E Úniko Solushon!

E HÒMBER Lázaro huntu ku su ruman muhénan, Marta i Maria, tabata biba na Betania, un pueblito ku a keda mas o ménos tres kilometer pafó di Yerusalèm. Riba un dia, ora ku nan amigu Hesus no tabat’ei, Lázaro a bira hopi malu. Su ruman muhénan tabata hopi preokupá p’e. Nan a manda un mensahe pa Hesus. Poko despues di a tende e notisia, Hesus a sali pa bai mira Lázaro. Na kaminda, Hesus a informá su disipelnan ku e ta bai serka Lázaro pa lant’é for di soño. Na promé instante e disipelnan a komprondé Hesus robes, pero e ta klarifiká e asuntu, bisando: “Lázaro a muri.”—Juan 11:1-14.

Ora Hesus a yega na e graf di Lázaro, el a manda nan kita e piedra ku a sera e entrada di e graf. Despues di hasi orashon na bos haltu, el a ordená: “Lázaro, bin pafó!” Anto Lázaro a bin pafó. E hòmber ku tabatin kuater dia morto a ser resusitá.—Juan 11:38-44.

E relato tokante Lázaro ta mustra ku resurekshon ta e solushon sigur pa morto. Pero kisas tin hende ta puntra: E milager di trese Lázaro bèk na bida ta un kos ku a pasa di bèrdat? Beibel ta present’é komo un echo. Lesa Juan 11:1-44, i lo bo mira kon bibu e detayenan di e relato aki ta. Bo por nenga ku esei a sosodé? Hasiendo esei lo por duna bo motibu pa duda di tur e milagernan ku tin pará skirbí den Beibel, inkluso e resurekshon di Hesukristu mes. Anto Beibel ta bisa ku “si Kristu no a wòrdu lantá, boso fe ta sin balor.” (1 Korintionan 15:17) E resurekshon ta un siñansa fundamental di Beibel. (Hebreonan 6:1, 2) Pero, kiko e palabra “resurekshon” ke men?

Kiko Beibel Ke Men ku “Resurekshon”?

Den e Skritura Griego Kristian, e palabra “resurekshon” ta aparesé mas ku 40 biaha. E ta ser tradusí for di un palabra griego ku literalmente ta nifiká “lanta para atrobe.” E ekspreshon hebreo ku ta korespondé kuné ta nifiká “rebibamentu di e mortonan.” Despues ku un persona muri, ta kiko ta ser resusitá? No por ta e kurpa, pasobra esei ta putri i bolbe na stòf. Loke ta ser resusitá no ta e mesun kurpa sino e mesun persona ku a muri. Pues, resurekshon ta enserá restorashon di e patronchi di bida di un persona: e karakterístikanan di su personalidat, e kosnan ku el a hasi durante di su bida i tur e detayenan di su identidat.

Yehova Dios su memoria ta perfekto, i p’e no ta un problema pa kòrda e patronchi di bida di e hendenan ku a muri. (Isaias 40:26) Siendo ku Yehova ta e Originadó di bida, fásilmente e por resusitá e mesun persona den un kurpa nobo. (Salmo 36:9) Ademas, Beibel ta deklará ku Yehova Dios ta “anhelá”—es desir, e tin un deseo fuerte i sinsero—pa resusitá e mortonan. (Jòb 14:14, 15) Nos por ta hopi kontentu ku Yehova no solamente por trese un persona bèk na bida, sino tambe ku e kier hasié!

Hesukristu tambe ta hunga un papel importante den resurekshon di e mortonan. Un poko mas ku un aña despues ku Hesus a kuminsá ku su ministerio, el a bisa: “Meskos ku e Tata ta lanta e mortonan i ta duna nan bida, asina e Yu tambe ta duna bida na esun ku e kier.” (Juan 5:21) E eksperensia di Lázaro no ta mustra bon kla ku Hesukristu tin e poder i tambe e deseo di resusitá e mortonan?

Kiko di e idea ku den nos tin algu ku ta sigui biba despues ku nos muri? Bon mirá, e siñansa di resurekshon i e idea ku hende tin un alma òf spiritu inmortal, ta inkompatibel. Si tin algu den nos ta keda na bida ora nos muri,  pakiko nos lo tin mester di un resurekshon? Lázaro su ruman muhé Marta no a kere ku ora su ruman hòmber a muri, el a sigui eksistí den un region di spiritu. Marta tabatin fe den e resurekshon. Ora Hesus a sigur’é: “Bo ruman hòmber lo lanta,” Marta a bisa: “Mi sa ku e lo lanta den e resurekshon riba e último dia.” (Juan 11:23, 24) Anto ora Lázaro a resusitá, e no a konta ningun eksperensia di un bida despues di morto. E tabata morto. Beibel ta bisa: “E mortonan no sa nada . . . No tin ni aktividat ni planifikashon ni sabiduria den Seol [e graf komun di humanidat], kaminda bo ta bai.”—Eklesiastés 9:5, 10.

Pues anto, segun Beibel e úniko solushon pa morto ta resurekshon. Pero di tur e hendenan ku a muri, ta ken lo ser resusitá i na unda?

Ken Lo Ser Resusitá?

Hesus a bisa: “E ora lo yega den kual tur ku ta den graf [“konmemorativo,” NW] lo tende [Hesus] su bos, i lo sali.” (Juan 5:28, 29) Segun e promesa aki, esnan den graf konmemorativo—esta, esnan den Yehova su memoria—lo ser resusitá. Pues anto, e pregunta ta: Di tur e hendenan ku a muri, ken realmente ta den Dios su memoria sperando un resurekshon?

E buki bíbliko di Hebreonan kapítulo 11 ta menshoná pa nòmber hende hòmber i muhé ku a sirbi Dios fielmente. Nan, huntu ku e fiel sirbidónan di Dios ku a muri den añanan resien, lo ta entre esnan resusitá. Kiko di e hendenan ku no a kumpli ku Dios su normanan di hustisia, podisé pa falta di konosementu? Nan tambe ta den Dios su memoria? Sí, hopi di nan ta den su memoria, pasobra Beibel ta primintí: “Lo tin un resurekshon di tantu e hustunan komo e malbadonan.”—Echonan 24:15.

Sin embargo, no ta tur hende ku a yega di biba lo haña un resurekshon. Beibel ta deklará: “Si nos sigui peka boluntariamente despues di a risibí e konosementu di e bèrdat, no ta keda sakrifisio pa piká mas, sino un sierto ekspektativa teribel di huisio.” (Hebreonan 10:26, 27) Tin hende a kometé  pikánan pa kua no tin pordon. Nan no ta den Hades (e graf komun di humanidat) sino den Gehena, un lugá simbóliko di destrukshon eterno. (Mateo 23:33, NW) Pero nos tin ku tene kuidou pa nos no kuminsá spekulá si un sierto persona lo ser resusitá òf nò. Ta Dios lo husga esaki. E sa ken ta den Hades i ken ta den Gehena. Di nos parti, lo ta bon pa nos hiba nos bida segun e boluntat di Dios.

Ken Lo Ser Resusitá pa Biba den Shelu?

E resurekshon di mas remarkabel tabata esun di Hesukristu. El a ser “matá den e karni, ma hasí bibu den e spiritu.” (1 Pedro 3:18) Ningun hende promé kuné no a yega di haña un resurekshon asina. Hesus mes a bisa: “Ni un hende no a subi na shelu, sino esun ku a baha for di shelu, esta, e Yu di hende.” (Juan 3:13) Sí, e Yu di hende tabata e promé ku a ser lantá komo un persona spiritual. (Echonan 26:23, BPK) Anto tabatin mas hende pa haña un resurekshon asina. E Skritura ta bisa: “Kada un segun su mes órden: Kristu e promé fruta, despues di esei, esnan ku ta di Kristu na su binida.”—1 Korintionan 15:23.

Un grupo chikitu di persona—“esnan ku ta di Kristu”—lo ser resusitá pa bida selestial pa un propósito spesial. (Romanonan 6:5) Nan lo ‘reina ku Kristu riba tera.’ (Revelashon 5:9, 10) Ademas, nan lo sirbi komo saserdote den e sentido ku nan lo yuda eliminá e efektonan di piká ku humanidat a heredá for di e promé hòmber, Adam. (Romanonan 5:12) Esnan ku ta goberná huntu ku Kristu komo rei i saserdote ta un total di 144.000 persona. (Revelashon 14:1, 3) Ki tipo di kurpa nan lo haña ora nan ser resusitá? Beibel ta bisa “un kurpa spiritual.” Esaki ta hasi posibel ku nan por biba den shelu.—1 Korintionan 15:35, 38, 42-45.

Ki tempu e resurekshon selestial ta tuma lugá? Promé Korintionan 15:23 [NW] ta kontestá ku ta ‘durante Kristu su presensia.’ Susesonan mundial for di aña 1914 ta mustra bon kla ku tantu Kristu su presensia komo “e fin di tempu” a kuminsá e aña ei. (Mateo 24:3-7) Pues nos tin motibu pa konkluí ku e resurekshon di kristiannan fiel pa bida selestial a kuminsá kaba, pero klaru ku hende no por a mira esei tuma lugá. Esaki ta nifiká ku e apòstelnan i e kristiannan di promé ya a ser lantá pa bida selestial. Kiko di kristiannan ku ta biba awe i ku tin e speransa sigur, duná pa Dios, di reina ku Kristu den shelu? Nan ta ser lantá “den un fregá di wowo,” es desir, asina ku nan muri. (1 Korintionan 15:52) Siendo ku resurekshon di e grupo chikitu aki di 144.000 persona ta promé ku esun di e kantidat grandi di hendenan ku lo ser resusitá pa biba riba tera, e ta ser yamá “e resurekshon mas trempan,” i “e promé resurekshon.”—Filipensenan 3:11, NW; Revelashon 20:6.

Ken Lo Ser Resusitá pa Biba Riba Tera?

Segun e Skritura, e gran mayoria di mortonan lo ser lantá bèk pa biba riba tera. (Salmo 37:29; Mateo 6:10) Apòstel Juan a deskribí un vishon magnífiko ku el a haña di esnan ku lo ser resusitá. El a skirbi: “Laman a entregá e mortonan ku tabata den dje, i morto i Hades a entregá e mortonan ku tabata den nan; i nan a wòrdu husgá, kada un di nan segun nan obranan. I morto i Hades a wòrdu tirá den e lago di kandela. Esaki ta e di dos morto, e lago di kandela.” (Revelashon 20:11-14) E mortonan den Hades, òf Seol—e graf komun di humanidat—ta den Dios su memoria. Delaster un di nan lo ser librá for di e gara di morto. (Salmo 16:10; Echonan 2:31) Anto kada un di nan lo ser husgá a base di nan komportashon despues di nan resurekshon. Kiko lo pasa e ora ei ku morto i Hades? Nan lo ser tirá den “e lago di kandela.” Esaki ta nifiká ku nunka mas hende lo muri debí na e piká ku nan a heredá di Adam.

 Djis pensa ki un speransa felis e promesa di resurekshon ta duna esnan ku a pèrdè un ser kerí! Ora Hesus a resusitá e úniko yu di e biuda di Nain, ki un goso e mama lo mester a sinti! (Lukas 7:11-17) I relashoná ku e mayornan di un mucha di 12 aña ku Hesus a resusitá, Beibel ta bisa: “Umbes nan tabata for di nan mes di gran eksitashon.” (Marko 5:21-24, 35-42, NW; Lukas 8:40-42, 49-56) Den Dios su mundu nobo primintí, lo ta un goso di por risibí sernan kerí bèk.

Ki impakto e echo ku nos sa e bèrdat tokante resurekshon por tin riba nos awor? The World Book Encyclopedia ta bisa: “Mayoria hende tin miedu di morto i ta purba evitá di pensa riba dje.” Dikon? Pasobra pa mayoria hende, morto ta un misterio, un kos deskonosí ku nan tin miedu di dje. Pero e echo ku nos sa e bèrdat tokante e kondishon di e mortonan i nos tin e speransa di resurekshon, esei por duna nos kurashi si nos haña nos konfrontá ku ‘e delaster enemigu, morto.’ (1 Korintionan 15:26) Tambe e konosementu aki ta yuda nos soportá e doló ku nos ta sinti ora un amigu íntimo òf un miembro di famia muri.

Ki tempu e resurekshon riba tera lo kuminsá? Awe e tera ta yen di violensia, konflikto, dramamentu di sanger i kontaminashon. Si e mortonan mester resusitá riba un mundu yen di e kosnan aki, nan felisidat sigur lo ta di korto durashon. Sin embargo, e Kreadó a primintí ku pronto lo e trese un fin na e mundu aktual ku ta bou di kontròl di Satanas. (Proverbionan 2:21, 22; Daniel 2:44; 1 Juan 5:19) Dios su propósito pa e tera ta serka di kumpli. Anto e ora ei, den Dios su mundu nobo di pas, míles di miónes di hende ku awor ta drumí den morto lo habri nan wowo.

[Plachi na página 7]

Mayoria di e mortonan lo ser resusitá pa biba riba tera