Pregunta di Lektor

E kolebra ku a papia ku Eva tabatin pia?

Manera Génesis 3:14 ta indiká, Yehova Dios a papia ku e kolebra ku a gaña Eva den e hòfi di Edén. Dios a bis’é: “Pasobra bo a hasi e kos aki, maldishoná bo ta mas ku tur bestia di kria, i mas ku tur bestia di sabana; riba bo barika lo bo lastra, i stòf lo bo kome tur e dianan di bo bida.” Beibel no ta bisa spesífikamente ku e bestia ku a ser usá pa tenta Eva tabatin pia anto ku despues el a pèrdè nan. Ounke e palabranan di Génesis 3:14 lo por pone algun hende pensa esei, bon mirá, no tin motibu pa konkluí ku promé ku e maldishon aki, kolebra tabatin pia. Dikon nò?

E motibu prinsipal ta pasobra e huisio ku Yehova a dikta tabata en realidat kontra Satanas, e spiritu invisibel ku a hasi mal uso di e bestia inferior ei. Beibel ta deskribí Satanas komo “e tata di mentira” i “e kolebra di antigwedat.” Ámbos ekspreshon ta referí aparentemente na e echo ku Satanas a usa komo bosero un bestia visibel—un kolebra—pa pone Eva desobedesé e òrdu di Dios.—Juan 8:44; Revelashon 20:2.

Dios a krea kolebra, i Adam aparentemente a duna kolebra nòmber promé ku Satanas a usa unu pa gaña Eva. E kolebra ku a papia ku Eva, un bestia ku no por a rasoná, no tabata esun kulpabel. E kolebra ei lo no tabata sa mes ku Satanas a manipul’é, i lo e no por a komprondé e huisio ku Dios a dikta kontra e personanan desobediente.

Dikon anto Dios a menshoná e degradashon físiko di e kolebra? Pasobra un kolebra den su ambiente natural ta lastra riba su barika i ta saka su lenga komo si fuera e ta lembe stòf. E komportashon aki aptamente a simbolisá e kondishon degradá di Satanas. E tabatin anteriormente un posishon elevá komo un di e angelnan di Dios, pero el a ser rebahá na e kondishon baho di skuridat spiritual menshoná den Beibel.—Hudas 6.

Mas aleu, Satanas den su kondishon degradá lo a ‘herida e hilchi’ di e ‘simia’ di Dios meskos ku un kolebra real lo por herida un hende su hilchi. (Génesis 3:15) E parti prinsipal di e simia ei a resultá di ta Hesukristu, kende a sufri temporalmente na man di e agentenan di Satanas. Pero na su debido tempu, Kristu i su kompañeronan kristian ungí ku a ser resusitá lo plècha kabes di e kolebra simbóliko permanentemente. (Romanonan 16:20) Pues, e maldishon ku Dios a ekspresá kontra e kolebra visibel a representá aptamente e degradashon i destrukshon final di “e kolebra [invisibel] di antigwedat,” Satanas e Diabel.