Jefte A Kumpli ku Su Promesa na Yehova

UN GUERERO viktorioso a regresá kas despues di a libra su nashon for di opreshon. Su yu muhé a kore bin kontr’é, bailando yen di alegria i tokando tamburein. Pero ora e guerero a mira su yu, en bes di alegrá, el a sker su paña. Dikon? Akaso e no tabata mes kontentu ku su yu ku el a bolbe kas sano i salvo? Ta kua bataya el a gana? Ken e guerero aki tabata?

E hòmber tabata Jefte, un di e huesnan di Israel di antigwedat. Pero pa kontestá e otro preguntanan i pa mira ki nifikashon e relato aki tin pa nos, nos tin ku konsiderá loke a tuma lugá promé ku e reenkuentro inusual aki.

Un Krísis den Israel

Jefte a biba den un tempu di krísis. Su paisanonan israelita a bandoná adorashon puru i tabata sirbi e diosnan di Sidon, Moab, Amon i Filistea. Komo konsekuensia, Yehova a laga su pueblo kai den man di e amonita- i filisteonan, kende a oprimí nan pa 18 aña largu. Spesialmente e habitantenan di Galaad, na e banda ost di Riu Hordan, a sufri hopi. * Finalmente, e israelitanan a realisá ku nan tabata den mal kaminda. Nan a repentí, buska Yehova su yudansa, kuminsá sirbié i deshasí di e diosnan stranhero ku nan tabatin.—Huesnan 10:6-16.

E amonitanan a kamper na Galaad, i e israelitanan a reuní pa kontra ku nan. Pero Israel tabatin mester di un hefe, un komandante. (Huesnan 10:17, 18) Miéntras tantu, Jefte tabatin su propio problemanan. Su mitar rumannan haragan a kore kuné pa nan por a hòrta su herensia. P’esei Jefte a muda pa Tob, un region na ost di Galaad ku no tabatin protekshon kontra e enemigunan di Israel. “Hòmbernan sin nada di hasi” [NW], probablemente hòmbernan ku a pèrdè trabou debí na e opresornan òf ku a nenga di sirbi komo katibu pa nan, a uni ku Jefte. Nan “tabata sali kuné.” Esei podisé a nifiká ku nan tabata kompañá Jefte ora ku e tabata bai invadí nan bisiñanan enemigu. Probablemente debí na Jefte su abilidat i kurashi ekstraordinario den kombate, e Skritura ta yam’é “un guerero balente.” (Huesnan 11:1-3) Pues, ta ken lo a dirigí Israel kontra e amonitanan?

“Bin i Sea Nos Hefe”

E ansianonan di Galaad a urgi Jefte: “Bin i sea nos hefe.” Si nan a kere ku lo el a bula gara e oportunidat pa regresá su pais, nan tabata  ekiboká. El a kontestá nan: “Boso no tabata odia mi i a kore ku mi for di e kas di mi tata? Pakiko anto boso a bin serka mi awor ku boso ta den problema?” Esta inhustu ku na promé instante nan a rechasá Jefte anto despues a akudí serka e mes pa yudansa!—Huesnan 11:4-7.

Bou di un solo kondishon Jefte lo a hiba delantera den Galaad. El a deklará: ‘Si Yehova entregá Amon na mi, lo mi bira boso kabesante!’ Viktoria lo a duna prueba di Dios su respaldo, pero tambe Jefte kier a hasi sigur ku e pueblo lo no a bandoná Yehova su guia asina ku e krísis lo a pasa.—Huesnan 11:8-11.

Trato ku Amon

Jefte a purba negoshá ku e amonitanan. El a manda mensahero na nan rei pa haña sa e motibu di e agreshon amonita. E kontesta a inkluí un akusashon: Tempu ku e israelitanan a sali for di Egipto, nan a okupá teritorio amonita, i awor nan mester entreg’é bèk.—Huesnan 11:12, 13.

Jefte tabatin bon konosementu di e historia di Israel, i ábilmente el a refutá e demandanan amonita. El a bisa nan ku e israelitanan no a molestiá ni Amon ni Moab ni Edòm ora nan a sali for di Egipto; es mas, Amon no tabatin e teritorio en kuestion tempu di e Éksodo di Israel. Ta e amoreonan tabatiné, pero Dios a entregá nan rei, Sehon, den man di Israel. Ademas, e israelitanan tabatin 300 aña ta biba den e área ei. Dikon ta awor numa e amonitanan tabata kier e bèk?—Huesnan 11:14-22, 26.

Jefte a enfoká tambe riba un kuestion ku tabata e motibu prinsipal pa e sufrimentu di Israel: Ken ta e Dios berdadero? Ta Yehova òf e diosnan di e pais ku Israel a okupá? Si e dios Kemos tabatin poder, lo e no a us’é pa yuda e pueblo keda ku e pais? Esaki tabata un bataya entre religion falsu, promové pa e amonitanan, i adorashon berdadero. P’esei Jefte a konkluí lógikamente: “Ku [Yehova], e Hues, husga awe entre e yunan di Israel i e yu hòmbernan di Amon.”—Huesnan 11:23-27.

E rei di Amon no a hasi kaso di Jefte su mensahe bon kla. “Awor e spiritu di SEÑOR a bin riba Jefte, asina ku el a pasa dor di Galaad i Manasés,” probablemente pa reklutá hòmbernan físikamente fuerte pa un bataya kontra Amon.—Huesnan 11:28, 29.

E Promesa di Jefte

Ku e deseo ferviente di haña guia divino, Jefte a primintí Dios: “Si di bèrdat bo entregá e yu hòmbernan di Amon den mi man, e ora ei kiko ku sali for di e portanan di mi kas pa kontra mi ora mi bolbe na pas for di e yu hòmbernan di Amon, lo ta di SEÑOR, i lo mi ofresé esaki komo un ofrenda kimá.” Komo kontesta, Dios a bendishoná Jefte di manera ku el a logra derotá 20 stat amonita den un ‘matansa grandi,’ i asina el a dominá e enemigunan di Israel.—Huesnan 11:30-33.

Ora Jefte tabata biniendo bèk for di e bataya, ken a sali bin kontr’é? Su yu muhé stima, su úniko yu! E relato ta bisa: “Ora ku el a mir’é, el a sker su pañanan i a bisa: ‘Ai, mi yu! Bo a kibra mi kurason, i bo ta entre esnan ku ta hinka mi den problema [“ta abo ta esun ku a bira opheto di mi maldishon,” NW]; pasobra mi a duna SEÑOR mi palabra, i mi no por hala esaki atras.’”—Huesnan 11:34, 35.

Jefte lo a ègt sakrifiká su yu muhé? Nò. No por ta esei e tabatin na mente. Yehova a odia sakrifisio humano literal, un di e práktikanan malbado di e kananeonan. (Levítiko 18:21; Deuteronomio 12:31) E spiritu di Dios tabata aktivo riba Jefte ora ku el a hasi su promesa, i es mas, Yehova a bendishoná su esfuerso. E Skritura ta papia bon di Jefte debí na su fe i e papel ku el a hunga en konekshon ku e propósito divino. (1 Samuel 12:11; Hebreonan 11:32-34) Pues un sakrifisio humano—un asesinato—ta algu ku lo e no a ni pensa mes di hasi. Kiko Jefte tabata ke men anto ora el a primintí di ofresé un persona na Yehova?

 Jefte evidentemente tabata ke men ku lo el a dediká esun ku a bin kontr’é eksklusivamente na e sirbishi di Dios. Bou di e Lei di Moisés tabata posibel pa primintí di duna alma na Yehova. Por ehèmpel, hende muhé tabata sirbi na e santuario, podisé pa hala awa. (Eksodo 38:8; 1 Samuel 2:22) Nos no sa mashá di e sirbishi ei ni si por lo general e tabata algu permanente. Jefte aparentemente tabatin e deboshon spesial ei na mente ora ku el a hasi su promesa, i ta parse ku su promesa a enserá sirbishi permanente.

Tantu Jefte su yu muhé komo mas despues e mucha hòmber Samuel, a koperá plenamente pa kumpli ku e promesanan di nan mayornan temeroso di Dios. (1 Samuel 1:11) Komo un adoradó leal di Yehova, Jefte su yu muhé tabata mes konvensí ku su tata ku mester a kumpli ku e promesa. E sakrifisio tabata grandi, pasobra esei a nifiká ku e yu muhé lo no a kasa nunka. El a yora pa motibu di su virginidat pasobra tur israelita tabata deseá di haña yu pa nan por a preservá e nòmber i herensia di nan famia. Pa Jefte, kumpli ku e promesa a nifiká ku lo el a pèrdè e kompania di su úniko yu stimá.—Huesnan 11:36-39.

E bida di e mosa fiel aki no a bai pèrdí. Sirbishi di tempu kompletu na e kas di Yehova tabata un ekselente manera p’e onra Dios. Ademas, esei lo a dun’é satisfakshon i tabata algu digno di elogio. Pues, “tur aña e yu muhénan di Israel tabata bai pa rekordá [òf, “duna elogio na e,” NW] yu muhé di Jefte e galadita.” (Huesnan 11:40) I Jefte siguramente a alegrá den e sirbishi ku su yu tabata rindi na Yehova.

Hopi hende den e pueblo di Dios awe ta skohe un bida di sirbishi di tempu kompletu komo pionero, misionero, minister biahero òf miembro di e famia di Bètel. Esaki lo por nifiká ku nan no ta mira nan famianan mes tantu ku nan lo ke. Sin embargo, tantu esnan ku ta sirbi asina komo nan famianan por alegrá den e sirbishi sagrado ei ku ta ser rindí na Yehova.—Salmo 110:3; Hebreonan 13:15, 16.

Rebelion Kontra e Guia di Dios

Mirando bèk na e tempu di Jefte, nos ta mira ku hopi israelita a rechasá e guia di Yehova. Apesar di evidensia ku e bendishon di Dios tabata riba Jefte, e hòmbernan di Efrain a pleita kuné. Nan kier a sa dikon e no a manda yama nan pa e bataya. Asta nan kier a kima Jefte su kas ‘kuné aden’!—Huesnan 12:1.

Jefte a bisa nan ku el a manda yama nan, pero ta nan no a reakshoná. En todo kaso, ta Dios a gana e bataya. Akaso nan tabata rabiá pasobra e galaditanan no a konsultá ku nan ora di skohe Jefte komo hefe? Bon mirá, e mal kontentu di Efrain a indiká rebelion kontra Yehova, i no tabatin ningun otro alternativa sino di bringa kontra nan. Den e bataya ku a sigui, e hòmbernan di Efrain a sufri un derota aplastante. Komo ku esnan ku tabata hui no por a bisa e palabra di prueba “Shibolet” korektamente, tabata fásil pa identifiká nan. Na tur, 42.000 hòmber di Efrain a muri den e konflikto.—Huesnan 12:2-6.

Esta un periodo tristu den e historia di Israel! Batayanan anterior ku a resultá viktorioso pa e huesnan Otoniel, Aod, Barak i Gideon a trese pas. E biaha aki Beibel no ta menshoná pas. E relato ta konkluí simplemente bisando: “Jefte a husga Israel seis aña. Anto Jefte e galadita a muri i a wòrdu derá den un di e statnan di Galaad.”—Huesnan 3:11, 30; 5:31; 8:28; 12:7.

Kiko nos por siña for di tur esaki? Ku maske e bida di Jefte tabata yen di lucha, el a keda fiel na Dios. E hòmber balente aki a menshoná Yehova ora ku el a papia ku e ansianonan di Galaad, ku e amonitanan, ku su yu muhé, ku e hòmbernan di Efrain i, naturalmente, ora el a hasi su promesa. (Huesnan 11:9, 23, 27, 30, 31, 35; 12:3) Dios a bendishoná Jefte pa su deboshon, i a usa é i su yu muhé pa promové adorashon berdadero. Den un tempu ku otro hende a bandoná normanan divino, Jefte sí a pega na e normanan ei. Abo lo obedesé Yehova semper, meskos ku Jefte?

[Nota]