Graduadonan di un Skol Ku Ta Benefisiá Hende Rònt Mundu

DEN mas ku 98.000 kongregashon di Testigunan di Yehova na mas ku 200 pais, Dios ta siñando hende di tur nivel di bida. E buki prinsipal di instrukshon ta Beibel, i e meta di e edukashon aki ta pa siña hende kiko ta e boluntat di Dios i kon pa biba di akuerdo kuné, yudando nan asina pa progresá spiritualmente. Esnan ku aseptá e edukashon aki ta saka gran benefisio. Anto loke nan siña, nan ta kompartí tambe ku otro hende, na armonia ku e instrukshon di Hesukristu pa hasi disipel.​—⁠Mateo 28:​19, 20.

Fuera di e programa edukativo kontinuo ku Testigunan di Yehova tin den nan kongregashonnan, nan a establesé tambe vários skol spesialisá. Un di esakinan ta e Skol di Entrenamentu Ministerial. E skol a keda inougurá na òktober 1987 na Pittsburgh, Pennsylvania, Merka. E promé klas a konsistí di 24 studiante di abla ingles. Djei te ku awor a tene e skol aki na 21 idioma den 43 pais. Te asina leu, ansiano- i sirbidónan ministerial soltero di mas ku 90 pais a siguié. Ora e graduadonan kompletá e kurso di ocho siman, ta asigná nan pa sirbi kaminda tin un nesesidat, sea den nan propio pais òf den eksterior. Te ku fin di aña 2005, mas ku 22.000 ruman hòmber kristian a kompletá e kurso. Yehova a bendishoná rikamente nan esfuersonan humilde pa promové interesnan di Reino i benefisiá otro hende.​—⁠Proverbionan 10:⁠22; 1 Pedro 5:⁠5.

 Loke Nan A Hasi pa Asistí

Pa por asistí na e Skol di Entrenamentu Ministerial, mayoria studiante tin ku pidi liber for di nan empleo, sea ku nan ta traha partaim òf fultaim. Esaki tin biaha ta un problema. Na Hawai, dos ruman hòmber kristian ku a haña invitashon pa asistí na e skol tabatin ku pidi liber for di nan trabou komo maestro di skol. Ku fe den Yehova, nan a entregá nan petishon, i a splika dikon nan kier a asistí i kon nan lo a benefisiá. Ámbos a haña e tempu liber.

Den vários kaso, Testigunan ku a pidi liber di trabou a haña komo kontesta ku nan lo no tin trabou ora nan bin bèk. Tòg nan a skohe pa haña entrenamentu serka Yehova su organisashon, maske esei a nifiká ku nan lo a pèrdè nan trabou. Tin di e personanan aki ku despues a haña invitashon di nan doño di trabou pa bin traha bèk ora nan kaba ku e skol. Por resumí nan determinashon pa asistí na e skol asin’aki: Hasi bo petishon na bo doño di trabou, pidi Yehova su yudansa den orashon, i laga sobrá kos den su man.​—⁠Salmo 37:⁠5.

“Siñá pa Yehova”

E skol su programa di ocho siman ta enserá un estudio profundo di Beibel. Studiantenan ta siña kon e pueblo di Yehova ta organisá pa hasi e boluntat di Dios. Nan ta siña tambe kon nan por usa Beibel na un manera mas efektivo den nan sirbishi di vèlt, na reunionnan di kongregashon i na asamblea.

Un graduado ku tabatin apresio pa e skol a skirbi lo siguiente na un studiante ku tabatin ku bai e skol ainda: “Kere mi, esaki lo ta e mihó eksperensia edukativo ku lo bo haña den bo bida. E teksto bíbliko ku ta bisa ‘ser siñá pa Yehova,’ realmente lo haña mas nifikashon. Henter e eksperensia ta un proseso di moldia i refiná bo kurason i personalidat pa nan kuadra mas ku e ehèmpel di Kristu Hesus. Bo ta bai pasa den e eksperensia di mas grandi den bo bida.”​—⁠Isaias 54:​13, NW.

Evangelisadó, Wardadó, i Maestro

Aktualmente graduadonan di e Skol di Entrenamentu Ministerial ta sirbi den 117 pais. Esakinan ta inkluí islanan den áreanan di Atlántiko, Caribe i Pasífiko, i tambe den mayoria pais kaminda tin sukursal di Testigunan di Yehova. Sukursalnan ta informá ku e entrenamentu ekselente ku e studiantenan ta haña ta bisto den nan aktividatnan komo evangelisadó, wardadó i maestro. Nan entrenamentu ta prepará nan pa usa Beibel den un manera mas efektivo den sirbishi di vèlt. (2 Timoteo 2:⁠15) Ora nan ta kontestá preguntanan di e doñonan di kas, nan ta referí ku frekuensia na e buki Rasonamentu for di e Skritura * i ta siña otro publikadónan di Reino pa hasi meskos. E entusiasmo di e graduadonan ta kontagioso, i nan aktividat ta fortalesé e kongregashonnan.

Ansianonan di kongregashon tin e privilegio di “pastoriá e tou” i yuda atendé e nesesidatnan spiritual di otro kristiannan. (1 Pedro 5:​2, 3) Un ansiano a bisa tokante e areglo di pastoriá: “Nos ta apresiá mashá ku sukursal ta manda ruman hòmber bon entrená pa yuda nos ku e responsabilidat di pastoriá e tou di Dios.” Un sukursal na Lehano Oriente tambe a remarká: “E graduadonan ta masha kompasivo. Nan ta traha duru i ta gana e rèspèt di e kongregashon. Nan humildat, kalor di amistat i entusiasmo ta bon konosí i altamente apresiá. Nan ta sakrifiká nan mes di buena gana i gustosamente ta muda pa kongregashonnan ku tin mester di wardadó.” (Filipensenan 2:⁠4) Hòmbernan asina ta refreská nan rumannan den fe i meresé elogio.​—⁠1 Korintionan 16:⁠18.

Un otro kos ta ku e instruktornan di e Skol di Entrenamentu Ministerial ta yuda e studiantenan mehorá nan abilidat komo oradó públiko. Hopi di e graduadonan, despues di apliká e sugerensianan i konseho ku nan ta  haña, por ser usá den korto tempu den programanan di asamblea di sirkuito i kongreso di distrito. Un superintendente di sirkuito a remarká ku e graduadonan ta duna “diskursonan ekselente i ta apliká e informashon usando bon rasonamentu.”​—⁠1 Timoteo 4:⁠13.

E kalidat di enseñansa na reunionnan di kongregashon a mehorá konsiderablemente den un pais afrikano despues ku nan a tene e Skol di Entrenamentu Ministerial einan i a asigná vários graduado pa traha den vèlt. Ansianonan ku a bin di e skol ta duna asistensia den e trabou di prediká, pastoriá i siña, yudando asina pa edifiká e kongregashonnan spiritualmente.​—⁠Efesionan 4:​8, 11, 12.

Mihó Supervishon den e Kongregashon

Hopi kaminda tin mester di mas ansiano i sirbidó ministerial. Algun kongregashon lo no tabatin ningun ansiano si no a manda un graduado di Skol di Entrenamentu Ministerial pa nan. P’esei ta asigná hopi graduado pa sirbi kaminda tin tal nesesidat.

Hopi sukursal ta informá ku e hòmbernan aki “konosé e areglonan di e organisashon bon,” “ta tuma nan responsabilidatnan na serio,” “ta yuda otro rumannan apresiá i respetá e organisashon di Yehova” i “ta kontribuí na e kalor i spiritualidat di nan kongregashon.” Esaki ta asina pasobra e graduadonan di e skol ta apliká loke tin skirbí den e Palabra di Dios i no ta dependé riba nan mes komprondementu ni ta sabí den nan mes bista. (Proverbionan 3:​5-7) Hòmbernan asina ta bira un bendishon spiritual den e kongregashonnan na kua nan ta asigná.

Nan Ta Sirbi den Teritorionan Aislá

Algun graduado apuntá komo pionero spesial ta yuda gruponan aislá bira kongregashon. Ekspresando apresio pa nan yudansa, un ansiano den un área aislá di Guatemala a bisa: “Binti aña largu mi a preokupá kon lo bai atendé e teritorio inmenso aki. Hopi biaha mi a hasi orashon tokante e asuntu. E rumannan di Skol di Entrenamentu Ministerial ta bon entrená komo oradó i tambe den asuntunan di e organisashon, i mi a keda kontentu di mira ku awor e área ta hañando atenshon amoroso.”

Graduadonan a siña kon pa ta efektivo den teritorionan kaminda nan tin ku biaha distansianan largu atraves di serunan pa yega na pueblitonan plamá. Unabes nan yega, nan ta establesé i organisá rápidamente gruponan aislá, asta ora ku anteriormente otro publikadónan no a logra hasi esei. Por ehèmpel, un ansiano na Níger a pidi pa laga algun graduado bin yud’é komo ku e tabata di opinion ku nan lo por a hasi un ekselente trabou den e área kaminda e tabata biba. Spesialmente den áreanan aislá, por ta mas fásil pa hòmbernan soltero sirbi komo pionero spesial i superintendente di sirkuito. Meskos ku apòstel Pablo, nan tin ku trata ku ‘peliger riba riunan, peliger di ladronnan, peliger den desierto,’ i inkomodidat personal i tambe preokupashon pa e kongregashonnan ku nan ta sirbi.​—⁠2 Korintionan 11:​26-28.

Hóbennan Ta Benefisiá

E Skritura ta urgi hóbennan pa kòrda riba nan Kreadó. (Eklesiastés 12:⁠1) Graduadonan seloso di Skol di Entrenamentu Ministerial ta bon ehèmpel pa hóbennan kristian. Despues ku un kongregashon na Merka a haña dos graduado, e kantidat di tempu ku e rumannan tabata pasa den sirbishi a bira dòbel. Ademas, e kantidat di pionero regular, òf proklamadó di Reino di tempu kompletu, a subi di 2 pa 11. Esaki ta típikamente loke ta sosodé den hopi kongregashon.

Ademas, e graduadonan ta stimulá rumannan hòmber hóben pa asistí na e Skol di Entrenamentu Ministerial. Esaki a motivá algun ku no ta sirbi ainda komo sirbidó ministerial pa hasi esfuerso pa alkansá e privilegio ei. E sukursal di Hulanda ta yama graduadonan di Skol di Entrenamentu Ministerial “ehèmpelnan bibu pa rumannan hòmber hóben ku ta pensando riba kiko pa hasi ku nan bida.”

 Nan Ta Sirbi den Kongregashonnan di Otro Idioma

Den hopi pais, esfuersonan pa prediká e bon nobo na e hendenan den nan idioma nativo ta avansando ku mas forsa. Graduadonan di Skol di Entrenamentu Ministerial hopi biaha ta siña otro idioma i ta sirbi den teritorionan ku tin un poblashon grandi di imigrante. Por ehèmpel na Bèlgika, tin mester di mas predikadó di Reino den e teritorio albanes, perso i ruso.

Kongregashon- i gruponan di otro idioma na Alemania, Gran Bretaña, Italia, Merka, Mexico i otro paisnan ya kaba ta sakando gran benefisio di superintendentenan biahero, ansianonan i sirbidónan ministerial ku ta graduadonan di Skol di Entrenamentu Ministerial. E sukursal di Korea ta informá ku “mas ku 200 graduado ta hunga un papel prominente den yuda nos ku kongregashon- i gruponan di otro idioma.”

Nan Ta Sirbi Humildemente den Otro Kapasidat

Fuera di sirbi ku grupo- i kongregashonnan di otro idioma, e rumannan ku a gradua di Skol di Entrenamentu Ministerial ta sirbi komo ansiano, sirbidó ministerial i superintendente biahero. Tin di nan ta aseptá asignashon den un otro pais, kisas satisfasiendo un nesesidat urgente den e Departamento di Sirbishi na un sukursal. Esnan ku tin konosementu den trabou di konstrukshon kisas ta partisipá den e programa di konstruí Salòn di Reino.

E oumento mundial ku tin di e kantidat di kongregashon i sirkuito ta nifiká ku konstantemente tin mester di mas superintendente biahero. Pa yuda satisfasé e nesesidat aki, sierto graduadonan di Skol di Entrenamentu Ministerial ta haña un entrenamentu di dies siman den e trabou biahero i despues ta sirbi komo superintendente di sirkuito regular òf supstituto. Rònt di 1.300 graduado ta sirbi aktualmente komo superintendente biahero den 97 pais. Den un pais afrikano, 55 porshento di e superintendentenan biahero a gradua di e Skol di Entrenamentu Ministerial. Den un otro pais afrikano, e kantidat ta 70 porshento.

For di Canada, Europa, Lehano Oriente, Merka i Oustralia, a manda sentenáres di graduado di e skol pa eksterior pa satisfasé nesesidatnan spesífiko den otro pais. Den e manera aki, e benefisionan di e skol a ekstendé rònt mundu.

Mediante su Yu, Hesukristu, Yehova a lanta evangelisadó, wardadó, maestro i otronan ku ta promové interesnan di Reino den e último dianan aki. Tin ekspektativa pa mas oumento den e pueblo di Dios? Sigur ku sí! Pues tin mas i mas mester di hòmbernan dediká ku ta hasi esfuerso pa alkansá mayor responsabilidat. (Isaias 60:⁠22; 1 Timoteo 3:​1, 13) E Skol di Entrenamentu Ministerial ta duna ansiano i sirbidó ministerial un oportunidat di prepará nan mes pa ekspandé nan ministerio, ku gran benefisio pa nan mes i pa otro hende den e kampo mundial.

[Nota]

[Plachinan na página 10]

E Skol di Entrenamentu Ministerial ta promové interesnan di Reino rònt mundu

[Plachinan na página 13]

Abo ta deseá di bai e Skol di Entrenamentu Ministerial i benefisiá otro hende?