Mayornan, Eduká Boso Yunan ku Amor

“Laga tur loke boso hasi wòrdu hasí ku amor.”—1 KORINTIONAN 16:14.

1. Ki sintimentu mayornan ta eksperensiá ora un yu nase?

MAYORIA di tata ku mama ta di akuerdo ku un di e susesonan di mas gososo den bida ta e nasementu di un yu. Un mama ku yama Aleah a bisa: “Ora mi a mira mi yu muhé resien nasí pa promé biaha, mi a sinti mi hopi emoshoná. Mi a hañ’é e yuchi di mas bunita ku mi a yega di mira.” Pero e suseso gososo ei por kousa preokupashon tambe pa mayornan. Aleah su kasá a bisa: “Mi preokupashon tabata si lo mi por a prepará mi yu muhé bon p’e trata ku e problemanan di bida.” Hopi mayor tin mesun preokupashon i ta realisá ku nan mester eduká nan yunan ku amor. Sin embargo, mayornan kristian ku ta deseá di duna nan yunan un edukashon amoroso asina lo konfrontá vários reto. Kua ta algun di nan?

2. Menshoná algun reto ku mayornan ta konfrontá.

² Nos ta bibando awor kasi na fin di e último dianan di e sistema aki. Manera Beibel a profetisá, e mundu ku nos ta biba aden ta yen di hende ku no ta mustra amor. Ni den seno di famia hende “no tin kariño” mas pa otro i nan a bira ‘malagradesidu, nan no ta respetá loke ta di Dios, no por kontrolá nan mes i ta violento.’ (2 Timoteo 3:1-5, BPK) Kontakto diario ku hende ku ta desplegá e karakterístikanan ei por afektá e manera ku miembro di famianan kristian ta trata otro. Ademas, mayornan ta lucha ku nan propio inklinashon heredá ku ta pone nan pèrdè dominio propio, bisa kosnan ku nan no ta men i keda sin usa sano huisio den vários otro manera.—Romanonan 3:23; Santiago 3:2, 8, 9.

3. Kon mayornan por lanta yunan felis?

³ Apesar di e retonan aki, mayornan por lanta yunan felis ku tin un bon relashon ku Dios. Kon? Dor di sigui e konseho aki di Beibel: “Laga tur loke boso hasi wòrdu hasí ku amor.” (1 Korintionan 16:14) Sí, amor ta “e laso perfekto di unidat.” (Kolosensenan 3:14) Laga nos analisá tres aspekto di amor ku apòstel Pablo a deskribí den su promé karta na e Korintionan i nos lo trata algun manera spesífiko ku mayornan por apliká e kualidat aki segun ku nan ta eduká nan yunan.—1 Korintionan 13:4-8.

Mayornan Mester Tin Pasenshi

4. Dikon mayornan mester tin pasenshi?

⁴ Pablo a skirbi: “Amor tin pasenshi.” (1 Korintionan 13:4) E ekspreshon griego tradusí “pasenshi” ta indiká un persona ku no ta  rabia lihé. Dikon mayornan mester tin pasenshi? Sin duda, mayoria di mayor por pensa riba hopi motibu. Konsiderá djis algun. Mucha kasi nunka ta pidi un kos un biaha so. Asta ora un mayor bisa nò ku firmesa, e mucha ta sigui pidi e kos bes tras bes, ku e speransa ku e mayor lo kambia di idea. Tinernan kisas ta bin ku mil i un motibu pakiko lo mester permití nan hasi algu ku e mayor sa bon-bon ku ta lokura. (Proverbionan 22:15) Anto meskos ku nos tur, muchanan tin e tendensia di keda hasi e mesun erornan.—Salmo 130:3.

5. Kiko por yuda mayornan tene pasenshi ku nan yunan?

⁵ Kiko por yuda mayornan tene pasenshi ku nan yunan? Rei Salomon a skirbi: “Prudensia [“perspikasia,” NW] di un hende ta hasi ku e no ta rabia lihé.” (Proverbionan 19:11) Mayornan por mustra perspikasia, es desir ku nan ta komprondé e komportashon di nan yunan, dor di kòrda ku un tempu nan tambe tabata “papia manera mucha, pensa manera mucha, rasoná manera mucha.” (1 Korintionan 13:11) Mayornan, boso ta kòrda kon boso tabata kansa boso mama òf tata pa el a laga boso hasi kualke muchachada ku boso tabata antohá? Tempu boso tabata tiner, boso a yega di pensa ku boso mayornan simplemente no a komprondé boso sintimentunan òf problemanan? Si boso ta kòrda e kosnan ei, boso por komprondé dikon boso yunan ta komportá nan mes di un sierto manera i dikon boso mester tin pasenshi i rekordá nan konstantemente di boso desishonnan. (Kolosensenan 4:6) Ta bon pa tuma nota ku Yehova a bisa mayornan israelita pa nan siña nan yunan e leinan di Yehova “ku tur diligensia.” (Deuteronomio 6:6, 7) E palabra hebreo pa ‘siña ku tur diligensia’ ta nifiká “ripití,” “bisa bes tras bes,” “inkulká.” Esaki ta indiká ku mayornan kisas tin ku keda papia e mesun kos hopi bes, promé ku un mucha siña apliká e leinan di Dios. Anto hopi biaha ta nesesario pa keda ripití kosnan pa asina siña nan otro lèsnan di bida.

6. Dikon e echo ku un mayor tin pasenshi no ke men ku e ta muchu tolerante?

⁶ Sin embargo, e echo ku un mayor tin pasenshi no ke men ku e ta muchu tolerante. E Palabra di Dios ta duna e spièrtamentu: “Un yu lagá pa su kuenta ta pone su mama na bèrgwensa.” Pa evitá e resultado ei, e mesun proverbio ta deklará: “Bara i reprendementu ta duna sabiduria.” (Proverbionan 29:15) Tin biaha, muchanan ta haña ku nan mayornan no tin derecho di korigí nan. Pero famianan kristian no mester ser dirigí manera un demokrasia, komo si fuera mayornan su derecho di pone regla ta dependé di un manera òf otro di e aprobashon di nan yunan. Na lugá di esei, Yehova, komo e Kabes supremo di famia, a duna mayornan e outoridat pa eduká i disipliná nan yunan ku amor. (1 Korintionan 11:3; Efesionan 3:15; 6:1-4) De echo, disiplina ta estrechamente ligá ku e siguiente aspekto di amor ku Pablo a menshoná.

Kon pa Disipliná Yu ku Amor

7. Dikon mayornan ku ta stima nan yunan ta disipliná nan, i kiko tal disiplina ta enserá?

⁷ Pablo a skirbi ku “amor ta kariñoso.” (1 Korintionan 13:4) Mayornan ku di bèrdat ta stima nan yunan lo disipliná nan na un manera kariñoso i konsistente. Dor di hasi asina, nan ta imitá Yehova. Pablo a skirbi: “Esnan ku SEÑOR ta stima, e ta disipliná.” Pero tuma nota ku e tipo di disiplina ku Beibel ta papia di dje no ta nifiká simplemente kastigu. E ta duna e idea di entrenamentu i edukashon. Kiko ta e propósito di tal disiplina? Pablo a deklará: “Esnan ku a wòrdu entrená dor di dje, despues e ta duna e fruta pasífiko di hustisia.” (Hebreonan 12:6, 11) Ora mayornan ta eduká nan yunan kariñosamente di akuerdo ku e boluntat di Dios, nan ta duna nan yunan e oportunidat pa bira  adultonan pasífiko i rekto. Si yunan aseptá ‘e disiplina di Yehova,’ nan ta haña sabiduria, konosementu i disernimentu; kualidatnan ku ta bal mas ku plata òf oro.—Proverbionan 3:11-18.

8. Kiko por lo general ta e resultado ora mayornan no ta disipliná nan yunan?

⁸ Di otro banda, ora mayornan ta keda sin disipliná nan yunan, esei no ta un muestra di amor. Yehova a inspirá Salomon pa skirbi: “Esun ku laga di usa bara ta odia su yu, ma esun ku ta stim’é ta disiplin’é for di trempan.” (Proverbionan 13:24) Yunan ku lanta sin haña disiplina riba un base konsistente tin mas chèns di bira adultonan egoista i infelis. Na kontraste, a konstatá ku yunan di mayornan ku ta kariñoso pero ku ta pone límitenan firme, ta siña bon na skol, nan por sali bon ku otro hende i por lo general ta felis. Definitivamente anto, mayornan ku ta disipliná nan yunan na un manera kariñoso ta mustra ku di bèrdat nan ta stima nan yunan.

9. Kiko mayornan kristian ta siña nan yunan, i kon yunan mester mira e rekisitonan aki?

⁹ Kiko disipliná yu na un manera kariñoso i amoroso ta enserá? Wèl, mayornan tin ku bisa nan yunan bon kla kiko ta e kosnan ku nan mester hasi. Por ehèmpel, for di infansia yunan di mayornan kristian ta siña prinsipionan bíbliko fundamental. Tambe nan ta siña di e nesesidat pa partisipá den e vários aspektonan di adorashon berdadero. (Eksodo 20:12-17; Mateo 22:37-40; 28:19; Hebreonan 10:24, 25) Yunan mester sa ku e rekisitonan aki no ta kambia bou di ningun sirkunstansia.

10, 11. Dikon mayornan lo por tuma na kuenta e opinion di nan yunan ora di fiha regla di kas?

¹⁰ Pero tin biaha mayornan lo ke inkluí nan yunan ora di pone sierto reglanan di kas. Si hóbennan tambe tin mag di duna nan opinion tokante e reglanan ei, nan lo ta mas inkliná na obedesé nan. Por ehèmpel, den kaso ku mayornan disidí di pone un ora ku nan yunan mester ta na kas, e mayornan mes por stipulá ki ora esei lo ta. Òf, un otro opshon por ta ku nan ta permití nan yunan sugerí un ora i splika pakiko nan ta preferá e ora ei. E mayornan na nan turno por bisa kua ta e ora ku nan ke pa e yunan ta na kas i splika pakiko nan ta haña ku esei ta rasonabel. Kiko mayornan por hasi si tin un diferensia di opinion, lokual muy probablemente lo ta e kaso? Den algun kaso, nan por disidí ku ta posibel kumpli ku e deseo di nan yunan ora ku esei no ta bai kontra di ningun prinsipio bíbliko. Pero esaki ta nifiká ku e mayornan a entregá nan outoridat si nan hasi asina?

 ¹¹ Pa kontesta e pregunta ei, konsiderá e manera amoroso ku Yehova a ehersé su outoridat ora di trata ku Lòt i su famia. Despues ku e angelnan a eskoltá Lòt, su kasá i su yu muhénan for di Sodoma, nan a bisa e famia: “Hui bai na e serunan, pa bo no peresé”! Sin embargo, Lòt a kontestá: “Ai nò, Yehova!” [NW] Anto Lòt a sugerí un otro opshon: “Awor mira, e stat aki ta basta serka pa hui bai ayanan, i e ta chikitu. Pa fabor, laga mi hui bai ayanan.” Kiko Yehova a bis’é? “Mira, mi ta konsedé bo e súplika aki tambe.” (Génesis 19:17-22) Akaso Yehova a entregá su outoridat? Definitivamente ku nò! Pero sí el a tuma na kuenta e petishon di Lòt i a skohe pa mustra èkstra bondat na dje den e asuntu aki. Si bo ta un mayor, tin okashonnan ku lo bo por tuma na kuenta loke ta preokupá bo yunan ora bo ta fiha regla di kas?

12. Kiko lo yuda yunan sinti nan mes sigur?

¹² Klaru ku muchanan mester sa no solamente e reglanan, sino tambe e kastigu ku nan lo haña ora nan kibra ku e reglanan ei. Unabes boso a papia ku nan di e kastigu i nan a komprondé esei, boso mester sòru pa nan kumpli ku e reglanan. Mayornan no ta mustra amor ora ku nan konstantemente ta spièrta nan yunan ku nan lo haña un kastigu meresí pero ta keda sin dun’é. Beibel ta bisa: “Pasobra sentensia kontra un echo di maldat no ta wòrdu ehekutá lihé; p’esei kurason di e yunan di hende den nan ta kompletamente dispuesto pa hasi maldat.” (Eklesiastés 8:11) Ta bèrdat ku kisas un mayor ke spar un yu di poko bèrgwensa i p’esei e no ta kastig’é den públiko òf dilanti di e yu su amigunan. Pero muchanan ta sinti nan mes mas sigur i ta haña mas rèspèt i amor pa nan mayornan ora ku nan sa ku nan mayornan su “Sí” ta nifiká sí i nan “Nò” ta nifiká nò; asta ora esei ta enserá kastigu.—Mateo 5:37.

13, 14. Kon mayornan por imitá Yehova ora nan ta eduká nan yunan?

¹³ Pa kastigu por ta amoroso, mayornan mester dun’é na un manera ku ta adaptá na e yu. Segun Pam: “Nos tin dos yu muhé i nan kada un tabatin ku haña un otro tipo di disiplina. Loke a duna resultado serka un yu no tabata efektivo serka e otro.” Larry, kasá di Pam, a splika: “Esun mayó tabatin un karakter fuerte i aparentemente tabata reakshoná solamente ora e disiplina tabata severo. Sin embargo, esun mas chikitu tabata reakshoná masha lihé riba palabra firme i asta riba un mirada di desaprobashon.” Sí, mayornan amoroso ta hasi esfuerso pa ripará ki tipo di disiplina ta mas efektivo pa kada un di nan yunan.

¹⁴ Yehova ta un ehèmpel pa mayornan ya ku e konosé e puntonan fuerte i débil di kada  un di su sirbidónan. (Hebreonan 4:13) Ademas, ora di duna kastigu, Yehova no ta muchu severo ni muchu permisivo. Mas bien, semper e ta disipliná su pueblo “manera mester ta.” (Jeremias 46:28) Mayornan, boso konosé tantu e puntonan fuerte komo débil di boso yunan? Boso por usa e konosementu ei pa eduká nan na un manera positivo i kariñoso? Si ta asina, boso ta duna prueba ku boso ta stima boso yunan.

Animá Bo Yunan pa Papia Franko ku Bo

15, 16. Kon mayornan por animá nan yunan pa papia frankamente, i ki método mayornan kristian a haña ku tabata efektivo relashoná ku esaki?

¹⁵ Un otro faseta di amor ta ku “e no ta regosihá den inhustisia, ma ta regosihá den e bèrdat.” (1 Korintionan 13:6) Kon mayornan por eduká nan yunan pa stima loke ta korekto i bèrdat? Un paso fundamental ta pa animá nan yunan pa papia frankamente tokante nan sintimentunan, asta si loke e yunan ta bisa ta duru pa e mayornan aseptá. Ta di komprondé ku mayornan ta keda kontentu ora nan yunan ta ekspresá pensamentu- i sintimentunan ku ta na armonia ku normanan hustu. Pero tin okashon ku un yu su komentarionan sinsero kisas ta revelá ku e ta inkliná den direkshon di inhustisia. (Génesis 8:21) Kon mayornan lo mester reakshoná? Kisas nan promé inklinashon ta pa skual nan yunan mesora pasobra nan a ekspresá e tipo di pensamentunan ei. Pero si mayornan reakshoná asina, nan yunan lo siña umbes ku nan mester bisa solamente loke nan ta kere nan mayornan lo ke tende. Klaru ku mayornan mester korigí nan yunan mesora si nan ta papia ku falta di rèspèt. Pero tin un diferensia entre siña yu kon pa papia nèchi i dikta kiko nan tin ku bisa.

¹⁶ Kon mayornan por animá nan yunan pa papia frankamente ku nan? Aleah, menshoná anteriormente, a bisa: “Na kas nos a krea un ambiente di komunikashon franko i habrí dor di no reakshoná na un manera eksagerá ora nos yunan bisa nos algu ku ta preokupá nos.” Un tata ku yama Tom a bisa: “Nos a animá nos yu muhé pa ekspresá su mes, asta ora e no tabata di akuerdo ku nos manera di pensa. Nos a haña ku si semper nos ta kòrta su palabra i imponé nos boluntat riba dje manera nos haña ta bon, lo el a frustra i siña di no konta nos kiko realmente tabatin den su kurason. Di otro banda, dor di skuch’é, nos a anim’é pa skucha nos.” Un kos ta sigur, yunan tin ku obedesé nan mayornan. (Proverbionan 6:20) Pero un komunikashon habrí ta duna mayornan e oportunidat di yuda nan yunan desaroyá e kapasidat di rasoná. Vincent, un tata di kuater yu, a bisa: “Hopi biaha, nos tabata papia riba e pro i kontra di un situashon di manera ku nos yunan por a mira pa nan mes kua ta e mihó resultado. Esaki a yuda nan desaroyá e kapasidat di pensa.”—Proverbionan 1:1-4.

17. Mayornan por tin sigur di kiko?

¹⁷ Klaru ku ningun mayor lo por apliká e konseho di Beibel tokante kriamentu di yu a la perfekshon. Pero asina mes, boso por tin sigur ku boso yunan lo keda masha gradisidu ku boso esfuerso pa eduká nan ku pasenshi, kariño i amor. Yehova siguramente lo bendishoná boso esfuerso pa hasi esei. (Proverbionan 3:33) Na final di kuenta, tur mayor kristian ke pa nan yunan siña stima Yehova mes tantu ku nan ta stim’é. Kon mayornan por alkansá e meta noble aki? E siguiente artíkulo lo trata algun método spesífiko.

Bo Ta Kòrda?

• Kon perspikasia por yuda un mayor tene pasenshi?

• Kon amor i disiplina duná ku kariño ta ligá ku otro?

• Dikon komunikashon franko entre mayor i yu ta sumamente importante?

[Preguntanan di Estudio]

[Plachinan na página 23]

Mayornan, boso ta kòrda kon boso tabata tempu boso tabata mucha?

[Plachi na página 24]

Bo ta animá bo yunan pa papia franko ku bo?