Dikon Evitá Ekstremo?

YEHOVA ta e mihó ehèmpel ku tin di ekilibrio òf balansa. “Su obra ta perfekto,” i su hustisia nunka ta severo, ya ku semper e ta kombiná ku miserikòrdia. (Deuteronomio 32:4) Su amor nunka ta sin eskrúpulo, pasobra e ta aktua na armonia ku leinan perfekto. (Salmo 89:14; 103:13, 14) Nos promé mayornan a ser kreá balansá den tur sentido. Nan no tabata inkliná na ningun ekstremo. Sin embargo, introdukshon di piká a trese un “defekto”—imperfekshon—lokual a pone nan pèrdè e balansa ei.—Deuteronomio 32:5.

Pa ilustrá esaki: Bo a yega di kore den un outo òf riba un baiskel ku tin un tayer ku un bòbel grandi? E defekto ei sin duda a hasi e korementu difísil i tambe peligroso. Bo mester drecha un tayer asina promé ku e bira pió òf e baha. Di igual manera, nos personalidat imperfekto ta inkliná na kosnan ku ta fuera di lo normal. Si nos permití e “bòbelnan” aki krese, nos trayekto atraves di bida lo por ta difísil i asta peligroso.

Tin biaha nos bon kualidatnan, nos puntonan fuerte, por bai muchu den ekstremo. Por ehèmpel, e Lei di Moisés a rekerí di e israelitanan pa nan pone fraña na rant di nan pañanan, sin embargo komo ku e fariseonan den tempu di Hesus kier a sobresalí riba e multitut, nan a “hasi e kuashinan [òf, fraña] di nan pañanan mas largu,” te na un grado ekstremo. Nan motivashon tabata pa parse mas santu ku tur otro hende.—Mateo 23:5; Numbernan 15:38-40.

Awendia tin hende ta purba tur manera posibel pa haña atenshon, tin biaha asta dor di shòk otronan. Bon mirá, esaki por ta un gritu desesperá di: “Wak mi! Mi tambe t’ei!” Sin embargo, bistí, aktitut i akshonnan ekstremo lo no satisfasé e berdadero nesesidatnan di un kristian.

Un Aktitut Balansá Relashoná ku Trabou

Ken ku nos ta i unda ku nos ta biba, trabou sano ta un kos ku ta yuda duna nos bida un propósito. Dios a kreá nos pa haña satisfakshon den trabou asina. (Génesis 2:15) P’esei Beibel ta kondená flohera. Apòstel Pablo a bisa bon kla: “Si un hende no kier traha, no lag’é kome tampoko.” (2 Tesalonisensenan 3:10) Sí, un aktitut floho relashoná ku trabou lo por kousa no solamente pobresa i mal kontentu sino tambe e desaprobashon di Dios.

Hopi hende ta bai na e otro ekstremo i ta bira adikto na nan trabou, es desir, boluntariamente nan ta katibu di nan trabou. Nan ta sali kas mainta trempan i ta yega bèk anochi lat, anto kisas nan ta rasoná ku nan trabou ta pa bienestar di nan famia. Sin embargo, nan famia kisas ta en realidat víktima di tal dedikashon ekstremo na trabou. Un ama di kas, kende su kasá hopi biaha ta traha overtaim, a bisa: “Gustosamente lo mi duna tur e kosnan den e kas luhoso aki a kambio di e oportunidat di tin mi kasá aki huntu ku mi i ku nos yunan.” E personanan ku ta skohe pa traha di mas mester pensa seriamente riba e eksperensia personal di Rei Salomon: “Mi a konsiderá tur mi aktividatnan ku mi mannan a hasi i e trabou ku mi a tuma pa hasi nan; i mira, tur tabata banidat i korementu tras di bientu.”—Eklesiastés 2:11.

 Sí, den asuntu di trabou, nos tin ku evitá ámbos ekstremo. Nos por ta trahadó diligente, pero kòrdando a la bes ku si nos bira katibu di trabou esei lo hòrta nos di felisidat i podisé di hopi kos mas.—Eklesiastés 4:5, 6.

Evitá Puntonan di Bista Ekstremo di Plaser

Beibel a profetisá relashoná ku nos tempu: ‘Hende lo ta stimadó di plaser mas bien ku stimadó di Dios.’ (2 Timoteo 3:2, 4) Korementu tras di plaser a bira un di e hèrmèntnan mas efektivo di Satanas pa kita hende for di Dios. Partisipashon den rekreo i entretenimentu, manera por ehèmpel den deportenan ekstremo ku ta subi “adrenalina,” ta floresiendo. E lista di e tipo di aktividatnan ei ta birando konstantemente mas largu, i e kantidat di hende ku ta partisipando den nan ta bira mas grandi. Kon bin e deportenan ei ta gosa di tantu popularidat? E kos ta ku hopi hende no ta satisfecho ku nan bida diario, i p’esei nan ta bai en buska di mas i mas eksitashon. Pero pa nan mantené e eksitashon ei, nan tin ku oumentá e nivel di riesgo. Kristiannan ku ke agradá Dios ta evitá deportenan peligroso komo muestra di rèspèt pa e regalo di bida i pa e Dunadó di Bida.—Salmo 36:9.

Ora ku Dios a krea e promé pareha humano, unda el a pone nan? Den e hòfi di Edén, ku na e idioma original ta nifiká “Plaser” òf “Delisia.” (Génesis 2:8) Pues ta bisto ku un bida agradabel i plasentero tabata parti di e propósito di Yehova pa hende.

Hesus a laga un ehèmpel perfekto pa nos di un punto di bista balansá di plaser. E tabata kompletamente dediká na kumpli ku e boluntat di Yehova, i ni pa un ratu e no a stòp di biba na armonia ku e leinan i prinsipionan di Dios. El a saka tempu pa hende den nesesidat, asta ora ku e tabata kansá. (Mateo 14:13, 14) Anto sí, Hesus a aseptá invitashonnan pa bai kome i a traha tempu den su bida pa sosegá i refreská su mes. Klaru ku e tabata sa ku algun enemigu a kritik’é pasobra el a hasi e kosnan aki. Nan a bisa tokante dje: “Ata un hòmber golos i un buraché.” (Lukas 7:34; 10:38; 11:37) Pero Hesus no a kere ku berdadero deboshon ta ekskluí tur plaser for di bida.

Ta bisto anto ku ta sabí di nos parti pa evitá kualke ekstremo den asuntu di rekreo. Si nos hasi plaser i entretenimentu e kos prinsipal den bida, nunka nos lo haña berdadero felisidat. Esei por pone nos neglishá kosnan mas importante, inkluso nos relashon ku Dios. Di otro banda, nos no mester nenga nos mes tur plaser ni kritiká hende ku ta disfrutá di bida den un manera balansá.—Eklesiastés 2:24; 3:1-4.

Haña Felisidat den un Bida Balansá

Disipel Santiago a skirbi: “Nos tur ta trompeká na hopi manera.” (Santiago 3:2) Kisas nos ta konstatá ku esaki ta bèrdat den nos kaso segun ku nos ta hasi esfuerso pa evitá ekstremo. Kiko por yuda nos keda balansá? Wèl, nos tin ku rekonosé nos propio puntonan fuerte i puntonan débil. Pero no ta fásil pa hasi esei. Nos lo por ta bayendo den un direkshon ekstremo sin ku nos ta konsiente di esei. Ta sabí anto pa nos keda serka di otro kristiannan maduro i skucha konseho balansá. (Galationan 6:1, NW) Nos lo por pidi un amigu di konfiansa òf un ansiano den kongregashon ku tin eksperensia pa duna nos tal konseho balansá. Huntu ku e Skritura mes, tal konseho basá riba Beibel por sirbi komo un “spil” pa nos kontrolá kon balansá nos realmente ta for di e punto di bista di Yehova.—Santiago 1:22-25.

Felismente, nos no tin ku hiba un bida di ekstremonan inevitabel. Si nos hasi berdadero esfuerso i ku e bendishon di Yehova, nos por bira personanan balansá, i pues felis. Asina nos relashon ku nos rumannan kristian lo por mehorá, i nos por bira asta mihó ehèmpel pa e hendenan ku nos ta prediká na dje. Riba tur kos, asina nos lo imitá mas mihó ainda nos Dios amoroso i balansá, Yehova.—Efesionan 5:1.

[Rekonosementu pa Potrèt na página 28]

©Greg Epperson/age fotostock