Mayornan—​Ser un Bon Ehèmpel pa Boso Yunan

“SIKÓLOGONAN tin un siglo kaba ta buska e klave pa lanta un bon yu; pero nan por bien para e búskeda, no pasobra nan a hañ’é sino pasobra e no ta eksistí.” Asina e reseña di un buki tokante kriamentu di yu ku a sali den e revista Time a bisa. E buki ta bisa ku mucha ta bai mas lihé tras di e balornan di nan pareunan ku esnan di nan mayornan.

Nos tin ku rekonosé en bèrdat ku hóbennan di mas o ménos e mesun edat tin hopi influensia riba otro. (Proverbionan 13:20; 1 Korintionan 15:33) E kolumnista William Brown a remarká: Si tin un solo kos ku ta dominá bida di adolesentenan, ta e deseo pa otro hóbennan aseptá nan. E kos di mas indeseabel pa nan ta ser diferente for di nan pareunan. Ora mayornan no logra hasi e ambiente na kas agradabel òf no ta dediká sufisiente tempu na nan yunan—lokual ta situashonnan masha komun den e mundu drùk djawe—den un sentido nan ta habriendo porta pa influensia di otro hóbennan, e asina yamá preshon di pareunan, kousa daño na nan yunan.

Ademas, durante e “último dianan” aki, e areglo di famia ta bou di atake pasobra, manera Beibel a profetisá, hende ta preokupá prinsipalmente ku plaka, plaser i nan mes interesnan. Pues, no ta nada straño anto ku yunan a bira “desobediente na mayornan, malagradesí, desleal, sin kariño natural.”—2 Timoteo 3:1-3, NW.

E ekspreshon “kariño natural” manera e ta pará den Beibel ta deskribí e amor ku mester eksistí entre miembronan di un famia. E amor aki ta un laso natural ku ta motivá mayornan pa mustra interes den nan yunan, i yunan pa pega na nan mayornan. Pero ora mayornan ta falta e kariño natural aki, e yunan lo bai buska apoyo emoshonal otro kaminda, por lo general serka nan pareunan. I probablemente nan lo adoptá e balornan i aktitutnan di nan pareunan. Pero hopi bes mayornan por evitá e situashon aki dor di laga prinsipionan di Beibel dirigí nan bida di famia.—Proverbionan 3:5, 6.

Famia Ta un Areglo di Dios

Despues ku Dios a uni Adam ku Eva komo esposo i esposa, el a duna nan e siguiente mandato: “Sea fruktífero i multipliká, i yena e tera.” Despues di esei, famia—tata, mama i yunan—a kuminsá eksistí. (Génesis 1:28; 5:3, 4; Efesionan 3:14, 15) Pa yuda hende lanta nan yunan, Yehova a pone ku di naturalesa mayornan ta kumpli ku sierto aspektonan básiko di kriamentu di yu. Pero hende no ta manera bestia. Nan tin mester di yudansa adishonal, p’esei Yehova a perkurá un guia skirbí pa nan. Parti di e guia aki ta konsistí di instrukshonnan riba asuntunan moral i spiritual, i riba dunamentu di disiplina apropiá.—Proverbionan 4:1-4.

Dirigiendo su mes spesialmente na tatanan, Dios a bisa: “E palabranan aki, ku mi ta ordená  bo awe, mester ta riba bo kurason. Siña nan ku tur diligensia na bo yunan, i papia di nan ora bo ta sinta den bo kas, ora bo ta kana riba kaminda, ora bo ta bai drumi i ora bo ta lanta.” (Deuteronomio 6:6, 7; Proverbionan 1:8, 9) Ripará ku mayornan mester a inkulká e lei di Dios den nan mes kurason promé. Pakiko esaki tabata importante? Pasobra e klase di siñansa ku en bèrdat ta motivá otro hende no ta loke ta sali simplemente for di boka sino for di kurason. Ta ora mayornan ta siña for di nan kurason so nan lo por alkansá e kurason di nan yunan. E mayornan ei lo sirbi tambe komo bon ehèmpel pa nan yunan, kendenan ta detektá hipokresia fásilmente.—Romanonan 2:21.

Beibel ta bisa mayornan kristian pa lanta nan yunan for di infansia den “e disiplina i instrukshon di Señor.” (Efesionan 6:4; 2 Timoteo 3:15) For di infansia? Sí! Un mama a bisa: “Tin biaha komo mayor nos no ta duna nos yunan e mérito ku nan meresé. Nos ta balotá nan kapasidat, siendo ku nan tiné. Komo mayornan nos mester probechá di e kapasidat aki.” Sí, mucha ta gusta siña, i ora nan haña instrukshon di mayornan ku ta adorá Dios, nan tambe lo siña stima. E yunan ei lo sinti nan sigur denter di e límitenan ku ser poné pa nan. P’esei, mayornan eksitoso ta hasi esfuerso pa bira kompañeronan amoroso di nan yunan, pa komuniká bon ku nan, siña nan ku pasenshi i a la bes ku firmesa, i krea un ambiente saludabel den kua nan yunan ta desaroyá bon. *

Protehá Boso Yunan

Den un karta dirigí na mayornan, un kabes di skol na Alemania a skirbi: “Mayornan stimá, nos ke animá boso pa enbolbé boso mes mas ku e kriamentu di boso yunan i pa no laga esaki pa televishon òf otro mucha riba kaya. De echo, ta boso tin e [responsabilidat] di yuda nan desaroyá nan personalidat.”

Un mayor ku ta laga su yu den man di televishon òf di otro mucha riba kaya, den un sentido, ta lagando e spiritu di mundu influensiá e kriansa di su yu. (Efesionan 2:1, 2) E spiritu di e mundu aki, ku ta kontra e spiritu di Dios, ta aktua manera un bientu fuerte ku ta hiba e simianan di pensamentu “terenal, bestial [i] demoniako” i sembra nan na abundansia den mente i kurason di hende naïf òf bobo. (Santiago 3:15, NW) E manera di pensa aki ku ta mes destruktivo ku mal yerba, ku tempu ta korumpí e kurason. Hesus a ilustrá e efekto di loke ta ser sembrá den kurason, bisando: “E bon hende, for di e bon tesoro di su kurason, ta saka loke ta bon; i e mal hende, for di e mal tesoro, ta saka loke ta malu; pasobra for di e abundansia di kurason su boka ta papia.” (Lukas 6:45) P’esei, Beibel ta animá nos: “Warda bo kurason riba tur kos, pasobra e ta e fuente di bida.”—Proverbionan 4:23.

Klaru ku mucha ta keda mucha, i algun ta kabesura i tin chèns di bira asta desobediente. (Génesis 8:21) Kiko mayornan por hasi? Beibel ta bisa: “Lokura ta mará den kurason di un mucha; bara di korekshon lo alehá esaki for di dje.” (Proverbionan 22:15) Algun hende ta mira esaki komo un trato severo ku a bai for di moda. En realidat Beibel ta kontra violensia i  tur klase di maltrato. Pero e palabra “bara,” ounke tin biaha e por enserá kastigu literal, ta representá e outoridat ku un mayor ta ehersé di un manera firme pero amoroso, motivá korektamente pa e interes ku e tin den e bienestar eterno di su yunan.—Hebreonan 12:7-11.

Disfrutá di Rekreo Huntu ku Boso Yunan

Ta un echo establesí ku pa un yu desaroyá bon, e tin ku hunga i dibertí. Mayornan sabí ta probechá di oportunidatnan pa reforsá e laso entre mayor ku yu dor di rekreá ku nan yunan ki ora ku ta posibel. Pues, mayornan no solamente por guia nan yunan den skohe e klase di rekreo korekto sino tambe mustra e yunan kuantu nan ta gusta di ta den nan kompania.

Un tata Testigu ta bisa ku hopi bes e tabata hunga bala ku su yu hòmber ora e yega kas for di trabou. Un mama ta kòrda ku e tabata gusta hunga spèl ku su yunan. Un yu muhé ku aworakí ta grandi kaba ta kòrda kon nan famia tabata gusta kore baiskel huntu. Tur e yunan aki ta adulto aworakí, pero e amor ku nan tin pa nan mayornan i pa Yehova ta mas fuerte ku nunka.

En bèrdat, mayornan ku ta mustra ku palabra i akshon ku nan ta stima nan yunan i ku nan ta gusta di ta den nan kompania ta hasi un impreshon profundo i hopi bes duradero riba nan. Por ehèmpel, hopi di e graduadonan di un klas di e Skol Bíbliko di Galaad di Watchtower a konta ku ta e ehèmpel i animashon di nan mayornan a lanta den nan e deseo pa drenta e sirbishi di tempu kompletu. Esta un herensia magnífiko pa e yunan i ki un bendishon pa e mayornan! Klaru ku no ta tur yu lo por drenta e sirbishi di tempu kompletu ora nan bira mas grandi, pero sin duda nan tur lo benefisiá di mayornan temeroso di Dios ku ta bira nan mihó amigu- i ehèmpelnan pa imitá. I nan lo sinti nan impulsá pa onra nan mayornan.—Proverbionan 22:6; Efesionan 6:2, 3.

Mayornan Soltero Por Tin Éksito

Awe, hopi mucha ta lanta den kasnan ku un mayor so. Ounke esaki ta hasi kriamentu di yu mas difísil, mayornan soltero por tin éksito. E ehèmpel bíbliko di Eunise, un hudiu kristian di promé siglo, ta un bon animashon pa nan. Eunise tabata kasá ku un hòmber ku no tabata kreyente i probablemente e no a risibí ningun apoyo spiritual for di dje. Apesar di esei, Eunise tabata un bon ehèmpel den e kriansa di Timoteo. E bon influensia ku tantu é komo Loida, wela di Timoteo, tabatin riba Timoteo for di esaki su infansia, a resultá di ta mas poderoso ku kualke influensia negativo ku Timoteo su pareunan lo por a ehersé riba dje.—Echonan 16:1, 2; 2 Timoteo 1:5; 3:15.

Awe hopi hóben ku a lanta ku un mayor no-kreyente òf den kas di un mayor soltero ta manifestá e mesun kualidatnan ekselente ku e hóben Timoteo tabatin. Por ehèmpel, Ryan, kende awor tin 22 aña di edat i kende ta un predikadó di tempu kompletu, a lanta den kas ku un mayor so huntu ku su ruman hòmber i ruman muhé mas grandi. Nan tata tabata un alkohóliko  i el a bai laga e famia tempu ku Ryan tabatin kuater aña. Ryan a bisa: “Mami tabata determiná pa nos famia a sigui sirbi Yehova, i el a pega na e determinashon ei ku henter su kurason.”

Ryan a kontinuá: “Por ehèmpel, mi mama a hasi sigur ku nos a asosiá ku mucha ku por tabatin un bon influensia riba nos. Nunka e tabata permití nos anda ku mucha ku Beibel ta deskribí komo mal asosiashon, ni pafó ni paden di e kongregashon. Ademas, el a inkulká den nos e punto di bista korekto di siñansa eskolar.” Ounke hopi bes Ryan su mama tabata okupá i tabata bini kas kansá for di trabou, esaki no a strob’é di mustra interes amoroso den su yunan. Ryan a bisa: “Semper e kier tabata huntu ku nos i papia ku nos. E tabata siña nos ku pasenshi pero na un manera firme, hasiendo su bèst pa garantisá ku komo famia nos tabatin un estudio di Beibel regularmente. E no tabata hasi wega ku prinsipionan di Beibel.”

Ora Ryan wak bèk riba su hubentut, e ta realisá ku e influensia humano di mas poderoso den su bida i den bida di su rumannan mas grandi tabata di un mayor ku en bèrdat a stima Dios i a stima su yunan. Pues boso komo mayornan kristian—sea kasá òf biuda, ku òf sin un kasá kreyente—no laga desanimashon ni kontratempu temporal stroba boso di sigui hasi esfuerso pa siña boso yunan. Por sosodé ku algun hóben, manera e yu pèrdí, ta bai for di e bèrdat. Pero ora nan mira kon bashí i kruel e mundu aki realmente ta, nan por bini bèk. Sí, “hende hustu ta sigui kana den nan integridat. Su yunan tras di dje ta felis.”—Proverbionan 20:7, NW; 23:24, 25; Lukas 15:11-24.

[Nota]

[Kuadro/Plachinan na página 11]

Dios A Skohe Hesus Su Mayornan

Ora Yehova a manda su Yu p’e nase komo un ser humano, el a skohe su mayornan kuidadosamente. Ta interesante pa nota ku Dios a skohe un pareha di kondishon humilde, ku inklinashon spiritual i ku no a malkriá Hesus sino ku a siñ’é e Palabra di Dios i e balor di traha duru i pa ser responsabel. (Proverbionan 29:21, NW; Lamentashon 3:27) Hosé a siña Hesus e fishi di karpinté, i sin duda tantu Hosé komo Maria a pidi Hesus, e primogénito, yuda nan kuida e otro yunan, kuanan tabata por lo ménos seis.—Marko 6:3.

Bo por imaginá bo kon Hosé su famia tabata prepará huntu den tempu di e pasku hudiu pa hasi nan biahe anual pa Yerusalèm—un biahe ida i buèlta di 200 kilometer den un tempu ku no tabatin e medionan di transporte manera tin awe. Sin duda, un famia di nuebe miembro òf mas lo mester tabata bon prepará pa hasi un biahe largu asina. (Lukas 2:39, 41) Apesar di e desafionan, kasi sigur Hosé ku Maria a balorá e okashonnan aki i a probechá di nan pa siña nan yunan tokante susesonan bíbliko di pasado.

Miéntras Hesus tabata na kas ainda, el a ‘keda sumiso na’ su mayornan, tur e tempu ei i a “krese den sabiduria i estatura, i den grasia serka Dios i hende.” (Lukas 2:51, 52) Sí, Hosé ku Maria a resultá di ta digno di Yehova su konfiansa. Esta un bon ehèmpel pa mayornan djawe!—Salmo 127:3.