Puntonan Sobresaliente di e Buki di Oseas
E Palabra di Yehova Ta Bibu
Puntonan Sobresaliente di e Buki di Oseas
ADORASHON berdadero kasi a disparsé for di Israel su reino di dies tribu di nort. Bou di e gobernashon di Jeroboam II, tabatin prosperidat material den Israel, pero no muchu tempu despues di morto di e rei e prosperidat aki a mengua. Despues a sigui un periodo turbulento i di instabilidat polítiko. Kuater di e seis personanan ku a sigui otro komo rei a ser asesiná. (2 Reinan 14:29; 15:8-30; 17:1-6) Oseas su karera profétiko di 59 aña largu ku a kuminsá na 804 promé ku nos era a sigui te den e tempu difísil ei.
Loke a tuma lugá den Oseas su matrimonio ta un deskripshon bibu di Yehova su sintimentu pa ku e pueblo rebelde di Israel. E tema di Oseas su mensahe ta e sakamentu na kla di e eror di Israel i e huisio profétiko kontra Israel i kontra e reino di Huda. Tur esaki Oseas a skirbi den un buki ku ta karga su nòmber. El a usa palabranan tierno i afektuoso i tambe lenguahe ku ta bibu i fuerte. Komo parti di e Palabra inspirá di Dios, e mensahe di e Buki di Oseas ta bibu i aktivo.—Hebreonan 4:12.
“TUMA PA BO MES UN ESPOSA PROSTITUTA”
Yehova ta bisa Oseas: “Bai, tuma pa bo mes un esposa prostituta.” (Oseas 1:2) Oseas ta obedesé i Gomer ta haña un yu hòmber p’e. E dos yunan ku Gomer a haña despues, aparentemente ta yu ku el a haña pafó di matrimonio. E nifikashon di nan nòmbernan, esta Lo-ruhama i Lo-ammi, ta indiká ku Yehova lo no mustra miserikòrdia mas na Israel i ku el a rechasá su pueblo desleal.
Kiko en realidat Yehova ta sinti pa su pueblo rebelde? E ta bisa Oseas: “Bai atrobe, stima un muhé ku ta stimá dor di su esposo, maske ku e ta un adúltero, meskos ku SEÑOR ta stima e yunan di Israel, maske nan ta bira na otro diosnan.”—Oseas 3:1.
Kontesta Riba Pregunta Bíbliko:
1:1—Pakiko Oseas ta menshoná solamente un gobernante di Israel siendo ku e ta menshoná tur kuater rei ku a reina riba Huda durante su ministerio? Pasobra a konsiderá solamente e reinan desendiente di David komo gobernante legítimo di Dios su pueblo skohí. E reinan di e reino di nort no tabata desendientenan di David, pero esnan di Huda sí.
1:2-9—Oseas realmente a tuma un esposa prostituta? Sí, den e sentido ku Oseas a kasa ku un hende muhé ku despues a kometé adulterio. E profeta no a bisa nada ku ta indiká ku loke el a relatá tokante su bida di famia tabata un soño òf un vishon.
1:7—Na ki tempu Dios a mustra kompashon ku e kas di Huda i a libra nan? Esaki a kumpli na 732 promé ku nos era, den e dianan di Rei Ezekias. Na e tempu ei, Yehova a pone un fin na Asiria su menasanan kontra Yerusalèm ora el a laga un angel mata 185.000 sòldá den un anochi. (2 Reinan 19:34, 35) Pues, Yehova a libra Huda, no “pa medio di bog, spada, bataya, kabai òf koredó di kabai,” sino pa medio di un angel.
1:10, 11—Siendo ku e reino di Israel di nort a kai na 740 promé ku nos era, di ki manera e yunan di Israel a “wòrdu reuní huntu” ku e yunan di Huda? Hopi hudiu di e reino di nort a bai Huda promé ku a hiba e habitantenan di e tera di Huda den koutiverio na Babilonia na aña 607 promé ku nos era. (2 Krónikanan 11:13-17; 30:6-12, 18-20, 25) Ora e eksiliadonan hudiu a regresá nan patria na 537 promé ku nos era, tabatin desendiente di e habitantenan di e reino di Israel di nort meimei di nan.—Esdras 2:70.
2:21-23—Kiko Yehova a predisí mediante e palabranan: ‘lo mi sembra Jezreel pa mi mes den e tera, i tambe lo mi tin kompashon kuné’? E nòmber di e promé yu hòmber ku Gomer a haña pa Oseas tabata Jezreel. (Oseas 1:2-4) E nifikashon di e nòmber Jezreel ta: Yehova Lo Sembra Simia. Esaki ta un deskripshon profétiko di e echo ku Yehova a rekohé un restu fiel na aña 537 promé ku nos era i a planta nan manera simia na Huda. E tera ku a keda desolá pa 70 aña mester a produsí maishi, biña nobo i zeta atrobe. Den un manera poétiko, e profesia ta indiká ku e bon kosnan aki lo pidi e tera pa produsí supstansia nutritivo, i e tera lo pidi shelu pa yobida. Na su turno, shelu lo hasi un petishon na Dios pa proveé áwaseru. Tur esaki tabata ku e meta pa perkurá na abundansia pa e nesesidatnan di e restu ku lo a bolbe. Apòstel Pablo i Pedro a apliká Oseas 2:23 na e rekohementu di un restu di Israel spiritual.—Romanonan 9:25, 26; 1 Pedro 2:10.
Lès pa Nos:
1:2-9; 3:1, 2. Esta un sakrifisio personal Oseas a hasi pa keda kasá i kumpli ku e boluntat divino! Ora ta trata di hasimentu di e boluntat di Dios, te na ki grado nos ta dispuesto pa hala preferensia personal un banda?
1:6-9. Yehova ta odia adulterio spiritual, meskos ku e ta odia adulterio literal.
1:7, 10, 11; 2:14-23. Loke Yehova a predisí tokante Israel i Huda a sosodé. Yehova su palabra semper ta kumpli.
2:16, 19, 21-23; 3:1-4. Yehova ta dispuesto pa pordoná hende ku ta mustra arepentimentu di kurason. (Nehemias 9:17) Meskos ku Yehova, nos tambe mester mustra kompashon i miserikòrdia den nos trato ku otro hende.
‘YEHOVA TIN UN KASO KONTRA HUDA’
“SEÑOR tin un kaso kontra e habitantenan di e tera.” Dikon? Pasobra “no tin fieldat, ni kariño [“bondat amoroso,” NW], ni konosementu di Dios den e tera.” (Oseas 4:1) E pueblo rebelde di Israel a oprimí hende, a drama sanger i a kometé tantu fornikashon literal komo spiritual. En bes di akudí na Dios pa yudansa, “nan ta yama na Egipto, nan ta bai Asiria.”—Oseas 7:11.
Yehova ta deklará su huisio, bisando: ‘Israel lo wòrdu tragá.’ (Oseas 8:8) E reino di Huda no ta sin kulpa. Hoséas 12:2 [BPK] ta bisa: “SEÑOR tin un kaso kontra Huda tambe, e ta bai kastigá e pueblo di Yakob pa nan echonan, e ta laga nan paga pa loke nan a hasi.” Pero Dios lo restorá su pueblo, pasobra el a primintí: “Lo mi reskatá nan for di e poder di Seol; lo mi redimí nan for di morto.”—Oseas 13:14.
Kontesta Riba Pregunta Bíbliko:
6:1-3—Ken a bisa: “Ban, laga nos bolbe na SEÑOR”? Kisas e israelitanan infiel tabata animá otro pa bolbe bèk serka Yehova. Si esei ta e kaso, nan simplemente a fingi ku nan a repentí. Nan bondat amoroso no a dura largu i tabata algu pasahero manera “un nubia di mainta, i manera serena ku ta disparsé trempan.” (Oseas 6:4) Òf kisas e persona ku a ekspresá e palabranan ei tabata Oseas ku a roga e pueblo pa bin bèk serka Yehova. Sea kual sea e kaso, e habitantenan rebelde di e reino di dies tribu di Israel mester a desplegá berdadero arepentimentu i realmente bolbe bèk serka Yehova.
7:4—Den ki sentido e israelitanan adúltero tabata manera “un fòrnu keintá”? E komparashon aki ta mustra klaramente kon fuerte e mal deseonan di nan kurason tabata.
Lès pa Nos:
4:1, 6. Si nos ke Yehova su aprobashon, nos mester sigui atkerí konosementu di dje i biba na armonia ku loke nos ta siña.
4:9-13. Yehova lo pidi kuenta i lo kastigá hende ku ta praktiká inmoralidat seksual i ta partisipá den adorashon impuru.—Oseas 1:4.
5:1. Hòmbernan ku ta hiba delantera den Dios su pueblo mester rechasá apostasia totalmente. Si nan no hasi esei, nan lo por sedusí algun hende pa praktiká idolatria, i di e manera ei bira ‘un trampa i un reda’ pa nan.
6:1-4; 7:14, 16. Arepentimentu ku palabra so ta hipokresia i ta inútil. Pa Dios mustra miserikòrdia na un malbado, e mester mustra ku el a repentí di kurason dor di bolbe na e adorashon di e Haltísimo. Su akshonnan mester ta na armonia ku Dios su normanan haltu.—Oseas 7:16.
6:6. Un hende ku ta praktiká piká, no tin amor leal pa Dios. Ni maske kuantu sakrifisio un hende hasi den su sirbishi na Dios, esei no ta kompensá e defisiensia aki.
8:7, 13; 10:13. E prinsipio ku “loke un hende sembra, esaki tambe e lo kosechá” a resultá di ta sierto den kaso di e israelitanan idólatra.—Galationan 6:7.
8:8; 9:17; 13:16. E profesianan tokante e reino di nort a kumpli ora su kapital, Samaria, a keda kapturá pa Asiria. (2 Reinan 17:3-6) Nos por tin konfiansa ku Dios lo hasi loke el a bisa i kumpli ku loke el a papia.—Numbernan 23:19.
8:14. Yehova a manda “kandela riba [Huda] su statnan” na aña 607 promé ku nos era pa medio di e babilonionan, i di e forma ei a desolá Yerusalèm i e tera di Huda manera el a predisí. (2 Krónikanan 36:19) Nunka Dios su palabra ta faya.—Josué 23:14.
9:10. Maske e israelitanan tabata dediká na e Dios berdadero, nan “a bin na Baal-peor i a dediká nan mes na e ídolo bergonsoso ei.” Ta sabi di nos parti pa hasi kaso di e spièrtamentu ku nos ta haña for di nan mal ehèmpel i vigilá pa nos no keda sin kumpli ku nos dedikashon na Yehova.—1 Korintionan 10:11.
10:1, 2, 12. Nos mester adorá Dios ku un kurason sin hipokresia. Ora ‘nos sembra den hustisia, nos ta kosechá den Dios su bondat amoroso.’
10:5. A usa e nòmber Bèt-aven (ku ta nifiká Kas di Loke Ta Perhudisial) pa difamá Bètel (ku ta nifiká Kas di Dios). Ora a hiba e bisé di Bèt-aven den eksilio, residentenan di Samaria a yora p’e echo ku nan a pèrdè nan opheto di deboshon. Esta un bobedat pa pone konfiansa den un imágen sin bida ku no por protehá ni su mes!—Salmo 135:15-18; Jeremias 10:3-5.
11:1-4. Yehova semper ta trata su pueblo ku amor. Pues, nunka nos lo no sinti nos oprimí ora nos ta sumiso na Dios.
11:8-11; 13:14. Yehova su palabra pa restorá su pueblo bèk na adorashon berdadero ‘no a bolbe bashí serka dje.’ (Isaias 55:11) Na 537 promé ku nos era, e eksilio babilóniko a terminá i un restu a bolbe Yerusalèm. (Esdras 2:1; 3:1-3) Tur loke Yehova a bisa mediante su profetanan lo sosodé sin falta.
12:6. Nos mester ta firmemente determiná pa desplegá miserikòrdia [“bondat amoroso,” NW], hasi hustisia i spera kontinuamente riba Yehova.
13:6. E israelitanan a keda satisfecho i “siendo satisfecho, nan kurason a bira orguyoso; p’esei nan a lubidá [Yehova].” Nos mester ta alerta pa kualke tendensia pa halsa nos mes.
“E KAMINDANAN DI SEÑOR TA REKTO”
Oseas ta roga: “Bolbe, o Israel, serka SEÑOR bo Dios, pasobra bo a trompeká pa motibu di bo inikidat.” E ta urgi e pueblo pa bisa Yehova: “Kita tur inikidat, i risibí nos ku grasia, pa nos presentá e fruta di nos lepnan.”—Oseas 14:1, 2.
Un malechor arepentí mester aserká Yehova, aseptá su kamindanan i ofresé sakrifisio di alabansa. Dikon? Pasobra “e kamindanan di SEÑOR ta rekto, i e hustu lo kana den nan.” (Oseas 14:9) Esta kontentu nos ta ku hopi hende ainda siguramente “lo bin na temblamentu na SEÑOR i na su bondat den e último dianan”!—Oseas 3:5.
[Plachi na página 9]
Oseas su bida di famia a simbolisá Yehova su trato ku Israel
[Plachi na página 11]
Ora Samaria a kai na 740 promé ku nos era, e reino di dies tribu di Israel a stòp di eksistí