Historia di Bida

Siñando Pakiko Dios Ta Permití Sufrimentu A Kambia Mi Bida

SEGUN E RELATO DI HARRY PELOYAN

Pakiko Dios ta permití sufrimentu? E pregunta ei a molestiá mi for di tempu ku mi tabata chikí. Mi mayornan tabata hende trahadó, onesto i interesá den e bienestar di nan famia. Pero mi tata no tabata religioso, i mi mama tabata djis un tiki asina interesá den religion. Pues, nan no por a duna mi un kontesta riba e pregunta ei.

MI A keda pensa riba e pregunta ei asta mas ainda durante i despues di Segundo Guera Mundial, tempu ku mi tabata den marina merikano pa tres aña. Despues ku guera a terminá, nan a asigná mi pa traha riba un barku ku nan a manda China pa entregá artíkulonan di yudansa. Mi a keda einan pa kasi un aña i a mira sufrimentu na gran eskala.

Chinesnan ta hende trahadó i inteligente. Pero hopi di nan tabata pasando hopi miseria debí na pobresa i tambe debí na e violensia ku Segundo Guera Mundial a kousa. Loke foral tabata konmové mi tabata e muchanan lif ku tabata pidi nos limosna ora nos baha for di barku. Hopi di nan tabata tur desnutrí i bistí ku paña kibrá.

Dikon Hende Ta Sufri?

Mi a nase na aña 1925 i a lanta na California, Merka. Nunka den mi bida mi a mira kondishonnan manera esnan na China. P’esei bes tras bes mi tabata puntra mi mes: ‘Si tin un Kreadó todopoderoso, dikon e ta permití e tipo di kondishonnan aki afligí asina tantu hende, foral muchanan inosente?’

 Tambe mi tabata puntra mi mes dikon Dios, si di bèrdat e ta eksistí, a permití asina tantu destrukshon, asesinato masal, morto i sufrimentu, manera loke a afligí humanidat atraves di siglonan, spesialmente durante Segundo Guera Mundial ora ku mas ku 50 mion hende a pèrdè nan bida. Ademas, durante henter e guera ei, dikon hende di e mesun religion, stimulá dor di nan klero, a mata otro djis pasobra nan tabata di otro nashonalidat?

E Teleskop

Ora ku Segundo Guera Mundial a kuminsá na 1939 i un gran kantidat di hende rònt mundu tabata ser matá, mi a sinti ku no por tin un Dios. Anto a sosodé ku pa un lès di natuurkunde na skol sekundario, nos kada un den klas mester a konstruí algu di karakter sientífiko. Komo ku mi tabata interesá den astronomia, mi a kuminsá traha un teleskop grandi ku a usa un spil di 20 centimeter di diameter.

Pa traha e teleskop reflektor aki, mi a kumpra un pida glas di mas ku 2,5 centimeter diki i 20 centimeter hanchu, anto ku un hèrmènt di kòrta glas mi a hasié rondó. Kaba mi a kuminsá ku e tarea pisá di skür e na man pa hasié un spil hòl. Esei a tuma tur mi tempu liber durante henter un semèster. Ora ku mi a kaba ku e spil, mi a peg’é na un tubu largu di metal i a ekipá e teleskop ku vários lèns di diferente potensia.

Un anochi ku shelu no tabatin nubia ni luna, mi a hiba mi teleskop pafó pa promé biaha i mi por a opservá e streanan i planetanan di nos sistema solar. Mi a keda babuká kuantu strea, planeta i luna tabatin i kon bon organisá tur kos tabata. Anto despues, ora ku mi a haña sa ku algun kos ku mi a kere ku tabata “strea,” de echo tabata galaksianan meskos ku nos Via Láktea (Melkweg), i ku kada un tabatin míles di miónes di strea, mi a keda mas babuká ainda.

Mi a pensa e ora ei: ‘Definitivamente, tur esaki no por a bin di su mes. Nada ku ta organisá no ta sosodé pa kasualidat. E universo ta asina bon organisá ku ta parse komo si fuera ta un genio a trah’é. Ta posibel ku tòg ta eksistí un Dios?’ E eksperensia ku e teleskop a pone mi kita un tiki for di e kreensia firme ku mi tabatin ku Dios no ta eksistí.

E ora ei mi a kuminsá puntra mi mes: ‘Si di bèrdat tin un Dios sufisiente poderoso i sabí pa krea e universo asombroso aki, lo e no por korigí e situashon lamentabel ku tin riba tera? Dikon e ta permití tur e miseria aki mes?’ Ora mi tabata hasi hende religioso e preguntanan ei, nan no por a duna mi kontestanan satisfaktorio.

 Ora ku mi a kaba skol sekundario mi a bai universidat pa algun aña, despues mi a drenta marina merikano. Sin embargo, e kapelannan den ehérsito tampoko no por a ègt kontestá mi preguntanan. Masha hopi biaha, hende religioso tabata bisa mi: “Señor ta obra den formanan misterioso.”

Mi Búskeda Ta Sigui

Despues ku mi a bandoná China, e preguntanan ku mi tabatin tokante pakiko Dios ta permití sufrimentu a keda molestiá mi. Mi no por a saka nan for di mi mente, foral ora ku mi a mira santananan militar riba vários di e islanan den Oséano Pasífiko unda nos a mara riba kaminda pa bai kas bèk. Kasi tur e grafnan tabata di hòmbernan hóben ku a muri den flor di nan hubentut.

Ora mi a yega bèk na Merka i mi a terminá mi servisio den marina, mi mester a kaba un aña di skol na Universidat di Harvard na Cambridge, Massachusetts. Mi a gradua despues di e aña ei i a haña mi título, pero mi no a bai kas na California. Mi a disidí di keda na parti ost di Merka pa un tempu pa purba wak si mi ta haña kontesta riba mi preguntanan. Mi a skohe pa bai New York City, kaminda tabatin hopi religion, ya mi por a asistí na algun sirbishi religioso pa wak kiko nan tabata siña.

Na New York, mi tanta Isabel Kapigian, a invitá mi bin keda na su kas. E ku su dos yu muhénan, Rose ku Ruth, tabata Testigu di Yehova. Komo ku mi a pensa ku lo mi no ta interesá den nan kreensianan, mi a kuminsá asistí na e sirbishinan di otro religionnan, papiando ku vários hende i lesando nan literatura. Mi tabata puntra nan pakiko Dios ta permití sufrimentu, pero nan tampoko no tabata sa e kontesta. Mi a konkluí ku podisé tòg Dios no ta eksistí.

Mi Ta Haña Kontesta

E ora ei mi a pidi mi tanta ku su yu muhénan si mi tabatin mag di lesa algun di nan literatura pa mi sa e punto di bista di Testigunan di Yehova. Ora mi a lesa e publikashonnan, mi a ripará mesora ku e Testigunan tabata hopi distinto for di otro religionnan. E kontestanan a bin for di Beibel i a duna mi un gran satisfakshon. Den un korto tempu, mi a  haña kontesta riba mi preguntanan tokante pakiko Dios ta permití sufrimentu.

Pero esei no tabata tur kos, mi por a mira ku Testigunan di Yehova tabata apoyá nan kontestanan basá riba Beibel dor di biba na armonia ku nan kreensianan. Por ehèmpel, mi a puntra mi tanta kiko mucha hòmbernan Testigu di Yehova a hasi na Alemania durante Segundo Guera Mundial. Akaso nan a drenta servisio militar na Alemania, nan a bisa “Heil Hitler!,” i a saludá e bandera suástika? Su kontesta tabata nò, nan no a hasi esei. Anto debí na nan posishon neutral nan a ser mandá kampo di konsentrashon, kaminda hopi di nan a ser asesiná. El a splika ku durante e guera e posishon di Testigunan di Yehova na tur parti tabata meskos: nan a keda neutral. Asta den paisnan demokrátiko, nan a enkarselá mucha hòmbernan Testigu di Yehova pa nan posishon neutral.

Mi tanta e ora ei a pidi mi lesa Juan 13:35, ku ta bisa: “Na esaki tur hende lo sa ku boso ta mi disipel, si boso tin amor un pa otro.” Den tur nashon kaminda kristiannan berdadero ta biba nan mester tin e amor ei komo nan marka di identifikashon. Nunka lo bo no haña nan ta bringa na bandanan kontrario den e mesun guera, matando otro pasobra nan ta di otro nashonalidat! El a puntra mi: “Bo por imaginá Hesus ku su disipelnan na banda kontrario di otro durante e gueranan di Roma, ta mata otro?”

Tambe el a pidi mi lesa 1 Juan 3:10-12. E ta bisa: “Na esaki e yunan di Dios i e yunan di Diabel ta konosí: esun ku no ta praktiká hustisia no ta di Dios, ni esun ku no ta stima su ruman. . . . Nos mester stima otro; no manera Kain, kende tabata di e malbado, i a mata su ruman.”

Beibel ta masha kla. Kristiannan berdadero ta stima otro, sin importá den kua nashon nan ta biba. Pues, nunka lo bo no haña nan ta mata nan propio rumannan spiritual ni tampoko ningun otro persona. Ta p’esei Hesus por a bisa di su siguidónan: ‘Nan no ta parti di mundu, meskos ku ami no ta parti di mundu.’—Juan 17:16.

Pakiko Dios Ta Permití Sufrimentu

No a tarda hopi ku mi a haña sa ku Beibel ta konta nos pakiko Dios a permití sufrimentu. Beibel ta splika ku ora Dios a krea nos promé mayornan, el a traha nan perfekto i a pone nan den un hòfi manera un paradeis. (Génesis 1:26; 2:15) Tambe el a duna nan un regalo masha deseabel: boluntat liber. Pero nan tabatin ku usa e boluntat liber ei na un manera responsabel. Si nan a obedesé Dios i su leinan, nan lo a sigui biba den perfekshon den un paradeis. Nan lo a ekstendé e paradeis ei te ora ku el a abarká henter e tera. Nan yunan tambe lo tabata perfekto, di manera ku e tera aki ku tempu lo a bira un paradeis glorioso poblá ku hende perfekto i felis.—Génesis 1:28.

Sin embargo, si Adam ku Eva lo a skohe pa sigui nan mes kaminda, independiente di Dios, anto Dios lo no a laga nan sigui biba komo hende perfekto. (Génesis 2:16, 17) Desafortunadamente pa humanidat, nos promé mayornan a hasi mal uso di nan boluntat liber i a skohe pa ta independiente di Dios. Un kriatura spiritual rebelde, ku a bira konosí komo Satanas e Diabel, a enkurashá nan pa hasi esei. E angel ei kier tabata independiente di Dios i a kudishá e adorashon ku debidamente ta pertenesé na Dios so.—Génesis 3:1-19; Revelashon 4:11.

 Pues Satanas a bira “e dios di e mundu aki.” (2 Korintionan 4:4) Beibel ta deklará: “Henter mundu ta bou di kontròl di e malbado.” (1 Juan 5:19) Hesus a yama Satanas e gobernante òf “prens di e mundu.” (Juan 14:30) E desobedensia di Satanas i di nos promé mayornan a trese imperfekshon, violensia, morto, tristesa i sufrimentu pa henter humanidat.—Romanonan 5:12.

“No Ta Keda na Hende”

Pa laga hende mira kon lo a bai ku e famia humano ora nan ignorá e leinan di e Kreadó, Dios a permití hende eksperensiá durante míles di aña e konsekuensianan di ignorá su leinan. E periodo di tempu aki a duna henter humanidat sufisiente chèns pa mira e bèrdat di loke Beibel ta bisa: “E kaminda di hende no ta di dje mes; tampoko no ta keda na hende pa dirigí su pasonan. Korigí mi, o SEÑOR.”—Jeremias 10:23, 24.

Awor, despues di tur e siglonan aki, nos por mira ku gobernashon independiente di Dios a resultá den un desaster. Pues, Dios su propósito ta pa no laga hende sigui mas ku e eksperimento desastroso aki di goberná nan mes independientemente for di dje i su leinan.

Un Futuro Maravioso

Profesia bíbliko ta mustra ku djis aki Dios lo trese un fin na e sistema di kosnan kruel i feros aki: “Aki poko tempu e malbado lo no t’ei mas . . . Ma e humildenan lo heredá e tera, i lo deleitá nan mes den pas abundante.”—Salmo 37:10, 11.

Un profesia na Daniel 2:44 ta deklará: “Den e dianan di e reinan ei [tur forma di gobernashon ku ta eksistí awe] e Dios di shelu lo lanta un reino ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan aki, ma e mes lo dura pa semper.” Nunka mas Dios lo permití hende goberná. Henter e tera lo ta bou di mando di e Reino di Dios. Bou di atministrashon di e Reino ei, henter e tera lo keda transformá den un paradeis i humanidat gradualmente lo bira perfekto pa biba pa semper den felisidat. Beibel ta primintí: “[Dios] lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló.” (Revelashon 21:4) Ki un futuro maravioso Dios tin prepará pa nos!

Un Bida Diferente

Hañando kontesta satisfaktorio riba mi preguntanan a kambia mi bida. Djei padilanti, mi kier a sirbi Dios i yuda otro hende tambe komprondé pakiko Dios ta permití sufrimentu. Mi a komprondé e seriedat di loke 1 Juan 2:17 ta bisa: “E mundu [e aktual sistema di kosnan goberná pa Satanas] ta pasa bai i su deseonan tambe, ma esun ku hasi e boluntat di Dios ta permanesé pa semper.” Mi tabatin masha gana di haña bida eterno den Dios su mundu nobo. Mi a disidí di keda New York i a kuminsá asosiá ku e kongregashon di Testigunan di Yehova einan. Mi tabatin hopi eksperensia agradabel segun ku mi a yuda otro hende siña loke ami a siña.

Na 1949 mi a topa Rose Marie Lewis. E ku su mama Sadie, i su seis ruman muhénan tur tabata Testigu di Yehova. Rose tabata sirbi Dios fultaim den e trabou di prediká. E tabatin hopi kualidat bon, i mi a ser atraí na dje mesora. Nos a kasa na yüni 1950 i a keda New York. Nos tabata felis ku loke nos tabata hasi i a alegrá den e speransa di biba pa semper den Dios su mundu nobo.

Na 1957, ami ku Rose Marie a haña e invitashon pa sirbi fultaim na e sede mundial di Testigunan di Yehova na Brooklyn, New York.  Na yüni 2004 nos tabata felismente kasá pa 54 aña, di kua 47 aña na e sede na Brooklyn. Nan tabata añanan bendishoná, sirbiendo Yehova i trahando huntu ku míles di ruman den fe.

Mi Pió Sufrimentu

Lamentablemente, na prinsipio di desèmber 2004, dòkternan a diagnostiká un tumor kanseroso na un di e pulmonnan di Rose Marie. Nan a konfirmá ku e tumor aki tabata krese lihé i ku mester sak’é. Mas lat den desèmber nan a hasi e operashon, i mas o ménos un siman despues, e siruhano a drenta Rose su kamber na hospital ora ku mi tabata einan i a bisa: “Rose Marie, bai kas! Bo ta kurá!”

Sin embargo, apénas un par di dia despues ku Rose Marie a bin kas, el a kuminsá haña doló fuerte den su stoma i na otro parti di su kurpa. E dolónan aki a persistí, i e mester a bai hospital bèk pa hasi mas tèst. Dòkternan a deskubrí ku pa un motibu òf otro, vários di su órganonan importante tabata produsí klòmpi di sanger ku tabata stroba e órganonan ei di haña e oksígeno nesesario. E dòkternan a hasi tur loke tabata humanamente posibel pa kontrarestá esaki, pero sin éksito. Apénas un par di siman despues, dia 30 di yanüari 2005, mi a sufri e gòlpi di mas duru den mi bida. Mi Rose Marie stimá a muri.

E tempu ei mi tabatin kasi 80 aña i a mira hende sufri henter mi bida, pero esaki tabata otro. Ami ku Rose Marie tabata, manera Beibel ta bisa, “ún karni.” (Génesis 2:24) Mi a yega di mira e sufrimentu di otro hende i mi mes tambe a sufri ora ku amigu- i famianan a muri. Pero e sufrimentu ku mi a eksperensiá ora ku mi kasá a muri tabata hopi mas intenso i a dura mas largu. Awor mi ta realisá ki gran tristesa e morto di sernan kerí a kousa e famia humano pa asina tantu tempu.

Sin embargo, mi komprondementu di e orígen di sufrimentu i kon lo e yega na un fin, ta loke a yuda mi ku tristesa no a aplastá mi. Salmo 34:18 ta bisa: “[Yehova] ta serka di e hende di kurason kibrá, i ta salba esnan di spiritu abatí.” Un faktor fundamental pa soportá e sufrimentu aki ta di sa ku Beibel ta siña nos ku lo tin un resurekshon, ku hende den graf lo sali i haña e oportunidat di biba pa semper den Dios su mundu nobo. Echonan 24:15 ta bisa: “Lo tin un resurekshon di tantu e hustunan komo e malbadonan.” Rose Marie a stima Dios masha hopi. Mi tin sigur ku Dios tambe a stim’é masha hopi i ku lo e kòrda riba dje i lo resusit’é na su debido tempu, lokual mi ta spera ta djis aki.—Lukas 20:38; Juan 11:25.

Miéntras ku e tristesa pa e morto di un ser kerí ta grandi, e goso di risibí un ser kerí bèk mediante e resurekshon lo ta mas grandi ainda. (Marko 5:42, NW) E Palabra di Dios ta primintí: “Bo mortonan lo biba . . . Tera lo duna lus na su mortonan.” (Isaias 26:19) Hopi persona ku ta entre “e hustunan” menshoná na Echonan 24:15 probablemente lo ser resusitá for di trempan. Ki un tempu maravioso esei lo ta! I Rose Marie lo ta entre esnan ku ta bin bèk. Lo e haña ke se yama un bonbiní serka su sernan kerí! Ki dushi lo ta e tempu ei pa biba den un mundu sin sufrimentu!

[Plachinan na página 9]

Mi a mira hopi sufrimentu tempu ku mi tabata stashoná na China

[Plachinan na página 10]

For di 1957, mi ta sirbiendo na e sede di Testigunan di Yehova na Brooklyn

[Plachi na página 12]

Mi a kasa ku Rose Marie na 1950

[Plachi na página 13]

Dia nos a hasi 50 aña kasá na aña 2000