E Humildenan Lo Heredá e Tera

“Mi ta imaginá ku naturalesa lo ser transformá i restorá. . . . No mañan mainta, sino hopi leu den futuro, ora lo tin un shelu nobo i un tera nobo.”—Jean-Marie Pelt, spesialista franses di medio ambiente.

ANGUSTIÁ p’e problemanan sosial i di medio ambiente riba tera, hopi hende lo tin masha gana di mira nos planeta tera transformá den un paradeis. Pero e speransa aki no ta djis un soño di siglo 21. Hopi tempu pasá Beibel a primintí ku e tera aki lo bolbe bira un paradeis. E deklarashonnan di Hesus di ku e “humilde . . . lo heredá e tera” i “ku bo boluntat sosodé na tera meskos ku den shelu,” ta entre e pasashinan mas konosí den e Skritura. (Mateo 5:5; 6:10) Sin embargo, awe masha poko hende ta kere ku e tera aki lo bira un paradeis habitá pa e humildenan. Pa mayoria hende ku ta bisa ku nan ta kristian, e idea di un paradeis no ta eksistí mes.

E revista semanal franses La Vie ta splika pakiko hende, por lo ménos den Iglesia Katóliko, no ta kere mas den un paradeis, ni riba tera ni den shelu: “Despues ku [e konsepto di un] paradeis a dominá siñansanan katóliko pa por lo ménos 19 siglo, el a disparsé for di e ‘retrètnan’ [periodonan di reflekshon] spiritual, predikashinan riba djadumingu, kursonan di teologia i lèsnan di katisashi.” Segun e revista, e palabra mes ta tapá bou di un “neblina diki” di “misterio i konfushon.” Algun predikadó ta evit’é deliberadamente pasobra e ta “transmití demasiado imágen di felisidat riba tera.”

Pa Frédéric Lenoir, un sosiólogo ku ta spesialisá den religion, e konsepto di un paradeis a bira algu ku ta biba solamente den mente di algun hende. Meskos tambe, Juan Delumeau, historiadó i outor di vários buki riba e tópiko aki, ta pensa ku e promesanan bíbliko ta kumpli prinsipalmente den sentido simbóliko. E ta skirbi: “Riba e pregunta: ‘Kiko a para di Paradeis?’ e fe kristian ta duna e siguiente kontesta: Grásias n’e resurekshon di e Salbadó, kualke dia asina nos tur lo ta uní i felis.”

E mensahe di un paradeis riba tera ta relevante ainda? Kiko eksaktamente tin den futuro pa nos planeta? Futuro ta mustra vago, òf nos por mir’é ku hopi klaridat? E siguiente artíkulo lo kontestá e preguntanan aki.

 [Rekonosementu pa Potrèt na página 2]

COVER: Emma Lee/​Life File/​Getty Images