Imitá Kristu Ora di Ehersé Outoridat

UN EKSPERIMENTO riba komportashon humano realisá algun aña pasá a duna resultadonan fasinante. E personanan ku a partisipá den dje a ser partí den dos grupo. E promé grupo a ser nombrá komo bewaker pa vigilá e di dos grupo, ku mester a aktua komo prezu. Kiko a sosodé?

Segun e informe, “den un par di dia mayoria di [e bewakernan] a bira ofensivo i brutu den nan trato, kla pa duna kastigu, miéntras ku e prezunan a haña hopi miedu i a kuminsá sinti nan intimidá.” E konklushon ku e investigadónan a yega na dje tabata ku kasi tur hende por kai den e trampa di hasi mal uso di poder òf outoridat.

Bon Uso i Mal Uso di Outoridat

Klaru ku bon uso di outoridat por ta algu probechoso. E por duna guia apropiá i e por resultá den benefisionan físiko, emoshonal i spiritual. (Proverbionan 1:5; Isaias 48:17, 18) Sin embargo, manera e eksperimento menshoná ariba a mustra, semper tin e peliger ku un hende ta bai mas aleu di loke ta rasonabel den uso di outoridat. Beibel ta mustra riba e peliger aki i ta bisa: “Ora ku un malbado ta goberná, pueblo ta suspirá.”—Proverbionan 29:2; Eklesiastés 8:9.

Mal uso di poder ta perhudisial, asta ora e motivashon su tras ta bon. Por ehèmpel, resientemente un sosiedat religioso di maestronan na Irlanda a pidi despensa públikamente pa e manera ku algun maestro a hasi mal uso di nan outoridat riba muchanan ku tabata bou di nan kuido. Sin duda, hopi di e maestronan ei tabatin bon intenshon, asta noble, pero e métodonan ku algun di nan a usa tabata sumamente dañino. Un korant a informá ku “e violensia eksesivo i severidat di hopi di e maestronan aki a troumatisá hopi mucha.” (The Irish Times) Pues, kon bo por ehersé outoridat den un manera ku ta motivá otro hende pa hasi esfuerso en bes di alehá nan òf heridá nan ku palabra òf akshon?—Proverbionan 12:18.

“Tur Outoridat” A Wòrdu Duná na Hesukristu

Pensa riba e ehèmpel di Hesukristu. Djis promé ku el a subi na shelu, el a bisa su disipelnan: “Tur outoridat a wòrdu duná na mi den shelu i riba tera.” (Mateo 28:18) Esei a hinka miedu den e disipelnan? Nan a sinti ku  Hesus lo a bai kuminsá reflehá e mesun spiritu di e Cesarnan òf gobernantenan di Roma, kendenan tabatin e reputashon di usa nan poder pa aplastá kualke protesta òf rebelion kontra gobièrnu?

E registro di Beibel ta mustra klaramente ku nò! Hesukristu ta usa su outoridat den e mesun manera ku su Tata ta usa su outoridat. Ounke Yehova ta e legítimo Soberano Universal todopoderoso, e ta deseá un sirbishi boluntario di parti di su súpditonan, no un obedensia sin sentido, miedoso òf fòrsa. (Mateo 22:37) Yehova nunka ta hasi mal uso di su outoridat. Un vishon impaktante ku profeta Ezekiel a haña ta mustra esaki.

Den e vishon aki, Ezekiel a mira kuater kriatura angelikal ku tabata apoyá e soberania di Dios. Kada un tabatin kuater kara. Ezekiel a skirbi: “Pa loke ta forma di nan karanan: kada un tabatin kara di hende; na banda drechi tur kuater tabatin kara di leon, i na banda robes, kara di bisé machu; i tur kuater tabatin kara di águila.” (Ezekiel 1:10) E kuater karanan aki ta representá Dios su kuater kualidatnan prinsipal, perfektamente balansá. E Palabra di Dios ta deskribí esakinan komo: amor, representá pa e kara di hende; hustisia, representá pa e kara di leon; i sabiduria, representá pa e kara di águila. E tres kualidatnan aki ta kombiná huntu ku e di kuater—poder, representá pa e kara di toro. Kiko tur esaki ta nifiká? E vishon ta mustra ku semper Yehova ta ehersé su poder i outoridat sin límite den un manera ku ta na armonia ku su otro kualidatnan prinsipal.

Semper Hesukristu a imitá su Tata den e manera amoroso, sabí i hustu ku el a usa su outoridat. Su disipelnan a haña un gran refreskamentu sirbiendo bou di su outoridat. (Mateo 11:28-30) E kualidat ku mas ta reflehá  e personalidat di tantu Yehova Dios komo Hesukristu ta amor, i no poder òf outoridat!—1 Korintionan 13:13; 1 Juan 4:8.

Kon Abo Ta Ehersé Bo Outoridat?

Kon abo ta ehersé bo outoridat? Por ehèmpel, den bo famia bo ta usa bo outoridat den un manera ku ta satisfasé únikamente bo antoho òf kaprichonan personal? Otro miembronan di bo famia ta kumpli ku bo desishonnan pa motibu di miedu òf pasobra nan stima bo? Nan ta obedesé bo djis pasobra bo tin mas outoridat? Esakinan ta preguntanan ku kabesnan di famia por hasi nan mes pa yuda nan mantené òrdu teokrátiko den e areglo di famia.—1 Korintionan 11:3.

Si bo tin sierto outoridat den e kongregashon kristian, kon lo bo manehá esaki? Pa sa si bo ta manehá esaki korektamente, evaluá bo mes a base di e siguiente prinsipionan inspirá pa Yehova Dios i di kua Hesukristu a duna nos un bon ehèmpel.

‘E sirbidó di Señor mester ta kariñoso ku tur hende, ku kapasidat pa siña, ku pasenshi ora ku e wòrdu tratá inhustamente, ku ta korigí ku suavedat esnan ku ta den oposishon.’—2 Timoteo 2:24, 25.

Algun persona den e kongregashon kristian di promé siglo tabatin hopi outoridat. Por ehèmpel, Timoteo por a asta “instruí sierto hòmbernan pa nan no siña hende doktrina straño.” (1 Timoteo 1:3) Pero nos por ta sigur ku Timoteo a imitá e kualidatnan di Dios den tur loke el a hasi, pasobra sin duda el a sigui e konseho di Pablo pa instruí “ku suavedat” i pa tabata “kariñoso ku tur hende” ora el a kumpli ku su responsabilidat komo superintendente di e kongregashon kristian. Pa motibu ku e mes tabata relativamente yòn, e mester a komportá su mes manera un yu respetuoso pa ku e kristiannan mas grandi i manera un ruman hòmber amoroso pa ku esnan mas yòn. (1 Timoteo 5:1, 2) Bou di un kuido amoroso asina, e kongregashon kristian ta reflehá e spiritu di un famia kaluroso i amoroso, i no di un empresa kaminda ta reina un ambiente den kua hende ta trata otro na un manera friu i sin heful.—1 Korintionan 4:14; 1 Tesalonisensenan 2:7, 8.

“E gobernantenan di e paganonan tin dominio riba nan, i nan shon grandinan ta ehersé outoridat riba nan. Entre boso no ta asina, ma ken ku kier bira grandi entre boso lo ta boso sirbidó.”—Mateo 20:25, 26.

Opresornan mundano ta ehersé “dominio riba” otro hende dor di imponé nan boluntat riba nan i dor di insistí pa nan hasi kosnan den un sierto manera, menasando ku kastigu si nan desobedesé. Sin embargo, Hesukristu a  enfatisá e idea di sirbi otro hende i no di pone preshon riba nan. (Mateo 20:27, 28) Semper el a trata su disipelnan na un manera amoroso i bondadoso. Ora bo ta sigui e ehèmpel di Hesus, ta muchu mas fásil pa otro hende koperá ku bo. (Hebreonan 13:7, 17) Ta bira mas fásil tambe pa nan ‘bai e mia èkstra,’ hasiendo esei boluntariamente i no obligá.—Mateo 5:41.

‘Kuida e karnénan ku Dios a konfia na boso, no komo si fuera boso ta doño di e karnénan, sino birando un ehèmpel pa nan.’—1 Pedro 5:2, 3, BPK.

Awe superintendentenan ta realisá ku nan tin ku duna kuenta na Dios pa e bienestar spiritual di tur miembro di e kongregashon, i nan ta tuma e responsabilidat aki mashá na serio. Nan ta hasi esfuerso pa kuida e tou di Dios di buena gana, ku entusiasmo i den un manera amoroso. Meskos ku apòstel Pablo, nan ta traha duru pa edifiká i fortalesé e fe di esnan ku ta bou di nan kuido, i pa no aktua komo doño di nan fe.—2 Korintionan 1:24.

Ora ansianonan tin ku ofresé konseho apropiá, nan ta hasi esei ku un spiritu suave pa reahustá un miembro ku a faya òf pa yuda un ruman kristian progresá spiritualmente. Nan ta tene kuenta ku e rekordatorio di apòstel Pablo: “Rumannan, asta si un hende wòrdu sorprendí den kualke delitu, boso, ku ta spiritual, restorá un hende asina den un spiritu di mansedumbre; kada un wak su mes, pa boso tambe no wòrdu tentá.”—Galationan 6:1; Hebreonan 6:1, 9-12.

“Soportá otro i pordoná otro . . . Bisti amor, kual ta e laso perfekto di unidat.”—Kolosensenan 3:13, 14.

Kon bo ta trata ku un persona ku kisas no ta kumpli perfektamente ku e normanan kristian? Bo ta tene kuenta ku su imperfekshonnan, manera Yehova i Hesukristu ta hasi? (Isaias 42:2-4) Òf bo ta insistí pa den tur kaso rumannan apliká e lei ‘al pie de la letra’? (Salmo 130:3) Kòrda, kaminda ta posibel i si ta apropiá, mustra suavedat; ser firme solamente ora esei ta nesesario. Trata otro hende ku amor. Esei lo yuda forma lasonan fuerte di konfiansa mutuo entre abo i esnan riba ken bo tin outoridat.

Ora bo ta ehersé outoridat ku a ser konfiá na bo, hasi esfuerso pa imitá Yehova Dios i Hesukristu. Kòrda e kuadro maravioso ku e salmista a pinta dje manera ku Yehova ta ehersé su outoridat riba su pueblo. David a kanta: “SEÑOR ta mi wardadó, lo mi no tin falta di nada. E ta pone mi drumi den lugánan di yerba bèrdè; e ta hiba mi kantu di awanan ketu. E ta restorá mi alma; e ta guia mi den e kamindanan di hustisia pa motibu di su nòmber.” Di igual manera, nos ta lesa di Hesus: “Ami ta e bon wardadó; i mi konosé esnan ku ta di mi, i esnan ku ta di mi, konosé mi, meskos ku e Tata konosé mi i ami konosé e Tata; i mi ta duna mi bida pa e karnénan.” Nan ta e mihó ehèmpelnan ku nos por tin di ehersé outoridat na un manera amoroso.—Salmo 23:1-3; Juan 10:14, 15.

[Komentario na página 18]

Semper Yehova ta usa su poder na armonia perfekto ku su hustisia, sabiduria i amor

[Plachi na página 18]

Tin biaha, ansianonan tin ku duna konseho amoroso na rumannan ku a faya

[Plachi na página 19]

Pablo a konsehá Timoteo p’e tabata manera un yu respetuoso i un ruman amoroso

[Plachi na página 20]

Hesukristu ta ehersé su outoridat na un manera sabí, hustu i amoroso