Laga e Kongregashon Ser Edifiká

“E kongregashon . . . a drenta den un tempu di pas, siendo edifiká.”—ECHONAN 9:31, NW.

1. Ki preguntanan por lanta tokante “e kongregashon di Dios”?

RIBA e dia di Pentekòste di aña 33 di nos era, Yehova a aseptá un grupo di disipel di Kristu komo un nashon nobo, “e Israel di Dios.” (Galationan 6:16) E kristiannan ungí ku spiritu aki a bira tambe loke Beibel ta yama “e kongregashon di Dios.” (1 Korintionan 11:22, NW) Ma kiko esei a enserá? Kon “e kongregashon di Dios” lo a ser organisá? Kon lo el a funshoná riba tera, sin importá unda su miembronan tabata biba? I ki efekto e tin riba nos bida i felisidat?

2, 3. Kon Hesus a indiká ku e kongregashon lo tabatin un struktura?

² Manera e artíkulo anterior a trese dilanti, Hesus a predisí ku un dia e kongregashon aki di su siguidónan ungí lo a kuminsá eksistí, ora el a bisa apòstel Pedro: “Riba e baranka aki [Hesukristu] lo mi edifiká mi kongregashon, i e portanan di Hades lo no domin’é.” (Mateo 16:18, NW) Ademas, tempu ku Hesus tabata huntu ku su apòstelnan ainda, el a indiká ki funshon e kongregashon aki—ku pronto lo a ser establesé—lo tabatin i kon lo el a ser organisá.

³ Hesus a mustra ku palabra i echo ku algun kristian den e kongregashon lo a hiba delantera. Nan lo a hasi esei sirbiendo e otro kristiannan den nan grupo. Kristu a bisa: “Boso sa ku esnan ku ta rekonosí komo gobernantenan di e paganonan tin dominio riba nan; i nan shonnan ta ehersé outoridat riba nan. Ma entre boso no ta asina, ma ken ku kier bira grandi entre boso lo ta boso sirbidó; i ken ku kier ta esun di promé entre boso lo ta esklabo di tur.” (Marko 10:42-44) Ta opvio anto ku “e kongregashon di Dios” lo no tabata djis un grupo di persona plamá i isolá, sin ningun forma di organisashon. Mas bien, lo tabatin un struktura den kua miembronan di e kongregashon lo a traha i komuniká ku otro.

4, 5. Kon nos por sa ku e kongregashon lo mester a haña instrukshon spiritual?

⁴ Esun ku lo a fungi komo Kabes di e “kongregashon di Dios” ei a indiká ku su apòstelnan i otro personanan ku a siña for di dje lo a haña responsabilidatnan spesífiko pa ku e restu di e kongregashon. Pa nan hasi kiko? Un enkargo importante lo tabata pa duna e miembronan di e kongregashon instrukshon spiritual. Kòrda ku despues ku Hesus a resusitá, el a bisa Pedro den presensia di algun di e otro apòstelnan: “Simon yu di Juan, bo ta stima mi?” Pedro a kontest’é: “Sí, Señor, bo sa ku mi tin kariño pa bo.” Hesus a bis’é: “Alimentá mi lamchinan. . . . Pastoriá mi karné chikitunan. . . . Alimentá mi karné chikitunan.” (Juan 21:15-17, NW) Esei sí tabata un enkargo hopi importante!

⁵ Nos por mira for di e palabranan di Hesus ku por kompará e personanan ku ta ser reuní den e kongregashon ku karné den un tou. Lo mester alimentá e karnénan aki—hòmber, muhé i mucha kristian—den sentido spiritual i pastoriá nan apropiadamente. Ademas, siendo ku Hesus a manda tur su siguidónan pa siña otro hende i hasi disipel, kualke hende nobo ku ta bira su karné lo tin ku ser entrená pa kumpli ku e enkargo divino ei.—Mateo 28:19, 20.

6. Ki areglonan tabatin den e “kongregashon di Dios” resien establesí?

⁶ Despues ku “e kongregashon di Dios” a ser  formá, esnan ku tabata parti di dje a reuní regularmente pa risibí instrukshon i animashon mutuo: “Nan tabata dediká nan mes kontinuamente na e siñansa di e apòstelnan i na e komunion ku otro, na e kibramentu di pan i na orashon.” (Echonan 2:42, 46, 47) Un otro detaye notabel den e registro históriko ta ku a apuntá algun hòmber kualifiká pa yuda atendé sierto asuntunan práktiko. No a selektá nan pa motibu ku nan tabatin hopi skol òf abilidat tékniko. E hòmbernan aki tabata “yen di spiritu santu i di sabiduria.” Un di nan tabata Esteban, i e relato ta hala atenshon na e echo ku e tabata “yen di fe i di spiritu santu.” Debí ku e kristiannan tabata organisá den forma di kongregashon, un resultado di esei tabata ku “e palabra di Dios a sigui plama; i e kantidat di disipel a sigui oumentá masha hopi mes na Yerusalèm.”—Echonan 6:1-7.

Hòmbernan Ku Dios A Usa

7, 8. (a) Komo kiko e apòstelnan i ansianonan den Yerusalèm a sirbi entre e promé kristiannan? (b) Ora a manda instrukshon pa medio di e kongregashonnan, kiko tabata e resultado?

⁷ Manera bo por spera, ta e apòstelnan a hiba delantera den e kongregashonnan di promé siglo, pero nan no tabata e únikonan. Na dado momento, Pablo i su kompañeronan a regresá Antiokia di Siria. Echonan 14:27 ta bisa: “Ora nan a yega i a yama e iglesia huntu, nan a konta tur loke Dios a hasi [pa medio di] nan.” Miéntras nan tabata ku e kongregashon lokal ei, a lanta un pregunta tokante si mester a sirkunsidá kreyentenan no-hudiu. Pa resolvé e asuntu, nan a manda Pablo ku Barnabas “bai Yerusalèm serka e apòstelnan i e ansianonan,” kendenan klaramente tabata sirbi komo un kuerpo gobernante.—Echonan 15:1-3.

⁸ E ansiano kristian Santiago, mitar ruman di Hesus pero no un apòstel, a dirigí e reunion ora “e apòstelnan i e ansianonan a bin huntu pa papia riba e asuntu aki.” (Echonan 15:6) Despues di a deliberá riba dje i ku yudansa di spiritu santu, nan a yega na un konklushon na armonia ku e Skritura. Nan a manda esaki por eskrito pa e kongregashonnan lokal. (Echonan 15:22-32) Esnan ku a risibí e informashon aki a asept’é i aplik’é. Ku ki resultado? Esei a stimulá i animá e rumannan. Beibel ta informá: “Asina e iglesianan tabata wòrdu  fortifiká den fe, i tabata bira kada dia mas hopi.”—Echonan 16:5.

9. Den ki funshon hòmbernan kristian ku ta kumpli ku rekisitonan bíbliko ta sirbi?

⁹ Pero kon e kongregashonnan lokal mester a funshoná riba un base diario? Tuma, por ehèmpel, e kongregashonnan riba e isla di Kreta. Ounke hopi hende ku tabata biba einan tabatin un mal reputashon, algun a kambia i a bira kristian berdadero. (Tito 1:10-12; 2:2, 3) Nan tabata biba den vários stat, i tur tabata keda hopi leu for di e kuerpo gobernante na Yerusalèm. Sin embargo, esei no tabata un problema grandi pasobra, meskos ku na otro lugánan, a nombra hòmbernan ku tabata ‘ansiano’ den sentido spiritual den kada un di e kongregashonnan lokal na Kreta. E hòmbernan ei a kumpli ku e rekisitonan ku nos ta haña registrá den Beibel. Nan a ser nombrá komo ansiano, òf superintendente, ku por a “ekshortá ku doktrina sano i refutá esnan ku ta kontradisí.” (Tito 1:5-9; 1 Timoteo 3:1-7) Otro hòmbernan spiritual a kumpli ku e rekisitonan bíbliko nesesario pa yuda den e kongregashonnan komo diákono, òf sirbidó ministerial.—1 Timoteo 3:8-10, 12, 13.

10. Segun Mateo 18:15-17, kon mester a resolvé problemanan serio?

¹⁰ Hesus a indiká ku un struktura asina lo a eksistí. Kòrda e relato na Mateo 18:15-17, kaminda el a remarká ku tin biaha por surgi difikultat entre dos sirbidó di Dios, ora esun peka kontra e otro. Esun ku a keda perhudiká mester a aserká e otro i “mustr’é su falta” den privá, esta, entre nan dos so. Si e paso ei no a resolvé e asuntu, kisas por a pidi un òf dos otro persona ku tabata na haltura di e echonan pa yuda. I si esei ainda no a resolvé e asuntu, kiko mester a hasi? Hesus a bisa: “Si e nenga di skucha nan, bisa iglesia esaki; i si e nenga di skucha asta na iglesia, lag’é ta pa bo manera un pagano i un publikano.” Tempu ku Hesus a bisa esei, ainda “e kongregashon di Dios” tabata e nashon hudiu, pues na promé instante su palabranan a apliká na nan. * Sin embargo, unabes a establesé e kongregashon kristian, e instrukshon di Hesus lo a apliká na dje. Esaki ta un otro indikashon ku e pueblo di Dios lo tabatin un struktura di kongregashon pa edifiká i guia kada kristian.

11. Ki papel ansianonan mester a hunga den resolvé problema?

¹¹ E ansianonan, òf superintendentenan, tabata esnan indiká pa representá e kongregashon lokal ora di atendé òf resolvé problema òf ora di trata kasonan di piká. Esei ta kuadra ku e kualifikashonnan di ansiano menshoná na Tito 1:9. Ta bèrdat ku e ansianonan lokal tabata hòmbernan imperfekto, meskos ku Tito, kende Pablo a manda na e kongregashonnan pa korigí òf “regla loke [tabata] falta.” (Tito 1:4, 5) Awe, e rumannan ku ta ser evaluá pa keda nombrá komo ansiano mester ta demostrando nan fe i deboshon pa un tempu kaba. Esei ta duna otro rumannan den e kongregashon motibu pa pone konfiansa den e guia i direkshon ku nan ta risibí atraves di e areglo aki.

12. Ki responsabilidat ansianonan tin pa ku e kongregashon?

¹² Pablo a bisa e ansianonan den e kongregashon di Efeso: “Presta atenshon na boso mes i na henter e tou, den kua e spiritu santu a nombra boso komo superintendente, pa pastoriá e kongregashon di Dios, kua el a kumpra ku e sanger di su propio Yu.” (Echonan 20:28, NW) Awe tambe ta nombra superintendentenan di kongregashon “pa pastoriá e kongregashon di Dios.” Nan mester hasi esei ku amor, sin dominá e tou. (1 Pedro 5:2, 3) E superintendentenan mester hasi esfuerso pa edifiká i yuda “henter e tou.”

 No Alehá di e Kongregashon

13. Tin biaha, kiko por sosodé den un kongregashon i dikon?

¹³ E ansianonan i tambe tur otro miembro di e kongregashon ta imperfekto, pues de bes en kuando por presentá un problema òf mal komprondementu, manera a sosodé den promé siglo tempu ku ainda algun di e apòstelnan tabata na bida. (Filipensenan 4:2, 3) Kisas un superintendente òf un otro persona ta bisa algu ku ta parse ofensivo, sin konsiderashon òf no kompletamente bèrdat. Òf kisas nos ta pensa ku algu ku ta bai kontra di prinsipionan di Beibel ta tumando lugá, pero ta parse ku ounke e ansianonan lokal ta na haltura di e asuntu, nan no ta korigié. Podisé debidamente e ansianonan a atendé òf ta atendiendo e asuntu na armonia ku e Skritura i a base di echonan di kua nos no ta haltura di dje. Pero asta si e situashon ta manera nos ta pensa, konsiderá esaki: Pa un tempu tabata eksistí un malecho serio den e kongregashon di Korinto. Yehova tabatin e interesnan di e kongregashon ei na pechu i ku tempu el a sòru pa atendé e malecho na un manera korekto i firme. (1 Korintionan 5:1, 5, 9-11) Nos por puntra nos mes: ‘Si ami tabata biba na Korinto e tempu ei, kon lo mi a reakshoná tanten ku no a resolvé e asuntu?’

14, 15. Pakiko algun persona a stòp di sigui Hesus, i ki lès esei ta siña nos?

¹⁴ Konsiderá un otro kos ku por pasa den e kongregashon. Suponé ku un persona ta haña un siñansa bíbliko difísil pa komprondé i aseptá. Kisas el a hasi investigashon den Beibel i den publikashonnan disponibel via e kongregashon i a buska yudansa di otro kristiannan maduro, asta ansianonan. Pero e tin problema pa kapta òf aseptá e punto. Kiko e por hasi? Algu similar a tuma lugá mas o ménos un aña promé ku Hesus a muri. El a bisa ku e tabata “e pan di bida” i ku pa un hende haña bida eterno e tabatin ku “kome e karni di e Yu di hende i bebe su sanger.” Esei a shòk algun di su disipelnan. En bes di buska un splikashon òf simplemente warda ku fe den Yehova, hopi disipel ‘no a kana ku Hesus mas.’ (Juan 6:35, 41-66) Un biaha mas, si nos tabata einan, kiko nos lo a hasi?

¹⁵ Den nos tempu, algun persona a stòp di asosiá ku e kongregashon lokal, pensando ku nan por sirbi Dios riba nan mes. Podisé nan ta duna komo motibu ku nan a ser ofendí, òf nan ta pensa ku e ansianonan no ta korigiendo un  malecho òf ku nan no por aseptá sierto doktrina. Nan manera di aktua ta rasonabel? Ounke en bèrdat kada kristian mester tin un relashon personal ku Dios, nos no por nenga ku e ta usando un kongregashon mundial, manera el a hasi den tempu di e apòstelnan. Ademas, Yehova a usa i a bendishoná e kongregashonnan lokal den promé siglo, i a sòru pa tin ansiano i sirbidó ministerial kualifiká pa benefisiá e kongregashonnan. Esei ta e kaso awe tambe.

16. Si un persona ta hunga ku e idea di bandoná e kongregashon, riba kiko e mester pensa?

¹⁶ Si un kristian ta sinti ku e por dependé riba su relashon ku Dios sin tin nodi asosiá ku un kongregashon, de fakto e ta rechasando un areglo ku Dios a establesé, esta esun di tantu e kongregashon mundial komo e kongregashonnan lokal di e pueblo di Dios. Kisas e persona ta dal bai riba su mes òf ta asosiá ku djis algun otro individuo, pero unda e areglo di ansiano di kongregashon i di sirbidó ministerial a keda? Ta bon pa nota ku ora Pablo a skirbi e kongregashon na Kolosas i a manda nan lesa e karta na Laodisea tambe, el a bisa nan pa nan ta ankrá òf ‘araigá i edifiká den Kristu.’ E miembronan di e kongregashonnan ei, no individuonan ku a separá nan mes for di nan, lo a benefisiá di esaki.—Kolosensenan 2:6, 7; 4:16.

Pilá i Sosten di e Bèrdat

17. Kiko 1 Timoteo 3:15 ta siña nos tokante e kongregashon?

¹⁷ Den e promé karta ku apòstel Pablo a skirbi e ansiano kristian Timoteo, el a menshoná e rekisitonan ku ansiano i sirbidó ministerial den kongregashonnan lokal mester kumpli kuné. Djis despues di esei, Pablo a menshoná “e iglesia di e Dios bibu,” bisando ku esaki ta “e pilá i sosten di e bèrdat.” (1 Timoteo 3:15) Henter e kongregashon di kristian ungí sigur a demostrá di ta un pilá asina den e promé siglo. I sin duda e manera prinsipal ku e kristiannan individual por a risibí e bèrdat ei tabata via e kongregashon lokal. Ei ta kaminda nan por a tende kon e rumannan a presentá i defendé e bèrdat, kaminda nan por a ser edifiká.

18. Pakiko e reunionnan di kongregashon ta sumamente importante?

¹⁸ Meskos tambe e kongregashon mundial di kristiannan ta e kas di Dios, “pilá i sosten di e bèrdat.” Un manera prinsipal den kua nos ta ser edifiká, fortalesé den nos relashon ku Dios, i prepará pa hasi su boluntat ta ora nos ta asistí regularmente na e reunionnan di nos kongregashon lokal i ta partisipá den nan. Tempu ku Pablo a skirbi e kongregashon na Korinto, el a enfoká riba loke nan a papia na e reunionnan ei. El a skirbi ku el a deseá pa loke nan a papia na nan reunionnan tabata kla i komprendibel pa asina esnan ku a asistí na dje por a ser “edifiká.” (1 Korintionan 14:12, 17-19) Awe, si nos ta rekonosé ku ta Yehova Dios a outorisá e areglo pa kongregashonnan lokal i ta sosteniendo esaki, nos tambe por ser edifiká.

19. Dikon bo mester ta gradisidu ku bo kongregashon?

¹⁹ Pues, si nos ta deseá di ser edifiká komo kristian, nos mester keda den e kongregashon. Pa hopi tempu kaba el a resultá di ta un protekshon kontra siñansa falsu, i Dios ta usand’e pa perkurá pa e bon nobo di su Reino Mesiániko ser deklará rònt mundu. Sin duda, Dios a logra hopi kos pa medio di e kongregashon kristian.—Efesionan 3:9, 10.

[Nota]

Bo Ta Kòrda?

• Pakiko nos mester ferwagt ku Dios ta usando kongregashonnan riba tera?

• Kiko ansianonan, apesar ku nan ta imperfekto, ta hasi pa e kongregashon?

• Kon bo kongregashon ta edifiká bo?

[Preguntanan di Estudio]

[Plachi na página 26]

E apòstelnan i ansianonan den Yerusalèm a sirbi komo un kuerpo gobernante

[Plachi na página 28]

Ansiano- i sirbidónan ministerial ta risibí instrukshon pa nan por kumpli ku nan responsabilidatnan pa ku e kongregashon