Bo Ke Tin Bon Amigu?

MAYORIA hende ke tin bon amigu. Bida ta mas dushi ora bo por kompartí bo eksperensianan ku bo amigunan íntimo. Pero kon bo por haña un bon amigu? Kasi 2.000 aña pasá, Hesus a mustra ku e klave pa éksito den tur relashon humano ta amor inegoista. El a bisa: “Meskos ku boso kier pa hende hasi ku boso, boso tambe hasi ku nan.” (Lukas 6:31) E deklarashon aki, hopi bes yamá e Regla di Oro, ta mustra ku pa bo tin amigu bo mester ta un persona inegoista i generoso. Básikamente, pa bo tin un amigu, bo mes mester ta un amigu. Kon asina?

Bo no por kultivá un amistat íntimo i kaluroso di un dia pa otro. Al fin i al kabo, un amigu ta muchu mas ku un konosí. E ta un persona ku bo ta pega na bo kurason, i pa bo desaroyá i mantené lasonan estrecho bo tin ku hasi esfuerso. Hopi bes, amistat ta eksigí pa bo pone e nesesidatnan di bo amigu riba bo interesnan. Amigu ta kompartí no solamente nan eksperensianan agradabel sino tambe esnan desagradabel.

Bo ta mustra ku bo ta un berdadero amigu spesialmente dor di duna sosten emoshonal i práktiko na un persona den nesesidat. Proverbionan 17:17 ta deklará: “Un amigu ta stima tur ora bai, i un ruman ta nasí pa tempu di atversidat.” De echo, lasonan di amistat por ta asta mas fuerte ku sierto relashonnan di famia. Proverbionan 18:24 ta remarká: “Un hende ku tin hopi amigu por yega na ruina, ma tin un amigu ku ta mas pegá ku un ruman.” Bo ke sa mas tokante kon bo por kultivá berdadero amistat? Lo bo ke forma parti di un grupo di hende ku ta konosí pa e amor ku nan tin pa otro? (Juan 13:35) Si ta asina, Testigunan di Yehova den bo komunidat lo ta kontentu pa mustra bo kon bo por haña berdadero amigu.