Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Kiko nos por siña for di Hesus su ilustrashon di e anfitrion persistente? (Lukas 11:5-10)

E ilustrashon aki ta mustra ku ki aktitut nos lo mester hasi orashon. Nos tin ku pidi ku persistensia, es desir, sigui pidi, spesialmente pa haña e spiritu santu di Dios. (Lukas 11:11-13)—15/12, página 20-2.

• Ki lès nos ta saka for di Hesus su ilustrashon di un biuda i un hues? (Lukas 18:1-8)

E ilustrashon ta enfatisá ku nos mester hasi orashon. Distinto for di e hues, Yehova ta hustu i ke yuda nos. Ademas, nos mester tin fe manera di e biuda den e ilustrashon.—15/12, página 26-8.

• Pakiko apòstel Pablo a bisa e kristiannan di Korinto pa ‘habri nan kurason hanchu’? (2 Korintionan 6:11-13)

Parse ku algun hende den e kongregashon di Korinto tabata falta apresio pa nan rumannan den fe. Nan kurason tabata limitá, nan no tabatin un kurason generoso. Nos tin ku hasi esfuerso pa kultivá berdadero apresio pa nos rumannan, i asta purba sera amistatnan nobo.—1/1, página 9-11.

• Kiko ta e seyamentu ku Revelashon 7:3 ta referí na dje?

Ora Dios ta ungi kristiannan ku spiritu santu, nan ta haña nan promé seyamentu. Pero Revelashon 7:3 ta referí na un seyamentu final, ora ku e ungínan ei ta haña konfirmashon ku nan a demostrá nan lealtat plenamente.—1/1, página 30-1.

• Kiko mayornan por siña for di loke Beibel ta konta di Samuel?

Pa kuminsá, nan mester siña nan yunan e palabra di Dios, manera e mayornan di Samuel sin duda a siñ’é. Ademas, nan tin ku animá nan yunan pa hasi e sirbishi di Yehova nan karera.—15/1, página 16.

• Kon nos por mustra ku nos ta felis di por warda riba Yehova?

Nos ta ‘sperando e dia di Yehova,’ antisipando e alivio ku nos lo haña ora ku e eliminá tur hende malbado. (2 Pedro 3:7, 12) Pero apesar ku Yehova ta ansioso pa pone fin na tur maldat, e ta frena su mes pa e por trese salbashon pa kristiannan den un manera ku lo glorifiká su nòmber. Nos mester tin e konfiansa ku Yehova sa kua ta e momento oportuno pa aktua, i miéntras tantu, nos mester sigui alab’é aktivamente. (Salmo 71:14, 15)—1/3, página 17-18.

• Noe a bai den e arka ku shete di kada sorto di bestia limpi òf shete par di kada sorto?

Yehova a bisa Noe: “Hiba ku bo shete-shete di tur bestia limpi.” (Génesis 7:1, 2, NW) Na hebreo, e ekspreshon “shete-shete,” literalmente e ripitishon di shete, no ke men shete par, i otro tekstonan di Beibel ta indiká esei. Noe evidentemente a hiba shete di kada, esta, tres par plùs ún bestia mas ku despues e por a usa pa sakrifisio. (Génesis 8:20)—15/3, página 31.

• Pakiko kristiannan mester “kontemplá” e resultado dje fe di e ansianonan, esta, di esnan ku ta hiba delantera?

Apòstel Pablo ta invitá nos pa “kontemplá,” òf konsiderá kuidadosamente, e resultado di e kondukta fiel di e ansianonan i pa sigui e ehèmpelnan di fe ei. (Hebreonan 13:7) Nos ta hasi esaki pasobra e Palabra di Dios ta manda nos hasié. Ademas, nos ta konvensí ku e ansianonan tin tantu e interesnan di Reino komo nos mihó interes na pechu.—1/4, página 28.