Pregunta di Lektor

Na ki tempu e yamada di kristiannan pa e speransa selestial ta stòp?

Beibel no ta duna un kontesta spesífiko riba e pregunta ei. Loke sí nos sa ta ku na aña 33 di nos era e disipelnan di Hesus a kuminsá ser ungí ku e speransa di haña nan herensia selestial. (Echonan 2:1-4) Ademas, nos sa ku despues di morto di e apòstelnan, berdadero kristiannan ungí—kompará ku “trigu”—a “krese huntu” ku kristiannan falsu, kompará ku “yerba shimaron.” (Mateo 13:24-30) Mas despues, kuminsando den e parti final di siglo 19, kristiannan ungí a bolbe bira notablemente aktivo. Na aña 1919 “e kosecha di tera” a kuminsá, i esei a inkluí rekohementu di e ungínan.—Revelashon 14:15, 16.

For di final di siglo 19 te ku 1931, e propósito prinsipal di e trabou di prediká tabata pa rekohé e miembronan ku a resta di e kurpa di Kristu. Na 1931 e Studiantenan di Beibel a tuma e nòmber bíbliko Testigunan di Yehova, i den E Toren di Vigilansia na ingles di 15 di novèmber 1933, nan a ekspresá e pensamentu ku e nòmber úniko aki tabata e “denario” ku e parábola di Hesus na Mateo 20:1-16 ta referí na dje. Nan a kere ku e 12 oranan menshoná den e parábola tabata korespondé ku e 12 añanan ku a transkurí di 1919 pa 1931. Pa hopi aña despues di esei, nan a kere ku e yamada pa e Reino selestial a terminá na 1931 i ku esnan yamá pa ta ko-heredero ku Kristu na 1930 i 1931 tabata “e último grupo” yamá. (Mateo 20:6-8) Sin embargo, na 1966 nan a presentá un komprondementu ahustá di e parábola ei, i a bira bisto ku e no tabatin nada keber ku fin di e yamada di e ungínan.

Na 1935 nan a komprondé ku e “multitut grandi” di Revelashon 7:9-15 lo mester a konsistí di e “otro karnénan,” esta, kristiannan ku tin un speransa terenal, kendenan lo a ser rekohé durante “e último dianan” i sobrebibí Armagedón komo grupo. (Juan 10:16; 2 Timoteo 3:1; Revelashon 21:3, 4) Despues di e aña ei, e trabou di hasi disipel a konsentrá prinsipalmente riba rekohementu di e gran multitut. P’esei, spesialmente despues di 1966 nan a kere ku e yamada selestial a stòp na 1935. Loke a parse di konfirmá esaki  tabata ku kasi tur kristian ku a batisá despues di 1935 a sinti ku nan tin e speransa terenal. Despues di esei, nan a kere ku ken ku a haña e yamada pa e speransa selestial tabata pa remplasá kristiannan ungí ku a bira infiel.

No tin duda ku si un di e ungínan kai for di e bèrdat sin arepentí, Yehova ta yama un otro persona pa tuma su lugá. (Romanonan 11:17-22) Sin embargo, e kantidat di ungí berdadero ku a bira infiel probablemente no ta grandi. Di otro banda, segun ku tempu a pasa, algun kristian ku a batisá despues di 1935 a haña testimonio di spiritu santu ku nan tin e speransa selestial. (Romanonan 8:16, 17) Pues, aparentemente nos no por fiha un fecha spesífiko ku e yamada di kristiannan ku e speransa selestial a terminá.

Kon nos mester mira un persona ku a determiná den su kurason ku awor e ta un ungí i ta kuminsá tuma di e emblemanan na Memorial? Nos no mester husg’é. E asuntu ta entre é ku Yehova. (Romanonan 14:12) Sin embargo, berdadero kristiannan ungí no ta eksigí atenshon spesial. Nan no ta kere ku pasobra nan ta ungí esei ta duna nan komprondementu “spesial,” mas ayá di loke asta algun miembro di e multitut grandi ku hopi eksperensia por tin. Nan no ta kere ku nan lo mester tin mas spiritu santu ku nan kompañeronan ku ta otro karné. Tampoko nan no ta ferwagt un trato spesial ni pretendé ku e echo ku nan ta tuma di e emblemanan ta pone nan den un puesto mas haltu ku e ansianonan nombrá den e kongregashon. Humildemente nan ta kòrda ku algun hòmber ungí den promé siglo no tabata kualifiká pa sirbi komo ansiano ni sirbidó ministerial. (1 Timoteo 3:1-10, 12, 13; Tito 1:5-9; Santiago 3:1) Algun kristian ungí tabata asta spiritualmente débil. (1 Tesalonisensenan 5:14) Anto e ruman muhénan, maske nan tabata ungí, no a duna siñansa den kongregashon.—1 Timoteo 2:11, 12.

Pues, kristiannan ungí huntu ku nan kompañeronan, e otro karnénan, ta hasi esfuerso pa keda spiritualmente fuerte. Nan ta kultivá e fruta di spiritu i ta promové pas den e kongregashon. Tur kristian, sea ungí òf otro karné, ta traha duru den e trabou di prediká e bon nobo i di hasi disipel bou di direkshon di e Kuerpo Gobernante. Kristiannan ungí ta keda satisfecho di por hasi esaki tanten ku e boluntat di Dios ta pa nan keda riba tera komo sirbidó di Yehova.