Ken Ta Apliká e Siñansanan di Kristu Awe?

POR lo general hende ta rekonosé Hesukristu komo un di e hòmbernan di mas grandi ku a yega di biba. Hopi ta mir’é komo e hòmber di mas grandi. Pa kasi dos mil aña, su siñansanan tabatin un influensia profundo riba bida di hende—“bida humilde di hende bondadoso i tambe akshonnan humanitario impreshonante,” segun e outor ingles Melvyn Bragg.

Kiko di Kristianismo?

Kiko di kristianismo? Un artíkulo a deskribié komo “un di e mayor adelantonan spiritual di humanidat.” David Kelso di Glasgow Caledonian University, Eskosia, a duna e siguiente punto di bista: “Su dos mil añanan di historia ta yen di logro sin presedente riba tereno sosial, di arte, arkitektura, filosofia i músika.”

Sin embargo, hopi otro hende tin un punto di bista kompletamente diferente. Nan no tin problema ku e idea ku un religion ta basa su mes riba e siñansanan di Hesukristu i e kreensia ku Hesus tabata yu di Dios. Loke sí ta duna nan asko ta e kondukta di religionnan ku ta pretendé di representá kristianismo.

Por ehèmpel, e filósofo aleman di siglo 19, Friedrich Nietzsche, a deskribí kristianismo den e konteksto aki komo “e mancha eterno di humanidat.” El a skirbi ku esaki ta “e gran maldishon, e korupshon enorme i esun di mas profundo, . . . pa kua ningun medio ta demasiado venenoso, demasiado desonesto, demasiado klandestino i demasiado miskiña.” Kisas bo ta haña ku e punto di bista di Nietzsche ta poko eksagerá, pero algun opservadó mas rasonabel a yega na konklushonnan similar. Pakiko? Pasobra den transkurso di siglonan e  kondukta di hende ku ta pretendé di ta kristian ta karakterisá no pa e kualidatnan di Hesukristu, sino pa “degenerashon, blasfemia i krímennan horendo” na tur parti di mundu.

Kristianismo Ta Reflehá e Siñansanan di Kristu?

P’esei anto, no ta irasonabel pa puntra: “Kristianismo djawe ta reflehá e siñansanan di Kristu?” Algun hende lo bisa mesora: “Klaru ku sí. Akaso Hesus no a primintí su siguidónan ku lo e ta ku nan ‘te na fin di mundu’?” (Mateo 28:20) Sí, en bèrdat el a bisa esei. Pero e tabata ke men ku lo e ta ku tur hende ku ta pretendé di ta su siguidó, sin importá nan kondukta?

Kòrda, algun lider religioso den tempu di Hesus a pensa ku Dios tabata ku nan sin ku el a pone ningun kondishon pa nan. Siendo ku Dios a skohe Israel pa un papel spesial, algun lider religioso a pensa ku Dios nunka lo bandoná nan—sin importá kiko nan a hasi. (Mikeas 3:11) Pero ku tempu nan a bai muchu leu den e manera ku nan a rechasá e lei- i normanan di Dios. Komo resultado di esei, Hesukristu a bisa nan frankamente: “Mira, boso kas ta keda desolá pa boso!” (Mateo 23:38) Henter un sistema religioso a pèrdè e fabor di Dios. Dios a rechas’é i a laga e ehérsito romano destruí su stat kapital, Yerusalèm, i su tèmpel na aña 70 di nos era.

Algu similar por sosodé ku kristianismo? Laga nos konsiderá ki kondishonnan Hesus su siguidónan mester kumpli kuné pa e ta ku nan “te na fin di mundu” manera el a primintí.

 [Plachinan na página 2, 3]

E siñansanan di Hesukristu tin un influensia profundo riba miónes di hende rònt mundu