Skucha e Bos di Bo Konsenshi

‘Hende di e nashonnan, kendenan no tin Dios su lei di naturalesa ta hasi e kosnan di lei.’—ROMANONAN 2:14.

1, 2. (a) Kiko hopi hende a hasi debí na nan interes den otro hende? (b) Menshoná algun ehèmpel bíbliko den kua hende a mustra interes pa otro hende.

UN HÒMBER di 20 aña ku tabata pará na e stashon di metro a haña un atake di epilepsia i a kai riba e railnan. Un mener ku a mira loke a sosodé, a laga man di su yu muhénan bai i a bula abou. El a pusha e hòmber epiléptiko den e buraku meimei di e railnan, i a proteh’é di tal manera pa e trein ku a pasa riba nan lastrando su brek pa para, no plècha nan. Tin hende lo yam’é un héroe, pero e hòmber a bisa: “Bo tin ku hasi loke bo tin ku hasi. Mi a hasié komo un akto di bondat i no pa haña rekonosementu ni gloria.”

² Kisas bo konosé un hende ku a riska su bida pa yuda otro hende. Durante Segundo Guera Mundial hopi hende a hasi esei ora nan a skonde hende ku nan no konosé. Kòrda tambe riba e eksperensia di apòstel Pablo i 275 otro hende ku a noufragá riba e isla di Malta, serka di Sisilia. E habitantenan a yuda e stranheronan ei dor di trata nan ku “kariño [“bondat,” NW] eksepshonal.” (Echonan 27:27–28:2) I kiko di e mucha muhé israelita ku kisas no a riska su bida, pero kende a mustra interes bondadoso den e bienestar di un di su doñonan sirio? (2 Reinan 5:1-4) I pensa riba Hesus su komparashon bon konosí di e samaritano ku a yuda su próhimo. Un saserdote i un levita no a wòri mes ku un otro hudiu ku tabata mitar morto. Sin embargo un samaritano sí a hasi tur su posibel pa yud’é. Atraves di siglonan e komparashon aki a touch kurason di hende di vários kultura.—Lukas 10:29-37.

3, 4. Kiko e echo ku hopi hende ta altruista, ta yuda nos komprondé enkuanto e teoria di evolushon?

³ Ta bèrdat, nos ta bibando den “tempunan trabahoso”; hopi hende ta “violento” [BPK] i “odiadó di loke ta bon.” (2 Timoteo 3:1-3) Apesar di esei, no ta asina ku nos a mira aktonan di bon boluntat, i kisas nos mes ta benefisiando di e aktonan ei? E tendensia pa yuda otro hende, asta si esei ta nifiká hasi sakrifisio personal, ta asina komun ku algun hende ta konsider’é komo parti di “naturalesa humano.”

⁴ E echo ku den tur rasa i kultura hende ta dispuesto pa yuda otronan asta si nan tin ku hasi sakrifisio personal, ta kontradisí e idea ku hende a evolushoná segun e lei di selva: “Esun di mas fuerte ta sobrebibí.” Francis S. Collins, un eksperto den genétika, kende a enkabesá un proyekto di gobièrnu merikano pa purba desifrá e sèt di genenan humano (DNA), a bisa: “Altruismo [amor sin egoismo] ta krea un problema grandi pa evolushonistanan. . . . Si nos ta programá pa ta egoista, e ora ei no ta posibel pa splika altruismo.” Tambe el a bisa: “Tin hende ta duna generosamente di nan mes na esnan ku no ta di nan grupo [sírkulo di famia, grupo rasial, religioso, etcetera] i ku kende nan no tin apsolutamente nada en komun. . . . Ta parse ku hende no por splika e komportashon ei ku e teoria di Darwin.”

“E Bos di Nos Konsenshi”

5. Kiko hopi bes nos ta nota den hende?

⁵ Dr. Collins ta hala atenshon na un aspekto di nos altruismo: “E bos di nos konsenshi ta  bisa nos pa yuda otro hende maske nos no haña nada bèk.” * E palabra “konsenshi” ku e ta menshoná, por hasi nos kòrda riba algu ku apòstel Pablo a enfatisá: ‘Ora hende di e nashonnan, kendenan no tin lei, di naturalesa ta hasi e kosnan di lei, esakinan, ounke nan no tin lei, ta un lei pa nan mes, dor ku nan ta mustra e obra di lei ku ta skirbí den nan kurason, nan konsenshi dunando testimonio, i nan pensamentunan akusando òf defendiendo nan.’—Romanonan 2:14, 15.

6. Dikon tur hende tin ku duna kuenta na e Kreadó?

⁶ Den su karta na e romanonan, Pablo ta mustra ku hende tin ku duna kuenta na Dios pasobra e loke hende ta mira rònt di nan ta duna evidensia di Dios su eksistensia i su kualidatnan. Esei ta e kaso “desde kreashon di mundu.” (Romanonan 1:18-20; Salmo 19:1-4) Ta bèrdat ku hopi hende ta ignorá nan Kreadó i ta hiba un bida moralmente malu. Sin embargo, ta Dios su boluntat pa hende rekonosé Su hustisia i arepentí di kosnan malu ku nan a hasi. (Romanonan 1:22–2:6) E hudiunan tabatin un motibu masha fuerte pa hasi esei: nan a haña e Lei di Dios mediante Moisés. Pero asta hende ku no tabatin e “palabra di Dios” mester a rekonosé ku Dios ta eksistí.—Romanonan 2:8-13; 3:2.

7, 8. Kon komun e sentido di hustisia ta, i kiko esei ta indiká?

⁷ Un motibu fuerte pakiko tur hende mester rekonosé ku Dios ta eksistí i aktua di akuerdo ku esei ta e echo ku nan tin un sentido interno di bon i malu. Nos sentido di hustisia ta indiká ku nos tin un konsenshi. Imaginá lo siguiente: Un par di mucha chikí ta warda riba nan turno pa skòmel. Un mucha ta pasa nan dilanti i ta ignorá esnan ku ta warda. Hopi di nan ta bis’é: ‘Ei, no t’abo ta na bùrt!’ Awor, puntra bo mes: ‘Kon ta posibel ku asta mucha tin un sentido di hustisia?’ Nan reakshon ta reflehá ku nan tin un sentido moral interno. Pablo a skirbi: ‘Ora hende di e nashonnan, kendenan no tin lei, di naturalesa ta hasi e kosnan di lei.’ E no a bisa, “Si kualke dia,” komo si fuera tabata algu ku ta sosodé masha poko bes. El a bisa “ora,” es desir “ki ora ku.” Pues, tabata algu ku ta sosodé ku frekuensia. Esta ku hende “di naturalesa ta hasi e kosnan di lei,” lokual ta nifiká ku nan sentido moral interno ta konmové nan pa aktua na armonia ku loke nos ta lesa den Dios su lei skirbí.

⁸ Por mira e inklinashon moral aki den hopi pais. Un profèser di Cambridge a skirbi ku tantu e normanan di e babilonionan, egipsionan i griegonan komo di e aborígennan oustraliano i indjannan merikano a inkluí “denunsiashon kontra opreshon, asesinato, traishon i falsedat, e mesun normanan di bondat pa ku hende di edat, hóbennan i esnan débil.” I Dr. Collins a skirbi: “E konsepto di bon i malu ta parse di ta universal entre tur esnan ku ta pertenesé na e rasa humano.” Esei no ta pone bo kòrda riba Romanonan 2:14?

Kon Bo Konsenshi Ta Traha?

9. Kiko e konsenshi ta, i kon e por yuda bo promé ku bo aktua?

⁹ Beibel ta mustra ku e konsenshi ta e kapasidat di mira bo akshonnan i di evaluá nan. Ta komo si fuera un stèm den bo ta bisa bo ku loke bo kier hasi ta bon òf malu. Pablo a papia di su bos interno ora el a bisa: “Mi konsenshi ta konfirmá esaki den spiritu santu.” (Romanonan 9:1) Por ehèmpel, e bos aki por papia ku bo promé ku bo disidí di hasi algu ku ta bon òf malu. Bo konsenshi por yuda bo evaluá algu ku bo kier hasi i bisa bo kon lo bo sinti si bo hasié.

10. Ki ora e konsenshi ta reakshoná hopi bes?

¹⁰ Pero hopi biaha bo konsenshi ta reakshoná  despues ku bo hasi algu. Ora David tabata hui for di Rei Saul, David a hañ’é den un situashon kaminda e por a hasi algu ku a mustra falta di rèspèt pa e rei ungi di Dios, i el a hasié tambe. Pero despues, David “su kurason a kuminsá bati.” (1 Samuel 24:1-5, BPK; Salmo 32:3, 5) Den e relato aki no a usa e palabra “konsenshi”; sin embargo loke David a sinti ta e reakshon di su konsenshi. Nos tambe a yega di sinti remordimentu di konsenshi. Nos a hasi algu, anto despues nos a sinti nos malu, preokupá tokante e manera ku nos a aktua. Tin hende ku nan konsenshi a molestia nan asina tantu ora nan no a paga belasting ku despues nan a bai pag’é tòg. Otronan ku a kometé adulterio a sinti ku nan tin ku konfesá nan piká na nan kasá. (Hebreonan 13:4) Sin embargo ora un hende hasi kaso di su konsenshi, e por sinti un alivio i pas mental.

11. Pakiko por ta peligroso pa djis ‘laga bo konsenshi guia bo’? Duna un ehèmpel.

¹¹ Pues nos por djis ‘laga nos konsenshi guia nos’? Wèl, ta bon pa skucha nos konsenshi, pero su mensahe por ta kompletamente robes. Sí, nos bos “interior” por faya. (2 Korintionan 4:16) Ban wak un ehèmpel. Beibel ta konta nos di Esteban, un siguidó deboto di Kristu ‘yen di fabor i poder.’ Algun hudiu a benta Esteban pafó di Yerusalèm i a piedr’é mata. Saulo (kende despues a bira apòstel Pablo) tabata pará ei banda i ‘a konsentí ku e morto di Esteban.’ Ta parse ku e hudiunan ei tabata asina konvensí ku loke nan a hasi tabata bon, ku nan konsenshi no a molestia nan. Den e kaso di Saulo tambe tabata asina, pasobra despues di esei “ainda [e tabata] yen di menasa i gustu pa mata e disipelnan di Señor.” Pues, ta bisto ku su konsenshi no a bis’é loke ta korekto.—Echonan 6:8; 7:57–8:1; 9:1.

12. Kiko ta un di e kosnan ku por influensiá nos konsenshi?

¹² Kiko lo por a afektá Saulo su konsenshi? Un kos ku por a influensi’é tabata su asosiashon estrecho ku otro hende. Hopi di nos a yega di papia na telefòn ku un yu hòmber kende su stèm ta zona kasi meskos ku esun di su tata. Te na sierto grado, kisas e yu a heredá e tono di bos di su tata, pero ta posibel tambe ku e manera di papia di e tata a influensiá e yu su manera di papia. Asina tambe, kisas e asosiashon estrecho ku Saulo tabatin ku e hudiunan ku tabata odia Hesus i tabata opon’é su siñansanan, a influensi’é. (Juan 11:47-50; 18:14; Echonan 5:27, 28, 33) Sí, e amigunan di Saulo kisas a influensiá su bos interno, esta su konsenshi.

13. Kon e ambiente ku un hende ta biba aden por influensiá su konsenshi?

¹³ Tambe e kultura òf ambiente ku un hende ta bida aden por influensiá su konsenshi; meskos ku un hende su ambiente por pon’é papia ku un aksènt òf den un dialekto. (Mateo 26:73) Probablemente esei a sosodé ku e asirionan di antigwedat. Nan tabata konosí pa nan militarismo, i nan eskulturanan di relieve ta mustra kon nan tabata torturá nan prizoneronan. (Nahum 2:11, 12; 3:1) Un deskripshon di e ninivitanan di e tempu di Jonas a mustra ku nan no tabata “sa e diferensia entre nan man drechi i man robes.” Es desir, nan no tabatin un norma pa yuda nan husga kiko ta apropiá òf inapropiá for di Dios su punto di bista. Bo por imaginá bo kon un ambiente asina lo por a afektá e konsenshi di un hende ku a lanta na Nínive! (Jonas 3:4, 5; 4:11) Di mes manera, awendia e konsenshi di un hende por wòrdu afektá pa e aktitut di otro hende rònt di dje.

Kon Nos Por Mehorá Nos Konsenshi?

14. Kon nos konsenshi ta reflehá loke Génesis 1:27 ta bisa?

¹⁴ Yehova a duna Adam ku Eva e don di konsenshi, i nos a heredá nos konsenshi for di nan. Génesis 1:27 ta bisa nos ku hende ta kreá segun e imágen di Dios. Esei no ta den un sentido físiko, pasobra Dios ta un spiritu i nos ta di karni i wesu. Nos ta kreá den e imágen di Dios pasobra nos tin su kualidatnan, inkluso un sentido moral, un konsenshi ku ta funshoná.  E echo aki ta indiká ku tin un manera ku nos por fortalesé nos konsenshi i hasié mas konfiabel. Nos por hasi esei ora nos ta siña mas tokante e Kreadó, i hala serka dje.

15. Kua ta un benefisio ku nos por saka ora nos a siña konosé nos Tata?

¹⁵ Beibel ta mustra ku den un sentido Yehova ta un Tata pa nos tur. (Isaias 64:8) Ora kristiannan fiel ta akudí na Dios nan por yam’é Tata; sea ku nan tin speransa pa biba den shelu òf den paradeis riba tera. (Mateo 6:9) Nos mester deseá di hala mas serka di nos Tata i pa logra esei nos tin ku siña kiko ta su punto di bista i su normanan. (Santiago 4:8) Hopi hende no ta interesá pa hasi esei. Nan ta manera e hudiunan na ken Hesus a bisa: “Boso no a tende su bos nunka, ni a mira su forma. I boso no tin su palabra ta biba den boso.” (Juan 5:37, 38) Nos tampoko no a tende Dios su bos, sin embargo nos por tin su palabra den nos i di e manera ei nos por imit’é i sinti loke e ta sinti.

16. Kon e relato di Hosé ta mustra ku ta masha importante pa entrená i hasi kaso di nos konsenshi?

¹⁶ E relato tokante Hosé den Potifar su kas ta mustra esei. E esposa di Potifar a purba sedusí Hosé. Maske e tabata biba den un tempu ku ningun buki di Beibel tabata skirbí ainda ni nan no tabatin e Dies Mandamentunan, tòg Hosé a reakshoná bisando: “Kon anto mi por hasi e maldat grandi aki i peka kontra Dios?” (Génesis 39:9) E no a reakshoná asina djis pa komplasé su famia ya ku nan tabata biba leu. E motibu prinsipal ta ku e tabata ke agradá Dios. Hosé tabata sa kiko ta Dios su norma pa matrimonio: un hende hòmber pa un hende muhé, i nan dos huntu ta forma “ún karni.” I kasi sigur el a tende kon Abimelek a sintié ora el a haña sa ku Rebeka tabata kasá; ku ta malu pa un otro hòmber tum’é pasobra esei lo a trese kastigu riba su pueblo. I Yehova a bendishoná nan den e kaso aki, lokual a mustra kon e ta mira adulterio. E echo ku Hosé tabata sa tur esei  probablemente a hasi su konsenshi heredá mas sensitivo, i a motiv’é pa rechasá inmoralidat seksual.—Génesis 2:24; 12:17-19; 20:1-18; 26:7-14.

17. Dikon nos ta den un mihó posishon ku Hosé ora nos ta purba imitá nos Tata?

¹⁷ Ta bèrdat ku nos ta den un mihó posishon awor. Nos tin henter e Beibel ku ta siña nos e pensamentu- i sintimentunan di nos Tata, entre otro loke e ta aprobá i loke e ta prohibí. Mas mihó nos konosé e Skritura, mas serka di Dios nos por hala i imit’é. Ora nos hasi esei, nos konsenshi lo bira mas sensitivo i lo kuadra mas ku e pensamentunan di nos Tata. E bos di nos konsenshi lo ta mas i mas na armonia ku Dios su boluntat.—Efesionan 5:1-5.

18. Apesar di posibel influensianan di pasado, kiko nos por hasi pa nos konsenshi ta mas konfiabel?

¹⁸ Kiko di e ambiente rònt di nos ku ta moldia nos konsenshi? Kisas nos famia i e ambiente en general den kua nos a lanta a influensiá nos pensamentu i akshonnan. Pues, e mensahe ku nos konsenshi ta duna nos kisas ta trosí òf e ta asina vago ku nos no por tende mes kiko e ta bisa nos. Ta komo si fuera e ta papia ku e “aksènt” di otro hende rònt di nos. Ta bèrdat, nos no por kambia nos pasado; pero nos por ta determiná pa skohe asosiashon i un ambiente ku lo tin un bon efekto riba nos konsenshi. Un paso importante ta pa asosiá regularmente ku kristiannan deboto ku pa hopi tempu a purba di ta manera nan Tata selestial. Reunionnan di kongregashon, entre otro asosiashon promé i despues di reunion, ta duna nos un ekselente oportunidat pa hasi esei. Nos por opservá kon kompañeronan kristian ta pensa i reakshoná a base di nan konsenshi bíblikamente entrená, entre otro kon lihé nan ta skucha e bos di nan konsenshi ku ta reflehá Dios su punto di bista i manera di aktua. Ku tempu, esaki por yuda nos armonisá nos konsenshi ku prinsipio bíbliko, i debí na esei nos ta reflehá Dios su imágen mas mihó. Si nos ahustá e bos di nos konsenshi na armonia ku e prinsipionan di nos Tata i laga e bon influensia di kristiannan den fe moldia nos, nos konsenshi lo ta mas konfiabel i nos lo ta mas inkliná pa skucha loke e ta bisa.— Isaias 30:21.

19. Ki aspektonan di e konsenshi meresé nos atenshon ainda?

¹⁹ Tòg, algun hende ketu bai tin un lucha pa hasi kaso di nan konsenshi. E siguiente artíkulo lo trata algun situashon ku kristiannan ta enfrentá. Ora nos eksaminá nan, nos por mira e ròl di e konsenshi mas mihó, dikon kada konsenshi ta diferente i kon nos por hasi kaso di nos konsenshi asta mas ainda.—Hebreonan 6:11, 12.

[Nota]

Kiko Bo A Siña?

• Dikon tin un sentido di bon i malu òf konsenshi, den hende di tur kultura?

• Pakiko nos no por djis laga nos konsenshi guia nos?

• Kua ta algun manera ku nos por mehorá e bos di nos konsenshi?

[Preguntanan di Estudio]

[Plachinan na página 15]

David a sinti remordimentu di konsenshi . . .

pero Saulo di Tarso sí no

[Plachi na página 16]

Nos por entrená nos konsenshi