Historia di Bida

Nos Búskeda di Tesoro A Produsí Rikesa Duradero

Segun e relato di Dorothea Smith i Dora Ward

Ki klase di tesoro nos tabata buska? Nos tabata dos mucha muhé ku e deseo ferviente di partisipá den kumplimentu di e mandamentu di Hesus: “Bai i hasi tur e nashonnan disipel di mi.” (Mateo 28:19) Laga nos splika kon e búskeda aki a produsí rikesa duradero.

DOROTHEA: Mi a nase na aña 1915, djis despues ku Promé Guera Mundial a kuminsá. Mi tabata e di tres yu den nos famia. Nos tabata biba serka di Howell, na Michigan, Merka. Mi tata no tabata un persona religioso, pero mi mama sí tabata un muhé temeroso di Dios i el a purba siña nos pa sigui e Dies Mandamentunan. Un kos ku a preokup’é tabata ku ni ami ni mi ruman hòmber Willis, ni mi ruman muhé Viola, no tabata miembro di un iglesia.

Ora mi tabatin 12 aña, mi mama a disidí ku mi mester a batisá komo miembro di e Iglesia Presbiteriano. Mi ta kòrda kla-kla e dia di mi boutismo. Dos beibi, kargá pa nan mama, a batisá pareu ku mi. Mi a sinti masha bèrgwensa mes ku nan a batisá mi huntu ku beibi. E pastor a sprengu un par di gota di awa riba mi kabes i murmurá algun palabra ku mi no a komprondé. Bon mirá, e dos beibinan ei mes tabata sa mas tokante boutismo ku mi!

Un dia na aña 1932, un outo a kore drenta den nos kurá, i mi mama a bai wak ta ken tabata na porta. Tabata dos yònkuman ku a ofresé buki religioso. Un di nan a introdusí su mes komo Albert Schroeder. El a mustra mi  mama algun literatura publiká pa Testigunan di Yehova. Mi mama a tuma e bukinan. E publikashonnan ei a yud’é aseptá e bèrdat for di e Palabra di Dios.

E Búskeda di Tesoro Ta Kuminsá

Ku tempu mi a muda bai Detroit pa biba serka mi ruman muhé. Einan mi a topa un señora di edat ku tabata bishitá mi ruman muhé pa siñ’é Beibel. E kòmbersashonnan ei a pone mi kòrda riba un programa semanal di radio ku mi tabata skucha na kas huntu ku mi mama. E programa ei tabata konsistí di un diskurso di 15 minüt basá riba un tópiko bíbliko i presentá pa J. F. Rutherford, kende tabata hiba delantera den Testigunan di Yehova e tempu ei. Na 1937 nos a kuminsá asosiá ku e promé kongregashon di Testigunan di Yehova na Detroit. E siguiente aña mi a batisá.

Na prinsipio di dékada di 1940, nan a anunsiá ku Testigunan di Yehova tabata bai habri un skol ku yama Galaad na South Lansing, New York, pa entrená rumannan pa bira misionero. Ora mi a tende ku algun di e graduadonan di e skol ei lo a haña invitashon pa sirbi den eksterior, mi a pensa den mi mes: ‘Esei ta algu pa mi!’ Mi a pone komo meta pa mi bai Galaad. Lo tabata un gran privilegio di por buska “tesoro” den otro pais, es desir, buska hende ku ta deseá di bira disipel di Kristu Hesus!—Hageo 2:6, 7.

Yegando Pokopoko na Mi Meta

Na aprel 1942, mi a kita for di trabou i a kuminsá sirbi komo pionero, òf predikadó di tempu kompletu, na Findlay, Ohio, huntu ku un grupo di sinku ruman muhé spiritual. Einan no tabatin un kongregashon ku a tene e reunionnan regularmente, pero nos tabata animá otro dor di lesa artíkulonan for di e publikashonnan kristian huntu komo grupo. Durante mi promé luna komo pionero, mi a laga 95 buki ku hende interesá! Mas o ménos un aña i mei despues, mi a haña e asignashon pa sirbi komo pionero spesial na Chambersburg, Pennsylvania. Einan mi a djòin un grupo di sinku otro pionero, ku a inkluí Dora Ward, un ruman muhé kristian di Iowa. Ami ku Dora a bira partner den e trabou di pionero. Nos a batisá e mesun aña, i nos tabatin e mesun deseo di asistí na Skol di Galaad i sirbi den eksterior komo misionero.

Na kuminsamentu di 1944, e dia grandi a yega! Nos tur dos a haña invitashon pa asistí na e di kuater klas di Galaad. Nos a kuminsá na ougùstùs di e aña ei. Pero promé ku mi sigui, laga Dora konta bo kon bin el a bira mi partner di hopi aña den e búskeda di tesoro.

 Ansioso pa Kuminsá Prediká Tempu Kompletu

DORA: Semper mi mama tabata pidi Dios den orashon p’e yud’é komprondé Su Palabra. Un djadumingu mi tabata huntu kuné ora nos a tende un charla na radio di J. F. Rutherford. Na final di e diskurso, mi mama a deklará: “Esaki ta e bèrdat!” Poko despues, nos a kuminsá studia e publikashonnan di Testigunan di Yehova. Na 1935, tempu mi tabatin 12 aña, mi a asistí na un diskurso di boutismo ku un Testigu di Yehova a duna, i mi a sinti e deseo sinsero di dediká mi bida na Yehova. Tres aña despues mi a batisá. Mi dedikashon i boutismo a yuda mi mantené mi metanan bibu durante e añanan ku mi mester a sigui bai skol. Mi tabata ansioso pa kaba skol pa mi por a kuminsá sirbi komo pionero.

E tempu ei e grupo di Testigu ku nos tabata asosiá kuné tabata reuní komo kongregashon na Fort Dodge, Iowa. Nos mester a hasi hopi esfuerso pa asistí na e reunionnan kristian. E tempu ei, e artíkulonan di estudio di E Toren di Vigilansia no tabatin pregunta pa konsiderá durante e reunion di kongregashon. Nan tabata pidi e publikadónan pa entregá pregunta di antemano na e ruman ku a kondusí e Estudio di Toren di Vigilansia. Tur djaluna anochi, ami ku mi mama tabata prepará un pregunta pa kada paragraf, i nos tabata duna e konduktor esakinan di manera ku e por a skohe kua e ta usa.

De bes en kuando, nos kongregashon tabata haña bishita di un superintendente biahero. Un di e rumannan ei, John Booth, a yuda mi kuminsá prediká di kas pa kas ora mi tabatin 12 aña. Ku 17 aña, mi a puntr’é kon mi tin ku yena un solisitut pa traha pionero, i el a yuda mi. Mi no por a imaginá mi ku nos kamindanan lo a krusa atrobe i ku lo el a bira un amigu pa bida largu!

Komo pionero, mi tabata traha hopi biaha ku Ruman Dorothy Aronson, un predikadó di tempu kompletu ku tabata 15 aña mas grandi ku mi. Nos tabata partner den e trabou di pionero te ora ku el a haña invitashon pa asistí na e promé klas di Galaad na 1943. Despues di esei, mi a sigui traha pionero mi so.

Oposishon No Por Para Nos

E dékada di 1940 tabata añanan difísil pa nos debí na e ambiente patriótiko ku Segundo Guera Mundial a fomentá. Ora nos tabata prediká di kas pa kas, hende tabata tira nos hopi biaha ku webu putrí, tomati hechu i tin bes asta ku piedra! Un prueba mas serio a presentá ora ku nos tabata ofresé e revistanan Toren  di Vigilansia i Konsuelo (awor Spièrta!) na skina di kaya. Polis, instigá pa opositornan religioso, tabata aserká nos i menasá di arestá nos si nan a bolbe haña nos ta prediká públikamente.

Klaru ku nos tabata nenga di stòp di prediká, i nan tabata hiba nos warda di polis pa interogá nos. Despues ku nan a laga nos bai, nos tabata bolbe bèk na e mesun skina di kaya i tabata ofresé e mesun revistanan. Riba konseho di e ruman hòmbernan responsabel, nos a usa Isaias 61:1 i 2 pa defendé nos posishon. Un biaha un polis yòn a aserká mi, anto tur nèrvioso mi a resitá e versíkulonan ei p’e. Pa mi sorpresa, el a bira lomba kana bai! Segun mi, e angelnan tabata protehá nos.

Un Dia Inolvidabel

Na 1941 mi tabatin e goso di asistí na un kongreso di sinku dia di Testigunan di Yehova na St. Louis, Missouri. Durante e kongreso ei, Ruman Rutherford a pidi pa tur mucha entre 5 pa 18 aña di edat sinta den e sekshon prinsipal di e stadion. Tabatin míles di mucha. Ruman Rutherford a kumindá nos dor di zuai su lensu. Nos tur a zuai bèk. Despues ku el a duna un diskurso di ún ora, el a bisa: “Muchanan, boso tur ku ta di akuerdo pa hasi e boluntat di Dios i ku a tuma boso posishon na banda di Dios su gobièrnu teokrátiko den man di Kristu Hesus i ku pues a bai di akuerdo pa obedesé Dios i su Rei, por fabor lanta para.” E 15.000 muchanan a lanta para pareu, i ami tabata un di nan! E oradó a agregá: “Boso tur ku ta bai hasi tur loke ta posibel pa konta otronan tokante e Reino di Dios i e bendishonnan ku e ta trese kuné, por fabor bisa Sí.” Nos a hasié, i a sigui un tremendo aplouso.

Despues el a presentá e buki nobo Yunan, * i un fila largu di hóbennan a bin na plataforma, kaminda Ruman Rutherford a duna kada un di nos un ehemplar di e buki nobo. Tabata masha emoshonante! Awe, un kantidat grandi di e muchanan ku a haña un buki na e okashon ei ta sirbiendo Yehova te ainda selosamente rònt mundu, papiando tokante e Reino di Dios i su hustisia.—Salmo 148:12, 13.

Despues di a traha pionero mi so pa tres aña, mi a keda masha kontentu di haña e asignashon pa sirbi komo pionero spesial na Chambersburg! Einan mi a topa Dorothea, i no a tarda mashá ku nos a bira inseparabel. Nos tabata yen di energia i entusiasmo hubenil, ansioso pa oumentá nos partisipashon den e trabou di prediká. Huntu nos a kuminsá ku un búskeda di tesoro ku a dura henter nos bida.—Salmo 110:3.

Un par di luna despues ku nos a kuminsá sirbi komo pionero spesial, nos a topa un graduado di e promé klas di Galaad, Albert Mann. E tabata a punto di bai su asignashon den eksterior. El a animá nos pa aseptá kualke asignashon den eksterior ku nos haña.

Huntu na Skol

DORA KU DOROTHEA: Imaginá bo nos goso ora nos a kuminsá ku nos entrenamentu komo misionero! E promé dia di skol, Albert Schroeder, e ruman ku 12 aña promé a laga e seri di buki Estudio di e Skritura ku e mama di Dorothea, a registrá nos na e skol. John Booth tambe tabata einan. Awor e tabata sirbidó di hasienda na e Hasienda di Reino, kaminda e skol tabata situá. Mas despues, ámbos ruman hòmber a sirbi komo miembro di e Kuerpo Gobernante di Testigunan di Yehova.

Na Skol di Galaad, nos a studia e bèrdatnan mas profundo di Beibel. Esei tabata un entrenamentu ekselente. Tabatin 104 studiante den nos klas, inkluso e promé studiante stranhero for di Mexico. E tabata purba mehorá su ingles miéntras ku nos tabata purba siña spañó. Esta emoshoná nos tabata e dia ku Ruman Nathan H. Knorr a parti nos asignashonnan pa eksterior! Mayoria di nos a keda asigná na Sentro- i Suramérika; nos dos lo a bai Chile.

 Buskando Tesoro na Chile

Pa nos por a drenta Chile, nos mester a haña un visa, lokual a tuma basta tempu. Pues, despues ku nos a gradua na yanüari 1945, nos a sirbi komo pionero na Washington, D.C., pa un aña i mei. Ora ku nos a haña nos visa, nos a bira parti di un grupo di nuebe misionero ku a hasi e biahe pa Chile. Shete di nan tabata di e klasnan anterior di Galaad.

Vários ruman kristian a bin topa nos na nos yegada na e kapital, Santiago. Un di nan tabata Albert Mann, e graduado di Galaad ku a animá nos un par di aña promé. El a bin Chile un aña promé ku nos, huntu ku Joseph Ferrari di e segundo klas di Galaad. Tabatin ménos ku 100 publikadó den henter Chile ora nos a yega. Nos tabata ansioso pa buska i haña mas tesoro, esta, hendenan di kurason onrado, den nos asignashon nobo.

Nos a ser asigná pa sirbi den un kas di misionero na Santiago. Pa nos tabata un eksperensia nobo di biba komo parti di un famia grandi di misionero. Fuera di dediká un kantidat fiho di ora den e trabou di prediká, tur misionero mester a kushiná ún biaha pa siman p’e famia. Nos a pasa nos momentonan di bèrgwensa. Un biaha, nos a prepará kuki kayente komo desayuno pa nos famia hambrá, pero ora nos a saka e kukinan for di fòrnu, nos a ripará ku nan tabatin un holó desagradabel. Logá, nos a usa ‘baking soda’ en bes di ‘baking powder’! Un hende a pone e baking soda den un bleki bashí di baking powder.

Sin embargo, e erornan ku nos a hasi segun ku nos tabata siña spañó a kousa mas bèrgwensa ainda. Un famia grandi ku nos tabata studia Beibel kuné kasi a stòp di studia pasobra nan no por a komprondé ta kiko nos tabata bisa nan. Pero dor di buska e tekstonan den nan mes Beibel, nan a logra siña e bèrdat, i sinku di nan a bira Testigu di Yehova. Den e añanan ei, misioneronan nobo no tabata haña un kurso pa siña e idioma. Nos tabata kuminsá mesora den e trabou di prediká i a purba siña e idioma for di e hendenan ku nos tabata prediká na dje.

Nos a kondusí hopi estudio di Beibel, i algun di nos studiantenan a progresá lihé. Ku otronan nos mester a tene mas pasenshi. Teresa Tello, un damsita, a skucha e mensahe di e bèrdat i a bisa: “Por fabor, bin bèk i konta mi mas.” Nos a bolbe 12 biaha sin hañ’é. Tres aña a pasa. Un dia nos tabata na un asamblea den un teater na Santiago. Ora nos tabata saliendo for di asamblea riba djadumingu, un hende a yama: “Señorita Dora, Señorita Dora!” Ora nos a bira wak, tabata Teresa. E tabata di bishita serka su ruman muhé na otro banda di kaya i el a bin na e teater pa wak ta kiko tabata pasando. Esta un goso di top’é atrobe! Nos a hasi areglo pa studia Beibel kuné, i poko despues el a batisá. Despues el a bira pionero spesial. Awe, un 45 aña despues, ainda Teresa ta den sirbishi di pionero spesial.—Eklesiastés 11:1.

 Deskubriendo Tesoro den “Santu”

Na 1959 nos a ser asigná na Punta Arenas—ku ta nifiká “Punta di Santu”—e punto di mas zùit di Chile su kosta di 4.300 kilometer largu. Punta Arenas ta un teritorio ekstraordinario. Den lunanan di zomer, e dianan ta largu; te ku mitar di 12 djanochi tin lus di dia. Nos por a pasa hopi dia den sirbishi pero no sin opstákulo, pasobra zomer ta trese bientunan fuerte di Antártika. Lunanan di wenter ta sumamente friu, i e dianan ta kòrtiku.

Apesar di e retonan aki, Punta Arenas tin su aspektonan fasinante. Den zomer, parti wèst di shelu ta konstantemente yen di nubia diki di áwaseru. De bes en kuando, awa ta bira basha riba bo kabes, pero despues bientu ta kuminsá supla i seka bo bèk. Kaba ta sigui un bunita regenbog segun ku solo ta sali dor di e nubianan. E regenbognan aki tin biaha ta keda oranan largu, bai i bin segun ku solo ta penetrá ku su rayonan dor di e nubianan di áwaseru.—Jòb 37:14.

E tempu ei tabatin masha tiki publikadó na Punta Arenas. Nos komo ruman muhé tabatin ku kondusí e reunionnan den e kongregashon chikitu lokal. Yehova a bendishoná nos esfuersonan. Trintishete aña despues, nos a bolbe na e área aki pa un bishita. Kiko nos a haña? Seis kongregashon progresivo i tres Salòn di Reino bunita. Ki un goso ku Yehova a permití nos deskubrí tesoronan spiritual den e santunan den zùit ei!—Zakarias 4:10.

Mas Tesoro na “Playa Hanchu”

Despues di a sirbi pa tres aña i mei na Punta Arenas, nos a ser asigná pa sirbi na e siudat portuario di Valparaiso. E stat ta konsistí di 41 seru ku ta rondoná un bahia ku bista riba Oséano Pasífiko. Nos a konsentrá nos aktividatnan di prediká riba un di e serunan aki, Playa Ancha. Durante e 16 añanan ku nos a keda einan, nos a mira un grupo di mucha hòmber kristian progresá asina bon spiritualmente ku awe nan ta sirbi komo superintendente biahero i komo ansiano kristian den kongregashonnan rònt Chile.

Nos siguiente asignashon komo misionero tabata Viña del Mar. Nos a sirbi einan pa tres aña i mei te ora ku un temblor a kousa daño na e kas di misionero. Nos a bai bèk Santiago, kaminda 40 aña promé nos a kuminsá ku nos sirbishi di misionero. Kosnan a kambia einan. Tabatin un sukursal nobo, i e edifisio di sukursal bieu a bira un kas pa tur misionero ku tabatin ainda na e pais. Mas despues nan a kuminsá usa e kas ei komo e lugá pa tene e Skol di Entrenamentu Ministerial. E tempu ei, Yehova a bolbe demostrá su bondat amoroso na nos. Nos sinku misionero ku tabata di edat avansá a haña e invitashon pa bin biba na Bètel. Durante e tempu ku nos a sirbi aki na Chile nos a haña 15 diferente asignashon. Nos a mira e obra krese for di ménos ku 100 publikadó te na alrededor di 70.000 publikadó! Tabata un goso di por a buska tesoro na Chile durante 57 aña!

Nos ta sinti nos masha bendishoná ku Yehova a permití nos haña asina tantu hende—realmente tesoro—ku te awe ta útil den Yehova su organisashon. Durante e mas ku 60 añanan ku nos ta sirbiendo Yehova huntu, nos por bisa di kurason ku nos ta di akuerdo ku e sintimentunan ku Rei David a ekspresá ora el a skirbi: “Ki grandi ta bo bondat, ku bo a warda pa esnan ku tin temor di bo!”—Salmo 31:19.

[Nota]

[Plachinan na página 9]

Dorothea na 2002 i den e trabou di prediká na 1943

[Plachi na página 10]

Predikando den kaya na Fort Dodge, Iowa, na 1942

[Plachi na página 10]

Dora, 2002

[Plachi na página 12]

Dorothea ku Dora pafó di nan promé kas di misionero na Chile, 1946