Kon Bon Bo Ta Komuniká?

“KARTA di Amor di un Hende di 60 Aña.” Esei tabata e tema di un konkurso ku un banko na Hapon a tene algun aña pasá. E konkurso a animá haponesnan entre 50 pa 60 i piku aña, pa ekspresá “onestamente” loke nan ta sinti pa nan kasá. Un konkursante a skirbi na su esposa: “Podisé lo bo hari, pero lo duel mi si mi no bisa bo e kos aki. At’é ta bin na bos duru: Danki ku bo a kasa ku mi.”

Den vários kultura, inkluso algun na Oriente, nan ta deskurashá hende pa ekspresá nan sintimentunan libremente. Sin embargo, mas ku 15.000 hende a reakshoná riba e konkurso di karta di amor. E tabata asina popular ku nan a tene un di dos konkurso, i nan a publiká vários buki basá riba e kartanan ku a drenta. Esaki ta duna e idea ku tin hopi hende ku den e profundidat di nan kurason, ta anhelá pa ekspresá kiko nan ta sinti pa nan kasá stimá. Sin embargo, tin otro hende ku no ke ekspresá esei. Dikon nò? Muy probablemente pasobra ta rekerí un sierto esfuerso i abilidat pa laga otro hende—manera por ehèmpel bo kasá—komprondé kiko bo ta sinti.

Hitoshi Kato, kende a skirbi un buki tokante bahamentu ku penshon, a bisa ku serka parehanan di edat na Hapon, hopi biaha ta e esposanan ta kuminsá ku e trámitenan pa divorsio debí na renkor profundo ku nan a akumulá atraves di añanan. Anto Kato a agregá: “Pero esei tambe ta resultado di e echo ku e pareha no a ekspresá nan sintimentunan na otro ora ku nan tabata konfrontá krísis.”

Un esposo ku a baha ku penshon, kisas ta keda sorprendí ora ku su kasá lanta un dia entreg’é papel di divorsio. Pero kisas pa hopi aña e pareha no a papia tokante kiko nan ta  sinti pa otro. Podisé e esposo i esposa a purba ekspresá nan sintimentunan, pero nan no por a mantené e kòmbersashon na un nivel konstruktivo. En bes di desaroyá un relashon mas íntimo, nan tabata haña nan kada bes den pleitu ku otro.

Kon un esposo i esposa por trata ku nan desakuerdonan na un manera kalmu i komuniká nan sintimentunan den manera agradabel? Tal bes lo bo ta interesá pa sa ku bo ta haña e sugerensianan di mas práktiko, no den un buki resien skirbí pa un konsehero matrimonial, sino den un buki antiguo ku hende a apresiá pa siglonan, esta, Beibel.