Bo Por Biba pa Semper

E GRAN mayoria di kreyente den e religionnan di mundu ta karga e speransa di bida eterno den un òf otro forma. Kisas kada religion tin su propio vershon di esaki, pero e speransa ta básikamente meskos: biba felismente den kondishonnan ideal sin e menasa di morto. Esei no ta loke abo tambe ta deseá? Kon bin tin asina tantu hende ku e kreensia ei? I e speransa di bida eterno lo bira realidat un dia?

E Skritura ta mustra ku for di ora Dios a krea e promé pareha humano, el a inkulká profundamente den nan konsiensia e deseo di biba pa semper. Beibel ta bisa ku Dios “a pone eternidat den nan kurason.”—Eklesiastés 3:11.

Sin embargo, pa kumpli ku e deseo di biba pa semper, e promé pareha humano mester a aseptá e outoridat di Dios pa disidí loke ta bon i loke ta malu. Si nan a hasi esei, Yehova lo a husga nan digno pa “biba pa semper” den e hogar ku el a prepará pa nan, esta, e hòfi di Edén.—Génesis 2:8; 3:22.

Bida Eterno A Bai Pèrdí

E registro di Beibel ta mustra ku Dios a planta den e hòfi “e palu di konosementu di bon i malu,” i el a prohibí Adam ku Eva di kome di su fruta. Si nan a kome di dje, nan lo a haña pena di morto. (Génesis 2:9, 17) Si Adam ku Eva a evitá di kome di e fruta ei, nan lo a mustra Dios ku nan a rekonosé su outoridat. Di otro banda, dor di kome di e fruta, nan lo a indiká ku nan a rechasá Dios su outoridat. Adam ku Eva a desobedesé e instrukshonnan di Yehova i a uni ku Satanas, un kriatura spiritual ku a rebeldiá kontra e outoridat di Dios. Komo resultado, Dios a determiná korektamente ku Adam i Eva no tabata den kondishon mas pa biba pa semper.—Génesis 3:1-6.

Loke Dios a ofresé tabata bida òf morto, eksistensia òf no-eksistensia. Desobedensia lo a hiba na morto i e fin kompletu di nan eksistensia. No tabatin niun bebida mágiko ku por a laga Adam ku Eva òf nan desendientenan sigui biba, ni nan no tabatin un alma inmortal. *

Tur desendiente di Adam a sufri pa motibu di su rebelion. Apòstel Pablo a splika e konsekuensianan. El a skirbi: “Dor di ún hende piká a drenta den mundu, i morto dor di piká, i asina morto a pasa pa tur hende, pasobra tur a peka.”—Romanonan 5:12.

Bida Eterno Ta Ser Rekobrá

Apòstel Pablo a ilustrá e kondishon di e desendientenan di Adam dor di kompar’é ku esun di un esklabo di promé siglo. Pa motibu di piká heredá, e yunan  di Adam ku Eva a nase inevitablemente komo “esklabo di piká,” destiná pa muri. (Romanonan 5:12; 6:16, 17) Esei lo tabata inevitabel bèrdat si no tabata pa e solushon legal ku Yehova a perkurá pa kumpra e libertat di e esklabonan ei. Pablo a splika: “Meskos ku ún transgreshon [esun di Adam] a trese kondenashon pa tur hende, asina tambe ún echo di hustisia a trese hustifikashon di bida pa tur hende.” E “echo di hustisia” ei a hiba na e sakrifisio ku Hesus a hasi di su kurpa humano perfekto komo “e preis di reskate pa tur hende.” Yehova a rekonosé e poder legal di e reskate pa libra humanidat for di e “huisio” di “kondenashon.”—Romanonan 5:16, 18, 19; 1 Timoteo 2:5, 6.

Pa e motibu ei sientífikonan hamas lo por haña e solushon pa bida eterno den e kódigo genétiko di hende. E solushon ta un otro kaminda. Segun Beibel, e kousa básiko di morto di humanidat ta un kuestion moral i legal, no biológiko. E medio pa restorá bida eterno—e sakrifisio di reskate di Hesus—tambe ta unu legal. E reskate ta un manifestashon tambe di e hustisia i bondat amoroso di Dios. Ken anto lo benefisiá di e reskate i risibí bida eterno?

E Don di Inmortalidat

Yehova Dios ta “for di eternidat te na eternidat.” E ta inmortal. (Salmo 90:2) E promé persona na ken Yehova a duna e don di inmortalidat tabata Hesukristu. Apòstel Pablo a splika: “Kristu, siendo lantá for di e mortonan, lo no muri nunka mas; morto no tin dominio mas riba dje.” (Romanonan 6:9) En bèrdat, hasiendo un kontraste entre Hesus resusitá i gobernantenan riba tera, Pablo a deskribié komo e úniko persona entre nan ku tin inmortalidat. Hesus lo “biba pa semper.” Su bida ta “indestruktibel.”—Hebreonan 7:15-17, 23-25; 1 Timoteo 6:15, 16.

Hesus no ta e úniko persona ku a risibí e don ei. Kristiannan ungí ku spiritu santu ku a wòrdu skohé pa goberná komo rei den gloria selestial ta risibí e mesun klase di resurekshon ku Hesus a haña. (Romanonan 6:5) Apòstel Juan a mustra ku e privilegio aki ta ser  otorgá na 144.000 persona. (Revelashon 14:1) Nan tambe ta risibí inmortalidat. Relashoná ku nan resurekshon, Pablo a bisa: “Karni i sanger no por heredá e reino di Dios . . . Tròmpèt lo zona, i e mortonan lo wòrdu lantá den inkorupshon, i nos lo wòrdu transformá. Pasobra e loke ta koruptibel aki mester wòrdu bistí ku loke ta inkoruptibel, i e loke ta mortal aki mester wòrdu bistí ku loke ta inmortal.” Morto no tin dominio riba esnan ku ta risibí un resurekshon asina.—1 Korintionan 15:50-53; Revelashon 20:6.

E revelashon divino aki en bèrdat ta remarkabel. Ni e angelnan, apesar ku nan ta kriaturanan spiritual, no a ser kreá inmortal. Nos por konkluí esaki for di e echo ku e kriaturanan spiritual ku a djòin e rebelion di Satanas lo ser ehekutá. (Mateo 25:41) Di otro banda, e ko-gobernantenan di Hesus ta risibí e don di inmortalidat, lokual ta un prueba di e konfiansa firme ku Yehova tin den nan fieldat.

Esaki ta nifiká ku ta 144.000 persona so, un grupo relativamente chikitu na komparashon ku e míles di miónes di hende ku a yega di biba, lo haña bida eterno? Nò. Laga nos mira dikon.

Bida Eterno den un Paradeis Riba Tera

E buki bíbliko di Revelashon ta pinta e bunita esena di un multitut grandi inkontabel di hende ku ta haña bida eterno den un paradeis riba tera. Huntu ku nan tin personanan ku a muri pero ku a resusitá i rekobrá nan salú i vigor hubenil. (Revelashon 7:9; 20:12, 13; 21:3, 4) Nan ta ser hibá na “un riu di e awa di bida, transparente manera kristal, ku tabata sali for di e trono di Dios.” Na oriyanan di e riu tin “palu di bida . . . i e blachinan di e palu tabata pa e kuramentu di e nashonnan.” Yehova Dios ta ekstendé e invitashon bondadoso aki: “Laga esun ku tin set, bin; laga esun ku kier, tuma e awa di bida pòrnada.”—Revelashon 22:1, 2, 17.

E palu- i awanan aki no ta ningun kura-lo-todo òf fòntein di hubentut, manera esnan ku hopi siglo pasá alkimistanan (praktikantenan di siensia kímiko di Edat Medio) i eksploradónan tabata buska. Mas bien, nan ta representá e provishonnan di Dios pa medio di Hesukristu pa restorá humanidat na e kondishon perfekto ku tabata eksistí originalmente.

E propósito di Dios pa duna humanidat obediente bida eterno riba tera no a kambia. E propósito ei lo kumpli, pasobra Yehova ta leal. Salmo 37:29 ta deklará: “E hustunan lo heredá e tera, i lo biba den dje pa semper.” E promesa aki ta motivá nos, huntu ku e personanan di humanidat ku ta haña inmortalidat den shelu, pa deklará: “Grandi i maravioso bo obranan ta, o SEÑOR Dios Todopoderoso; hustu i berdadero bo kamindanan ta, abo, Rei di e nashonnan [“Rei di eternidat,” NW]. Ken lo no teme [bo], o SEÑOR, i glorifiká bo nòmber? Pasobra abo so ta santu.”—Revelashon 15:3, 4.

Abo ta deseá e don presioso di bida eterno? Si ta asina, bo tin ku demostrá ku bo ta leal i obediente na e “Rei di eternidat.” Bo tin ku siña tokante Yehova i esun pa medio di ken e bida ei a bira posibel, Hesukristu. Tur hende ku ta dispuesto pa aseptá e normanan di Dios di loke ta bon i malu lo risibí e don di “bida eterno.”—Juan 17:3.

[Nota]

[Plachi na página 5]

Un Soño di Hopi Tempu

E Poema Épiko di Gilgamesh, un leyenda di Mesopotamia ku supuestamente ta data for di e di dos milenio promé ku nos era, ta deskribí kon un héroe tabata buska hubentut eterno. E egipsionan di antigwedat tabata balsamá nan defuntunan ku e idea ku e almanan, ku segun nan tabata inmortal, lo por a usa nan kurpanan atrobe. Konsekuentemente, algun graf egipsio a wòrdu yená ku tur loke e mortonan lo por tabatin mester den e asina yamá bida despues di morto.

Serka e alkimistanan chines, ta parse ku e kreensia den un kurpa inmortal ta data for di por lo ménos siglo 8 promé ku nos era, i e posibilidat pa alkansá esei pa medio di bebidanan mágiko ta data for di siglo 4 promé ku nos era. Alkimistanan arabir i europeo di Edat Medio a buska i a purba inventá nan mes kura-lo-todo. Algun di nan bebidanan tabata kontené un meskla di arséniko, merkurio i suafel. Ken sa kuantu di nan no a venená nan mes ora nan a bebe e kòktelnan aki!

Un tempu e leyendanan tokante un asina yamá Fòntein di Hubentut—un fuente ku supuestamente ta rehubenesé tur hende ku bebe for di dje—tabata masha konosí.

 [Plachi na página 7]

Bida Eterno Lo Ta Laf?

Algun hende ta bisa ku bida eterno lo ta laf, nada mas ku un malgastamentu di eternidat tiki-tiki na hòbinan sin sentido, ku ta blo ser ripití. Tal bes e eternidat ku nan ta imaginá nan ta un kontinuashon eterno di e estilonan di bida i kondishonnan aktual, ku pa hopi hende lo parse laf i sin sentido. Pero, den e Paradeis ku Dios lo restorá, e ta primintí ku hende “lo deleitá nan mes den pas abundante.” (Salmo 37:11) Un bida asina lo duna humanidat e oportunidat di siña konosé Yehova su kreashon i di dediká tempu pa desaroyá kualke òf tur e abilidat-, estudio- i aktividatnan fasinante ku nos por solamente soña kuné aworakí.

Dr. Aubrey de Grey, spesialista den genétika di e Universidat di Cambridge, kende a dediká su mes na e estudio di kon pa alargá bida, a remarká: “Awe, hende ku tin un bon edukashon i e tempu pa us’é no ta fada nunka, i no por imaginá nan ku un dia lo no tin nada nobo ku nan lo tin gana di hasi.” Asina mes, e Palabra inspirá di Dios ta bisa: “Hende [lo no] por haña sa e trabou ku Dios a hasi for di prinsipio te na fin.”—Eklesiastés 3:11.