Kon Nos Por Mustra Miserikòrdia?
Kon Nos Por Mustra Miserikòrdia?
“Laga nos hasi bon na tur hende, i spesialmente na esnan ku ta di e famia di fe.”—GALATIONAN 6:10.
1, 2. Kiko e komparashon di e bon samaritano ta siña nos tokante miserikòrdia?
ORA un eksperto di Lei tabata papia ku Hesus, el a puntra Hesus: “Ken ta mi próhimo?” Komo kontesta, Hesus a kont’é e siguiente komparashon: “Un hòmber tabata baha di Yerusalèm bai Jeriko, i el a kai den man di ladron; i nan a kita tur kos for di dje i a batié, i a bai lag’é mitar morto. I pa kasualidat un saserdote tabata baha bai pa e kaminda ei, i ora ku el a mir’é, el a pas’é forbei bai pa e otro banda. I meskos un levita tambe, ora ku el a yega na e lugá ei i a mir’é, a pas’é forbei bai pa e otro banda. Ma un samaritano, ku tabata biahando, a yega serka di dje; i ora ku el a mir’é, el a sinti kompashon, i a bai serka dje i a mara su heridanan i a basha zeta i biña riba nan; i el a pon’é riba su buriku, a hib’é na un posada i a perkurá p’e. I e siguiente dia el a saka dos denario duna e doño di posada i a bisa: ‘Perkurá p’e; i ki gastu mas ku bo hasi lo mi paga bo ora mi bolbe.’” Despues, Hesus a puntra e hòmber ku tabata skuch’é: “Kual di e tresnan aki bo ta kere tabata próhimo di e hòmber ku a kai den man di ladron?” I e hòmber a kontestá: “Esun ku a mustra miserikòrdia na dje.”—Lukas 10:25, 29-37a.
2 E manera ku e samaritano a trata e hòmber heridá ta un ehèmpel bibu di berdadero miserikòrdia! Un sintimentu di duele i kompashon a motivá e samaritano pa aktua na un manera ku a trese alivio pa e víktima. Es mas, e hòmber den nesesidat tabata un stranhero pa e samaritano. Pues, miserikòrdia no konosé barera nashonal, religioso ni kultural. Despues ku Hesus a konta e komparashon tokante e bon samaritano, el a konsehá e eksperto di Lei: “Bai i hasi meskos.” (Lukas 10:37b) Nos por hasi kaso di e konseho ei i hasi esfuerso pa mustra miserikòrdia na otro hende. Pero kon? Den ki maneranan nos por mustra miserikòrdia den nos bida diario?
“Si un Ruman . . . Ta sin Paña”
3, 4. Dikon ta masha importante pa nos mustra miserikòrdia den e kongregashon kristian?
3 Apòstel Pablo a bisa: “Miéntras nos tin oportunidat, laga nos hasi bon na tur hende, i spesialmente na esnan ku ta di e famia di fe.” (Galationan 6:10) P’esei anto, laga nos konsiderá vários manera ku nos por mustra miserikòrdia na esnan ku ta di nos famia di fe.
4 Ora disipel Santiago a animá kristiannan berdadero pa mustra miserikòrdia na otro hende, el a skirbi: “Huisio lo ta sin miserikòrdia pa ku esun ku no a mustra miserikòrdia.” (Santiago 2:13) E konteksto di e palabranan inspirá aki ta bisa nos kua ta algun di e maneranan ku nos por mustra miserikòrdia. Por ehèmpel, na Santiago 1:27 nos ta lesa: “Esaki ta e religion puru i sin mancha den bista di nos Dios i Tata: bishitá huérfano i biuda den nan aflikshon, i konserbá bo mes liber di mancha di mundu.” Santiago 2:15 i 16 ta deklará: “Si un ruman hòmber òf ruman muhé ta sin paña i den nesesidat di e kuminda di kada dia, i un di boso bisa nan: ‘Bai na pas, tene bo kurpa kayente i yena bo barika,’ i sin embargo, boso no ta duna nan loke ta nesesario pa nan kurpa, kiko esei ta bal?”
5, 6. Kua ta e vários maneranan ku nos por mustra miserikòrdia den nos trato ku e miembronan di e kongregashon lokal?
5 Un rasgo di religion berdadero ta ku su miembronan ta mustra interes den otro hende i ta yuda esnan den nesesidat. E manera ku nos ta adorá Dios no ta permití nos mustra interes den otro hende ku palabra so, esta, djis ekspresá e deseo pa kos bai bon ku nan. Mas bien, un sintimentu tierno di kompashon ta motivá nos pa aktua na fabor di esnan ku realmente ta den nesesidat. (1 Juan 3:17, 18) Sí, algun di e maneranan ku nos por mustra ku nos ta miserikòrdioso ta dor di prepará un kuminda pa un persona ku ta malu, yuda un persona di edat ku su trabounan di kas, yuda otro hende ku transpòrt pa bai reunionnan kristian ora ta nesesario i dor di no sera nos man pa hende meresedor.—Deuteronomio 15:7-10.
6 Ounke ta importante pa duna yudansa material na e miembronan di e kongregashon kristian ku ta kresiendo, ta hopi mas importante ainda pa yuda nan den sentido spiritual. Beibel ta animá nos pa “enkurashá esnan ku ta falta ánimo, yuda e débilnan.” (1 Tesalonisensenan 5:14) Anto “muhénan di edat” ta haña animashon pa ‘siña loke ta bon’ na otronan. (Tito 2:3) Relashoná ku superintendentenan kristian, Beibel ta bisa: “Kada un lo ta manera un refugio kontra bientu, i un protekshon kontra tempestat.”—Isaias 32:2.
7. Kiko nos ta siña di e disipelnan na Antiokia di Siria relashoná ku mustramentu di miserikòrdia?
7 Ademas di perkurá pa biuda-, huérfanonan i esnan ku tabatin mester di yudansa i animashon den nan propio teritorio, a yega di sosodé ku e kongregashonnan den promé siglo a tuma medidanan pa yuda rumannan den otro pais tambe. Por ehèmpel, ora profeta Agabo a profetisá ku “lo a bin un hamber grandi den henter mundu,” e disipelnan na Antiokia di Siria “a determiná ku, segun alkanse, kada un di nan lo a manda un kontribushon komo un sosten pa e rumannan ku tabata biba na Hudea.” I “pa medio di Barnabas i Saulo” nan a manda esaki pa e ansianonan einan. (Echonan 11:28-30) Kiko di nos tempu? “E esklabo fiel i prudente” a organisá komiténan di ousilio pa perkurá pa nos rumannan ku kisas a ser perhudiká dor di desasternan natural manera horkan, temblor òf tsunami. (Mateo 24:45) Pues, un ekselente manera pa nos mustra miserikòrdia ta di boluntariamente duna di nos tempu, esfuerso i rekursonan pa koperá ku e areglo aki.
“Si Boso Hasi Distinshon di Persona”
8. Dikon nos no por ta miserikòrdioso ora nos ta hasi distinshon di persona?
8 Ora Santiago tabata spièrta kristiannan kontra un karakterístika ku ta stroba un persona di mustra miserikòrdia i kumpli ku “e lei real” di amor, el a skirbi: “Si boso hasi distinshon di persona, boso ta kometé piká i ta wòrdu kondená dor di lei komo transgresornan.” (Santiago 2:8, 9) Si nos ta hasi bon na un persona pasobra e ta un hende riku òf prominente nos ta bira ménos sensitivo pa “sklamashon di e pober.” (Proverbionan 21:13) Ora nos ta hasi distinshon di persona esaki ta stroba nos di mustra miserikòrdia. Pues, nos ta miserikòrdioso ora nos ta trata hende sin hasi distinshon.
9. Dikon no ta malu pa duna rekonosementu na esnan ku meresé esei?
9 E echo ku nos ta imparsial ta nifiká ku nunka nos no mag duna rekonosementu na un persona? Klaru ku nò. Relashoná ku su kompañero di trabou, Epafrodito, apòstel Pablo a skirbi e kristiannan na Filipos: “Trata hòmbernan asina ku gran apresio.” Dikon? “Pasobra el a hera muri pa e obra di Kristu, riskando su bida pa kompletá loke boso tabata falta den boso sirbishi na mi.” (Filipensenan 2:25, 29, 30) Epafrodito a meresé rekonosementu pa su sirbishi fiel. Ademas, na 1 Timoteo 5:17 nos ta lesa: “Laga e ansianonan ku ta goberná bon wòrdu konsiderá digno di dòbel onor, spesialmente esnan ku ta traha duru den predikamentu i siñamentu.” Personanan ku bon kualidatnan spiritual tambe ta meresé rekonosementu. Ora nos ta duna e rekonosementu ei, nos no por papia di distinshon di persona.
‘Sabiduria di Ariba Ta Yen di Miserikòrdia’
10. Dikon nos mester kontrolá nos lenga?
10 Relashoná ku e lenga, Santiago a bisa: “E ta un maldat sin sosiegu i yen di venenu mortal. Kuné nos ta bendishoná nos Señor i Tata; i kuné nos ta maldishoná hende, kende a wòrdu trahá den e semehansa di Dios; for di e mesun boka ta sali tantu bendishon komo maldishon.” Den e konteksto aki Santiago a agregá: “Si boso tin envidia amargo i egoismo den boso kurason, no sea arogante i asina gaña kontra e bèrdat. E sabiduria aki no ta esun ku ta baha bin for di ariba, ma e ta terenal, natural, diabóliko. Pasobra kaminda ta eksistí envidia i egoismo, tin desòrdu i tur sorto di kos malu. Ma e sabiduria di ariba primeramente ta puru, despues pasífiko, suave, rasonabel, yen di miserikòrdia i bon fruta, imparsial, sin hipokresia.”—Santiago 3:8-10a, 14-17.
11. Kon nos por ta miserikòrdioso ora nos ta usa nos lenga?
11 Pues e manera ku nos ta usa nos lenga ta indiká si nos tin e sabiduria di ariba ku ta “yen di miserikòrdia.” Kiko nos lo revelá tokante nos mes si nos ta broma tokante nos mes, gaña otro hende i ta plama redu tokante otro persona pasobra nos ta yalurs riba nan òf pasobra nos a pleita ku nan? Salmo 94:4 ta bisa: “Tur esnan ku ta hasi maldat ta gaba nan mes.” I ta masha fásil pa papiamentu perhudisial daña bon reputashon di un persona inosente! (Salmo 64:2-4) Ademas, pensa riba e daño ku “un testigu falsu [ku] ta papia mentira,” por hasi. (Proverbionan 14:5; 1 Reinan 21:7-13) Despues ku Santiago a kaba di papia di mal uso di e lenga, el a bisa: “Mi rumannan, e kosnan aki no mester ta asina.” (Santiago 3:10b) Pa nos por mustra berdadero miserikòrdia nos mester usa nos lenga den un manera puru, pasífiko i rasonabel. Hesus a bisa: “Ami ta bisa boso, ku hende lo duna kuenta riba e dia di huisio di kada palabra bano ku nan papia.” (Mateo 12:36) Ta masha importante anto pa nos ta miserikòrdioso den e manera ku nos ta usa nos lenga!
“Pordoná Hende Nan Transgreshonnan”
12, 13. (a) Kiko nos ta siña tokante miserikòrdia for di e komparashon di e esklabo ku tabata debe su doño un suma grandi di plaka? (b) Kiko ke men pordoná bo ruman “te setenta bes shete”?
12 Hesus su komparashon tokante e esklabo ku tabata debe su doño, un rei, 60.000.000 denario òf 10.000 talento ta ilustrá un otro manera pa mustra miserikòrdia. Debí ku e esklabo no tabatin moda di paga su debe, el a roga su doño pa miserikòrdia. E doño “a sinti kompashon” i a pordoná e esklabo su debe. Ma ora e esklabo ei a sali bai i a topa un kompañero esklabo ku tabata deb’é solamente shen denario, sin tene miserikòrdia el a laga tir’é den prizon. Ora e doño a tende loke a pasa, el a manda yama e esklabo i a bis’é: “Abo, esklabo malbado, mi a pordoná bo tur e debe ei, pasobra bo a roga mi. Abo tambe no mester a tene miserikòrdia di bo kompañero esklabo, meskos ku ami a tene miserikòrdia di bo?” Anto e doño a entreg’é na e wardadónan di prezu. Hesus a terminá su komparashon, bisando: “Asina tambe mi Tata selestial lo hasi ku boso, si kada un di boso no pordoná su ruman di henter su kurason.”—Mateo 18:23-35.
13 Den un manera poderoso e komparashon den e paragraf anterior ta mustra ku ser miserikòrdioso ta enserá ser kla pa pordoná! Yehova a pordoná nos un debe enorme di piká. Nos tambe no mester “pordoná hende nan transgreshonnan”? (Mateo 6:14, 15) Promé ku Hesus a konta e komparashon tokante e esklabo sin miserikòrdia, Pedro a puntr’é: “Señor, kuantu bes mi ruman lo peka kontra mi, i ami mester pordon’é? Te shete bes?” Hesus a kontest’é: “Mi ta bisa bo, no te shete bes, sino te setenta bes shete.” (Mateo 18:21, 22) Sí, un persona miserikòrdioso ta kla pa pordoná “te setenta bes shete,” esta, sin límite.
14. Segun Mateo 7:1-4, kon nos por mustra miserikòrdia diariamente?
14 Pa ilustrá un otro manera mas ku nos por mustra miserikòrdia, Hesus a bisa den su Sermon Riba Seru: “No husga, pa boso no wòrdu husgá. Pasobra di e mesun manera ku boso husga, boso lo wòrdu husgá . . . Pakiko bo ta wak e stòf den wowo di bo ruman, ma no ta ripará e balki ku tin den bo mes wowo? Òf kon bo por bisa bo ruman: ‘Laga mi saka e stòf for di bo wowo,’ i mira, e balki no ta den bo mes wowo?” (Mateo 7:1-4) Pues, nos por mustra miserikòrdia diariamente ora nos ta soportá e debilidatnan di otro hende sin husga nan òf ser demasiado krítiko.
“Hasi Bon na Tur Hende”
15. Dikon no ta solamente na nos rumannan den fe nos ta mustra miserikòrdia?
15 Ounke e buki bíbliko di Santiago ta resaltá e miserikòrdia ku mester eksistí entre kompañeronan di fe, esaki no ta nifiká ku ta na hende den e kongregashon kristian so nos mester mustra miserikòrdia. Salmo 145:9 ta bisa: “SEÑOR ta bon pa tur, i su miserikòrdianan ta riba tur su obranan.” Beibel ta urgi nos pa “sea imitadónan di Dios” i “hasi bon na tur hende.” (Efesionan 5:1; Galationan 6:10) Maske nos no ta “stima mundu, ni e kosnan ku tin den mundu,” nos no ta indiferente pa ku e nesesidatnan di hende den e mundu.—1 Juan 2:15.
16. Ki faktornan tin influensia riba e manera ku nos ta mustra miserikòrdia na otro hende?
16 Komo kristiannan semper nos ta dispuesto pa duna kualke yudansa ku nos por na víktimanan di “suseso imprevisto” òf na hende ku ta den situashonnan penoso. (Eklesiastés 9:11, NW) Klaru ku ta dependé di nos sirkunstansia kiko i kuantu kos nos por hasi pa nan. (Proverbionan 3:27) Ora nos ta duna yudansa material na otro hende, nos tin ku tene kuidou pa algu ku ta parse un bon obra no promové flohedat. (Proverbionan 20:1, 4; 2 Tesalonisensenan 3:10-12) P’esei, un berdadero akto di miserikòrdia ta un reakshon motivá pa un kombinashon di sintimentunan tierno di kompashon òf konsiderashon huntu ku sano huisio.
17. Kua ta e mihó manera pa mustra miserikòrdia na hende pafó di e kongregashon kristian?
17 E mihó manera pa mustra miserikòrdia na hende pafó di e kongregashon kristian ta di kompartí e bèrdat di Beibel ku nan. Dikon? Pasobra e mayoria di humanidat ta buskando den skuridat spiritual. Mayoria di hende ta “kansá i plamá, manera karné sin wardadó” pasobra nan no sa kon pa trata ku e problemanan ku nan ta konfrontá ni nan no tin berdadero speransa pa futuro. (Mateo 9:36) E mensahe di e Palabra di Dios por ta ‘un lampi pa nan pia’ i asina ta yuda nan trata ku problemanan di bida. E por ta tambe ‘un lus pa nan kaminda,’ den e sentido ku Beibel ta predisí kiko ta e propósito di Dios pa futuro, dunando nan asina un speransa briante. (Salmo 119:105) Nos tin e gran privilegio di por hiba e mensahe maravioso di e bèrdat na hende ku tin mester di dje urgentemente! En bista di e “gran tribulashon,” ku ta hopi serka, awor ta e tempu pa nos partisipá ku entusiasmo den e trabou di prediká e Reino i di hasi disipel. (Mateo 24:3-8, 21, 22, 36-41; 28:19, 20) No tin ningun akto di miserikòrdia ku ta mas importante ku esei.
Duna “Loke Ta Paden”
18, 19. Dikon nos mester hasi esfuerso pa oumentá e influensia ku miserikòrdia tin riba nos bida?
18 Hesus a bisa: “Duna loke ta paden komo limosna.” (Lukas 11:41) Pa un bon obra por ta un akto di berdadero miserikòrdia, e mester ta un regalo ku ta bini di paden: for di un kurason boluntario i yen di amor. (2 Korintionan 9:7) Den un mundu kaminda krueldat, egoismo i un falta di interes den sufrimentu i problema di otro hende ta masha normal, ta masha refreskante pa eksperensiá e klase di miserikòrdia ei!
19 P’esei anto, laga nos hasi esfuerso pa oumentá e influensia ku miserikòrdia tin riba nos bida. Mas miserikòrdioso nos ta, mas nos ta bira manera Dios. Esaki ta yuda nos hiba un bida ku ta berdaderamente signifikativo i satisfasiente.—Mateo 5:7.
Kiko Bo A Siña?
• Dikon ta hopi importante pa nos mustra miserikòrdia na rumannan den fe?
• Kon nos por mustra miserikòrdia den e kongregashon kristian?
• Kon nos por hasi bon na hende pafó di e kongregashon?
[Preguntanan di Estudio]
[Plachi na página 17]
E samaritano a mustra miserikòrdia
[Plachi na página 17]
Kristiannan ta mustra miserikòrdia den vários manera
[Plachi na página 19]
E mihó manera pa mustra miserikòrdia na hende pafó di e kongregashon ta di kompartí e bèrdat di Beibel ku nan