“O Kuantu Mi Ta Stima Bo ‵Lei!”

“O kuantu mi ta stima bo lei! E ta mi meditashon henter dia.”—SALMO 119:97.

1, 2. (a) Ki situashon e eskritor inspirá di Salmo 119 a konfrontá? (b) Kon el a reakshoná, i dikon?

E ESKRITOR di Salmo 119 a konfrontá un prueba severo. Enemigunan arogante ku no tabata hasi kaso di Dios su lei tabata hasi bofon di e salmista i a saka mentira kontra dje. Prensnan tabata konsultá huntu kontra dje i a persiguié. E malbadonan a rondon’é, i asta su bida tabata na peliger. Tur esaki a pon’é “yora di tristesa.” (Salmo 119:9, 23, 28, 51, 61, 69, 85, 87, 161) Apesar di tur e difikultatnan aki, e salmista a kanta: “O kuantu mi ta stima bo lei! E ta mi meditashon henter dia.”—Salmo 119:97.

² Lo ta bon pa nos puntra nos mes: “Kon e lei di Dios por tabata un fuente di konsuelo pa e salmista?” Wèl, e loke ku a sosten’é tabata su konfiansa ku Yehova ta interesá den dje. E echo ku e salmista tabata familiarisá ku e areglonan amoroso di e lei ei, a hasié felis apesar di e difikultatnan ku opositornan a kous’é. El a rekonosé ku Yehova a trata bondadosamente kuné. Es mas, komo ku el a apliká e guia ku a bin di Dios su lei, esei a hasié mas sabí ku su enemigunan i asta a manten’é na bida. Obedensia na e lei a dun’é pas i un bon konsenshi.—Salmo 119:1, 9, 65, 93, 98, 165.

3. Dikon ta un reto pa kristiannan biba di akuerdo ku e normanan di Dios awe?

³ Algun sirbidó di Dios djawe tambe ta pasando den pruebanan pisá di nan fe. Kisas nos no ta konfrontando un krísis ku ta menasá nos bida manera tabata e kaso ku e salmista, pero sí nos ta biba den “tempunan trabahoso.” Hopi hende ku nos ta den kontakto kuné diariamente, no tin rèspèt pa loke ta bon òf malu desde e punto di bista di Dios; nan metanan ta materialista i ta enfoká solamente riba nan mes, nan aktitut ta arogante i sin rèspèt. (2 Timoteo 3:1-5) Kristiannan hóben ku regularidat ta konfrontá situashonnan ku ta forma un menasa pa nan normanan moral. Den un ambiente asina, kisas ta difísil pa mantené nos amor pa Yehova i pa loke ta korekto. Kon nos por protehá nos mes?

4. Kon e salmista a mustra apresio pa e lei di Dios, i akaso kristiannan mester hasi meskos?

⁴ Loke a yuda e salmista resistí e preshonnan ku el a konfrontá, tabata e echo ku el a dediká tempu na studia e lei di Dios i meditá ku apresio riba dje. Asina el a bin kultivá un amor pa Dios su lei. De echo, kasi tur versíkulo di Salmo 119 ta menshoná un òf otro faseta di e lei di Yehova. * Awe kristiannan no ta mará na e Lei di Moisés ku Dios a duna e antiguo nashon di Israel. (Kolosensenan 2:14) Sin embargo, e prinsipionan ekspresá den e Lei ei te ainda ta di gran balor. E prinsipionan aki tabata un konsuelo pa e salmista, meskos ku nan por ta un konsuelo pa Dios su sirbidónan ku ta luchando pa trata ku e difikultatnan di bida djawendia.

5. Ki aspektonan di e Lei di Moisés nos ta bai konsiderá?

⁵ Laga nos wak ki animashon nos por saka for di solamente tres aspekto di e Lei di Moisés:  e areglo di sabat, e areglo pa laga hende pober piki loke a resta di kosecha i e mandamentu pa no kudishá. Den kada kaso, nos lo ripará ku si nos ke superá e difikultatnan i preshonnan ku ta karakterisá nos tempu, ta importante pa nos komprondé e prinsipionan ku ta e base di e leinan aki.

Satisfasé Nos Nesesidat Spiritual

6. Menshoná e nesesidatnan fundamental ku tur hende tin.

⁶ Dios a krea hende ku e nesesidat di vários kos esensial. Por ehèmpel, kuminda, kos di bebe i un dak riba su kabes, ta kosnan esensial pa un persona keda ku un bon salú físiko. Sin embargo, un hende tin ku perkurá tambe pa su “nesesidat spiritual.” Lo e no ta realmente felis a ménos ku e hasi esei. (Mateo 5:3, NW) Yehova a haña ku ta asina fundamental pa hende satisfasé e nesesidat aki ku nan ta nase kuné, ku el a manda su pueblo interumpí un biaha pa siman nan aktividatnan normal durante henter un dia afin di duna atenshon na asuntunan spiritual, es desir, na kosnan relashoná ku nan adorashon di Dios.

7, 8. (a) Kon Dios a hasi un distinshon entre sabat i otro dianan? (b) Kiko tabata e propósito di sabat?

⁷ E areglo di sabat a enfatisá e importansia di aktividatnan spiritual, esta, pa hende dediká tempu na mehorá nan relashon ku Dios. E promé biaha ku e palabra “sabat” ta aparesé den Beibel ta en konekshon ku e perkurashon di mana den desierto. E israelitanan a haña instrukshon pa rekohé e pan milagroso aki durante seis dia. Riba e di seis dia, nan mester a rekohé “pan pa dos dia,” pasobra riba e di shete dia nan lo no a haña mana. E di shete dia lo tabata “un sabat santu na SEÑOR.” Durante e dia ei kada hende lo mester a keda sinta na su lugá. (Eksodo 16:13-30) Un di e Dies Mandamentunan a bisa ku no tabatin mag di hasi ningun trabou riba e dia di sabat. E dia ei tabata sagrado. E kastigu pa esun ku no a kumpli kuné tabata morto.—Eksodo 20:8-11; Numbernan 15:32-36.

⁸ E lei di sabat a demostrá Yehova su interes pa tantu e bienestar físiko komo spiritual di su pueblo. Hesus a bisa: “Sabat ta poní pa hende.” (Marko 2:27) E sabat no solamente a permití e israelitanan sosegá sino tambe a duna nan e oportunidat di hala mas serka di nan Kreadó i demostrá nan amor p’e. (Deuteronomio 5:12) Esei tabata un dia dediká eksklusivamente na interesnan spiritual. Esei a enserá rindi adorashon komo famia, hasi orashon i meditá riba e Lei di Dios. E areglo a sirbi pa protehá e israelitanan pa nan no bai dediká tur nan tempu i energia na metanan materialista. E sabat a rekordá nan ku nan relashon ku Yehova tabata e kos di mas importante den nan bida. Hesus a enfatisá e prinsipio inkambiabel ei ora el a bisa: “Ta pará skirbí: ‘Hende lo no biba di pan so, ma di tur palabra ku ta sali for di boka di Dios.’”—Mateo 4:4.

9. Ki lès e areglo di sabat ta siña kristiannan?

⁹ Dios no ta rekerí mas di su pueblo pa  nan tene un dia literal di 24 ora komo sosiegu di sabat. Pero e areglo di sabat no a keda komo djis un punto di interes históriko. (Kolosensenan 2:16) Akaso e no ta un rekordatorio ku nos tambe tin ku duna prioridat na aktividatnan spiritual? Preokupashonnan material i aktividatnan di rekreo no mester tin mas peso ku aktividatnan relashoná ku nos adorashon. (Hebreonan 4:9, 10) P’esei nos lo por puntra nos mes: “Kiko ta na promé lugá den mi bida? Mi ta dunando prioridat na studia e Palabra di Dios, na hasi orashon, na asistí na reunionnan kristian i na prediká e bon nobo di e Reino? Òf tin otro interesnan ku ta kita tempu for di e aktividatnan ei?” Si nos ta pone asuntunan spiritual na promé lugá den nos bida, Yehova ta sigurá nos ku nos lo no keda sin e nesesidatnan di bida.—Mateo 6:24-33.

10. Kon nos por benefisiá di dediká tempu na asuntunan spiritual?

¹⁰ E tempu ku nos ta dediká na studia Beibel i publikashonnan bíbliko, i tambe na pensa profundamente riba nan mensahe, por yuda nos hala mas serka di Yehova. (Santiago 4:8) Susan, ku un 40 aña pasá a kuminsá apartá tempu pa studia Beibel riba un base regular, ta atmití ku na promé instante e no tabata disfrutá di hasi esaki. Tabata un tarea pisá. Pero mas el a lesa, mas el a kuminsá gusta esei. Awor e ta sinti realmente falta di su estudio personal si pa un motibu òf otro e no por hasié. El a bisa: “Studiamentu a siña mi konosé Yehova i mir’é komo un Tata. Mi por konfi’é, stèns riba dje, i aserk’é libremente den orashon. Ta impreshonante pa mira kuantu Yehova ta stima su sirbidónan, kon e ta perkurá pa mi personalmente i kon el a yuda mi.” Ki un gran goso nos tambe por haña dor di satisfasé nos nesesidatnan spiritual regularmente!

Dios Su Lei Tokante Pikimentu di Loke A Resta di Kosecha

11. Kon e areglo di piki loke a resta di kosecha a funshoná?

¹¹ Un di dos aspekto di e Lei di Moisés ku a reflehá Dios su interes profundo den e bienestar di su pueblo tabata e derecho di piki loke a resta di kosecha. Yehova a duna òrdu pa ora un kunukero israelita kosechá e produktonan di su kunuku, e mester a permití hende pober rekohé loke e kosechadónan a laga atras. Kunukeronan no tabatin mag di kosechá e rant di nan kunuku kompletamente, ni nan no tabatin mag di rekohé wendrùif ni oleifi ku a keda atras. Nan no tabatin mag di bai kue bòshi di trigu ku nan a lubidá den kunuku. Esaki tabata un areglo amoroso na fabor di hende pober, habitantenan stranhero, huérfanonan i biudanan. Ta bèrdat ku pa piki loke a resta di kosecha hende pober mester a traha duru, sin embargo hasiendo esei nan a evitá di tin ku kana pidi limosna.—Levítiko 19:9, 10; Deuteronomio 24:19-22; Salmo 37:25.

12. Ki oportunidat e areglo di laga hende pober piki loke a resta di kosecha a duna e kunukeronan?

¹² E lei ku a permití hende pober piki loke a resta di kosecha no a stipulá kuantu produkto e kunukeronan mester a laga atras pa esnan den nesesidat. A keda na e kunukero pa disidí si ta un rant smal òf hanchu di su kunuku e ta laga ku trigu sin kosechá. Esaki a siña e kunukeronan pa ta generoso. E areglo aki a duna nan e oportunidat di demostrá nan apresio pa Yehova, Esun ku a perkurá e kosecha, ya komo ku ‘esun ku tene miserikòrdia di esun den nesesidat ta onra Esun ku a trah’é.’ (Proverbionan 14:31) Boaz tabata un kunukero ku a hasi esei. Bondadosamente el a sòru pa Ruth por a rekohé un bon kantidat di trigu. E biuda aki tabata piki loke a resta di kosecha riba Boaz su tereno. Yehova a rekompensá Boaz rikamente pa su generosidat.—Ruth 2:15, 16; 4:21, 22; Proverbionan 19:17.

13. Kiko e antiguo lei tokante laga hende pober piki loke a resta di kosecha ta siña nos?

¹³ E prinsipio ku ta e base di e lei tokante laga hende pober piki loke a resta di kosecha no a kambia. Yehova ta ferwagt di su sirbidónan ku nan ta generoso, foral pa ku hende den nesesidat.  Mas generoso nos ta, mas grandi nos bendishonnan lo ta. Hesus a bisa: “Duna, i lo wòrdu duná na boso: un midí bon yená, bon primí, bon sagudí, ku ta basha over, nan lo drama den boso skochi. Pasobra ku e mesun midí ku boso midi kuné lo wòrdu midí bèk pa boso.”—Lukas 6:38.

14, 15. Kon nos por demostrá generosidat, i ku ki posibel benefisionan tantu pa nos mes komo pa esnan ku nos ta yuda?

¹⁴ Apòstel Pablo a rekomendá pa nos “hasi bon na tur hende, i spesialmente na esnan ku ta di e famia di fe.” (Galationan 6:10) Pues, ki ora ku nos rumannan kristian ta konfrontá prueba di nan fe, nos siguramente mester ta masha interesá pa nan haña yudansa spiritual. Pero akaso nan lo tin mester di yudansa práktiko tambe, por ehèmpel, pa yega Salòn di Reino òf pa bai supermerkado? Den bo kongregashon tin rumannan di edat avansá, rumannan enfermo òf rumannan ku no por sali for di kas, kendenan lo apresiá un bishita di animashon òf pa bo duna nan un man? Si nos ta hasi esfuerso pa ta mas konsiente di tal nesesidatnan, e ora ei Yehova lo por usa nos pa kontestá e orashonnan di un persona den nesesidat. Ounke kuida otro ta un obligashon kristian, esun ku ta rindi yudansa tambe ta benefisiá for di esei. Mustrando berdadero amor na rumannan den fe ta resultá den gran goso i profundo satisfakshon, i e ta pone nos haña Yehova su aprobashon.—Proverbionan 15:29.

¹⁵ Un otro manera importante den kua kristiannan ta demostrá ku nan no ta egoista ta ora nan ta usa nan tempu i energia pa papia tokante e propósitonan di Dios. (Mateo 28:19, 20) Ken ku tabatin e goso di yuda un otro persona yega na e punto di dediká su bida na Yehova, sa ku e palabranan aki di Hesus ta bèrdat: “Ta mas bendishoná pa duna ku pa risibí.”—Echonan 20:35.

Tene Kuidou ku Kudishi

16, 17. Kiko e di dies mandamentu a prohibí, i dikon?

¹⁶ E di tres aspekto di Dios su Lei pa Israel ku nos ta bai konsiderá ta e di dies mandamentu ku a taha hende di kudishá. E Lei a deklará: “No kudishá kas di bo próhimo; no kudishá esposa di bo próhimo, ni su sirbidó hòmber, ni su sirbidó muhé, ni su buey, ni su buriku, ni nada ku ta pertenesé na bo próhimo.” (Eksodo  20:17) Ningun ser humano lo por a sòru pa hende obedesé un mandamentu asina, ya ku ningun hende no por lesa kurason. Sin embargo, e mandamentu ei a elevá e Lei na un nivel mas haltu ku hende su sistema hudisial. El a hasi kada israelita konsiente di e echo ku e tabatin ku rindi kuenta direktamente na Yehova, esun ku sí por lesa e inklinashonnan di e kurason. (1 Samuel 16:7) Es mas, e mandamentu aki a yega na e kousa fundamental di hopi akto ilegal.—Santiago 1:14.

¹⁷ E lei ku a taha Dios su pueblo di kudishá, a stimulá nan pa evitá materialismo, golosidat i di keha tokante nan situashon den bida. Tambe e lei a protehá nan di e tentashon pa kometé ladronisia òf inmoralidat. Semper lo tin hende ku tin propiedatnan material ku nos ta atmirá òf kendenan den un manera òf otro ta parse mas eksitoso ku nos. Si nos no dominá nos pensamentu den situashonnan asina, nos lo por bira infelis i kuminsá envidiá otro hende. Beibel ta menshoná kudishi komo un di e manifestashonnan di “un estado mental desaprobá.” Ta kumbiní nos pa no kudishá.—Romanonan 1:28-30, NW.

18. Ki mentalidat ta reina den mundu awe, i ki efektonan negativo e por produsí?

¹⁸ E mentalidat ku ta reina den mundu awe ta promové materialismo i kompetensia. Pa medio di propaganda, komersio ta stimulá e deseo pa produktonan nobo i hopi bes ta transmití e idea ku nos lo no ta felis a ménos ku nos optené e produktonan nobo aki. Esei ta presis e tipo di mentalidat ku e Lei di Yehova a kondená. Un otro aktitut similar ku tambe e lei di Yehova a kondená ta e deseo di bai dilanti den bida kueste loke kueste i akumulá rikesa. Apòstel Pablo a spièrta: “Esnan ku kier bira riku ta kai den tentashon i den trampa i den hopi deseonan loko i dañino, kualnan ta hundi hende den ruina i destrukshon. Pasobra amor pa plaka ta rais di tur sorto di maldat, i algun hende, dor di deseá esaki, a desviá for di e fe, i a traspasá nan mes ku hopi doló.”—1 Timoteo 6:9, 10.

19, 20. (a) Pa hende ku stima e lei di Yehova, kiko ta e kosnan ku ta realmente balioso? (b) Kiko lo ta e tópiko di e siguiente artíkulo?

¹⁹ E personanan ku ta stima Dios su lei ta komprondé e peligernan di un aktitut materialista i ta ser protehá kontra esei. E salmista por ehèmpel, a pidi Yehova den orashon: “Inkliná mi kurason na bo testimonionan, i no na ganashi desonesto. E lei di bo boka ta mihó pa mi ku míles di pida oro i plata.” (Salmo 119:36, 72) Si nos ta konvensí ku e palabranan aki ta bèrdat, esei lo yuda nos mantené e balansa nesesario pa evitá e trampa di materialismo, di golosidat i di ta mal kontentu ku nos situashon den bida. Ta “deboshon na Dios,” no akumulashon di propiedat, ta e yabi pa alkansá e ganashi di mas grandi ku tin.—1 Timoteo 6:6, NW.

²⁰ E prinsipionan ku ta e base di e Lei ku Yehova a duna e antiguo nashon di Israel ta mesun balioso den nos tempu trabahoso ku nan tabata ora ku Yehova a duna e Lei ei na Moisés. Mas nos apliká e prinsipionan aki den nos bida, mas nos lo komprondé nan, mas nos lo stima nan i mas felis nos lo ta. E Lei ta kontené hopi lès balioso pa nos, i nos ta haña bon rekordatorio di nan balor dor di analisá e bida i eksperensianan di personahenan bíbliko. Den e siguiente artíkulo nos lo konsiderá algun di nan.

[Nota]

Kon Lo Bo Kontestá?

• Dikon e eskritor di Salmo 119 a stima e lei di Yehova?

• Kiko kristiannan por siña for di e areglo di sabat?

• Ki balor duradero Dios su lei tokante pikimentu di loke a resta di kosecha tabatin?

• Kon e mandamentu pa no kudishá ta protehá nos?

[Preguntanan di Estudio]

[Plachi na página 21]

Kiko e lei di sabat a enfatisá?

[Plachi na página 23]

Kiko e lei tokante pikimentu di loke a resta di kosecha ta siña nos?