Na aña 1985, mi tabatin 10 aña ora ku mi skol na Columbus (Ohio, Merka) a kuminsá haña masha hopi mucha for di Cambodja. Un di e muchanan tabata sa un par di palabra na ingles. Via di plachi ku el a pinta, el a konta mi di kosnan horibel ku tabata pasa na su pais. Por ehèmpel, el a konta kon nan tabata torturá i mata hende einan i kon hopi hende mester a hui bai pa skapa nan bida. Mi kier a konta e muchanan tokante e speransa di Paradeis i e resurekshon, pero nan no tabata komprondé mi idioma. Aunke mi tabata un mucha, m’a disidí di siña e idioma kambodjano pa mi por a papia ku e muchanan di mi skol tokante Yehova. Mi no a realisá e tempu ei kon e desishon akí lo a forma mi futuro.

No tabata fásil pa siña kambodjano. Dos biaha mi a disidí ku mi ta legumai di siña e idioma, pero Yehova a usa mi mayornan pa animá mi. Ku tempu, e maestronan i muchanan di mi skol a kuminsá pone preshon riba mi pa mi sigui un karera ku lo a paga bon. Pero ami kier a traha pionero, pues mi a skohe kursonan na skol ku lo a yuda mi haña trabou partaim pa logra mi meta. Despues di skol, mi tabata bai den sirbishi ku algun pionero. Tambe mi tabata duna beilès na muchanan ku kier a siña ingles. E desishon ei a yuda mi hopi despues.

Ora mi tabatin 16 aña, mi a tende ku na Long ­Beach, California, tabatin un grupo di idioma kambodjano. Mi a bai bishitá e grupo i a siña lesa kambodjano. Asina ku mi a kaba skol, mi a bira pionero i a sigui prediká na e hendenan di Cambodja pegá ku mi kas. Pa ora mi tabatin 18 aña, mi a kuminsá pensa pa bai biba na Cambodja. Ainda e tabata un pais peligroso, pero mi tabata sa tambe ku masha poko di e 10 mion hendenan ku tabata biba einan a yega di tende e bon notisia di e Reino. E tempu ei tabatin un kongregashon so di 13 publikadó den henter e pais. Ku 19 aña, mi a bishitá Cambodja pa promé biaha. Dos aña despues, mi a disidí di bai biba einan. Mi a haña trabou partaim komo traduktor i mi tabata duna lès di ingles pa mantené mi mes den sirbishi. Ku tempu, mi a kasa ku un mucha muhé ku tabatin e mesun metanan ku mi. Huntu nos a yuda hopi hende di Cambodja bira Testigu di Yehova.

Yehova a duna mi ‘e deseonan di mi kurason.’ (Sal. 37:4) E trabou ku ta duna hende e satisfakshon di mas grandi ta e trabou di hasi disipel. Durante e 16 añanan ku mi tin na Cambodja, e grupo chikitu di 13 sirbidó di Yehova a para bira 12 kongregashon i 4 grupo isolá!—Segun e relato di Jason Blackwell.