Kon Firme Bo Konfiansa den Dios Ta?
Kon Firme Bo Konfiansa den Dios Ta?
“Ma buska promé e reino.”—MATEO 6:33.
1, 2. Un hòmber hóben a dal ki paso relashoná ku su empleo, i dikon?
UN HÒMBER hóben kier tabata mas útil den su kongregashon. Pero e problema tabata ku su trabou a strob’é di asistí ku regularidat na e reunionnan. Kon el a resolvé e situashon? El a simplifiká su bida, kita for di su trabou i ku tempu a haña un trabou ku no tabata strob’é den su aktividatnan kristian. Awe, e ta gana hopi mas ménos ku ántes, pero tòg e por perkurá ainda pa e nesesidatnan di su famia i ta den mihó posishon pa yuda e kongregashon.
2 Abo ta komprondé dikon e hòmber hóben ei a dal un paso asina? Bo por mira bo mes ta dal un paso similar si bo tabata den mesun situashon kuné? Ta di elogiá ku hopi kristian a dal pasonan similar, i nan akshon ta demostrá nan konfiansa den e promesa aki di Hesus: “Ma buska promé e reino di Dios i Su hustisia, i tur e kosnan aki lo wòrdu añadí na boso.” (Mateo 6:33) Nan ta konfia den Yehova komo esun ku lo duna nan siguridat en bes di konfia den e mundu.—Proverbionan 3:23, 26.
3. Dikon kisas tin algun hende ta puntra nan mes si ta práktiko awe pa pone e Reino di Dios na promé lugá?
3 En bista di e tempu difísil ku nos ta bibando aden, tin hende kisas ta puntra nan mes si e hòmber ei a tuma un desishon sabí. Awe, un parti di humanidat ta biba den pobresa ekstremo, miéntras ku un otro parti ta gosa di e nivel di bida di mas haltu den historia. Mayoria hende den paisnan pober lo gara ku dos man kualke chèns ku nan haña pa hasi nan bida un poko mas fásil. Di otro banda, hopi hende den paisnan ku ta mas riku ta sinti e preshon pa mantené nan nivel di bida apesar di ekonomia suak, kambionan riba merkado laboral i doñonan di trabou ku ta mas i mas eksigente. Mirando e preshon ku tin pa hende gana nan pan di kada dia, tin kristian ta puntra nan mes: ‘Ta práktiko ainda pa buska e Reino promé?’ Pa yuda kontestá e pregunta ei, ban wak ta ku ken Hesus tabata papia.
“No Preokupá Boso Mes”
4, 5. Ki ilustrashon Hesus a usa pa mustra ku ta rasonabel pa e pueblo di Dios no ta demasiado preokupá ku asuntunan di bida diario?
4 Hesus tabata na Galilea, papiando ku un multitut grandi di hende for di hopi lugá. (Mateo 4:25) Masha poko, i kisas ningun, di e hendenan ei no tabata riku. Probablemente, mayoria tabata pober. Pero tòg, Hesus a urgi nan pa no duna prioridat na ganamentu di rikesa material sino mas bien pa nan montoná algu hopi mas balioso: tesoro spiritual. (Mateo 6:19-21, 24) El a bisa: “No preokupá boso mes pa boso bida, kiko boso lo kome òf kiko boso lo bebe; tampoko pa boso kurpa, kiko boso lo bisti. Bida no ta mas ku kuminda, i kurpa mas ku paña di bisti?”—Mateo 6:25.
5 Pa hopi di esnan ku tabata skucha Hesus, e palabranan ei kisas a zona impráktiko. Nan tabata sa ku si nan no traha duru, nan famia lo a sufri. Sin embargo, Hesus a rekordá nan di e paranan. Tur dia para tin ku buska kuminda, pero Yehova ta kuida nan. Tambe Hesus a mustra riba e manera ku Yehova ta perkurá pa e flornan di mondi, i nan beyesa a surpasá esun di Salomon ora e tabata den tur su gloria. Si Yehova ta perkurá pa para i flor, kuantu mas lo e perkurá pa nos? (Mateo 6:26-30) Manera Hesus a bisa, nos bida i kurpa ta hopi mas importante ku e kuminda ku nos ta kumpra pa sostené nos bida i tambe e pañanan pa tapa nos kurpa. Si nos dediká tur nos energia solamente na buska kos pa alimentá nos mes i pa tapa nos kurpa, sin laga nada supstansial keda pa sirbi Yehova, nos ta pasa por haltu di loke ta presisamente e propósito di bida.—Eklesiastés 12:13, NW.
Un Punto di Bista Balansá
6. (a) Ki responsabilidat kristiannan tin? (b) Kristiannan ta pone nan pleno konfiansa den ken?
6 Klaru ku Hesus no a animá su oyentenan pa stòp di traha i warda pa Dios, di un manera òf otro, perkurá e nesesidatnan di bida pa nan famia. Asta e paranan tin ku buska kuminda pa nan mes i pa nan yunan. Pues, e promé kristiannan tabatin ku traha si nan kier a kome. Nan tabatin ku sòru pa responsabilidatnan familiar. Kristiannan ku tabata sirbidó òf katibu tabatin ku traha diligentemente pa nan shon. (2 Tesalonisensenan 3:10-12; 1 Timoteo 5:8; 1 Pedro 2:18) Apòstel Pablo a traha hopi biaha komo trahadó di tènt pa mantené su mes. (Echonan 18:1-4; 1 Tesalonisensenan 2:9) Sin embargo, e kristiannan ei no a dependé riba nan trabou pa duna nan siguridat. Nan a konfia den Yehova. Komo resultado, nan a disfrutá di un pas interno ku tabata deskonosí pa otro hende. E salmista a bisa: “Esnan ku ta konfia den SEÑOR ta manera Seru Sion, ku no por wòrdu moví, ma ku ta permanesé pa semper.”—Salmo 125:1.
7. Kiko kisas ta e punto di bista di un persona ku no ta konfia firmemente den Yehova?
7 Ken ku no ta konfia firmemente den Yehova kisas ta pensa otro. Mayoria hende ta mira rikesa material komo e yabi prinsipal pa haña siguridat. P’esei tin mayornan ku a animá nan yunan pa invertí gran parti di nan añanan komo hóben adulto na edukashon mas avansá, sperando ku esei lo prepará nan pa empleonan ku ta paga bon. Lamentablemente, algun famia kristian a sufri gran pèrdida dor di invertí tantu tempu asina den esei, ya ku nan yunan a pèrdè nan enfoke spiritual i a bai sigui tras di metanan materialista.
8. Ki balansa kristiannan ta mantené?
8 Pues, kristiannan sabí ta realisá ku e konseho di Hesus ta mesun aplikabel awe ku e tabata den promé siglo, i nan ta purba keda balansá. Asta si nan tin ku pasa hopi ora na trabou afin di por kumpli ku responsabilidatnan bíbliko, nunka nan no ta laga e echo ku nan mester traha pa gana plaka pone nan pasa por haltu di asuntunan spiritual ku ta mas importante.—Eklesiastés 7:12.
Mas Konseho pa “No Preokupá”
9. Ki garantia Hesus a duna esnan ku ta konfia plenamente den Yehova?
9 Hesus a urgi su oyentenan den su Sermon Riba Seru: “No preokupá boso mes anto, bisando: ‘Kiko nos lo kome?’ òf ‘Kiko nos lo bebe?’ òf ‘Kiko nos lo bisti?’ Pasobra tur e kosnan aki e paganonan ta buska; ma boso Tata selestial sa ku boso tin mester di tur e kosnan aki.” (Mateo 6:31, 32) E palabranan aki ta hopi animador! Si nos ta konfia plenamente den Yehova, semper lo e t’ei pa sostené nos. Pero e palabranan di Hesus ta pone nos para pensa un ratu tambe. Nan ta rekordá nos ku si nos ta “buska” kosnan material ku empeño, nos manera di pensa ta meskos ku di “e paganonan,” esta, hendenan ku no ta kristiannan berdadero.
10. Ora un hòmber hóben a aserká Hesus pa konseho, kon Hesus a revelá loke e hòmber hóben tabata stima mas tantu?
10 Na un okashon un hòmber hóben ku tabata hopi riku a puntra Hesus kiko e mester hasi pa gana bida eterno. Hesus a rekord’é di e rekisitonan di e Lei, ku e tempu ei ainda tabata na vigor. E hòmber hóben a sigurá Hesus: “Tur e kosnan aki mi a warda. Kiko mas mi falta?” Hesus su kontesta kisas a zona impráktiko pa hopi hende. E di: “Si bo kier ta perfekto, bai i bende bo propiedatnan i duna na hende pober, i lo bo tin tesoro den shelu; i bin, sigui mi.” (Mateo 19:16-21) E hòmber hóben a bai tur tristu, pasobra e no por a biba ku e pensamentu di pèrdè su rikesa. Pa kuantu ku e tabata stima Yehova, el a stima su propiedatnan mas ku Yehova.
11, 12. (a) Ki palabranan ku ta pone nos para pensa Hesus a ekspresá relashoná ku rikesa? (b) Kon un hende su propiedat por strob’é di sirbi Yehova?
11 E suseso ei a pone Hesus bisa algu inesperá: “Ta difísil pa un hende riku drenta e reino di shelu. . . . Ta mas fásil pa un kamel pasa dor di wowo di un angua, ku pa un hende riku drenta e reino di Dios.” (Mateo 19:23, 24) Akaso Hesus tabata ke men ku ningun hende riku lo heredá e Reino? Nò, no ta esei e tabata ke men, pasobra el a sigui bisa: “Serka Dios tur kos ta posibel.” (Mateo 19:25, 26) Sí, ku Yehova su yudansa algun hende riku den e tempu ei a bira kristian ungí. (1 Timoteo 6:17) Sin embargo, Hesus a bisa e palabranan sorprendente ei pa un bon motibu. E tabata dunando un spièrtamentu.
12 Si un persona pega su kurason na e propiedatnan ku e tin, meskos ku e hòmber hóben riku ei a hasi, e kosnan ei lo por bira un barera ku ta strob’é di sirbi Yehova di henter kurason. Esei por ta e kaso tantu ku un hende ku ta riku kaba komo ku un hende ku “kier bira riku.” (1 Timoteo 6:9, 10) Demasiado konfiansa den kosnan material por pone un persona bira ménos ‘konsiente di su nesesidat spiritual.’ (Mateo 5:3, NW) Komo resultado, kisas e no ta sinti tantu mester mas di Yehova su sosten. (Deuteronomio 6:10-12) Lo e por kuminsá ferwagt ku e mester haña trato spesial den e kongregashon. (Santiago 2:1-4) I lo e por kuminsá dediká mayor parti di su tempu na gosa di su rikesa en bes di na sirbi Yehova.
Kultivá e Punto di Bista Korekto
13. Ki punto di bista robes e kristiannan di Laodisea tabatin?
13 Un grupo ku tabatin un punto di bista robes pa ku propiedat tabata e kongregashon di promé siglo na Laodisea. Hesus a bisa nan: “Bo ta bisa: ‘Mi ta riku, mi ta bon pará i no tin mester di nada,’ i bo no sa ku bo ta deplorabel i miserabel, pober, siegu i sunú.” No ta e rikesa di e kristiannan di Laodisea a hiba nan na tal kondishon spiritual lamentabel. Tabata e echo ku nan a konfia mas den rikesa ku den Yehova. Komo resultado, nan a bira lou den sentido spiritual, i Hesus tabata serka di ‘skupi’ nan for di su boka.—Revelashon 3:14-17.
14. Dikon e kristiannan hebreo a meresé Pablo su palabranan di elogio?
14 Di otro banda, Pablo a elogiá e kristiannan hebreo pa nan aktitut durante un periodo di persekushon ku a tuma lugá mas promé. El a bisa nan: “Boso a kompadesé di e prezunan i a aseptá ku goso e konfiskashon di boso propiedat, sabiendo ku boso tin pa boso mes un mihó poseshon i un ku ta permanesé.” (Hebreonan 10:34) E kristiannan ei no a keda destrosá dor ku nan a pèrdè nan propiedatnan. Nan a keda ku nan goso pasobra nan tabatin gara riba nan poseshon di mas balioso, “un mihó poseshon i un ku ta permanesé.” Meskos ku e komersiante ku a sakrifiká tur kos pa un pèrla balioso den Hesus su komparashon, nan tabata determiná pa no pèrdè nan gara riba e speransa di Reino, kueste loke kueste. (Mateo 13:45, 46) Ki un aktitut ekselente!
15. Kon un mucha muhé kristian na Liberia a pone interesnan di Reino na promé lugá?
15 Hopi kristian awe a kultivá e mesun aktitut ekselente ei. Por ehèmpel, na Liberia, un mucha muhé kristian a haña e oferta pa studia na universidat. Den e pais ei, hende ta mira un oferta asina komo un manera pa alkansá un futuro sigur. Sin embargo, e tabata un pionero, es desir, un predikadó di tempu kompletu, i el a kaba di haña un invitashon pa sirbi komo pionero spesial temporal. El a disidí di buska e Reino promé i a keda den sirbishi di tempu kompletu. El a bai su asignashon i a kuminsá 21 estudio di Beibel den tres luna. E ruman muhé hóben aki i míles di otronan meskos kuné ta buska promé e Reino, asta a kosto di posibel bentahanan material. Kon nan ta logra mantené un aktitut asina den e mundu materialista aki? Dor ku nan a kultivá vários kualidat ekselente. Laga nos trata algun di nan.
16, 17. (a) Pakiko modestia ta importante si nos ke konfia den Yehova? (b) Dikon nos mester kultivá konfiansa den e promesanan di Dios?
16 Modestia. Beibel ta bisa: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan. No sea sabí den bo mes bista.” (Proverbionan 3:5-7) Tin biaha, un sierto rumbo lo por parse práktiko desde e punto di bista di mundu. (Jeremias 17:9) Pero tòg, un kristian sinsero ta akudí na Yehova pa haña guia. (Salmo 48:14) ‘Den tur su kamindanan’—den asuntunan di kongregashon, edukashon, trabou, rekreo òf kualke otro kos—e ta buska modestamente e konseho di Yehova.—Salmo 73:24.
17 Konfiansa den e promesanan di Yehova. Pablo a bisa: “Esun ku bin serka Dios mester kere ku e ta, i ku e ta Esun ku ta rekompensá esnan ku ta busk’é.” (Hebreonan 11:6) Si nos ta duda ku Yehova lo kumpli ku su promesanan, lo por parse lógiko e ora ei pa ‘hasi uso kompletu di e kosnan di mundu.’ (1 Korintionan 7:31) Di otro banda, si nos fe ta fuerte, nos lo ta determiná pa buska e Reino promé. Kon nos por kultivá un fe fuerte? Dor di hala serka Yehova den orashon konstante i sinsero, i mediante estudio personal regular. (Salmo 1:1-3; Filipensenan 4:6, 7; Santiago 4:8) Meskos ku Rei David, nos por bisa den orashon: “Mi ta konfia den bo, o SEÑOR; mi ta bisa: ‘Bo ta mi Dios.’ Ki grandi ta bo bondat!”—Salmo 31:14, 19.
18, 19. (a) Kon diligensia ta fortalesé nos konfiansa den Yehova? (b) Dikon un kristian mester ta dispuesto pa hasi sakrifisio?
18 Ser diligente den e sirbishi di Yehova. Pablo a konektá konfiansa den e promesanan di Yehova ku ser diligente ora el a skirbi: “Nos ta deseá ku kada un di boso lo mustra e mesun diligensia pa asina realisá e siguransa kompletu di speransa te na fin.” (Hebreonan 6:11) Si nos ta okupá den e sirbishi di Yehova, lo e sostené nos. Kada biaha ku nos eksperensiá e sosten ei, nos konfiansa den dje ta bira mas fuerte, nos ta bira “firme, konstante.” (1 Korintionan 15:58) Nos fe ta ser renobá, i nos speransa ta keda konfirmá.—Efesionan 3:16-19.
19 Dispuesto pa hasi sakrifisio. Pablo a sakrifiká un karera prometedor pa e por a sigui Hesus. Klaramente el a tuma e desishon korekto, ounke tabatin biaha ku su bida tabata difísil desde un punto di bista material. (1 Korintionan 4:11-13) Yehova no ta primintí un bida di luho, i tin biaha su sirbidónan ta soportá difikultatnan. E echo ku nos ta dispuesto pa simplifiká nos estilo di bida i hasi sakrifisio ta duna prueba kon fuerte nos determinashon ta pa sirbi Yehova.—1 Timoteo 6:6-8.
20. Dikon pasenshi ta masha importante pa un persona ku ta pone interesnan di Reino na promé lugá?
20 Pasenshi. Disipel Santiago a urgi e otro kristiannan: “Tene pasenshi, rumannan, te na e binida di Señor.” (Santiago 5:7) Den e mundu ku ta move ku paso rápido aki, ta difísil pa tene pasenshi. Nos ke pa kosnan sosodé lihé-lihé. Pero Pablo ta urgi nos pa imitá esnan ku “pa medio di fe i pasenshi ta heredá e promesanan.” (Hebreonan 6:12) Sea dispuesto pa warda riba Yehova. Bida eterno den un paradeis riba tera; definitivamente ta bale la pena pa warda riba esei!
21. (a) Kiko nos ta demostrá ora nos ta pone interesnan di Reino na promé lugá? (b) Kiko nos lo trata den e siguiente artíkulo?
21 Sí, Hesus su konseho pa buska promé e Reino ta práktiko. Ora nos ta hasi esei, nos ta demostrá ku realmente nos ta konfia den Yehova i nos ta skohe e úniko manera safe pa un kristian biba. Sin embargo, Hesus a konsehá nos tambe pa sigui ‘buska promé Dios su hustisia.’ Den e siguiente artíkulo, nos lo mira dikon e animashon ei ta nesesario spesialmente awe.
Bo Por Splika?
• Hesus a animá nos pa nos tin ki balansa relashoná ku kosnan material?
• Kiko nos ta siña for di Hesus su komparashon di e kamel i e wowo di angua?
• Kua kualidatnan kristian ta yuda nos buska promé e Reino di Dios?
[Preguntanan di Estudio]
[Plachi na página 21]
Hopi di e hendenan ku a tende Hesus su palabranan tabata pober
[Plachi na página 23]
E hòmber hóben riku tabata stima su propiedatnan mas ku el a stima Dios
[Plachi na página 23]
E komersiante den Hesus su komparashon a sakrifiká tur kos pa un solo pèrla balioso
[Plachi na página 24]
Si nos ta okupá den e sirbishi di Yehova, lo e sostené nos