Un Kuestion Ku Ta Toka Bo

BO TIN un amigu òf famia ku bo ta hopi será kuné? Kon lo bo sinti bo si un hende akusá bo ku bo tin e relashon será ei puramentu pa motibunan egoista? Lo bo no sinti bo ofendí, i podisé asta indigná? Esei ta netamente e akusashon ku Satanas e Diabel a lansa kontra tur persona ku tin un relashon será ku Yehova Dios.

Reflekshoná un ratu riba loke a sosodé ora ku Satanas a logra pone e promé pareha humano, Adam ku Eva, kibra e lei di Dios i uni kuné den su rebelion kontra Dios. Akaso loke a sosodé a nifiká ku hende lo a keda obedesidu na Yehova tanten ku esei a kumbiní nan? (Génesis 3:​1-6) Un 2.500 aña despues ku Adam a desviá, Satanas a bolbe lanta e mesun kuestion, pero e biaha aki en konekshon ku un hòmber ku yama Jòb. Laga nos analisá e relato bíbliko ei kuidadosamente, ya ku e akusashon ku Diabel a hasi ta identifiká e kuestion bon kla.

“Lo Mi No Bandoná Mi Integridat”

Jòb tabata ‘un hende perfekto [“sin kulpa,” NW ] i rekto, ku a teme Dios i ku a apartá su mes for di maldat.’ Sin embargo, Satanas a kuestioná Jòb su rektitut. El a puntra Yehova: “Ta pòrnada Jòb ta teme Dios?” Anto Diabel a kalumniá tantu Dios komo Jòb ora el a akusá Yehova di a kumpra Jòb su lealtat dor di proteh’é i bendishon’é. Satanas a desafiá Dios, bisando: “Ma saka bo man awor i mishi ku tur loke e tin; siguramente e lo maldishoná bo den bo kara.”​—⁠Jòb 1:​8-⁠11.

Pa kontestá e ponensianan aki, Yehova a permití Satanas tèst Jòb. Den un intento pa kita Jòb di sirbi Dios, Diabel a trese un kalamidat tras di otro riba e hòmber fiel ei. Nan a hòrta òf mata tur e bestianan di krio di Jòb, asesiná su sirbidónan i mata su yunan. (Jòb 1:​12-⁠19) Pero Satanas tabatin éksito? Nò! Sin ku Jòb tabata sa ku ta Diabel tabata e kousa di su difikultatnan, el a bisa: ‘Yehova a duna i Yehova a kita. Bendishoná sea e nòmber di Yehova.’​—⁠Jòb 1:⁠21.

Despues, Satanas a presentá dilanti di Yehova, i Yehova a bis’é: “[Jòb] ta mantené su integridat, maske ku bo a pone mi kontra dje, pa ruin’é sin motibu.” (Jòb 2:​1-3) E kuestion sumamente importante tabata Jòb su integridat, un kualidat ku ta rekerí pa hende keda leal na Dios i pega fielmente na hustisia. Te asina leu Jòb a sali viktorioso riba e kuestion di integridat. Sin embargo, Diabel no a entregá.

Satanas e ora ei a inkluí henter humanidat den su insinuashon. El a bisa Yehova: “Kueru pa kueru! Sí, tur loke un hende tin e lo duna pa su bida. Ma saka bo man awor i mishi ku su wesu i ku su karni; e lo maldishoná bo den bo kara.” (Jòb 2:​4, 5) Usando e término  general “un hende” en bes di e nòmber di Jòb, Diabel a kuestioná e integridat di tur hende. Ta komo si fuera el a bisa: ‘Un hende lo hasi loke sea ta nesesario pa salba su bida. Duna mi un chèns, i wak kon mi ta kita tur hende for di Dios.’ Tabata bèrdat ku ningun hende lo no keda leal na Dios bou di tur kondishon i na tur momento?

Yehova a permití Diabel dal Jòb ku un malesa teribel. Jòb a sufri asina tantu ku el a pidi p’e muri. (Jòb 2:7; 14:13) No opstante, Jòb a deklará: “Te na mi morto lo mi no bandoná mi integridat”! (Jòb 27:⁠5) Jòb a bisa esaki pasobra e tabata stima Dios, i nada no por a kambia esei. Jòb a demostrá ku e tabata un hòmber di integridat. Beibel ta bisa di Yehova: “[El] a bendishoná e último dianan di Jòb mas ku e proménan.” (Jòb 42:​10-⁠17) Tabatin mas hende manera Jòb? Kiko e tempu ku a pasa a revelá?

Kon e Desafio A Ser Kontestá

Den kapítulo 11 di e buki bíbliko di Hebreonan, apòstel Pablo a menshoná vários hòmber i muhé fiel di tempu prekristian, entre otro Noe, Abraham, Sara i Moisés. Kaba e apòstel a deklará: “Lo mi no tin basta tempu pa mi konta di [otronan].” (Hebreonan 11:32) E sirbidónan fiel aki di Dios tabata asina tantu ku Pablo a referí na nan komo ‘un nubia grandi di testigu,’ komparando nan ku un nubia inmenso ku ta ekstendé den shelu. (Hebreonan 12:⁠1) Sí, atraves di siglonan, masha hopi hende a hasi uso di nan boluntat liber i a skohe pa duna nan lealtat na Yehova Dios.​—⁠Josué 24:⁠15.

E mihó kontesta kontra e ponensia di Satanas ku e por kita hende di sirbi Yehova a bin for di e propio Yu di Dios, Hesukristu. Ni sikiera e doló insoportabel di un staka di tormento no a kibra su integridat na Dios. Na momento ku Hesus a hala su lastu rosea, el a sklama: “Tata, den bo mannan mi ta entregá mi spiritu.”​—⁠Lukas 23:⁠46.

E tempu ku a pasa a demostrá bon kla ku Diabel no por a kita tur hende di sirbi e Dios berdadero. Masha hopi hende a siña konosé Yehova i a ‘stim’é ku henter nan kurason i ku henter nan alma i ku henter nan mente.’ (Mateo 22:⁠37) Nan lealtat firme na Yehova a proba ku Satanas ta gran ekiboká den e kuestion di integridat humano. Abo tambe por duna prueba ku Diabel ta gran ekiboká si bo ta un hòmber òf muhé di integridat.

Kiko Bo Tin Ku Hasi?

E boluntat di Dios ta pa ‘tur klase di hende wòrdu salbá i yega na un konosementu eksakto di e bèrdat.’ (1 Timoteo 2:⁠4) Kon abo por hasi esei? Traha tempu pa studia Beibel i gana ‘konosementu di e úniko Dios berdadero i di Hesukristu, kende el a manda.’​—⁠Juan 17:⁠3.

Satanas a desafiá e integridat di hende ora el a kuestioná e motibunan pakiko hende ta sirbi Dios. Pa konosementu por influensiá bo motivashon, e mester yega na bo kurason. Anto pa esaki sosodé, bo tin ku hasi mas ku djis buska informashon for di Beibel. Kultivá e kustumber di meditá riba loke bo siña. (Salmo 143:⁠5) Ora bo ta lesa Beibel òf un publikashon basá riba Beibel, hasi sigur di tuma tempu pa reflekshoná riba preguntanan manera: ‘Kiko esaki ta siña mi tokante Yehova? Kua kualidatnan di Dios mi ta mira ekspresá akinan? Den ki áreanan di mi bida ami mester ta asina? Kiko Dios ta aprobá òf desaprobá? Ki efekto esei tin riba loke mi ta sinti pa Dios?’ Meditando di e manera ei lo yena bo kurason ku amor i apresio pa e Kreadó.

Integridat na Dios no ta limitá na e esfera di kreensia religioso. (1 Reinan 9:⁠4) Pa mantené bo integridat na Yehova Dios bo mester ta moralmente rekto den tur área di bida. Lo bo no pèrdè nada ku esei. Yehova ta “e Dios felis,” i e ke pa bo gosa di bida. (1 Timoteo 1:⁠11, NW ) Ban konsiderá algun práktika ku  bo tin ku evitá pa bo por keda moralmente limpi i asina gosa di un bida mas felis i di e aprobashon di Dios.

Evitá Inmoralidat Seksual

Yehova mes a fiha e norma pa matrimonio den su Palabra. Beibel ta bisa: “Un hòmber lo bandoná su tata i su mama i lo uni ku su esposa. I nan lo bira ún karni.” (Génesis 2:​21-⁠24) Siendo ku parehanan kasá a bira “ún karni,” nan ta onra Dios su areglo matrimonial si nan ta limitá nan relashon seksual entre nan dos. Apòstel Pablo a deklará: “Laga matrimonio wòrdu onrá pa tur hende, i laga e kama matrimonial ta sin mancha; pasobra Dios lo husga fornikadónan i adúlteronan.” (Hebreonan 13:⁠4) E ekspreshon “kama matrimonial” ta para pa relashon seksual entre un hòmber ku un muhé legalmente kasá ku otro. Si un di nan tene relashon seksual pafó di matrimonio esei ta adulterio i por trese huisio desfaborabel di Dios.​—⁠Malakias 3:⁠5.

Kiko di sèks promé ku matrimonio? Esei tambe ta kontra e normanan moral ku Yehova a establesé. Beibel ta bisa: “Esaki ta e boluntat di Dios . . . pa boso apstené boso di inmoralidat seksual.” (1 Tesalonisensenan 4:⁠3) Homoseksualidat, relashon seksual ku famia hopi pegá òf ku bestia tambe ta pikánan kontra Dios. (Levítiko 18:​6, 23; Romanonan 1:​26, 27) Ken ku ke agradá Dios i gosa di un bida realmente felis tin ku keda leu for di práktikanan inmoral.

Kiko di aktonan ku ta eksitá hende seksualmente promé ku kasamentu? E práktika aki ta desagradá Yehova. (Galationan 5:⁠19) Nos mente tambe mester keda limpi di pensamentunan inmoral. Hesus a bisa: “Ken ku wak un muhé pa dese’é, ya kaba el a kometé adulterio kuné den su kurason.” (Mateo 5:⁠28) E palabranan ei ta apliká tambe na wakmentu di imágennan pornográfiko riba papel, riba pantaya òf riba Internet; e ta apliká na lesamentu di relatonan tokante aktividatnan seksual; i na skuchamentu di músika ku letra inmoral òf dòbel sintí. Ora nos evitá e tipo di kosnan ei nos lo agradá Dios i hiba un bida mas sano.

Kiko di flirtmentu? Flirtmentu ta nifiká mustra interes romántiko den otro hende den forma di chansa òf komportashon seksualmente seduktivo. Ta kontra di prinsipionan bíbliko pa un hòmber òf muhé kasá dirigí tal atenshon na un persona ku no ta su kasá, i e ta un indikashon di falta di rèspèt pa Yehova. (Efesionan 5:​28-⁠33) P’esei ta masha inapropiá pa hende soltero koketeá òf manda señalnan romántiko pa otro djis pa pasa prèt! Kiko si un persona tuma e flirtmentu ei mas na serio di loke tabata bo intenshon? Pensa riba e doló emoshonal ku esei por kousa. Loke tambe ta hasi e asuntu aki serio ta e echo ku flirtmentu por hiba na adulterio òf fornikashon. Di otro banda, ora nos ta trata miembronan di e sekso opuesto na un manera desente, esei ta oumentá nos rèspèt propio.​—⁠1 Timoteo 5:​1, 2.

Agradá Dios den Otro Áreanan di Bida

Den hopi pais ta fásil pa haña bebida alkohóliko. Tin algu malu den bebe alkohòl? E Skritura no ta prohibí bebementu moderá di biña, serbes òf otro bebida alkohóliko. (Salmo 104:⁠15; 1 Timoteo 5:⁠23) Sin embargo, bebementu di mas i buracheria ta malu den bista di Dios. (1 Korintionan 5:​11-⁠13) Un kos ta sigur, lo bo no ke pa bebementu di mas daña bo salú i perhudiká bo bida di famia.​—⁠Proverbionan 23:​20, 21, 29-⁠35.

Yehova ta e “Dios di bèrdat.” (Salmo 31:⁠5, BPK ) Beibel ta deklará: “Ta imposibel pa Dios gaña.” (Hebreonan 6:⁠18) Si bo ke e aprobashon di Dios, bo tin ku evitá di gaña. (Proverbionan 6:​16-⁠19; Kolosensenan 3:​9, 10) Beibel ta konsehá kristiannan pa “papia bèrdat ku [nan] próhimo.”​—⁠Efesionan 4:⁠25.

 Un otro práktika ta wega di plaka. Ounke wega di plaka ta popular serka hopi hende, e ta un forma di golosidat, pasobra ta un intento pa traha plaka riba kustia di otro hende. Yehova no ta aprobá hende ku ta “golos pa ganashi desonesto.” (1 Timoteo 3:​8, NW ) Pues si bo ke agradá Yehova, lo bo keda leu for di tur sorto di wega di plaka, entre nan, wega di number, bingo i pustamentu di kabai. Lo bo ripará ku de echo bo ta keda ku mas plaka den bo saku pa satisfasé e nesesidatnan di bo famia.

Hòrtamentu, esta, kue kos ku no ta di bo, ta un otro forma di golosidat. Beibel ta bisa: “No hòrta.” (Eksodo 20:⁠15) Ta robes pa konsientemente kumpra artíkulonan hòrtá i pa kue kos sin pèrmit. Beibel ta bisa: “Laga esun ku ta hòrta, no hòrta mas; ma mas bien, lag’é traha, hasiendo ku su mes mannan loke ta bon, pa e por tin algu pa kompartí ku esun ku ta den nesesidat.” (Efesionan 4:⁠28) En bes di hòrta tempu for di doño di trabou, sirbidónan di Yehova ta sòru di duna un dia kompletu di trabou. Nan ‘deseo ta pa komportá nan mes den tur kos na un manera onorabel.’ (Hebreonan 13:⁠18) Ademas, un konsenshi limpi siguramente ta kontribuí na pas mental.

Kiko Dios ta pensa di hende ku tin un karakter violento? Beibel ta spièrta: “No sera amistat ku hende ku ta gusta rabia, i no anda ku hende di mal genio.” (Proverbionan 22:⁠24) Rabiamentu deskontrolá ta hiba hopi biaha na aktonan di violensia. (Génesis 4:​5-⁠8) Pa loke ta tumamentu di vengansa, Beibel ta deklará: “Nunka paga malu ku malu na ningun hende. Respetá loke ta korekto den bista di tur hende. Si ta posibel, asina leu ku ta dependé di boso, sea na pas ku tur hende. Nunka no venga boso mes, stimánan, ma laga lugá pa e furia di Dios, pasobra ta pará skirbí: ‘ “Ta di mi vengansa ta, ami lo paga bèk,” Señor ta bisa.’ ” (Romanonan 12:​17-⁠19) Ora nos ta sigui tal konseho, nos bida lo ta mas trankil, i esei lo oumentá nos felisidat.

Bo Por Logra

Lo bo por logra mantené bo integridat na Dios apesar di preshon pa hasi lo kontrario? Sí, bo por. Tuma nota ku Dios ke pa bo logra demostrá ku Satanas ta ekiboká den e kuestion di integridat, pasobra Su Palabra ta bisa: “Sea sabí, mi yu, i hasi mi kurason kontentu, pa mi por kontestá esun ku reprochá mi.”​—⁠Proverbionan 27:⁠11.

Bo por pidi Yehova den orashon pa fortalesé bo pa hasi loke ta korekto den su bista. (Filipensenan 4:​6, 7, 13) P’esei hasi esfuerso pa oumentá bo konosementu di e Palabra di Dios, Beibel. Meditando ku apresio riba loke bo ta siña for di Beibel, lo yuda bo profundisá bo amor pa Dios i lo motivá bo pa agrad’é. Segun 1 Juan 5:⁠3: “Esaki ta e amor di Dios, ku nos ta warda su mandamentunan; i su mandamentunan no ta pisá.” Gustosamente Testigunan di Yehova den bo komunidat lo yuda bo studia Beibel. Nos ta invitá bo pa tuma kontakto ku nan lokalmente, òf bo por skirbi e editornan di e revista aki.

[Plachi na página 4]

Jòb a keda fiel bou di prueba

[Plachi na página 7]

Oumentá bo konosementu di e Palabra di Dios; esei lo fortalesé bo determinashon pa hasi loke ta korekto