tin ku dal pa keda alerta ta di rekonosé ku di bèrdat e ta eksistí. Pero pa nos mantené nos huisio i keda alerta nos tin ku tene kuenta ku algu mas. Ta importante tambe pa no ignorá e “trikinan” di Satanas i su táktikanan di engaño. (2 Korintionan 2:11) Kiko ta su táktikanan mañoso? I kon nos por para firme kontra nan?

Diabel Ta Probechá di Hende Su Nesesidat Natural

Diabel a bin ta opservá hende desde kreashon di humanidat. E konosé hende su naturalesa, i kiko ta su nesesidatnan, su interesnan i su deseonan. Satanas ta bon na haltura ku hende a ser kreá ku un nesesidat di adorá, i den su astusia, el a probechá di e nesesidat aki. Kon asina? Dor di alimentá hende ku mentira religioso. (Juan 8:44) Hopi siñansa religioso tokante Dios ta kontradiktorio i ta krea konfushon. Ken su propósito bo ta kere ku esaki ta sirbi? Si dos siñansa ta kontradisí otro, nan tur dos no por ta bèrdat. Pues ta eksistí e posibilidat anto ku hopi siñansa religioso ta spesífikamente diseñá pa gaña hende i ku Satanas ta usa nan ku e meta ei. De echo, Beibel ta referí na Satanas komo “e dios di e mundu aki” ku a siega mente di hende.—2 Korintionan 4:4.

E bèrdat di Dios ta protehá hende kontra engaño religioso. Beibel ta kompará e bèrdat di e Palabra di Dios ku e faha ku un sòldá di antigwedat tabata bisti pa yuda protehá su hepnan. (Efesionan 6:14) Si bo siña konosé Beibel i biba segun su mensahe, fahando bo kurpa kuné na moda di papia, e Palabra di  Dios lo protehá bo kontra engaño i eror religioso.

E deseo ku hende tin pa adorá a impuls’é pa e bai eksplorá lo deskonosí, lokual a ekspon’é na un otro triki di Satanas. Probechando di hende su kuriosidat pa ku loke ta straño i misterioso, Satanas a usa spiritismo pa kontrolá bida di hopi hende. Meskos ku un yagdó ta usa as pa lòk su proi, Satanas ta usa trikinan manera miramentu di destino, astrologia, hipnotismo, bruheria, lesamentu di plant’i man i magia pa lòk i kohe hende rònt mundu den trampa.—Levítiko 19:31; Salmo 119:110.

Kon bo por protehá bo mes pa bo no kai den e trampa di spiritismo? Deuteronomio 18:10-12 ta deklará: “Entre boso no mag wòrdu hañá ningun hende ku ta hasi su yu hòmber òf su yu muhé pasa dor di kandela, ni ningun hende ku ta praktiká adivinashon òf ku ta praktiká bruheria, òf ku ta pronostiká, òf ku ta praktiká magia, ni ningun hende ku ta plega hende, òf ku ta montadó òf spiritista, òf ku ta konsultá ku e mortonan. Pasobra ken ku hasi e kosnan aki ta un abominashon na SEÑOR; i pa motibu di e abominashonnan aki SEÑOR bo Dios lo kore ku nan for di bo dilanti.”

E konseho bíbliko ta masha spesífiko: Keda leu for di spiritismo. Kiko bo tin ku hasi si bo ta praktikando un ke otro forma di spiritismo i awor bo ke stòp ku esei? Bo por sigui e ehèmpel di e promé kristiannan den e stat di Efeso. Ora nan a aseptá “e palabra di Yehova,” segun e relato di Beibel “hopi di esnan ku a praktiká e arte di magia a trese nan bukinan huntu i a kima nan dilanti tur hende.” E bukinan ei tabata masha kostoso. Nan tabata bal 50.000 pida plata. (Echonan 19:19, 20, NW) Pero tòg e kristiannan na Efeso no a vasilá pa destruí nan.

Satanas Ta Probechá di Debilidatnan Humano

Un angel perfekto a bira Satanas e Diabel pasobra el a sukumbí na e deseo di halsa su mes. Den Eva tambe el a lanta un anhelo egoista i orguyoso di ke ta manera Dios. Awe, Satanas ta tene hopi hende den su gara dor di lanta den nan e sintimentu di orguyo. Por ehèmpel, algun hende ta haña ku nan rasa, grupo étniko òf nashonalidat ta mihó ku di otro hende. Esaki no ta kuadra mes ku loke Beibel ta siña! (Echonan 10:34, 35) Beibel ta bisa bon kla: “For di un hende [Dios] a krea tur pueblo.”—Echonan 17:26, BPK.

Un bon defensa kontra Satanas su trampa di orguyo ta humildat. Beibel ta konsehá nos pa “no pensa mas haltu di [nos] mes ku [nos] mester pensa.” (Romanonan 12:3) E ta bisa ku “Dios ta resistí e orguyosonan, ma ta duna grasia na e humildenan.” (Santiago 4:6) Un  manera efektivo pa resistí e intentonan di Satanas ta pa ser humilde i manifestá e otro kualidatnan ku Dios ta aprobá den bo bida personal.

Diabel ta ansioso tambe pa probechá di hende su debilidat di sede na deseonan karnal inapropiá. E propósito di Yehova Dios tabata pa hende gosa di bida. Ora nan ta satisfasé nan deseonan na e manera ku ta kuadra ku e boluntat di Dios, nan lo ta berdaderamente felis. Pero Satanas ta hinka nan den tentashon pa satisfasé nan deseonan na un manera inmoral. (1 Korintionan 6:9, 10) Ta muchu mas mihó pa konsentrá riba loke ta puru i birtuoso. (Filipensenan 4:8) Esaki lo yuda bo dominá bo pensamentu- i emoshonnan.

Sigui Resistí Diabel

Bo por logra resistí Diabel? Sí, bo por. Beibel ta sigurá nos: “Resistí Diabel i e lo hui for di boso.” (Santiago 4:7) Asta ora bo para firme kontra Satanas, lo e no entregá mesora i stòp di kousa mas problema pa bo segun ku bo ta gana konosementu di Dios. Nò, lo e ‘laga bo pa un tempu’ i bolbe purba un otro ora kumbiniente. (Lukas 4:13) Ma bo no tin nodi tene miedu di Diabel. Si bo sigui resistié, lo e no por alehá bo for di e Dios berdadero.

Sin embargo, pa bo resistí Diabel, bo mester sa ken e ta i kon e ta engañá hende. Ademas, bo mester siña ki medidanan bo por tuma pa protehá bo mes kontra su táktikanan mañoso. E úniko fuente ku por duna bo e konosementu eksakto ei ta Beibel, e Palabra di Dios. Pues, sea firme den bo desishon pa studia e Skritura inspirá, i apliká loke bo siña for di dje den bo bida. Gustosamente e Testigunan di Yehova den bo área lo yuda bo grátis ku un estudio asina, na un ora kumbiniente pa bo. Por fabor, no vasilá pa tuma kontakto ku nan òf pa skirbi e editornan di e revista aki.

Segun bo ta studia Beibel, tene na mente ku Satanas por usa oposishon òf persekushon pa stroba bo di siña e bèrdat ku tin den e Palabra di Dios. Algun di bo sernan kerí por asta rabia ku bo pasobra bo ta studia Beibel, foral dor ku kisas nan no konosé e bèrdatnan maravioso ku Beibel ta kontené. Otronan kisas ta hasi chèrchi di bo. Pero Dios realmente lo keda kontentu si bo sukumbí na e preshonnan ei? Ta Diabel ke desanimá bo pa bo stòp di siña tokante e Dios berdadero. Pakiko bo tin ku laga Satanas gana? (Mateo 10:34-39) Bo no deb’é nada. Ta Yehova bo debe bo bida. Pues, sea desididu anto pa resistí Diabel i ‘hasi Yehova su kurason kontentu.’—Proverbionan 27:11.

[Plachi na página 6]

Hende ku a bira kristian a kima nan bukinan di spiritismo

[Plachi na página 7]

Tuma e desishon firme pa studia Beibel