Desabilitá i Tòg Ansioso pa Sirbi

ORA bo topa Leonardo pa promé bes, kisas bo no ta mir’é komo un hende ku ta traha den konstrukshon. Un par di tempu pasá el a pèrdè tur su dos mannan den un aksidente di trabou. Sin embargo, apesar di Leonardo su desabilidat, e tabata traha duru na un sitio di konstrukshon na Acajutla, El Salvador, manera bo por mira riba e potrèt.

Pa e por a yuda den e proyekto di konstrukshon ei, el a diseñá su propio hèrmèntnan. E ta hinka e parti dilanti di su brasa drechi den un renchi di metal pegá na kabu di un skòp i na un manera ábil e ta hisa tera benta den un krenwa. Ya ku e no por gara e krenwa den un forma normal na e baranan, el a pega renchi na esakinan di manera ku e mes por hala e krenwa. Kiko a motivá Leonardo pa yuda den e proyekto aki?

Leonardo kier a ‘duna un man’ den e konstrukshon di un Salòn di Reino, e lugá di adorashon pa e kongregashon lokal di Testigunan di Yehova. E tabatin vários motibu pa hustifiká pakiko lo e no por a yuda ku e trabounan di konstrukshon. E tin un trabou fultaim, e ta desabilitá, i e ta sirbiendo kaba den su kongregashon komo sirbidó ministerial. Ma e kier a hasi tur loke tabata na su alkanse pa sirbi Dios na e sitio di konstrukshon tambe.

Bo ta sirbi Dios ku e mesun spiritu? Leonardo, na lugá di a usa su desabilidat komo un èksküs, a usa su fakultatnan mental pa diseñá su mes hèrmèntnan pa e por a hasi e trabou ku di otro manera lo no tabata posibel p’e. E ta sirbi Dios ‘ku henter su mente.’ (Mateo 22:37) E trahadónan ku ta partisipá den konstrukshon di Salònnan di Reino di Testigunan di Yehova rònt mundu, sea ku nan ta desabilitá òf nò, tin un spiritu boluntario. Nan reunionnan ta habrí pa públiko, i bo ta bonbiní.